Lliteratura

La Conceyalía de Cultura y Deportes del Conceyu de Tinéu, en collaboración cola Conseyería de Cultura, convoca’l XII Certame Lliterariu César Feito, abiertu a la participación de tolos escolinos del conceyu, ente 0 y 16 años, xebraos, eso sí, en delles categoríes.

Les obres han presentase n’asturianu y con un máximu d’ocho fueyes. Les categoríes son: hasta los 9 años, ente los 10 y los 13, y ente 14 y 16 años.

La entrega de premios va facese’l día 11 d’avientu nel Cine Marvi de Tinéu y el plazu pa entregar les obres acaba’l 20 de payares. Los orixinales recuéyense nes Cases de Cultura de Tinéu y Navelgas.

“El Espinete”, fanzine cultural del Occidente qu’espublizó’l so primer númberu en marzu de 2002, ta acabante espublizar el númberu 20, teniendo como principal novedá un cambiu, “más cómodu y remanable”, según los editores. Amás, el diseñu corre a partir d’agora a cargu del estudiu de diseñu gráficu y puntoypixel.es . La revista espubliza testos en delles llingües, ente elles asturianu y gallego-asturianu.

Nesti númberu atópense testos de Jesús Barrera Toribio, Claudio Castillo Díaz, Moisés Cima Fernández, Xuan Carlos Crespos Lanchas, Carlos G. Torrico, Javier García López, Pedro Gilthoniel, David Ginzo, Roberto Carlos Obarri, Xurde Portilla Lejarza, Óscar R. Flores, Francisco Romero, Pilar S. Tarduchy, y Manolo Turnes “El Virginiano”.

La revista pue consultase yá en formatu dixital, y tará nes biblioteques del occidente asturianu y en papel, pa finales d’ochobre. Los interesaos en recibir nes sos cases y de baldre “El Espinete” han mandar un corréu cola so dirección postal a contacta@quefemos.com .

Descarga la revista de baldre

La sede de la Conseyería de Cultura y Turismu del Principáu d’Asturies recibió la presentación del programa del I Festival del Llibru Infantil y Xuvenil, que va facese en Villaviciosa dende’l xueves 15 hasta’l domingu 18 d’ochobre y que va acoyer una gran variedá d’actividaes, ente les que van tar la presentación d’obres de publicación recién; la realización de talleres cola participación d’escritores asturianos; la celebración de conciertos didácticos y actuaciones musicales; sesiones de teatru infantil y cuentacuentos…

La Comarca de la Sidra, co-organizadora, tien un pesu especial con diverses actividaes rellacionaes cola comarca, mesmo que’l Gremiu d’Editores d’Asturies, que va esponer les últimes novedaes del mercáu editorial, que van poder mercase con un 10% de descuentu.

La celebración d’actuaciones de maxa o la posibilidá de prebar el xuegu didácticu Colás y Xana. Vivir n’asturianu son otros de los atractivos que va ufrir el Festival, que convoca a un públicu infantil, xuvenil y adultu a descubrir y redescubrir los llibros y los mundos creativos que d’ellos se deriven.

Demientres les dos primeres xornaes del Festival -xueves 15 y vienres 16- ta programada la visita d’escolares de los centros educativos de la Comarca de la Sidra. Un total de 1000 alumnos de 12 centros van participar nes actividaes programaes y van poder tomar parte nel “I Concursu de Relatos Ilustraos n’asturianu”, del que los premios van entregase na mañana del domingu.

Programa completu del Festival

L’Asociación d’Escritores d’Asturies entregó ayeri nel Salón d’Actos de Caxastur, n’Uviéu, y cola presentación de los periodistes Ana Luz Suárez y José Ramón Patterson, los X Premios de la Crítica d’Asturies y el IV de les Lletres d’Asturies, que foi nesta ocasión pal profesor eméritu José María Martínez Cachero.

L’escritor y ex Presidente d’Asturies, Pedro de Silva, recibió’l Premiu de la Crítica en columnismu lliterariu. En cuantes a la categoría de novela, n’asturianu quedó ermu, mientres qu’en castellán el premiu foi pa Ricardo Menéndez Salmón por “Derrumbe”. “Los círculos concéntricos” d’Alejandro Céspedes, llevó’l premiu a poesía en castellán, mientres que n’asturianu, por “Robinson Astur”, llevólu Elias Veiga.

El meyor cuentu en llingua española foi según los críticos “No gana uno para sustos” de Jose Luis Espina, y n’asturianu “La fábrica de Lluz”, de Xuan Santori.

En narrativa de non ficción “A mordiscos” de Jesús Palacios resultó premiada.

En lliteratura infantil y xuvenil, el premiu en castellán foi pa “El viaje de Tin y Ton” de Miguel Rojo; y n’asturianu pa Berta Piñán por “Les coses que-y presten a Fran”.

El Serviciu de Normalización Llingüística (SNL) y el Conceyu de Cangas del Narcea tán acabante convocar la octava edición del Concursu de Rellatos Curtios del Conceyu de Cangas del Narcea, al que puen presentase obres n’asturianu estándar o con rasgos occidentales.

El concursu ta abiertu a los mayores de 16 años, pudiendo presentar una obra por participante, de temática llibre y con una estensión de cinco fueyes como mínimu y venti como máximu, con una presentación en DIN A4 a espaciu doble.

Los premios son de 400 euros pa la obra ganadora y otros 400 pal meyor rellatu escritu na variante occidental del asturianu.

Los trabayos hai que los presentar por triplicao nes oficines del SNL de Cangas del Narcea (Cai Uría, 13, baxu, 33800 Cangas del Narcea) o per corréu certificáu a la mesma dirección, nun sobre ensin remite que lleve dientro otru sobre ciarráu nel que tean tolos datos del autor o autora, hasta l’11 de payares.

El xuráu de la primer edición del I Premiu “Formientu” de Microrrellatu Mozu, formaú pol escritor Xuan Xosé Sánchez Vicente; el xerente d’ediciones La Cruz de Grau, Cesar García Santiago; la filóloga y escritora Laura Marcos; l’escritor Benxa Pérez y el director de la revista Formientu, Inaciu Galán, como secretariu, y al traviés de conceyu virtual, decidió declarar ganadores del certame ex aequo a Pablo A. Quiroga Prendes y Rubén Rey Menéndez.

El premiu convocáronlu ’asociación Xareos! y la revista Formientu, en collaboración cola editorial La Cruz de Grau, “col envís d’afalar la creación lliteraria ente los escritores más mozos y ayudalos a esplorar les sos posibilidaes”.

-Vivía ente l’angustia y l’espectáculu. Suicidóse en Cuadonga, dempués d’una misa.

-DESPIDIDA:

Quería mover los llabios pero namás foi a zarrar los güeyos.

Una vegada abiertes les pliques resultaron ser obra de Pablo A. Quiroga Prendes y Rubén Rey Menéndez, respectivamente.

El Xuráu decidió otorga-yos accésits a los microrrellatos y autores que siguen darréu:

-Güeyando al pá, el xatu dixo mui enfotáu a la vaca: -Ma, de mayor voi ser llobu.

de Blanca Martínez Sancho

-Pueo resumite la vida en diez minutos. La punta d’un iceberg en mediu l’océanu.

de Raúl García García

-Namás sentila esguilaba pel árbol p’apalpiala, pero’l cielu inda taba lloñe.

-Pal nuesu aniversariu de namoraos regale-y el GPS que la llevó a conocelu.

-De sópitu nun había gravedá. Esquivó’l semáforu pero comiólu la osa mayor.

de Pablo A. Quiroga Prendes

-SECRETU:

Pa cuando algamó’l valor pa cuntá-ylo, ella yá se durmiere.

-NAMÁI UNA IDEA:

Decatóse yá ensin remediu de que la mayor arma de destrucción taba na so mente.

-CARPE DIEM (I):

Dicíen-y: esfruta la vida. Pero naide-y dixo cómo. Enteróse a un añu de morrer.

-ALQUILERES:

Alquílase compañeru de pisu silenciosu.

de Jorge Fernández García

Amás, el xuráu encamienta la espublización de los siguientes microrrellatos:

-Fiede como a primeru de payares. Arume llonxanu: flores ¿algodón y madera?
-Daqué que faiga escaecer la crisis y los dexe’n casa. ¡A! Gripe, por exemplu…

de Paulino Feito Alonso

-Él, que daba’l premiu al ganador, ufiertóme’l troféu a cambiu d’una felación.

de Pablo A. Quiroga

-REGRESU:

Sentíase un estrañu na so casa; hasta que vio la bruesina que-y ficiera´l buelu.

de Rubén Rey Menéndez

-PÁLPITU:

Aportó corriendo a casa y al entrar atopólu nun charcu sangre. Aínda boquexaba.

-SANGRÍN:

Trespasó les puertes cola sorrisa na boca y les manes enllenes de sangre.

-BÍBLICU:

Cuando’l “Verbu” fíxose carne; el “Suxetu” fíxose pan.

-TESTAMENTU:

“Y a elli, nun-y dexo nada”.

de Jorge Fernández García

ENTREGA DE PREMIOS

Los rellatos van espublizase nel númberu 6 de la revista Formientu, mientres que los premios van entregase nel actu de presentación de la mesma publicación, a lo llargo del mes d’ochobre.