Lliteratura

El Paséu de Begoña de Xixón va acoyer, organizáu pola Gremiu d’Editores d’Asturies, el VII Salón del Llibru Asturianu de la villa de Xovellanos. Mañana xueves a les 18.30 hores, van inauguralu, el viceconseyeru de Cultura, Jorge Fernández León, y la presidenta del Gremiu, Marta Magadán.

Nestos díes, el Salón va cuntar con esposiciones, presentaciones y firmes de llibros y revistes, como Formientu, que va presentar el so númberu 5 el sábado 22 d’agostu a les seis y media de la tarde.

El Centru Asturianu de Madrid convoca’l VIII Concursu de Relatu Curtiu en llingua asturiana, que ta abiertu a rellatos d’argumentu rellacionáu con Asturies o la emigración asturiana con un mínimu de 10 fueyes y un máximu de 20.

El Premiu, que lleva’l nome de Xosé Álvarez otogar al trabayu ganador 1.500 euros, espublizándolu darréu, el Conseyu de Comunidaes Asturianes.

El plazu de presentación de trabayos termina’l miércoles 30 de setiembre y han mandase a Centru Asturianu de Madrid (C/. Farmacia nu 2, 28004-Madrid) indicando que ye pal Concursu de Relatu Curtiu n´Asturianu – Centru Asturianu de Madrid.

Bases completes del concursu

Ediciones Trabe va alternando cada añu los dos premios lliterarios que promueve, el PREMIU MONTESÍN DE LLITERATURA XUVENIL, ganáu na convocatoria de 2008 por Vicente García Oliva, cola novela Fontenebrosa: la rebelión de los homosaurios, y el PREMIU DE NARRACIONES TRABE, que na convocatoria del 2007 ganó Pablo Antón Marín Estrada cola novela La boca puerca, yá publicada.

Por ello, Ediciones Trabe convoca, cola axuda de la Conseyería de Cultura y Turismu del Principáu d’Asturies, El PREMIU DE NARRACIONES TRABE del añu 2009 que va rixise poles siguientes

Primera: puen participar toles persones interesaes, soles o en grupu, ensin límite d¹edá, con obres de narrativa en llingua asturiana, yá sían noveles, recopilaciones de cuentos o cualesquier otra forma posible de narración.

Segunda: los trabayos presentaos nun tendrán menos de sesenta páxines DIN A-4 o foliu mecanografiaes a doble espaciu per una sola llana (1.800 caracteres). Han ser inéditos y han tar ensin premiu n¹otros concursos como conxuntu, quier dicise, puen presentase obres de les qu¹apaecieren fragmentos publicaos, o recopilaciones de cuentos onde hebia dalgún editáu.

Tercera: el premiu tien una dotación de 3.000 euros en conceptu de drechos d¹autor y la so publicación dientro de dalguna de les colecciones de la casa. El xuráu pue partilu, conceder accésit, recomendar la publicación d¹otres obres o dexalu desiertu según aconseye la calidá de los trabayos presentaos.

Cuarta: les obres han mandase, per corréu o en mano, en cinco copies a Ediciones Trabe, S. L., c/ Padre Buenaventura de Paredes, 4, 33001 d¹Uviéu, enantes de les 24 hores del día 30 de payares de 2009, faciendo constar la siguiente lleenda: PREMIU DE NARRACIONES TRABE 2009. Puen presentase de dos xeitos: firmando col nome, dirección y teléfonu o baxo plica, quier dicise, figurando dientro d¹un sobre zarráu los datos del autor y fuera¹l títulu de la obra presentada y l¹alcuñu col que se presenta, d¹habelu.

Quinta: el xuráu tará formáu por persones rellacionaes col ámbitu de la lliteratura asturiana. Como secretariu o secretaria, con voz pero ensin votu, actuará un representante d¹Ediciones Trabe.

Sexta: al fallu del xuráu nun se pue retrucar. Fairáse públicu enantes del día 31 de xineru de 2010. El xuráu queda autorizáu a abrir la plica de les obres premiaes y de les que recomiende pa publicar. Pal casu de les obres que nun reciban premiu económicu, Ediciones Trabe tien que se poner d¹alcuerdu col autor o autores enantes d¹entamar la so edición.

Sétima: los trabayos que nun se premien volveránse a los autores, en pidiéndolos éstos, nos tres meses siguientes a que se dea conocencia del fallu. Desque pase esti plazu ensin que naide los reclame pasarán a formar parte del archivu editorial.

Octava: presentase al premiu supón tar d¹alcuerdu coles bases. Les cuestiones que se plantexen y que nun tuvieren establecíes nestes bases podrá resolveles el xuráu.

L’Asociación Cultural l’Arribada tien abiertu’l plazu pa presentar candidatures al III Premiu Timón, col que faen reconocencia d’una trayectoria lliteraria en llingua asturiana d’especial valir. El plazu va tar abiertu hasta’l 30 d’agostu viniente. Les candidatures puen tar presentaes por una persona o un colectivu al corréu larribada@gmail.com

Al certame puen presentate candidatures d’autores ñacíos nel añu 1.959 o anteriormente. Al efectu de fallar el premiu, l’asociación convocante aconceyará un xuráu integráu por persones venceyaes a la cultura del país. Esta distinción, que consiste nuna obra del escultor y ceramista xixonés Jesús Castañón, va entregase demientres la celebración de l’Arribada 2009. Los ganadores anteriores fueron, en 2007, la va poco fallecida Nené Losada Rico y, en 2008, Xuan Xosé Sánchez Vicente.

La editorial lleonesa Llibros Filandón, que yá espublizare títulos en lleonés como “Poemas pa nun ser lleidos”, ta acabante espublizar el segundu títulu de la colección de poesía La Ponte de Santa Catalina, El ñegru amor, de Ramón Rei, nomatu embaxo’l que se presenta un escritor anónimu d’orixe lleonés, según informa la editorial.

Na obra, Rei percorre la xeografía emocional de la rellación amorosa. Los poemes “son paraes curties al traviés de les que se traza un viaxe, non pela dimensión filosófica, nin tráxica, nin siquiera llírica del sentimientu amorosu, sinón polos estaos emocionales qu’avecen a definir les diferentes hores nes que se dixebra esi curtiu y únicu día nel que suel vivir l’amor.”

El puestu de la editorial La Cruz de Grau na Selmana Negra de Xixón va acoyer la presentación del númberu cinco de la revista de lliteratura moza Formientu. Nel actu van tar presentes César Santiago García, editor y Benxa Pérez, escritor y miembru del conseyu de redacción de la revista, amás d’otros autores por confirmar.

L’actu va celebrase esti sábadu nel espaciu de La Cruz na faza de llibros de la Selmana Negra, de magar les ocho la tarde.

El congresu “L’Arribada” d’esti añu va tratar dellos aspectos venceyaos a la realidá llingüística y lliteraria del Navia-Eo, según anunció la organización nel so blogue. Amás de la presentación de novedaes editoriales, incidiráse nes obres empobinaes al públicu infantil per aciu de trés autores de la fastera; Aurora García Rivas, Belén Rico y Marisa López.

Amás, va analizase’l papel de los medios de comunicación na difusión del gallego-asturianu, nuna mesa d’alderique con periodistes y xestores culturales, y tamién habrá llugar pa la música de la mano d’Eva Rico, componente del grupu Darbuka. La xornada dedicada al Navia-Eo será’l xueves, 1 d’ochobre, y va desenrrollase nel Muséu del Ferrocarril de Xixón.

La editorial La Cruz de Grau, a comuña cola Casa Cultura de Grau y la Biblioteca Municipal “Valentín Andrés Álvarez”, convoca un concursu de narrativa pa noveles escrites n’asturianu o en castellán con tema llibre y una estensión d’ente 100 y 150 fueyes. El plazu d’almisión termina’l 30 d’ochobre y el premiu ta dotáu con 600 euros.

Los testos han presentase por cuadruplicáu a cai Cerro de La Muralla, s/n 33820 Grau o per corréu lletrónicu a edlacruzdegrado@yahoo.es

La entrega del premiu va celebrase na primer selmana de xinero de 2010 dientro del II Salón del Llibru Asturianu de Grau, organizáu pola conceyalía de cultura del conceyu y el Gremiu d’Editores d’Asturies. Ediciones La Cruz de Grau va espublizar la primer edición de la obra.

El premiu ta dedicáu a la escritora ñacida en Robléu nel conceyu de Grau en 1895. De formación autodidacta, alquirida nos frecuentes viaxes realizaos al estranxeru, qu’espertaron n’ella la vocación d’escritora. Amás de numeroses collaboraciones en revistes estatales ya hispanoamericanas, ye autora d’una zarzuela de costumes asturianes en dos actos y cinco cuadros, en prosa y versu, titulada “El amigo traicionado”, Madrid (1929).

Bases completes del premiu

El Serviciu de Mocedá de la Comarca de la Sidra yá tien abiertu’l plazu de receición d’escritos al IV Concursu de microrrelatos 2009-lliteratura comprimida. Una convocatoria añal col sofitu de Caxastur que premia con 600 euros un relatu d’hasta 200 palabres, escritu n’asturianu o castellanu. El concursu ta empobináu a mozos y moces de menos de 35 años d’edá y pueden mandase hasta’l 30 de setiembre un máximu de dos relatos por persona.

Bases y la tramitación completa del concursu (formulariu d’inscripción, unviu, etc.)

L’asociación Xareos! y la revista Formientu, en collaboración cola editorial La Cruz de Grau, convoquen el I Certame de Microrrellatos Mozos «Formientu» “col envís d’afalar la creación lliteraria ente los escritores más mozos y ayudalos a esplorar les sos posibilidaes”. El plazu ta abiertu hasta’l 31 d’agostu d’esti añu.

La escritura de microrrelatos mínimos ye, según los responsables de la revista Formientu, “ un exerciciu perfectu pa desendolcar esa capacidá de síntesis y suxestión capaz de impactar al llector y dexalu prendáu d’una historia”, ye por ello que convoquen esti concursu nel que puen participar toes aquelles persones nacíes de 1975 n’adelantre, con un númberu ilimitáu de microrrellatos, de tema llibre y escritos n’asturianu.

El llargor máximu de los rellatos ha ser d’ochenta caracteres (aproximadamente una llinia de procesador de testos a tamañu de lletra 12) cuntando espacios, apóstrofos, guiones, puntos y comes.

Los rellatos han unviase al corréu lletrónicu formientu@xareos.com unviando los datos personales (nome, teléfonu, dirección y curriculu curtiu) nun archivu axuntáu al corréu.

D’ente los rellatos recibíos van otorgase trés premios (compuestos por un llote de llibros y la espublización del rellatu na revista Formientu) y un númberu ilimitáu d’accésits, que van espublizase na revista. El certame pue quedar ermu.

Bases completes del concursu de microrrellatos