Lliteratura

A Veiga acueye esta fin de selmana’l primer ‘Encontro d’Escritores de Gallego-Asturiano’, organizáu pola Conseyería de Cultura del Principáu d’Asturies pa facer un alderique fondu sobre’l presente y el futuru de la narrativa y la llírica na fala. L’Encontro presentóse esti llunes n’A Veiga, nun actu que contó cola participación de la directora xeneral de Promoción Cultural y Política Llingüística, Consuelo Vega.

Les xornaes van inaugurase’l vienres 3, de tarde, con un actu en reconocencia al escritor tapiegu Manuel García-Galano. A continuación va tener llugar una conferencia a cargu del escritor Xosé Miguel Suárez Fernández, que va ofrecer un percorríu didáctiu pola historia de la lliteratura na ‘fala’ d’occidente y la xornada va finar cola actuación del grupu de música tradicional ‘Darbukka’, compuestu por mozos d’A Veiga y de la población llucense de Pontenova.

La editorial Trabe tien abiertu’l plazu pa presentase a la convocatoria del Premiu Montesín, al que han presentase llibros escritos n’asturianu ensin qu’importe’l xeneru(narrativa, poesía, teatru…) pero empobinaes pa rapazos. La dotación económica del premiu ye de 3.000 euros y amás, la editorial comprometese a la publicación de la obra ganadora.

Nel premiu puen participar toles persones interesaes, soles o en grupu, ensin llímite d’edá, con obres de lliteratura xuvenil en llingua asturiana, yá seyan noveles, recopilaciones de cuentos, poemes o obres de teatru. Los trabayos presentaos, a escepción de la poesía, nun tendrán menos de trenta páxines DIN A-4 o foliu mecanografiaes a doble espaciu per una sola llana (1.800 caracteres). Han ser ineditos y han tar ensin premiu n’otros concursos como conxuntu, quier dicise, puen presentase obres de les qu’apaecieren fragmentos publicaos.

El xuráu pue partir el premiu o conceder accesit, recomendar la publicación d’otres obres o dexalu desiertu según aconseye la calidá de los trabayos presentaos.

Les obres han mandase, per correu o en mano, en cuatro copies a Ediciones Trabe, S. L. U., c/ Padre Buenaventura de Paredes, 4, 33001 d’Uvieu, enantes de les 24 hores del día 30 de payares de 2008, faciendo constar la siguiente lleenda: “PREMIU MONTESÍN DE LLITERATURA XUVENIL 2008”, de dos xeitos: firmando col nome, dirección y telefonu o baxo plica, quier dicise, figurando dientro d¹un sobre zarráu los datos del autor y fuera¹l títulu de la obra presentada y l’alcuñu col que se presenta, d’habelu.

E xuráu tará formáu por persones relacionaes col ámbitu de la lliteratura asturiana. Como secretariu o secretaria, con voz pero ensin votu, actuará un representante d’Ediciones Trabe. Al fallu del xuráu nun se pue retrucar. Fadráse públicu enantes del día 31 de xineru de 2009. El xuráu queda autorizáu a abrir la plica de les obres premiaes y de les que recomiende pa publicar. Pal casu de les obres que nun reciban premiu económicu, Ediciones Trabe tien que se poner d’alcuerdu col autor o autores enantes d’entamar la so edición.

L’escritor José Luis Argüelles fadrá una llectura representativa de la so trayectoria poética, dientro de la estaya Voces y acentos de l’Arribada 2008. L’actu cellebraráse’l güei a les 19 hores. Argüelles ye periodista y trabaya en La Nueva España, y tien publicao los poemarios Cuelmo de sombras (1988) y Pasaje (2008).

Recién seleccionó les voces de la lírica asturiano recoyíes na esposición PALABRAS LIBRES. LA POESÍA EN ASTURIAS DESDE 1978, amás de facer los testos del catálogu.

Aurora García Rivas va presentar el so últimu poemariu, Trinquilintainas, nun actu onde tamién intervendrá la escritora Carmen Rueda y Miguel Rojo, güei a les cinco y media la tarde.

Sobre esti llibru diz la so autora “este é o segundo libro de poesía qu’escribo na miña lengua vernácula. Supoño que, aínda sin pretendelo, os meus paisaxes, os tópicos de sempre, a miña infancia e muito do meu presente, tan nel. Tampouco penso demáis neso ¿pra qué? O libro fala de dous tempos: o dos álamos (aqueles que cantaban ó aire do outono, erguidos como vixilantes da vida e dos días) y o dos cipreses (erguidos tamén, coa folla afilada todos os días do ano) agardando a qu’eu volva, como Ulises, a miña Ítaca”.

Aurora García Rivas tien publicao los títulos siguientes: O viaxeiro da noite, Trabe, 2004; La tierra vertical, Atenéu Obreru de Xixón, Colección Deva, 2005; Contos, ducia e media d’eles, Trabe, 2007; La sombra del alcaudón (Premio Ateneo Jovellanos de Poesía de 2006), Vitruvio, 2007, y Cinco contos pra xogar coa música, Trabe, 2007 (que tamién presentará nesta Arribada). Ye la coordinadora de la antoloxía Na boca de todos, pulicada pol Ayuntamientu d’A Veiga.

Güei, vienres 19 de setiembre va celebrase la penúltima xornada de l’Arribada 2008. A les 16:30 Faustino Zapico va presentar “El nacimientu d’una nación: Historia de Sudáfrica”. Media hora más tarde Xavier Frías Conde va recuperar la obra “Nel país de la borrina (Poesía Galesa contemporánea) y yá a les 17:30 el protagonismu va ser pa los llibros d’Aurora García Rivas.

Adolfo Camilo Díaz va presentar, a les seis de la tarde, la novela Khaos y Cristina Muñiz va facer lo propio, a les seis y media, con Kárias, la so primer novela.

José Luis Argüelles va protagonizar les “Voces y acentos” d’esti añu a les siete y media hora más tarde, va celebrase’l visionáu de la película Frankestein, de 1910 y Nosferatu, Una sinfonía del Espantu, de 1922.

A les nueve y media, el Pub Oremus de Xixón, va acoyer la cabera actividá del día, una una tertulia sobre “cinema, lliteratura, monstruos y vampiros” cola intervención d’Illán Gonzali, Berto Peña, Chus Parrado y Pablo Rodríguez Medina.

El sábadu va ser el día final d’actividaes y va entamar a les 10:45 hores cola reproducción de “Los meyores del mundiu: Lleendes de Bataman y Superman”, sotitulaos n’asturianu.

A les 11, Juan Carlos Casimiro, periodista y escritor, va presentar el llibru “El viento que nos lleva”.

La mañana va siguir cola ponencia de Fe-Santoveña “Desmitificando’l matriarcáu na Asturies tradicional”, que va siguir con una tertulia sobre la tema, onde van participar la propia autora, David M. Rivas, Xosé Nel Riesgo y Mª Esther García.

A la una Félix Ferreiro va facer una comunicación sobre’l Premiu Fernán-Coronas, y darréu va presentase la obra “Manual contra’l vaciu”, de Berto García, y ganadora d’esti premiu en 2007.

Pablo Texón va recitar a les 16:30 p’abrir les actividaes de tarde y a les 17 hores van presentase les novedaes del Ateneo Jovellanos de Xixón.

El grupu “La Corexa” va facer una amuesa d’indumentaria tradicional asturiana a les cinco y media la tarde.

A les siete van producise les actividaes finales de l’Arribada 2008, la entrega del II Premiu Timón, la celebración del II Festival de Poesía, con poemes de Lourdes Álvarez, Xuan Bello, Ignaciu Llope, Roberto González-Quevedo, Ángel González, Alfredo Álvarez de Ponticiella y María José Fraga.

L’actu final va ser un conciertu que va dar a les ocho la tarde’l músicu Daniel García de la Cuesta.

El día va entamar a les 16:30 hores cola presentación del llibru “Mitos de Xixón”, d’Alberto Álvarez Peña. Darréu va presentase la Tercer Antoloxía de Cuentos Curtios d’El Garrapiellu, qu’apaecía nel programa del añu pasáu y nun pudo ser presentada a la fin. A les cinco y media Suburbia Ediciones va presentar l’antoloxía de cuentos “Asturies cuenta… (…y naide nun escucha…)”. Pablo Xuan Manzano va presentar, a les seis, “Testos n’asturianu na revista Asturias de Buenos Aires”.

La segunda metá de la tarde va dedicase a l’alcordanza cola presentación de la obra de Luciano Castañón “Escritos Gijoneses”, por Milio Rodríguez Cueto y la conferencia La lliteratura asturiana vista por Luciano Castañón”, que va dictar Xosé Lluis Campal.

La revista Orbayando que s’asoleyó dellos años va agora venti años, va ser motivu pa una tertulia “Una revistas y una época”, con Xicu Monteserín, Juan Bonifacio, Lorenzo Benavente, Humberto Gonzali, Ignaciu Llope y Antón García.

La tarde piésllala’l dúu “Andrés y Llorián” a les ocho y media .

L’Arribada 2008 llega güei a la so xornada cuarta y va facelo cola presentación del “Refraneru temáticu asturianu” de Xandru Fernández a les cinco la tarde, la presentación del llibru “Con tastu a sidra”, de Lluis Nel Estrada a les cinco y media, y el llibru de cuentos completos d’Eva González, pol so fíu Roberto González-Quevedo, secretariu de l’Academia de la Llingua Asturiana y escritor.

Amás, van presentase de 18:30 a 20 hores, los llibros, “Pisadas” de Mª Esther García, “Ferruñu y “Los meyores cuentos del mundu…” de José Luis Rendueles y “La fábrica de lluz” de Xuan Santori.

A les ocho y media la tarde Pablo Rodríguez Alonso y Armando Vega van facer una llectura de poesía galesa.

El pieslle del día va ponelu Milio’l del Nido coles sos hestories y cuentacuentos.

L’escritor asturianu ganó esti gallardón al que se presentaron 102 orixinales cola obra “Los últimos días de Michi Panero”. El premiu, convocáu pol Ayuntamientu de Mérida, fallóse estos díes nuna gala celebrada nel Teatru Romanu de Mérida. Ta dotáu con 24.000 euros.

Barrro (Uviéu, 1980) ye autor de les noveles en castellán “Espejo” y “La vuelta a casa”, collabora en revistes como “Eventual” o “El Norte de los Libros” y anguaño trabaya como redactor nel selmanariu Les Noticies, siendo coordinador de la revista cultural El Súmmum y columnista d’El Comercio.

Según informó l’Arribada, a seis díes andaos del mes de setiembre, aconceyara’l xuráu del Premiu Timón 2008 na ciudá de Xixón, y tando formáu por David M. Rivas, Roberto Colunga, Milio Rodríguez Cueto, Humberto Gonzali, Aurora García Rivas, Xosé Nel Riesgo Fernández, María Teresa González Cobos ya Illán Gonzali alcordó, por unanimidá, otorga-y el gallardón correspondiente a la edición d’esti añu, en virtú del valir de la so trayectoria lliteraria, a D. Xuan Xosé Sánchez Vicente.

El Premiu consiste nuna pintura-cerámica del escultor xixonés Jesús Castañón, y la entrega de so fadráse’l prósimu sábadu, 20 de setiembre, a les 19:00 hores, nel Salón d’Actos del CC Antiguu Institutu de Xixón, en dientro los actos de l’Arribada.

L’añu pasáu ganó’l gallardón la escritora valdesana Nené Losada Rico.

Güei domingu la terce xornada va celebrase de mañana y va entamar con dos presentaciones, la del Atles Sonoru de la Llngua Asturiana a les 11 la mañana y cola presencia de Fernando Ornosa y Jesús Suárez López y a les once y media, la presentación del “Diccionario Toponímico del Concejo de Gijón”, de Ramón d’Andrés.

A les doce Neto va presentar la recopilación de tires cómiques “Na punta la llingua” y al es doce y media David Guardado va presentar la obra “Llingua estandar y normalización llingüística”, asoleyada por Araz Llibros.

A la una va fallase’l premiu Timón, que l’añu pasáu foi a parar a manes de la escritora valdesana Nené Losada, y un cuartu d’hora más tarde, va producise l’actuación del grupu “A la gueta la runa”. Les actividaes van tornar na tarde del llunes y hasta’l sábadu siguente.