Lliteratura

El próximu sábadu, 9 de mayu la Conseyería de ultura y Suburbia ediciones van presentar el poemariu “Les vides incompletes” de Xandru Fernández, ganador del premiu de poesía xuan maría acebal 2008.

La presentación tendrá llugar a les 12 na carpa central de lLlibruvieu, cola intervención del autor, la direutora de política llengüística Consuelo Díaz ya Ismael Piñera.

Güei, llunes 4 de mayu, entama la edición númberu trenta de la fiesta más importante pa les lletres asturianes, la celebración de la Selmana de les Lletres Asturianes, qu’esti añu ta dedicada a la escritora y periodista Enriqueta González Rubín. La Casa Cultura de Llanes ye’l llugar escoyíu pa la presentación de los actos y de la edición del llibru “Enriqueta González Rubin, el sinciu d’ua escritora del XIX”, volume ilustráu al rodiu de la escritora que va repartise de baldre nes llibreríes d’Asturies, el vienres 8, Día del Llibru Asturianu.

Esi mesmu día, pero yá en Ribeseya, va presentase la esposición “Viaxe al tiempu d’Enriqueta González Rubín”, que va tar abierta al públicu hasta’l 16 de mayu, n’horariu d’11 a 13 y de 18 a 20 hores, na Casa Cultura del conceyu oriental.

Mañana martes va presentase na Casa Cultura de Llanes la edición facsimilar de la obra atopada l’añu pasáu, y hasta entós perdida, “Viaxe del tíu Pacho el Sordu a Uviedo”, amás de celebrase una conferencia de la escritora Ángeles Caso col títulu “Las olvidadas: una historia de mujeres creadoras”.

D’equí al vienres van celebrase dellos actos más, nestos conceyos y n’Uviéu, onde los políticos asturianos van protagonizar una de les actividaes de la Selmana.

Programa completu de la Selmana de les Lletres

Anque l’asturianu tien una versión d’El Principín dende los años ochenta (de Xosé Lluis García Arias y Marta Suárez), el llibru presentáu estos díes en Lleón tien la peculiaridá de tar tornada a una variedá del asturianu de La Cabreira (Lleón).

El clásicu d’Antoine de Saint-Exupéry espublizáu estos díes ye frutu del trabayu de dellos mozos del llugar, que nun cursu nel que coincidieron fueron tornando la obra, teniendo como fontes más fiables de la so variedá llingüística, a los más mayores de les sos families.

La obra, na que puen lleese fragmentos como esti «Cuando you tenía seis años, vi una vé un dibuxu mui guapu ñun llibru sobre la selva virxen que se chamaba Historias vividas . Éste representaba a una culuebra, una boa, que xambriaba a una fiera», usa variedaes estremaes pa cada personaxe, asina, nesta versión espublizada pola editorial El Búho Viajero, la culiebra fala na variedá de La Cabreira Baxa, el Principín na de La Baña, y les roses, na de la Cabreira Alta…

Los traductores, coordinaos por Xosepe Vega, son Jonatan Rodríguez Bayo, Juan González Pérez, María José Madero Nieto, Belén González Pérez, Cristina Lordén Nieto, Patricia Alves García y Sandra González Carracedo.

Esti xueves 30 d’abril, a les 18,30 hores, nel Salón d’Actos de la Casa Municipal de Cultura de Llanera arrancaben los actos qu’a lo llargo de toa Asturies van dedicase a celebrar el Día de les Lletres Asturianes con una riestra d’actividaes que tienen al conceyu de Llanera como referente. L’escritor Héctor Pérez Iglesias (Arlós, 1978) presentaba les sos obres caberes “L’amarga cazumbre” y “Como crecieres tu”, editaes por TRABE nun salón d’actos onde nun cabía un alfiler y arropáu por Esther Prieto, en representación de la editorial Trabe, la profesora María Xesús Álvarez y los poetes Xuan Santori y Pablo Texón, xunta la conceyala de cultura Belén Rodríguez.

L’actu foi enforma emotivu y cuntó cola participación de dos alumnes de llingua asturiana del conceyu, Rosa y Marisa, que dieron llectura a dellos poemes del autor.

Esti poeta tien algamaos dellos premios ente los que s’alcuentren l’Asturies Xoven de Poesía de la Dirección Xeneral de la Mocedá o’l Teodoru Cuesta del Conceyu de Mieres. Tamién ganó’l Premiu Nené Losada Rico de poesía nel añu 2006, col poemariu “L’amarga cazumbre”, y con “Como crecieres tu” el Teodoro Cuesta en 2007.

David Artime ganaó’l segundu premiu Arbidel de cuentos eróticos n’asturianu, y Pablo Rodríguez fízose col áccesit d’un premiu que l’añu pasáu ganó Xosé Nel Riesgo.

El cuentu ‘Ella y Ariel’, del candasín David Artime Coto, foi’l ganador d’esta segunda edicición del concursu lliterariu Arbidel de cuentos eróticos n’asturianu, que convoca l’Ayuntamientu de Ribeseya dientro les actividaes de la Selmana de les Lletres Asturianes. El xixonés Pablo Rodríguez Alonso algamó l’áccesit, col cuentu ‘El confesor’, presentáu baxo l’alcuñu de Guillaume de Vielhà, sigún el comunicáu col qu’esti xueves asoleyaben el fallu del xuráu, compuestu por Ana Luz Prieto Vega, Roberto González-Quevedo González y Xandru Martino Ruz, faciendo de secretariu con voz, pero ensin votu, el Conceyal de Cultura del Ayuntamientu.

La entrega diplomes va ser esti prósimu miércoles, 6 de mayu, a les 19hores, na Casa de la Cultura de Ribeseya, nun actu incluyíu dientro de la programación de la Selmana de les Lletres.

Esti xueves 30 d’abril, a les 18:30 hores, nel Salón d’Actos de la Casa Municipal de Cultura de Llanera l’escritor Héctor Pérez Iglesias (Arlós, 1978) va presentar les sos obres caberes “L’amarga cazumbre” y “Como crecieres tu”.

Esti poeta tien algamaos dellos premios ente los que s’alcuentren l’Asturies Xoven de Poesía de la Dirección Xeneral de la Mocedá o’l Teodoru Cuesta del Conceyu de Mieres. Tamién ganó’l Premiu Nené Losada Rico de poesía nel añu 2006, col poemariu “L’amarga cazumbre”, y con “Como crecieres tu” el Teodoro Cuesta en 2007.

El Conceyu de Lleón, al traviés de la conceyalía de cultura lleonesa, organiza per segundu añu consecutivu, el “Ciclu de Conferencias Reinu de Lleón”, que va tener güei como conferenciante al catedráticu de Lliteratura Española na ULE, José Mª Balcells Doménech. L’actu va ser a les siete y media la tarde nel Palaciu Don Gutierre, asitiáu na ciudá de Lleón, y nél va falase de “Lliteratura medieval lleonesa”.

Programa completu del ciclu de conferencies

La tertulia cultural “El Garrapiellu” organiza’l primer Concursu de redaición escolar n’asturianu pa neños d’ente 10 y 12 años, qu’han escribir una carta al presidente los Estaos Xuníos d’América, d’ente 300 y 600 pallabres, enantes del 8 de mayu. El ganador va consiguir cien euros en tarxeta d’El Corte Inglés y dos entraes pal partíu Sporting-Recreativu del 31 de mayu.

El segundu premiu va constar de setenta y cinco euros en tarxeta d’El Corte Inglés y el terceru de 50 €. Amás, los tres primeros premios publicaránse na sección de llingua asturiana d’”El Comercio”.

Les cartes a Obama han mandase al corréu lletrónicu vicente_miguel_villazon@merck.com o en papel, a EL GARRAPIELLU, apartáu de correos 8133, Xixón.

La Selmana de les Lletres Asturianes qu’algama esti añu trenta ediciones, va n’esta ocasión a la figura de la narradora y periodista Enriqueta González Rubín y yá tien programa d’actividaes pa los díes 4 al 8 de mayu, y sobremanera nos conceyos de Ribeseya y Llanes.

El llunes 4 van presentase los actos na Casa Cultura de Llanes, amás de la edición del llibru “Enriqueta González Rubin, el sinciu d’ua escritora del XIX”, volume ilustráu al rodiu de la escritora que va repartise de baldre nes llibreríes d’Asturies, el vienres 8, Día del Llibru Asturianu.

Esi mesmu día va presentase la esposición “Viaxe al tiempu d’Enriqueta González Rubín”, que va tar abierta al públicu hasta’l 16 de mayu, n’horariu d’11 a 13 y de 18 a 20 hores, na Casa Cultura de Ribeseya.

El martes 5 va presentase na Casa Cultura de Llanes la edición facsimilar de la obra atopada l’añu pasáu, y hasta entós perdida, “Viaxe del tíu Pacho el Sordu a Uviedo”, amás de celebrase una conferencia de la escritora Ángeles Caso col títulu “Las olvidadas: una historia de mujeres creadoras”.

El miércioles 6, los actos treslládense a Uviéu, onde los políticos asturianos van facer una llectura pública de testos n’asturianu nel Salón Europa de la Xunta Xeneral.

Yá pela tarde, a partir de les 19 hores, va entregase’l Premiu Arbidel de cuentos eróticos en Ribeseya.

El xueves 7 de mayu va ocupalu l’actu escolar qu’esti añu va tener por sede Ribeseya y onde van entregase dellos premios infantiles. De tarde y tamién na villa del oriente, va celebrase la conferencia “L’aguya y la pluma: vida y obra d’Enriqueta González Rubín, a cargu de Taresa Fernández Lorences.

La xornada cabera d’esta Selmana de les Lletres va celebrase’l vienres con un actu institucional n’homenaxe a Enriqueta González Rubín qu’inclúi la inauguración d’una plaza conmemorativa y una ruta lliteraria pelos paisaxes de la obra de Rubín, amás de la presentación de la Obra completa de la escritora. Amás, a lo llargo de tol día la mayor parte de les llibreríes d’Asturies celebren el Día del Llibru Asturianu, con un descuentu del 10% y regalu del llibru yá citáu.

El sábadu la RPA va ufrir un programa sobre la vida d’Enriqueta González Rubín dientro del espaciu “Nomes d’Asturies”.

Programa completu de la Selmana de les Lletres

La escritora Aurora García Rivas, presenta, mañana miércoles, Día del Llibru, na biblioteca de Taramundi, el llibru infantil “Cinco contos pra xogar coa música”, cola intervención de los neños de la Escuela Infantil de Taramundi. Dempués va celebrase un “Cuentacuentos”, nel que se cuntará “Rebelión na caixa máxica” de la mesma autora.

Más tarde va presentase, na Casa de Cultura, “Contos, ducia e media d’eles” tamién de la mesma autora y cola presencia de delles asociaciones de Taramundi, de profesores y neños del CRA, y del alcalde, Eduardo Lastra, asina como de l’autora. Esti mesmu miércoles, pela tarde, van repetise los actos na escuela de Santiso.