Lliteratura

La fin de selmana ta siendo tráxica pa la lliteratura n’Asturies. A la muerte de la novelista Corín Tellado, qu’anunciábemos va hores, súmase agora la perda de la decana de les lletres asturianes, la escritora valdesana Nené Losada Rico, que mos dexó esti sábadu, a la edá d’87 años nel Hospital de Xarrio, en Cuaña. Los sos restos mortales tán nel Tanatoriu de Barcia. El funeral va celebrase mañana a les 18,15 hores na Ilesia Parroquial de Santa Olaya de L.luarca.

La escritora, considerada decana de les lletres asturianes, ñació en L.luarca’l 10 de payares de 1921. Tres años depués, al morrer la madre, llévenla a Sanfliz de Trevías, pa cola güela. Ellí diba vivir hasta que, con diecinueve años, casa y torna pa L.luarca, onde sigue viviendo. De formación autodidacta, amuésase como una temprana escritora de relatos y poemes en castellán. Tiempu más tarde, empezará a facelo na llingua del so llugar, utilizando formes poétiques mui cercanes a les de la poesía oral popular. En 1992 recoyó bona parte de la so obra en versu nel volume Cantares valdesanos, n’edición de Consuelo Vega, que se completa col nuevu llibru poéticu apaecíu en 1997 col títulu de Entre apigarcios, dende entós espublizó tamién la so obra en castellán nun volume completu.

L’autora recibió numberosos homenaxes y premios. Col so nome convócase cada añu un premiu de poesía. Nel añu 2000 recibió l’Urogallo 2000, entregáu pol Centru Asturianu de Madrid, al que nel 2005 se-y sumó la medaya de plata del Principáu d’Asturies. En 2007 recibió’l Premiu Timón que concede l’Arribada, pola mor de la so trayectoria lliteraria, y en 2008 foi nomada Fía Predilecta del Conceyu de Valdés.

Cola muerte de Nené Losada Rico la lliteratura asturiana pierde una de les sos voces hestóriques, una de les últimes figures de la nomada Xeneración de la Posguerra, que nos últimos años dexó nel camín a escritores como Mánfer de la Llera o Eva González.

El Foru de Creación y Llectura de la Biblioteca de Grau, L’Asociación Valentín Andrés, la Conceyalía de Cultura y l’Aula de les Metáfores celebra los sos IV Alcuentros de Lliteratura y Artes con una esposición de pintura de Duli García, que va inaugurase esti miércoles 15, a partir de les 19:30 hores na sala d’esposiciobes del Corredor de la Casa de Cultura, onde va tar l’amuesa hasta’l 30 d’abril.

Esi mesmu día, a les ocho la tarde, la Sala Polivalente de la Casa de Cultura “Amuertecontodo” va celebrase un conciertu a cargu del Colectivo Implicarte, y la presentación del númberu ocho de la revista de creación lliteraria y plástica “Las Hojas del Foro”.

D’otru llau, el vienres 24 d’abril, a les ocho, la Sala Polivalente de la Casa Cultura de Grau va acoyer una cena lliteraria col Diego Llorente, será a partir de les diez de la nueche. P’apuntase pue pasase con antelación pela Casa Cultura.

L’escritor Jesús Tíscar Jandra vieno acabante ganar la XLVI edición del Premiu Internacional de Cuentos de L.lena, con la obra entitulada, “La Confesora de Impíos”. El XLVI Premiu Internacional de Cuentos L.lena, convocáu pol Ayuntamientu en collaboración cola Conseyería de Cultura y Turismu del Principáu tuvo esti añu 325 relatos procedentes de diferentes partes del mundu, principalmente España y Latinoamérica, y foi concedíu al relatu “La Confesora de Impíos” del escritor Jesús Tíscar Jandra (Jaén, 1970).

L’autor, de formación autodidacta, ye nacíu y residente en Xaén, y publicó, ente otros relatos, les novelas Vía Crucis y La Poetisa, ganadora, ésta última, del XXV Premiu “Felipe Trigo” de Novela y el llibru de cuentos “Colección de Impresentables”.

L’actu d’entrega del premiu va tener llugar esti vienees, 17 de Abril, a les 19 hores nel Salón d’Actos de la Casa de Cultura de La Pola, dientru de la programación de la tradicional fiesta de La Flor que se celebra esa fin de selmana nel conceyu.

Los “Alcuentros Lliterarios nel Vieyu Institutu”, dirixíos por Antonio Merayo, van recibir esti vienres la poesía del poeta pixuetu Ignaciu Llope. Presentáu por Aurora García Rivas y cola música de Daniel García de la Cuesta, l’autor convidáu va lleer la so poesía na sala de conferencies del Vieyu Insitutu Xovellanos de Xixón, a partir de les ocho la tarde.

Ignaciu Llope ñació en Cuideiru nel añu 1961 ye llicenciáu en Medicina y Psiquiatra. Poeta y ensayista, nel añu 89 publica De les coses del mundu , artículos y ensayos que vieran la lluz en delles publicaciones: La Voz d’Avilés, Hojas universitarias, Ámbitu, Lletres Asturianes, L’Esperteyu, asina como otros trabayos inéditos. Nel añu 1992 sal al mercáu’l poemariu Xeografía del augua. En 1999 algamó’l premiu de poesía Fernán Coronas col llibru El llugar del sol (Trabe, 2000). Y nel 2009 asoleya’l so últimu poemariu, El combate melancolicu, na editorial Suburbia.

Nel añu 2003, l’Atenéu Obreru de Xixón y na so colección Tiempu de Cristal, rrecueye una esbilla de la so obra poética y ensayástica nel volume Una casa tendida al océano, a cargu del escritor y críticu Xoaé Bolado.

Amás de les revistes citaes a propósitu de los artículos de De les coses del mundu, Llope publicó poesía en diverses revistes como Adréi y Lúnula. Ye tamien conocíu como lletrista del grupu folk Llan de Cubel. Fue ún de los traductores de los dos episodios de Les aventures de Tintín al asturiano. Ye miembru del conseyu editorial de la revista Lliteratura de l’Academia de la Llingua Asturiana y de Asturies, memoria encesa d’un país, qu’edita la Fundación Belenos.

La presidente de l’Academia de la Llingua Asturiana, Ana Cano, anunció güei na presentación del númberu 100 de la revista Lletres Asturianes, que de magar esti mes de mayu, el númberu d’esta publicación que l’ALLA dedica tradicionalmente a la lliteratura va pasar a denomase “Lletres Lliterariu”, convirtiéndose asina nuna publicación independiente.

El concursu “Rellatos de la mar”, convocáu con interrupciones pol Conceyu de Carreño dende va décades, tien ganadores na so edición de 2009. L’escritor uviedín Iván de Santiago, fízose col primer premiu, dotáu con 3.000 euros, pol rellatu “Cada uno de los paraísos”, escritu en castellán.

El segundu premiu, dotáu con 1.000 euros, foi pal autor del conceyu Xurde Fernández pol rellatu n’asturianu tituláu “Pa que sepas de min”.

La entrega de los premios va tener llugar el 17 d’abril na Casa Conceyu de Carreño.

La Conseyería de Cultura y Turismu aprobó, según s’anuncia estos díes nel BOPA, les bases de los sos tradicionales premios lliterarios “Xosefa Xovellanos” de novela, “Xuan M.ª Acebal” de poesía, “Máximo Fuertes Acevedo” d’ensayu y les nueves convocatories, el “María Josefa Canellada” de lliteratura infantil o xuvenil y l’“Alfonso Iglesias” de cómic en llingua asturiana, qu’avanzó Asturnews a finales de xineru.

Los premios convóquense col envís de “fomentar la creatividá lliteraria” que pa los responsables del Gobiernu “contribúi ensin dulda nenguna a desarrollar el conteníu cultural de la sociedá, sobre manera teniendo en cuenta la importancia de la lliteratura, en cualquier de les tantes de manifestaciones que tien nel nuestru tiempu”.

Al Premiu de Novela en llingua asturiana “Xosefa Xovellanos” van poder presentase noveles escrites en llingua asturiana con una estensión mínima de setenta y cinco páxines a espaciu doble.

Al Premiu de Poesía en llingua asturiana “Xuan M.ª Acebal” van poder presentase poemarios escritos en llingua asturiana con una estensión mínima de quinientos versos.

El Premiu de Lliteratura infantil y xuvenil en llingua asturiana “María Josefa Canellada”, que se convoca esti añu per primer vegada, ta empobináu a obres de lliteratura infantil o xuvenil —con independencia que sían noveles, compilaciones de cuentos, poemarios o obres de teatru— escrites en llingua asturiana y con una estensión mínima de doscientos cincuenta versos pa la poesía y de trenta páxines escrites a espaciu doble pa los demás xéneros.

El Premiu de Cómic en llingua asturiana “Alfonso Iglesias” ta abiertu a cómics escritos en llingua asturiana con una estensión mínima de cincuenta páxines. L’estilu, tratamientu y tema van ser llibres, y la obra presentada pue abarcar el desarrollu d’una historia única o un conxuntu d’histories (rellacionaes o non ente elles). No que cinca al formatu, esto han presentase nun formatu non inferior al A4 y non superior al A3.

En cuantes al premiu “Máximo Fuertes Acevedo”, podrá presentase ensayos escritos en llingua asturiana con una estensión mínima de cincuenta páxines escrites a espaciu doble.

En tolos concursos les obres van ser de tema, xéneru y estructura llibres. Inédites y non premiaes n’otros concursos.

Les obres tienen que se presentar nel Rexistru de la Conseyería de Cultura y Turismu nel plazu previstu na convocatoria, en dos sobres cerraos onde tien que s’escribir el nome del premiu al que se presenta en cada casu, faciendo constar el títulu de la obra y l’alcuñu del autor. Caún de los sobres tien qu’incluyir: Sobre A: Datos del autor/a (señes, teléfonu y un currículum d’estensión curtia); Sobre B: Orixinal y cuatro copies del testu.

Espendiente apaecíu nel BOPA

L’Academia de la Llingua Asturiana va presentar esti próximu martes día 31 de marzu, a les 12 nel salon d’actos de la Obra Social y Cultural de Caxastur (C/ San Francisco, 4 – Uviéu), el númberu 100 del boletín oficial de la institución, la revista Lletres Asturianes, con un actu especial nel que van tar presentes la mayoría de les persones ya instituciones que ficieron posible esti llargu camín.

El primer númberu de Lletres Asturianes asoleyóse nel mes de mayu de 1981, acabante crease l’Academia, y de magar entós y pasu ente pasu, la revista foi enanchándose y anovándose, algamando un llugar importante nel ámbitu de les revistes científiques españoles ya internacionales.

Según s’afita nuna nota de prensa asoleyada esti vienres, “supón una gran satisfaición pa l’Academia poder presentar esti simbólicu númberu 100 de Lletres Asturianes, que quier compartir col públicu llector de la revista, colos sos collaboradores, y con tola sociedá asturiana”.

Nel actu de presentación intervendrán xunto a la Presidenta de l’Academia, y Direutora de la revista Dª Ana María Cano, D. José Vega, responsable de “Obra Social y Cultural” de Caxastur (entidá patrocinadora de la revista), D. Xosé Lluis García Arias, primer Presidente de l’ALLA y primer Direutor de Lletres Asturianes, y otros miembros del Conseyu de Redaición.

“Rebelión na caixa máxica” ye la última novedá espublizada na fala de la fastera eonaviega. La editorial Trabe espubliza esta obra d’Aurora García Riva, empobinada al públicu infantil, dientro de la so colección “Montesín”.

El rellatu, tien ilustraciones de Juan Díaz-Faes Díaz y ta escritu na variedá llingüística de San Tiso d’Abres.

Aurora García Rivas espublizare yá dellos llibros en castellán y gallego-asturianu, ente los que tán “Cinco contos pra xogar coa música”, os poemarios “O viaxeiro da noite” (Trabe, 2004) y “Trinquilintainas” (Trabe, 2008), el llibru “Contos, ducia e media d’eles” (Trabe, 2007) y l’antoloxía “Na boca de todos” (Conceyo da Veiga, 2007).

La Casa Cultura de Mieres va acoyer güei xueves, a partir de les siete y media la tarde, la presentación de la revista Estandoiru, espublizada pola editorial Universos. La revista ñació apocayá con un doble oxetivu “ser estandarte qu’enverede a la lliteratura d’anguaño”, y ser “finxu que tien pola carga”, nesti casu una carga “tan maraviyosa como desconocida: la lliteratura asturiana”.

Nesti primer númberu participen José Ángel Gayol, Xosé Lluis Campal y Aurora Sánchez, Costante Álvarez, Xurde Álvarez, Xulio Arbesú, María Jesús Rodríguez Gullón, Miguel Solis Santos y Sidoro Villa Costales, Hector Pérez Iglesias y Miguel Allende y Laura Marcos como traductora de W.W. Jacobs.

La parte gráfica complétase con semeyes cedíes pol Muséu del Pueblu d’Asturies. “esTandoriu” ta dirixida Pablo Rodríguez Medina, cuntando col sofitu del Conseyu editorial formáu por José Luis Rendueles y José Ángel Gayol.