Lliteratura

Suburbia Ediciones, editorial xixonesa dirixida por Silvia Cosío, ta acabante espublizar un llibru con diez cuentos de Xandru Fernández embaxo’l títulu d’ún d’ellos “Entierros de xente famoso”. Xandru Fernández, que va recibir esti añu’l Premiu Xuan María Acebal de poesía, comenta p’Asturnews los conteníos del llibru y les sos sensaciones dempués de conocese ganador, per segunda vegada, d’esti prestixosu gallardón.

Xandru Fernández (Turón, 1970) ye narrador y poeta en llingua asturiana premiáu bien de vegaes (Xosefa Xovellanos, Trabe de Narraciones, Narrativa de l’ALLA, etc.) Ente les sos obres narratives destaquen: “Los homes de bronce” ( 2001), “Les ruines” ( 2004), “La banda sonora del paraísu” (2006), xunto con “El club de los inocentes» (1993) y «El suañu de los páxaros de sable” (1999). Ye tamién autor de la obra poética “Primer Bestiariu” (1990), “Lletra muerto” (1998) y “Servidume” ( 2001), ente otros volúmenes.

L’escritor Juan Marsé (Barcelona, 1933)algamó esti xueves el Premiu de Lliteratura en Llingua Castellana Miguel de Cervantes que concede añalmente’l Ministeriu de Cultura, según asoleyó’l ministru de Cultura, César Antonio Molina. El gallardón concédese a la obra d’un autor pola so especial contribución a la lliteratura castellana.

Marsé, qu’espublizó los sos primeros relatos na revista ‘Ínsula’, quedó finalista en 1958 nel premiu Biblioteca Breve de Seix Barral con ‘Encerrados con un solo juguete’ y algamó la so mayor popularidá en 1978, con ‘La muchacha de las bragas de oro’, novela cola que ganó’l Premiu Planeta.

L’escritor y editor Antón García, va comentar güei, xueves 27 de payares, colos sos llectores, la novela “Díes de Muncho”. L’actividá forma parte del ciclu “Alcuentros con Autores” y va celebrase a les 19 hores nel Atenéu de Turón, embaxo la organización del Serviciu de Normalización Llingüística de Mieres.

La revista El Súmmum, asoleyada por Ámbitu Publicaciones, llega al númberu 30, dempués de más de siete años asoleyándose. Col lema “Depués de 30 númberos, la revista sigue teniendo munchu pesu” los editores de la revistsa quiere resumir “l’espíritu” de la publicación”, que s’asoleya trimestralmente, ye de baldre y se defiene como “un auténticu magazine de la cultura”.

N’esta nueva entrega recueye poemes de William Faulkner, testos y pintures de Carlos Barral, una llarga entrevista al poeta mexicanu José Emilio Pacheco, un adelantu del últimu llibru de Juan Carlos Gea y una reflexón sobre la familia Panero de Miguel Barrero, ente munches otres collaboraciones. La revista El Súmmun distribúise gratuitamente per bien dellos puntos culturales y comerciales de tola xeografía d’Asturies.

El llector tamién va atopar bien dellos artículos d’interés: reseñes de llibros y d’esposiciones, estampes como la d’Ovidio Parades sobre Liza Minelli, noticies de les últimes producciones discográfiques (como «Dudas y precipicios» y «La nada y tu» d’Alfredo González) o una entrevista al antropólogu Manuel Delgado améstense nuna publicación que, comenten dende la editorial, “tovía guarda más sorpreses pal llector”.

Descarga la revista de baldre

L’Institutu Asturianu de la Mocedá del Principáu d’Asturies ta acabante facer públicu’l resultáu d’esti gallardón, integráu nel Programa «Culturaquí» y dotáu con 10.000 euros. El gallardón ta dirixíu a autores y compañíes de teatru non profesionales que presenten un testo teatral orixinal y inéditu y una propuesta d’interpretación.

El xuráu determinó conceder por unanimidá esti premiu “pola escelencia del montaxe propuestu, onde s’integren dalgún de los nomes propios más reconocíos de la escena asturiana, y l’interés d’un testu onde se resumen determinaes llinies de trabayu representatives y significatives del teatru qu’anguaño se fai n’Asturies: frescor, espontaneidá y mistura de técniques onde se recueyen les nueves tendencies y, al tiempu, se fai homenaxe al teatru más clásicu”.

El xuráu taba presidíu pol Director del Institutu Asturianu de la Mocedá, Guillermo Martínez Suárez, y por Adolfo Camilo Díaz López, José Ramón López Menéndez, presidente de FETEAS (Federación de Teatru Amateur d’Asturies) y Director de la Compañía de Teatru Kumen; Azucena Álvarez García, autora teatral y Premiu Asturies Xoven de Testos Teatrales 2006; y Carmen Duarte García, Vicepresidenta de FETEAS y Directora de la Compañía de Teatru Traslluz.

La sala d’arte del Centru Sociocultural de Les Vegues, nel conceyu de Corvera, va acoyer esti vienres, 21 de payares, a les 19:30 hores, la presentación del poemariu “Manual contra’l vaciu”, asoleyáu por Ediciones Trabe y ganador del Premiu Fernán Coronas en 2007. Na presentación van participar el presentador de la TPA y escritor Carlos Suari, Esther Prieto, de Trabe y Pablo Rodríguez Alonso, escritor, amás del autor.

Berto García ñaz en Les Vegues (Corvera), en 1975. Ye autor d’otros dos oemarios na editorial Trabe: Ensin otra sida (2005) y Treslallende [xunto a Carlos Suari] (2007) y de bien d’obra espardío peles revistes lliteraries del país, como: El Canciu’l Cuélebre, Lletres Asturianes, Formientu o Entellunu.

La Casa de la Cultura de San Martín del Rei Aurelio recibió la selmana pasada la presentación del últimu llibru de Pablo Rodríguez Medina, la novela xuvenil «Ello ye too la xente, que nun mos compriende», que presentó l’autor xunto a Hugo Cortina.

Pablo Rodríguez Medina, (L’Entregu, 1978). Escritor billingüe, les sos obres, tanto nuna como n’otra llingua, algamaron delles distinciones tanto a nivel rexonal como nacional. Destaquen premios como’l Xosefa Xovellanos, pola novela «L’Arna de San Atanás», el Teodoro Cuesta del añu 2006 pol poemariu «Aires de lmudanza» o el de creación lliteraria de l’Academia de la Llingua Asturiana por «Les vueltes, toles vueltes». Combina tamién dellos xéneros: la narrativa, con obres como «Los paraísos perdíos» o «Ente semeyances»; la poesía, con poemarios como «Nel dialeutu del grisú», «Tiempu d’esiliu y povisa ayeno» y «Los desconocedores del agua» (Premiu Asturies xoven de Poesía); y el teatru, con obres como «Martema. Historia d’una guerra, retratu d’unes culpes» y «Orbaya» (Premiu de teatru de l’Academia de la Llingua Asturiana). En castellán tien publicao obres como «Desbandada», «El desorden en los vientos», «La arena tras tus ojos» y «Los laberintos del humo».

Esti vienres, 21 de payares de 2008, a les 19:30 h0res, na Llibrería Paraxuga, na cai Paraíso, 2, d’Uviéu fadrase la presentación de “¡Cómo me pudisti engañar d’esa manera!” de María Luz Pontón, editada por Madú Ediciones, y na qu’amás de l’autora van participar, los escritores Vicente García Oliva y Chechu García y l’editor Cristian Velasco.

El llibru narra la hestoria de Fonsu, ún de los pocos trasgos en peligru d’estinción qu’entovía vive colos seres humanos, desapaez misteriosamente. Toles culpes van parar en don Ramón, l’escritor col que vive y col que siempre ta engarriáu, pero’l famosu inspector Antón nun va cansar de pescudar hasta descubrir tola verdá.

María Luz Pontón Álvarez naz en Mieres y acaba los estudios de Maxisteriu na especialidá de Filoloxía Francesa ya Inglesa. Ye Llicenciada en Filosofía y Ciencies de la Educación dende 1998 y esperta n’Informática Educativa, títulu propiu de la UNED, y en Filoloxía Asturiana pola Universidá d’Uviéu. Collaboró con delles revistes d’educación al rodiu del so trabayu d’investigación sobre l’alumnáu d’altes capacidaes. Y dende hai tiempu dirixe y presenta dos programas infantiles en Localia Televisión d’Asturies: La tele de los escolinos y Cuentos y lleendes. Tamién dirixe y presenta na Radio del Principáu d’Asturies el programa Revoltixu nes ondes. Collabora na sección de lliteratura infantil del portal www.asturies.com y ye autora y directora de les obres que representa’l grupu de teatru «Asturmitomanía».

Na actualidá da clases nel Centru d’Educación d’Adultos «El Fontán» (Uviéu). Comprometida dende va tiempu cola recuperación de la llingua asturiana, tien asoleyaos llibros de didáctica, un balagar de cuentos pa los más pequeñinos de la casa y dalgún qu’otru llibru, como ésti, pa neños más grandonos.

El Foro Abierto de la Llibrería Cervantes celebra esti llunes 17 de payares a les 19,30 hores la presentación de la primer obra asoleyada por Ediciones Saltadera, el nuevu proyectu editorial independiente d’Antón García. El primer llibru ye “Esta luz tan breve (Poesía 1988-2008)” del profesor de la Universidá d’Uviéu, Aurelio González Ovies. Un volume que recueye una amplia esbilla de la obra d’esti poeta, escrita a lo llargo de les dos últimes décades.

Escosaos tolos llibros del autor, la presente edición permite volver sobre les obres esenciales d’esti escritor: Vengo del norte (1993), Nadie responde (1994), Nada (2001) o Tocata y fuga (2004), amás de descubrir poemes magníficos asoleyaos en cartafueyos o folletos de menor difusión. De la so producción n’asturianu publíquense nueve poemes. Esta selección, fecha pol propiu autor, complétase con un prólogu del escritor Miguel Florián, que desvela dalgunes de les claves principales de la poesía d’Aurelio González Ovies, ñacíu en Bañugues, Asturies, en 1964 y doctor en Filoloxía Clásica pola Universidá d’Uviéu, onde ye profesor titular de Llatín.

Ediciones saltadera ñaz dende Asturies, “pa toa España, y va a ocupase d’editar poesía (autores españoles ya hispanoamericanos, traducciones dende diverses llingües al castellán…, ensin perder nunca la raíz asturiana) y otros llibros singulares”.

La escritora y academica de númberu Berta Piñán fízose esti día col Premiu de lliteratura infantil y xuvenil en llingua asturiana que lleva’l nome de “María Josefa Canellada” y que convocaba esti añu per primera vegada la Conseyería de Cultura y Turismu del Principáu. La obra ganadora lleva por títulu “Arroz, agua y maíz”.

El xuráu aconceyóse nel Ayuntamientu de Cabranes pa fallar el Premiu baxo la presidencia de la directora xeneral de Promoción Cultural y Política Llingüística, Consuelo Vega Díaz y cola participación del alcalde de Cabranes, Alejandro Vega Riego, y de dellos autores y espertos en lliteratura infantil y xuvenil, cuntando tamién cola participación d’Alonso Zamora Canellada, fíu de la escritora María Josefa Canellada que da nome al galardón.

Xunta’l de Berta Piñán presentárense a esti premiu dotáu con 3.000 euros otros cuatro trabayos.

Berta Piñán, que ye llicenciada Filoloxía pola Universidá d’Uviéu y exerce de profesora d’eñseñanzes medies tien publicaos llibros de tolos xéneros, pero sobremanera de poesía, como fain alcordanza ‘Al abellu les besties’ (1986), ‘Vida privada’ (1991), ‘Temporada de pesca’ (1998) y ‘Un mes’ (2002). Hai bien poco espublizó “En casa ayena”, un llibru asoleyáu pol Atenéu Obreru de Xixón que recueye les tornes que l’autora escoyó d’entes toles feches dende los sos entamos como escritora.

L’autora tamién publicó en narrativa dos llibros de relatos: ‘La tierra entero’ (1999) y ‘La maleta al agua’ (2006) y dellos trabayos de lliteratura infantil como “Lula, Lulina” (1989)o “El branu de Mirtya” (2006).