Lliteratura

Lluis Portal Hevia foi’l ganador del premiu “Xosé Álvarez”, otorgáu pol so rellatu “Ferre o palomba”, según dio a conocer el xuráu del VII Concursu de rellatu curtiu n’asturianu, qu’organiza’l Centru Asturianu de Madrid cada añu.

«Ferre o palomba» asitia l’acción nos instantes previos a la Guerra Civil y tien como protagonista a un mozu sindicalista que busca venganza pola muerte de so pá a manos de falanxistes. Por ello, el mozu va trabar amistá con un xefe de la Falanxe cola intención de facese con armes qu’esta organización poseía.

Amás, el xixonés Pablo Rodríguez Alonso llevó l’accésit “Xosé León Delestal” gracies a la hestoria “L’Abadía” que ye un rellatu más llargu que tien dos partes bien diferenciaes. Na primera, l’historiador xixonés fai una especie d’ensayu sobre’l conceptu d’historia a través de la figura d’un arqueólogu de la Universidá d’Uviéu que ta trabayando nel estudiu de la ilesia de Santu Adrianu de Tuñón. La segunda parte de “L’Abadía” céntrase na aparición de una inscripción nuna piedra del templu que-y permite reflexonar sobre lo socedío nel llugar nel pasáu.

Mañana, xueves 30 d’ochobre, a les 19:30 hores, l’Atenéu de Turón va acoyer un alcuentru col narrador asturianu Xosé Nel Riesgo. Una actividá que va repitise nos próximos meses cola presencia d’otros autores como Xandru Fernández o Antón García.

Xosé Nel Riesgo ñació n’Avilés nel añu 1963 y ye Llicenciáu en Xeografía pola Universidá d’Uviéu y Máster Superior en Desenrrollu Llocal. Ye autor de noveles como “El cai nunca duerme” (ALLA,1989), “Parque Temáticu” (Trabe,2005) y “Escrito na ceniza” (ALLA, 2007). Amás d’autor d’una montonera de rellatos, qu’axuntó en 1997 Editora del Norte.

La hestoriadora uviedina María Soto Cano ganó la XXIX edición del premiu “Juan Uría Ríu”, que concede la Conseyería de Cultura y Turismu del Principáu, por un trabayu tituláu “El escultor y dibujante Sebastián Miranda (1885-1975)”. El xuráu que concedió por unanimidá el premiu a María Soto taba presidíu pola Directora Xeneral de Promoción Cultural y Política Llingüística, Consuelo Vega Díaz ya integráu, como vocales, polos profesores Julia Barroso, Josefa Sanz, Serafina García y Adolfo García Martínez. Otros seis trabayos optaben a esti prestixosu galardón, dotáu con 6.000 euros.

María Soto Cano, de 29 años d’edá, ye doctora n’Historia del Arte pola Universidá d’Uviéu y especialista en Sebastián Miranda. El xuráu destacó la metodoloxía usada por María Soto Cano, amás de “la mui bona catalogación de la obra y el rigor y pulcritú na documentación del archivu col que se trabayó”. Tamién resaltó “l’amplitú del tema al abarcar la obra completa de Miranda, el bon accesu a les fontes documentales y el redescubrimientu d’esta figura relevante nel mundu de les artes asturianes”.

L’Academia de la Llingua Asturiana tien nes lliberíes un númberu nuevu de la so “Coleición Mázcara” de testos teatrales. El volume, tituláu “Agora, la más fuerte soi yo”, axunta testos representables de Pilar Murillo y fai el númberu 12 de la colección na que l’ALLA asoleyó testos d’autores como Chechu García, Adolfo Camilo Díaz o Azucena Álvarez, ente otros.

La obra ta conformada por dos partes: Una, na que Murillo axunta seis monólogos “El mecheru”, “Ódiote una migaya”, “La rifa”, “Por allegríes…”, “Trabayu temporal” y el que-y da títulu al llibru. D’otru llau, asoléyase la obra curtia “L’heriedu”, onde una familia, na que como nel restu la obra dominen los personaxes femeninos, discute pola herencia que-yos van dexar los güelos, entá vivos.

Pilar Murillo ñació n’Avilés y crióse en Podes, conceyu de Gozón. Ye autora d’obres esitores como “Les cartes”, “Faustina madre de Alejandro” o “Hamlet ye’l mio mozu”. Tien espublizaos testos en revistes como “La ratonera” o “Art teatral”. Algamó dellos premios ente los que destaquen l’Art Nalón de Teatru y el Premiu Asturies de la mesma modalidá.

Esti sábadu 25 a les 19 hores va presentase na FNAC del centru comercial Parque Principáu l’antoloxía, “Asturies cuenta… (y naide nun escucha)”. Ta confirmada la presencia de la editoria y prologuista de la obra, Silvia Cosío y de los autores Xandru Fernández y Pablo Texón.

El vienres, a les 13,45 hores, va facese l’actu de donación y entrega del manuscritu ‘Mieres-mío’, obra del colectivu de poetes mierenses. Tendrá llugar na Biblioteca Central de Mieres y va asistir l’alcalde del conceyu y la Conceyala de Cultura, que van recibir el manuscritu colos poemes escritos y dedicaos a Mieres polos escritores. Después, habrá un pequeñu café lliterariu nuna de les sales de la biblioteca.

L’autor del manuscritu ye’l prestixosu calígrafu y tamién poeta mierense Fernando Menéndez qu’axuntó testos breves de diez conocíos autores mierenses: Nel Amaro, José Luis Argüelles, Miguel Barrero, Xandru Fernández, José Ángel Gayol, Humberto Gonzali, Vanessa Gutiérrez, Miguel Rodríguez Muñoz, José Luis Piquero y el propiu Fernando Menéndez.

El manuscritu ta compuestu por aforismos y poemes de mui curtia estensión, ta caligrafíáu con distintos tipos de lletra y caligrafía: lucida handwriting, gótica, pincel xaponés, etcétera. La portada ye de papel de 600 gramos fecho a mano, mientres que’l papel utilizao nel interior ye del tipu ingres verxuráu de 200 gramos. Los testos compleméntense con dibuxos gouache plakkaatvert o colores tempera. La tinta de los testos ye la conocío como bokuteki (tinta negro xaponesa). El calígrafu remanó pinceles de cola de caballu y de marta, amás de plumines . La lletra capital de caúnu de los testos ye gótica gofrada y rasgada. Pal cosíu del manuscritu utilizóse filo encerao y cosío al estilu tradicional xaponés del sieglo XVII.

Del 20 d’ochobre al 7 de Payares, el conceyu Piloña va acoyer les VIII Xornaes de Lliteratura Infantil en Llingua Asturiana, que van tener llugar en L’infiestu. Cuentacuentos, talleres, esposiciones y concursos van enllenar estes dos selmanes d’actividá empobinada a los escolinos.

AsturOOns collabora un añu más col Ayuntamientu de Piloña entamando estes Xornaes de Lliteratura Infantil en Llingua Asturiana, que dende la prósima selmana tienen llugar en L’infiestu. Los escolinos que quieran participar nestes cites, nun tienen más qu’allegase a la Casa de la Cultura de la capital del conceyu ablaneru.

Dende estos díes yá se pue contemplar na biblioteca pública, asitiada nesti edificiu cultural, una muestra d’ilustraciones de les novedaes editoriales que s’asoleyen esta seronda. Amás, como ye d’avezu, L’Ayuntamientu tien convocada una nueva edición del so concursu de cuentos pa escolinos, que se fallará na primer selmana de payares.

Los interesaos en participar tienen que mandar narraciones de dos fueyes de llargor y dalgún dibuxu, enantes del 31 d’ochobre, a la Casa de la Cultura, na cai Cuadonga de L’Infiestu, poniendo los datos personales, edá, cursu, colexu y teléfonu de contautu. Habrá lotes de llibros y material educativu pa los ganadores.

El Primer Conceyu Internacional de Llingua Asturiana, que va desendolcase na Facultá de Filoloxía de la Universidá d’uviéu del 4 al 6 del mes qu’entra, organizáu pola Academia de la Llingua Asturiana ya tien programa y acunta a dellos de los más nomaos especialistes internacionales. El Conceyu preséntase embaxo la lleenda “Más de Mil años d’Historia d’una llingua nel país de los Ástures” y entamará’l martes 4 a les 12 la mañana nel Campus d’El Milán. Abrirálu’l profesor de la Universidá d’Uviéu Francisco Javier Fernández Conde’l con una conferencia sobre la “Particularidá histórica del País Astur” y pesllarálu un alderique’l xueves 6 a les 20 hores sobre “La llingüa nes tierres ástures: propuestes de collaboración llingüística y culñtural” que va desendolcase nel Clubd e Prensa de La Nueva España y nel que van participar Emilio Gancedo de Lleón, Alfredo hernández de Zamora, Antonio Bárbolo de Miranda do Douro y el profesor asturianu Xosé Antón González Riañu.

El programa completu pue consultase nel trípticu qu’ufre Asturnews a los sos llectores.

Hasta’l 2 de febreru ta abiertu’l plazu pa presentase al concursu de cuentos de tema llibre que ta acabante convovar el conceyu de L.lena.

Pueden presentase cuentos de non menos d’8 fueyes en castellán n’o asturianu.

Pa más información pue visitase cualesquier de les Oficines d’Información Xuvenil, llamar al teléfonu 985 491 157 o mandar un corréu a cultura@aytolena.es

La Conseyería de Cultura ta acabante espublizar el númberu 11 de la revista “Biblioasturias”, una revista billingüe que se distribúi de baldre nes biblioteques públiques d’Asturies. N’esti númberu de la revista trimestral la portada protagonízala’l ciclista asturianu Samuel Sánchez, comentando les llectures del oru olímpicu de ciclismu en ruta. Atópase amás delles entrevistes a autores como Cristina Muñiz y Adolfo Camilo Díaz.

Amás, Milio’l del Nido, Montse Garnacho y Carlos Alba dialoguen nun alderique sobre los cuentos y los cuentistes n’Asturies; da a conocer la utilidá de los blogues de les biblioteques y visita la biblioteca pública de Cuideiru.Pieslla la edición un espaciu pa les novedaes lliteraries en castellán y n’asturianu, como Sol reló de Nicolás V. Bardio, Khaos d’Adolfo Camilo Díaz, ¡Pa echar unes rises! Antoloxía de monólogu modernu, l’antoloxía Asturies cuenta… (y naide nun escucha) y otros llibros.

La contraportada ocúpenla los llistaos de llibros y discos más empretaos nes biblioteques asturianes.