Lliteratura

La editorial La Cruz de Grau y Xareos! Xestión Cultural van presentar el númberu 5 de la revista de lliteratura moza Formientu a lo llargo d’esta selmana y la siguiente. El primer actu va celebrase esti miércoles, 24 de xunu, a les 20:00 hores nel Cafetón d’Avilés.

El xueves, a les 20:00 hores, Formientu va llegar a la Casa Cultura de Grau, onde va presentase nun actu conxuntu, onde va entregase tamién el premiu de Cartes d’Amor, que ganó esti añu Rubén Rey, autor asoleyáu nel númberu presentáu de Formientu.

El xueves 2 de xunetu a les 20:00 hores nel Club de Prensa Asturiana de La Nueva España, n’Uviéu, el director de la revista, Inaciu Galán y González, l’editor Cesar García Santiago, la coordinadora del conseyu de redaición, Laura Marcos y dellos de los autores qu’espublicen nesti númberu, van presentar la revista na capital asturiana.

Nesti númberu apaecen testos de Rubén Rey Menédez, Javier Cubero de Vicente, Benxa Pérez, Héctor Pérez Iglesias, Inacio Rodríguez-Solar, Jorge Fernández García, Berto García, Laura Marcos Domínguez, Fran Melero «Frantxu», Verónica Canel y Miquel Martí i Pol tornáu por Iván Cuevas.

Formientu ñació nel añu 2006 dirixida por Inaciu Galán y embaxo la edición de Xareos! y dende entós vien espublizándose con regularidá, axuntando a los escritores más mozos del panorama asturianu d’anguaño. En 2008 Ediciones La Cruz de Grau asumió la xestión editorial de Formientu.

Formientu ta a la venta en Xixón; nes llibreríes Alborá, Paradiso y Central; Uviéu; nes llibreríes Ojanguren y Paraxuga y n’Avilés, nel Cafetón.

Web de Formientu

El Serviciu de Normalización Llingüística de Mieres organiza’l xueves que vien, 18 de xunu, nel Atenéu de Turón Recital, un recital de poesía moza, na que va poder charrase con dellos de los autores mozos más valoraos del panorama lliterariu asturianu: Carlos Suari (acabante de presentar el so llibru Orbayu d’alfileres), Pablo X. Suárez y Sofía Castañón.

La editorial La Cruz de Grau y Xareos! Xestión Cultural tán acabante asoleyar el númberu cinco de la revista de lliteratura Formientu, una publicación que busca asoleyar la obra de los autores más mozos de la lliteratura asturiana, dando a conocer a les nueves promeses de les nueses lletres.

“Col oxetivu de siguir meyorando na calidá lliteraria de la revista”, Formientu estrena Conseyu de Redaición, que pasa a ser fixu, de la mano de la filóloga y escritora Laura Marcos, como coordinadora, l’editor César García Santiago y l’escritor Bénxa Pérez. Un equipu “que vien a da-y a la revista un trabayu d’analís y esbilla más fondu”.

Como en cada númberu apaecen dellos nomes nuevos na revista, ye’l casu de Rubén Rey Menéndez, que vien col aval de dellos premios algamos y de Javier Cubero de Vicente, conocíu pol so trabayu como hestoriador n’otres publicaciones. Amás cunten con otra llarga riestra d’autores, espuesta más alantre, que vienen collaborando nel pasáu con Formientu y qu’amuesen novedaes, como les traducciones del catalán d’Iván Cuevas, feches con tol procuru y coles qu’abrimos una estaya inesplorada en Formientu, la de les tornes.

Apaecen nesti númberu: Rubén Rey Menédez, Javier Cubero de Vicente, Benxa Pérez, Héctor Pérez Iglesias, Inacio Rodríguez-Solar, Jorge Fernández García, Berto García, Laura Marcos Domínguez, Fran Melero «Frantxu», Verónica Canel, Javier Cayado Valdés, Miquel Martí i Pol tornáu por Iván Cuevas.

Formientu ñació nel añu 2006 dirixida por Inaciu Galán y embaxo la edición de Xareos! y dende entós vien espublizándose con regularidá, axuntando a los escritores más mozos del panorama asturianu d’anguaño. En 2008 Ediciones La Cruz de Grau asumió la xestión editorial de Formientu. La editorial prepara nesti momentu’l calendariu de presentaciones.

El coleutivu sociocultural de Les Filanderes convoca l’octavu concursu de rellatos curtios, centráu na realidá social de la muyer, pudiendo presentase trabayos n’asturianu y en castellán, d’ente trés y seis fueyes.

Los trabayos han mandase al Colectivu Sociocultural Muyeres “Les Filanderes”, cai Cipriano Pedrosa, edificiu RENFE, 33900; Sama (Llangréu).

Alborá Llibros, llibrería hestórica de Xixón, foi la llocalización escoyida pa la entrega de los premios Asturnews de lliteratura xuvenil ya infantil. Próspero Morán, director d’Asturnews, entregó a Lluis Portal Hevia’l primer premiu, dotáu con 1.000 euros, y los trés accésits de 200, a Jorger Fernández García, Abel Martínez y Marián García & Xurde Fernández.

Esti miércoles 8 xunetu, a les 20 hores, nel Club de Prensa de “La Nueva España” va presentase la “Poesía asturiana completa” de Lluis Xabel älvarez. Trátase d’una edición billingüe asturianu-castellán de los poemes del profesor d’estética de la Universidá d’uviéu fecha por Josep-Carles Laínez.

Nel actu van intervenir Roberto González-Quevedo, escritor y secretariu de l’Academia de la Llingua Asturiana, José Luis García Martín, escritor y crítico lliterariu y Consuelo Vega, escritora y Directora Xeneral de Política Llinguística del gobiernu asturianu.

Esti vienres 5 de xunu, a les 12 la mañana, nel hotel “Principado” (cai San Francisco 5 d’Uviéu), tuvo llugar l’actu d’entrega de los premios a los ganadores de los Concursos de l’Academia de la Llingua Asturiana 2009: Concursos d’Investigación ; Concursu de llectures pa rapazos; Concursu de creación lliteraria, premiu “Llorienzu Novo Mier”; Concursu de recoyida de material lliterario oral; Concursu de Teatru y de recoyida de material lliterario escrito, y del premiu “Federico González-Fierro Botas”, al mesmu tiempu que quedaben convocatos los premios de 2010 y se facía l’anuncia de que cada añu na entrega de los premios van presentase les ediciones de los premiaos nel añu anterior.

Los primeros premios n’entregase foron los del apartáu de recoyida d’información toponímica, onde foron premiaos un trabayu sobre los topónimos de les parroquies de les parroquies de Zarréu y Degaña, del que ye autor Francisco Javier Redondas Maseda y los áccesit de los trabayos sobre les parroquies de Llatores (Uviéu), por Gabino Arcadio Alonso; Felgueras (L.lena) de Verónica y Raúl Fueyo Alcedo; y La Marea (Piloña), de María Aurina González Nieda.

Lluis Portal Hevia foi’l ganador del Concursu de Llectures pa Rapazos, por trabayu tituláu ‘Pelegrinos del abismu’. Mientres, el poemariu tituláu ‘Cuando’l mundu debala’, del que ye autor Berto García García, ganó’l premiu ‘Llorienzu Novo Mier’. Nel apartáu de teatru, ganó la obra titulada ‘La fuxida’, de la que ye autor Xaviel Vilareyo.

Los últimos premios entregaos foron los del concursu de recoyida de material lliterario escrito ‘Premiu Federico G.-Fierro Botas’, onde se dio un accésit de 300 € al trabayu tituláu ‘Poesíes asturianes de Carlos de la Concha’, de Rafael Rodríguez Valdés, amás d’otros dos a los trabayos titulaos ‘Testos asturianos en prosa’, de José Luis Campal y Aurora Sánchez, y al trabayu ‘Amuesa de publicidá en llingua asturiana’, d’Inaciu Galán.

Dientro de los trabayos d’investigación quedaron ermos los de la categoría de recoyida oral de material léxico y d’investigación llingüística y los de cómics y curtios cinematográficos n’asturianu.

Esti vienres 5 de xunu, a les 12 la mañana, nel hotel “Principado” (cai San Francisco 5 d’Uviéu), tendrá llugar l’actu d’entrega de los premios a los ganadores de los Concursos de l’Academia de la Llingua Asturiana 2009: Concursos d’Investigación (de recoyida de material toponímico oral y d’investigación sobre lliteratura asturiana); Concursu de llectures pa rapazos; Concursu de creación lliteraria, premiu “Llorienzu Novo Mier”; Concursu de recoyida de material lliterario oral; Concursu de Teatru y Concursu de recoyida de material lliterario escrito, y del premiu “Federico González-Fierro Botas”.

El próximu martes día 9 de xunu, a les 19.30 hores, va presentase na llibrería Cervantes d’Uviéu (calle Doctor Casal, 12), el llibru Una olhada diversa/Una mirada diversa, coeditáu pola Conseyería de Cultura y Turismu y la editorial Trea. Esta obra, coordinada por Xuan Bello, ye un homenaxe al fondu poéticu portugués, esencial pa esplicar el movimientu de recuperación que la lliteratura asturiana vivió nos años ochenta.

Dende l’apaición en 1985 de Memoria d’outru ríu, de Eugénio de Andrade, los nomes de Jorge de Sena, Sophia de Mello y João Camilo, ente más otros, foron pa los escritores asturianos un espeyu onde se mirar y del que salieron palabres contra la escuridá. Esta antoloxía recueye estes voces y esta delda asturiana con Portugal.

Xuan Bello, Antón García, Berta Piñán, Esther Prieto, Vanessa Gutiérrez, Martín López-Vega y Henrique Facuriella son los responsables de les traducciones.

Güei, miércoles 3 de xunu, a les ocho la tarde, l’escritor y periodista deportivu Carlos Suari, va presentar el so poemariu “Orbayu d’alfileres” nel chigre La Casa Posafuelles, asitiáu nel númberu 10 de La Cuesta la Vega d’Uviéu. La obra ye’l primer volume de poesía espublizáu en papel por Suari.

La editorial Suburbia espubliza esti llibru de poesía onde l’autor remata’l ciclu poéticu qu’entamara en Treslallende, escrito a comuña con Berto García.

Carlos Suari presenta na TPA “Al aldu: a galmiaes”, onde fai un repás selmanal a l’actualidá deportiva d’Asturies. Na RPA dedícase a esparder los xuegos y deportes tradicionales asturianos nel programa “Acuto”, que s’emite los sábados ente les 13:00 y les 13:30 hores. Como escritor tien collaborao en revistes como Formientu o Lletres Asturianes, espublizando’l primer poemariu en llinia y con llicencia Copyleft, “El mio cachu tírolu”.