Lliteratura

La revista gratuita de les Biblioteques Públiques d’Asturies, , ta acabante aparecer con un númberu nuevu, y yá van 15. La revista, que tien a Ignacio Del Valle como tema central, inclúi un reportaxe sobre’l llibru lletrónicu y artículos dedicaos a la biblioteca asturiana de Carmen Díaz Castañón, crítiques lliteraries, noticies o les biblioteques públiques de Llaviana y Soto Ribera.

Nesti númberu protagonicen l’alderique a tres bandes Xosé Ambás (ivestigador del folkor asturianu), Anabel Santiago (cantante) y Ismael Arias (director de la Casa la Cultura de Mieres y estudiosu de la tonada), falando alredor de la “Revolución na tradición”.

Anunciólo’l conceyal de cultursal, José Suárez Arias-Cachero “Felechosa”, la falta de fondos “qu’en tiempos de crisis han empobinase a otros gastos” acaba cola convocatoria del premiu de novela «Tigre Juan», que llevaba trenta años n’activu y de los premios «Uviéu», que llevaben trés ediciones, espublizándose los ganadores cola Academia de la Llingua Asturiana.

La nueva “política d’austeridᔠdel conceyu va caltener esta decisión polo menos nos próximos dos años.

La Biblioteca de Grau “Valentín Andrés Alvarez” adelanta la celebración del Día de la Biblioteca (24 d’ochobre) al vienres día 23 d’ochobre. A les 18 hores y nes propies dependencies de la Biblioteca va celebrase una sesión de cuentacuentos y la presentación de los nuevo marcapáxines del VIII Concursu Escolar.

En 2009 asocedió un récord de participación, con 508 dibuxos presentaos por alumnos d’Educación Infantil, Primariu y Secundariu de Grau. Los ganadores d’anguaño fueron: Ángelo Miguel Zurga Guerra d’Educación Infantil de 3 años del Colexu Públicu Virxe del Fresno; Carlos Lavilla Fernández d’Educación Infantil de 5 años del Colexu Bernardo Gurdiel; David Pastur Fernández categoría B (Primer ciclu de Primariu) del Colexu Bernardo Gurdiel; Amor Cuervo González categoría C (2º ciclu de Primariu) del Colexu Bernardo Gurdiel; Andrea Muñiz González de categoría D (3º ciclu de Primariu) del Colexu Públicu Virxe del Fresno; Nerea Menéndez Fernández de categoría E (Secundariu) IES Ramón Areces.

Dende la Biblioteca y la Concejalía de Cultura del Ayuntamientu de Grau agradecierone estos díes “la collaboración de los profesor y equipos directivu de los centros escolares de Grau, según la participación masivu de los escolares”. L’actu sirvirá tamién pa convocar formalmente la IX edición d’esti concursu.

Consulta los marcapáxines ganadores

Acaba facese público una convocatoria abierta pa participar na Xunta d’Escritores Asturianos 2010 que tendrá llugar n’Uviéu los díes 11, 12 y 13 de xineru, coordinada por Xaviel Vilareyo. La convocatoria pa participar nesta Xunta ta dirixida a los escritores en llingua asturiana de cualesquier estaya interesaos en participar y aportar les sos idees mediante un ciclu de conferencies, alderiques, presentaciones de llibros y otres actividaes culturales al rodiu del fechu d’escribir n’asturianu.

Nesta edición el lema de les xornaes va ser “Lliteratura asturiana, identidá y nación” y cómo estos aspectos afecten al fechu d’escribir nuna llingua minorizada y non oficial como l’asturiana frente a otres de más prestixu institucional y los medios pa superar cola lliteratura esta situación de desventaya, asina como les relaciones esistentes ente identidá y lliteratura, cara al futuru de los nuevos escritores, ente otros temes.

Los interesaos en participar nesta Xunta d’Escritores Asturianos 2010 pueden facelo comunicando les sos propuestes al corréu lletrónicu xuntadescritores@wanadoo.es

Güei, xueves 22 d’ochobre, a les 19:30 hores, na Librería Cervantes d’Uviéu, asitiada na cai Doctor Casal, José Luis García Martín va presentar el so llibru últimu “Hotel Universo”. La obra del poeta, críticu lliterariu, traductor, autor d’obres naratives y de teatru, y profesor de la Universidá d’Uviéu va presentase cola compañía de Rosa Navarro Durán, filóloga y catedrática de la Universidá de Barcelona.

Antón García va presentar el so llibru últimu “Xente tan cerca”, esti martes, 20 d’ochobre, na Llibrería Cervantes d’Uviéu y a partir de les 19.00 hores. Nel actu va cuntase, amás de con García, cola intervención d’Enrique del Teso, profesor de la Universidá d’Uviéu y decanu de la Facultá de Filoloxía.

Xente tan cerca (Ámbitu, 2009) ye una colección de rellatos impecable. Como narrador, García aprovecha cualesquier material: anécdotes d’escritores de sieglos pasaos, histories familiares sorprendentes, vides entrañables marcaes pol desconsuelu, la rareza o la llocura, o él mesmu, que se presenta en dalgunos rellatos d’esti llibru como un personaxe más.

Cadavéu, pueblín del Conceyu de Valdés, va acoyer esti sábadu, 24 d’ochobre de 2009 y en coincidencia col Día de la Biblioteca una Xunta d’Escritores n’homenaxe a Nené Losada y al Padre Galo. Na inauguración, a les 10:30 hores, van tar Roberto González-Quevedo, de l’Academia de la llingua Asturiana, Juan Fernández Pereiro, alcalde de Valdés, Néstor Xosé Fernández, Conceyal de Cultura, Ana Cámara, Xefa de la Seición de Coordinación Bibliotecaria de la Conseyería de Cultura y Turismu y Consuelo Vega, Direutora Xeneral de Política Llingüística del Pricipáu d’Asturias.

A les 11, Roberto González-Quevedo. Escritor y miembru de númberu de l’Academia de la Llingua Asturiana, va dar llectura a la pirmer ponencia “Pol camín del Padre Galo”, celebrándose a les 11:30 delles meses de trabayu, sobre Escribir n’asturianu, coordinada por Mª Esther García López, escritora y miembru correspondiente de l’Academia de la Llingua Asturiana; sobre editar n’asturianu, coordinada por Carmen Guardado Parga, escritora y profesora de L.lingua asturiana y sobre lleer n’asturianu, al cargu de Cristina Álvarez y Santiago Pérez, directores de biblioteques del occidente.

Dempués de la xinta, amenizada pola actuación de gaiteros de la Banda de Gaites “Faro de Luarca”, Xosé Nel Fernández Riesgo, escritor, va falar de la lliteratura en llingua asturiana como elementu na construcción de l’Asturies del sieglu XXI.

A les cuatro van siguir les meses de trabayu, dando llectura a les conclusiones a les cinco.

Yá a les siete, va celebrase’l pieslle oficial con un Homenaxe a Nené Losada, a cargu de Mª Esther García López; otru al Padre Galo, por María Regla Rico, de Cadavéu; y delles pallabres de les autoridaes ellí presentes.

L’actu ta abiertu a los escritores y xente venceyao a la llingua asturiana que quiera asistir, pero ye necesario avisar por cuestiones d’organización.

El vienres pasáu, la Biblioteca de Bidebarrieta de Bilbao celebró un recital de poesía nel que participaron voces de toles lliteratures del estáu. Nel mesmu los versos de Xuan Bello, de la so propia voz, representaron a la lliteratura asturiana dientro de la conocida como “Bilbaopoesía” o Selmana de la poesía en Bilbao.

Amás, pudieron sentise les voces de’l valencianu Carlos Marzal, l’andaluza Ana Rossetti, la hispano-belga Chatall Maillard, l’aragonés Manuel Vilas, el vascu Kirmen Uribe, la gallega Olga Novo y la catalana Laia Noguera.

La editorial xixonesa Suburbia Ediciones edita Volta de Paso, el primer poemariu editáu n’eonaviegu de la editorial. L’autor, Arturo Álvarez Fernández, más conocíu como “Tangueiro” foi’l ganador del I Certamen de Poesía na Fala “Aria” col poemario Pedras Moles, tien tamién delles poemes incluyíos nas antoloxíes “Unde letras falan” y “Na boca de todos”.

La presentación va celebrase esti vienres, 16 d’ochobre, a les nueve la nueche, na Casa Cultural d’As Figuiera, en Castropol.

L’Ayuntamientu d’Ayer convoca esti Premiu de Poesía nel que pueden participar con obres n’asturianu o castellán de tema llibre. El poemariu ha tener un llargor mínimu de 250 versos y máximu de 500, pudiendo presentase orixinales hasta’l 30 de payares.

El Premiu ye de 2.000 euros, 1000 euros pa cada modalidá llingüística, teniendo que se mandar los trabayos per corréu certificáu a la Casa de la Cultura del Escmu. Ayuntamientu d’Ayer, asitiada n’Avenida de la Constitución 31, 33670 Morea d’Ayer, conseñando nel sobre “Pal XIX Premiu de Poesía Elvira Castañón”.

Más información na Casa Municipal de Cultura, nel teléfonu 985 482 885 o nel corréu lletrónicu cmc@ayto-aller.es

Bases completes Premiu Elvira Castañón