Lliteratura

Güei, miércoles 15 d’ochobre, a les ocho la tarde, el chigre uviedín El Posafuelles, va presentase l’antoloxía narrativa y temática “Asturies cuenta… (y naide nun escucha)”, asoleyáu por Suburbia.

Nel volume apaecen testos de Xuan Bello, Xandru Fernández, Adolfo Camilo Díaz, Naciu Varillas, Vanessa Gutierrez, Ramón Lluis Bande, Pablo Texón, Pablo X. Suárez, Francisco Álvarez, Xulio Arbesú, Miguel Rojo, Carlos Suari, Sergio Gutierrez Camblor, Iris Díaz Trancho y Xosé Mª Rodríguez de Bimenda. El prólogu ta firmáu pola editora, Silvia Cosío.

Suburbia Ediciones tien nel mercáu una nueva antoloxía de rellatos

L’alcalde de Mieres, Luis María García, y la conceyala de Cultura, Diana González, van entrega-yos esta tarde’l Premiu de Poesía Teodoro Cuesta a los escritores Miguel Allende y Héctor Pérez Iglesias. L’actu va celebrase na sala de xuntes de la Casa Conceyu de Mieres a la una la tarde.

El premiu que ta dotáu con 4.000 euros tien una llarga trayectoria y n’estos años ganáronlu los siguientes escritores:

1991 Vida Privada, de Berta Piñán.

1992 Mares d’añil, de Lourdes Álvarez y Cuadernu de Candem Town, de Alfonso Velázquez.

1993 El llibru vieyu, de Xuan Bello.

1994 Como aquella que yeres, de Lourdes Álvarez.

1995 Venti poemes, d’Antón García.

1996 Les coraes de la roca, de Chechu García y Martín López-Vega.

1997 Otra edá, de Pablo Antón Marín Estrada.

1998 La mala suerte, d’Esther Prieto.

1999 Les inconveniencies de la especie, de Xuan Santori.

2000 Pequeña Europa, de Xabiero Cayarga.

2001 Na mesma piedra, d’Ánxel Álvarez Llano.

2002 Pórticu, de Marta Mori.

2003 La danza de la yedra, de Vanessa Gutiérrez.

2004 Tiempu de la espera, de Marta Mori, y Países, de Xelu Gutiérrez Morán.

2005 La lluz del nordés, de Pablo Rodríguez Alonso.

2006 Pablo Texón y Pablo Rodríguez Medina.

2007 Miguel Allende y Héctor Pérez Iglesias.

La recién creada Editorial Universos, coordinada pol escritor Pablo Rodríguez Medina ta acabante d’espublizar “Robinson Astur”, el segundu llibru de poemes d’esti collaborador de revistes como Lliteratura y Lletres Asturianes.

Elías Veiga dase a conocer na poesía asturiana col volume «La tierra fonda», asoleyáu por Trabe en 2004, Amás apaez n’antoloxíes como «Palabres clares», «Escritores en Llanes», «Na boca de todos» o «Al aldu».

La revista Trabatel, revista eonaviega de lliteratura, presentóse’l pasáu sábadu 4 d’ochobre na Casa Cultura d’A Veiga, onde se celebró’l I Encontro d’escritores en gallego-asturianu. Esta revista quier ser un espaciu abiertu añalmente pa los escritores en gallego-asturianu, tanto pa los que yá publicaron como pa la xente más mozo que ta entamando. Esti primer númberu de Trabatel pue consiguise agora de baldre pidiéndolu na dirección opll@princast.es o descarándolu na versión PDF.

Descarga’l primer númberu de la revista Trabatel

La publicación presentóse dientro del I Encontro d’Escritores en Gallego-Asturiano y quier sirvir pa difundir les lletres escrites “en cualquera das variedades gallego-asturianas que se dan nel Navia-Eo”. La revista, que tien por nome “Trabatel” , ta coordinada pol poeta y filólogu Xosé Miguel Suárez Fernández y diseñada pola editorial Ámbitu.

Esti númberu primeru que’l coordinador abre como “úa ventana pr’asomáremonos a os carpinteiros que trabayan a palabra, esos homes y muyeres qu’anecían en erguer, pedra a pedra, úa lliteratura en gallego-asturiano”, cunta con testos d’Ágata García, Aurora García Rivas, Xosé Miguel Suárez Fernández, Moncho Martínez Castro, Manuel García Galano, Miguel Rodríguez Monteavaro y Belén Rico Prieto, amás d’unes reseñes de la producción lliteraria en gallego-asturianu del añu 2007.

L’Asociación d’Escritores d’Asturies dio anuncia de los premiaos na tercer edición de los “Premios de la crítica d’Asturies”, que se dan pa les obres espublizaes n’asturinau y en castellán. Amás, la organización concedió al escritor en castellán Luís Fernández Roces el “III Premiu de les lletres asturianes”.

Los premios d’esti añu teníen por oxetu gallardonar les meyores obres espublizaes en 2007. Na modalidá de narrativa en llingua asturiana’l premiu foi pa Cristina Muñiz Martín por “El buscador d’hestories”, mientres qu’en poesía’l ganador foi Antón García cola obra “La mirada aliella”. En cuanto a la categoría de lliteratura infantil y xuvenil resultó premiáu’l llibru “Garulla. Antoloxía del ritmu” de Vicente García Oliva y Severino Antuña.

En castellán fueron premiaos Antonio Valle en narrativa por “Mensajes de un mundo dibujado”, Inés Toledo en poesía, por “El final del cuento” y Mónica Rodríguez na categoría de narrativa infantil y xuvenil col llibru “Los caminos de Piedelagua”.

El diariu xixonés “El Comercio” distribuyó esti llunes de baldre un cartafueyu con testos espublizaos n’esti mesmu diariu por Adeflor, nel añu 1929.

L’Atenéu Xovellanos, coeditor del trabayu, acoyó la selmana pasada la presentación de la edición especial de ‘Charlas populares de 1929’ d’Alfredo García y García, conocíu pol alcuñu d’Adeflor.

La edición corrió a cargu del filólogu, investigador lliterariu, escritor y miembru del RIDEA Xosé Lluis Campal.

El xueves 2 d’ochobre, a les seis de la tarde, la Llibrería Asturiana d’Ediciones Trabe va acoyer la presentación de la novela “Sol reló”, primer volume propiu de Nicolás V. Bardio, que yá espublizare otros testos en revistes como Lletres Asturianes o Formientu y qu’apaez na antoloxía “Vía de serviciu” d’Ediciones Suburbia. Amás del autor, na presentación van intervenir Inaciu Galán, escritor y presentador de TPA que prologa la obra ya Inaciu Iglesias, d’Ediciones Trabe.

La novela asoléyase dientro de la colección “Incla Interior” de Trabe, col númberu 89 y ye según diz el prólogu “una novela policial onde los policíes nun son el centru de la hestoria, una novela política onde la política nun ye’l nucleu central, una novela de crítica social que nun se convierte nun panfletu, los temes tan abordaos na so xusta midida y consiguen un equilibriu en tou momentu”.

Nicolás V. Bardio ganó amás, l’añu pasáu, y col rellatu “Les nueches azules de Llúnada” la primer edición del “Premiu Asturnews de Lliteratura Infantil y Xuvenil” ex aequo con Abel Martínez González.

La editorial Trabe y dientro de la so colección “Maestros del humor”, tien nes llibreríes la primer antoloxía de monólogu modernu “Pa echar unes rises” onde Inaciu Galán antologa dellos monólogos propios y otros escritos por Cristina Muñiz Martín, Azucena Álvarez García, Isaac G. de L’Arada, Benxa Pérez y Chechu García. Un llibru que ye’l frutu del trabayu fechu por actores y autores nos últimos años pa la modernización del monólogu asturianu.

Nel entamu del antologador, Galán comenta como “dende va unos años delles persones venimos trabayando na modernización d’un xéneru lliterariu y escénicu que s’espresó siempres n’Asturies na nuesa llingua con más que notable ésitu y que nes últimes décades taba perdiendo públicu ensin parar”. Pal coordinador del llibru, esta perda venía, per un llau, «pola desconexión temática y estética del monólogu tradicional asturianu col públicu más mozu y urbanu» y, per otru, «pola sustitución del xéneru tradicional asturianu por otru tipu d’humor: el monólogu “stand-up comedy”, ye dicir, les formes y temes del monólogu modernu y televisivu fechu nos Estaos Xuníos y, amás, en castellanu».

Nel llibru pueden atopase los monólogos “Asturianos al volante”, “Les vueltes que da la vida” y “Los asturianos dende fuera”, escritos por Inaciu Galán y González & Isaac G. de l’Arada; “L’home y la gochería”, “La hestoria, más o menos” y “Qué guapu ye l’amor” de Benxa Pérez; “Cuatro verdaes” y “Otres cuatro verdaes” de Chechu García; “El soplómetru”, “El prexubiláu”, “Dientro la llegalidᔠy “Mensaxes curtios” de Cristina Muñiz Martín y “Tópicos asturianos” d’Azucena Álvarez García.

“Asturies cuenta… (…y naide nun escucha)” ye’l títulu de la nueva antoloxía de rellatos que la editorial Suburbia presentó na Arribada 2008. El llibru ta compuestu por quince relatos de diferentes autores onde caún d’ellos da una visión d’Asturies. Estructuráu en tres partes (el pasáu, el presente y el futuru), nél participen escritores asturianos de les tres promociones del Surdimientu, entamando con un prólogu de Silvia Cosío, …Y naide nun escucha. Les obres y autores presentes na antoloxía son los que siguen:

…El Pasáu

“Pelegrín por cuenta ayena” de Xulio Arbesú, “Una pota d’arroz” de Vanessa Gutiérrez, “L’acabóse” de Xosé Mª Rodríguez de Bimeda, “La vuelta a casa” de Miguel Rojo, “Fragmentos d’unes memories d’Andrés Parrondo” de Xuan Bello.

Presente

“Flash” de Pablo X. Suárez, “La vida nueva” de Ramón Lluís Bande, “Alonsomanía” de Francisco Álvarez, “Uviéu, 10:30” de Pablo Texón, “Sara” d’Adolfo Camilo Díaz, “Boa rápida” de Segio Gutiérrez Camblor, “Esto ye Asturies” de Naciu Varillas.

…El Futuru

“Bloque dos, cuarta zona, espaciu alministrativu primeru. Asturies” d’Iris Díaz Trancho, “Les Mandes” de Carlos Suari, “Otra vez U.H.P.” de Xandru Fernández.