Lliteratura

Güei martes, a les 19 hores, nel Club de Prensa Asturiana de La Nueva España. Mari Luz Pontón va presentar el so llibru últimu “Urraca blanca”, escritu a medies con Mabel Piérola y asoleyáu por Edicions Bellatera, qu’ufre’l llibru, tamién en catalán.

Nel actu van participar Nicanor García Fernandez, Xefe del Serviciu de Formación del Profesoráu, Innovación y Tecnoloxíes Educatives; l’escritor Pepe Monteserín y l’editor José Luis Ponce. Amás del grupu de teatru infantil Bueño y la neña Mara Rodríguez, Rosana Muñoz y Paula Alonso del grupu de teatru Asturmitomanía, Milio’l del Nido y Javier González.

La Casa de la Cultura de Grao acoyerá’l vienres 19 d’avientu la presentación del nuevu llibru de Xuan Santori “La Fábrica de LLuz” que vieno acabante asoleyar Editorial Universos.

El nuevu llibru de Xuan Santori texe la urdime cultural ya histórica d’Asturies al traviés de testos curtios, poemes y semeyes, que falen del yo colectivu pa interpretanos y dicinos como somos.

Nesti volume cuéntense histories de persones de la cai, xente normal, que vive y siente, recuerdos de la Guerra Civil, y la memoria del autor como filu conductor.

“La fábrica de lluz” entama con una cita de Benito Jerónimo Feijoo que se refier a la lluz que los homes necesiten nel camín de la vida. La nueva obra de Xuan Santori pretende ser un terrén onde espoxigue la lluz que nos allume y sirva de niciu sobre el destín que nos espera.

Xuan Santori ye un qutor que dase a conocer como poeta con la apaición de los llibros Zunes, Les inconveniencies de la especie, (Premiu Teodoro Cuesta 1999) y Bis a bis. Como traductor, tien feches tornes de testos y autores vinientes del mundu anglosaxón, como John Berger. Ye autor del ensayu Milenta voces. Visiones del Surdimientu. Con La fábrica de lluz sigue’l camín abiertu por La heredá.

La prosa de Santori ye un testimoniu vital d’esperiencies trataes de mou lliterariu que l’autor igua con procuru y dedicación esquisito.

La tertulia Reciella Malory va celebrar esti vienres 12 d’Avientu na casa la cultura de L’Entregu a les 19,30 el décimu aniversariu con un actu el que van dir como convidaos Belarmino Tomás, el conde Gonzalo Pelaiz, L’obispu Pelayo, Leopoldo Alas Clarín Y Xovellanos, ente más, munchos más otros.

Según los miembros de la Tertulia va tar toa guionizada y “va haber munches sorpreses! Va a ser la tertulia pública más esto y lo otro xamás imaxinada”.

La editorial Asturtoons, especializada en comic y llibros illustraos empobinaos al públicu infantil, vieno acabante de presentar dos nueves coleiciones: “Xigante que suaña” y “Cuentos del Planeta Azul”, qu’entamen con dos trabayos del escritor, periodista y dibuxante Enrique Carballeira.

La primer coleición ye de formatu A4 y espubliza como primer númberu un cuentu d’Enrique Carballeira que lleva por títulu “Xilu tien mieu a la nueche”, mentantu que la coleición “Cuentos del Planeta Azul” entama con un cuentu del mesmu autor que lleva por títulu “Y que siga siempre azul”. Esti caberu cunta la historia de Ramón, el Tiburón, que cuando la marea lo permitía, allegábase a les costes pa ar una vuelta y ver coses nueves.

Nel mes de Payares, la editorial espublizó un nuevu llibru de Miguel Rojo Martínez, empobináu pa los neños, «¿Pa qué val una papelera?», con ilustraciones tamién d’Enrique Carballeira. Trátase d’un nuevu númberu de la coleición Llingua de Trasgu que sigue la llínia d’otros títulos d’esta mesma estaya de ‘¿Pa qué val…?, como ¿Pa qué val una bufanda?, ¿Pa qué val una escoba? o ¿Pa qué val una sábana?. Esti nuevu llibru tien como oxetivu, en palabres del autor, “que los neños dexen volar la imaxinación. Trátase de ver los distintos usos de los oxetos cotidianos, nesti casu una papelera, usos lo más alloñaos que se pueda de la realidá. Al final, y pa que tengan clares les coses, dízse-yos pa qué val cada cosa”.

Miguel Rojo Martínez (L’Infiestu 1976) espublizó tamién con AsturtOOns otros títulos como ‘¡Menudu Elementu!’, ‘Pepu’l Pastor y el bichón del monte’ o ‘La lluz de la Lluna’. L’autor compaxina’l so interés pola narración y la poesía col so llabor diariu como redactor del periódicu EL COMERCIO.

Páxina Web d’Asturtoons

El pasáu vienres 5 d’avientu celebrose’l primer conceyu del xuráu del VII Edición del Certame lliterariu de Relatu Cortu ‘Eugenio Carbajal’, al qu’opten 109 escritores d’España y Iberoamérica. El xuráu espera ufrir el fallu a primeros del 2009, concediendo un primer premiu de 1200 euros y un segundu premiu de 300 euros, amás de la publicación de les obres.

El xuráu de la edición d’esti añu componentlu la periodista y premiada col Teodoro Cuesta, Vanesa Rodríguez, una ganadora del premiu Eugenio CArbajal, Rocío Souto, el periodista Miguel Barrero, el director del IES de Turón y Catedráticu de Llingua y Lliteratura, José Espiño, asina como representantes de los grupos políticos municipales. La ganadora de la pasada edición foi la portuguesa Marlene Correia.

Esti xueves 11 d’Avientu, nel Club de Prensa de La Nueva España y a partir de les 19 hores, la Editorial Universis va presentar “Robinson Astur”, la segunda entrega poética en volume d’Elías Veiga: “un poemariu posáu, maduru, nel que l’autor reflexona sobre l’aventura cotidiana del vivir y ufierta una mirada sobre los desengaños y naufraxos nos que queden los suaños”.

Na presentación van participar amás del propiu autor. el tamién escritor Xuan Santori y José Angel Gayol.

La poesía d’Elías Veiga ye una poesía moderna, a vegaes cruda, siempre reveladora y según l’aturo, “esti poemariu ta concebíu como un viaxe pola memoria del autor, poles sos condenes, les sos cayíes y l’alcordanza de tiempos que non siempre foron meyores”.

Elías Veiga ye collaborador de revistes como Lliteratura y Lletres Asturianes. Dase a conocer na poesía asturiana col volume La tierra fonda (Trabe, 2004). D’entós p’acá’l llabor poéticu desendolcáu vien siendo una referencia que se plasma na so inclusión n’antoloxíes como Palabres clares, Escritores en Llanes, Na boca de todos, o Al aldu.

El XVIII Premio Xeira de narracióis curtias en gallego-asturiano vieno acabante de fallase na Caridá resultando premiáu Iván Iglesias Fernández “Cazarón”, pol so relatu “El Maño”. El xuráu fixo tamién una mención especial pal relatu “Sudor y cobardía”, d’Andrés Rodríguez Monteavaro, de Bual.

El xuráu taba formáu por D. Rafael Cascudo Noceda, D. Alfredo González Fernández, D. José Manuel Martínez Castro y Da. Mª José Fraga Suárez, y actuando como secretario D. Rubén Rodríguez Gayol,

L’autor ye collaborador habitual de la revista Entrambasauguas y de Falaviva.net. Anguaño trabaya como coordinador d’actividaes culturales y llingüístiques na Fundación del Parque Histórico del Navia.

La editorial xixonesa VTP, dirixida pol escritor Milio R. Cueto, ta acabanta asoleyar un nuevu volume de la Biblioteca de Xixón/Gijón. Nesti casu la obra ye una recopilación d’artículos escritos por Adeflor, a partir del 6 d’agostu de 1921 y a lo llargo de cuatro meses, l’entós director d’El Comercio viaxaba como corresponsal del periódicu asturianu a la Guerra d’África. Dende ellí, Adeflor, diba facer llegar 113 cróniques, más trés qu’escribiría a la vuelta, embaxo’l títulu “Recuerdos de campaña”.

La introducción del llibru asoleyáu estos díes por VTP faila Luis Arias González.

Conocíu popularmente col alcuñu d’Adeflor, nació’l periodista Alfredo García García en Xixón en 1876. Exerció’l periodismu dende bien xoven, vinculándose al periódicu xixonés El Comercio, del que llegó a ser director. Nel añu 1906 dio a estampa Charlas gijonesas, con portada del pintor Ventura Álvarez Sala; nél recueye la serie de diálogos satíricos y humorísticos que fuera publicando n’El Comercio, cola intención de comentar críticamente aspectos de la política municipal. A lo llargo de la so amplia trayectoria periodística escribió abondos diálogos humorísticos asemeyaos, nos que combinaba l’asturiano con formes diglósiques de la llingua falada en Xixón.

L’Academia de la Llingua Asturiana vieno acabante asoleyar un númberu nuevu del so boletín “Lletres Asturianes”. A piques de facer un cientu de númberos l’Academia ufre un númberu nel que puen atopase trabayos como “El Apeo del ‘Concejo de Oviedo’ en el Libro del Prior (I)” trescripcion de Cristina García-Sampedro Clérigo sobre un testu del sieglu XV, “Vocabulariu de Cangas del Narcea, Amestadura”, de Jesús Feito Calzón, “Safo nel Surdimientu” de Ramiro González Delgado, “Una reseña de l’antoloxía de Caveda” de Xosé Lluis García Arias y “El tren de medianueche y otros cuentos de Sabel de Fausta” d’ Esperanza Marino Davila.

El númberu complétase cola reprodución d’un copia de la Fábula de Didos y Eneas d’Antón de Marirreguera, un trabayu de Xosé Lluis García Arias; el rellatu “Les fuercies de la naturaleza” d’Armando Murias Ibias; dellos de los dicursos pronunciaos pola Presidenta de l’Academia nos últimos meses, el discursu d’ingresu na ALLA de Berta Piñán y otres informaciones, como los ganadores de los premios de l’Academia en 2008, los alcuerdos roblaos con otres instituciones pola Academia, delles reseñes de llibros y un llistáu de les obres espublizaes n’asturianu nos últimos meses.

Esti xueves día 4 d’avientu, a les 19 hores preséntase “La espera” de Xurde fernández nel Forum de la Fnac (Parque Principado). intervendrán xurde fernández y naciu varillas.