Lliteratura

El Centru Asturianu de Madrid ta acabante espublizar nun volume les dos obres ganadores que convoca esta entidá anualmente. Nel llibru recuéyense los rellatos «Ferre o palomba» (ganador), del maliayu Lluis Portal Hevia, y «L’Abadía» (accésit), del xixonés Pablo Rodríguez Alonso. El concursu convócase en collaboración col Conseyu de Comunidaes Asturianes.

La Directora Xeneral de Política Lingüística, Consuelo Vega Díaz, anunció güei na Casa Cultura María Josefa Canellada, de Cabranes, el fallu del xuráu de la segunda edición del premiu que lleva’l mesmu nome y que concede la Conseyería de Cultura dende l’añu pasáu, cuando ganó Berta Piñán.

Nel xuráu, qu’aconceyó a les 11.30, nel mesmu llugar, tuvieron Consuelo Vega, l’alcalde de Cabranes, Alejandro Vega Riego, y les escritores Mª Luz Pontón y Maite González Iglesias, tando presente’l fíu de la escritora a la que ta dedicáu’l gallardón Alonso Zamora Canellada.

Otros tres trabayos optaben a esti premiu, dotáu con 7.000 euros. Ente les obres presentaes, el xuráu decidió por unanimidá conceder el Premiu al testu tituláu “Les puertes del paraísu”, al valorar que se trata d’una novela dirixida a un públicu xuvenil que pue interesar tamién a un públicu adultu y que trata’l tema de la emigración asturiana a Estaos Xuníos a finales del sieglu XIX con una estructura qu’alterna dos planos espaciales (Asturies y Estaos Uníos).

González Arias presentó’l testu embaxo’l seudónimu “Cuesta”. Ismael M.ª González Arias nació n’Uviéu en 1958. Escritor y productor musical, ye espertu en Xestión Cultural, Imaxe y Comunicación, y dirixe dende la so puesta en funcionamientu la Casa de Cultura “Teodoro Cuesta” de Mieres.

Ismael conviértese con esti premiu, nel únicu autor que ganó tolos certámenes convocaos pola Conseyería de Cultura pa testos n’asturianu en dalguna ocasión, sacante’l de poesía “Xuan María Acebal”: Premiu de Novela “Xosefa Xovellanos” del Principáu d’Asturies por El cuartu negociu (año 1992) y En busca de Xovellanos (añu 2005); el Premiu de Periodismu “Enriqueta González Rubín” pol artículu “La tonada como música culta asturiana” (2004) y xunto col so hermanu Xaime y por L’asturianada, el Premiu “Máximo Fuertes Acevedo” d’ensayu en 1998.

La segunda edición de “La ciudad en llamas” entama esti xueves a les 10:30 con una sesión de comunicaciones nel Departamentu de Filoloxía Española d’Uviéu.

Yá de tarde, nel Edificiu Hestóricu de la Universidá va celebrase a les seis, un recital de Rafa Cofiño. Darréu, un autobús de baldre va llevar a Grau, a les 19:30, a los participantes, pa poder sentir, a les ocho, el recital de Rubén d’Areñes, Carmen Camacho y Daniel Rabanaque nel Aaula de les Metáfores Fernando Beltrán, Grado.

Miguel Ramos Corrada abrió’l campu de la lliteratura nes Xornaes Internacionales d’Estudiu con un repás a la visión sobre la lliteratura asturiana del padre del modernismu hispanu, Rubén Darío, al que recordó “criticó Clarín”. Esti espublizó a principios del XX y dempués de numeroses visites d’ociu a Asturies, la esbilla d’artículos sobre’l país “En Asturias”, dientro del llibru “Todo al vuelo”. Destaca ente estos artículo “O(sic) poesía asturiana”, nel que, según comentó Ramos Corrada, comenta como lleía la Colección de Poesíes de Caveda, na so reedición de Canella, “mientres taba na playa”.

Sobre l’asturianu, Corrada asegura, “tuvo contradicciones”, per un llau llegó a llamalu “jerga asturiana”, mientres que nun artículu afirmó que yera un “lenguaje armonioso”, refiriéndose siempre a la llingua como “asturianu y non bable”. Darío “taba al tantu y apreciaba la poesía catalana, gallega, vasca…”, anque vía éstes “como parte del sistema poéticu castellán, contribuyendo a la dialectalización de la lliteratura asturiana” según afirma Corrada.

Na so crítica sobre la lliteratura “escaez autores como Teodoro Cuesta mientres empondera a Marcos del Torniello y Pepín Quevedo”. De los clásicos, afitó Ramos “quedóse con Antón de Marirreguera y otros autores”.

La so visita última a Asturies tuvo llugar nel añu 1909, espublizando estes opiniones nel diariu La Nación de Bonos Aires y darréu, en 1912, nel volume yá citáu.

Vidios de la conferencia:

Unu de los momentos de les Xornaes Internacionales d’Estudiu llegó’l miércoles cola conferencia de Xuan Santori, na que presentó dellos datos del estudiu que ta faciendo anguaño ente los escritores asturianos de los trenta años últimos. Asina, escueye a toos aquello con polo menos un volume propiu, 222 posibles, y encuestó a más del 90% de los mesmos, 164, ente los que s’atopen 136 homes y namás 28 muyeres.

Y ye que ye conocida la escasa participación de muyeres na lliteratura asturiana, pero los datos amosaos por Santori, nun solo confirmen esti datu, sinón que dan nuevos. Una mayor cantidá de muyeres, el 69%, “nun tuvo accesu a formación n’asturianu (cursos, escuela, universidá…)”, frente al 69% que sí la tuvieron, nel casu de los homes.

Nel estudiu que prepara Santori estudiaronse les 2.728 llibros asoleyaos n’asturianu dende 1975, colo qu’apaecen autores de delles xeneraciones, demostrando Santori, qu’el términu Surdimientu sigue identificando a una parte mayoritaria de los encuestaos (51%), un porcentaxe que se rebaxa nel casu de les muyeres hasta’l 43%.

Otra de les cuestiones más llamatives ye que munches muyeres entamen escribiendo en castellán, “16 de les 28 ecuestaes”, comentó Santori, “pero tienen un mayor grau de compromisu pa col asturianu, un 89% d’elles nun dexaría d’escribir n’asturianu, mientres qu’ente los homes esta cifra rebáxase al 76%.

Como conlusión Santori comentó “hai un porcentaxe mui baxu d’incorporación de la muyer al sistema lliterariu, pero nes xeneraciones nueves esti índiz medra”.

La xornada de güei, miércoles, va abrila a les cuatro y media, el profesorVicente J. Marcet Rodríguez de la Universidá de Jaén, con “La representación de las sibilantes en la documentación notarial leonesa en el paso del latín al romance”, siguiendo darréu Miguel Ramos Corrada con “La poesía asturiana a xuiciu del modernismu” y Xuan Santori Vázquez-Azpiri con “La lliteratura de les escritores asturianes. Perspectives d’un trabayu d’investigación sociollingüística”, a la que va siguir un alderique.

Dempués del descansu de les seis, Vicente García Oliva va lleer dellos “Apuntes pa una Historia de la Lliteratura Infantil y Xuvenil n’asturianu”. A les 18:30 Paula Pulgar Alves y José Antonio Calzón García van falar de los “Patrones temático-formales na narrativa curtia de Xosé Álvarez ‘Pin’”.

“La cama de Vanessa Gutiérrez: la escritura como revelación”, hiel tema escoyíu por Marta Mori d’Arriba pa la so comunicación, pesllando’l día Aurelio González Ovies con “Locus amoenus et classicus nos poetes contemporáneos d’Asturies” y un alderique.

La Xunta d’Escritores Asturianos 2010 yá tien cartelu y tema, falará de les rellaciones ente la lliteratura, la identidá y la nación, nel casu asturianu. La rellación ente nación y lliteratura “ye un vieyu tema presente en tola hestoriografía lliteraria y paña especial relieve nel casu de les lliteratures de llingües menores y en procesu de construcción como ye’l casu de la lliteratura asturiana, que ta escrita nun llingua inda non oficial”, comenta l’organizador de la mesa, Xaviel Vilareyo.

La participación na Xunta d’Escritores Asturianos ta abierta a la intervención activa de toos y por ello esiste una convocatoria abierta pa participar nuna nueva edición del 2010 que tendrá llugar n’Uviéu los díes 11, 12 y 13 de xineru. La convocatoria pública pa participar nesta Xunta ta dirixida a tolos y toles escritores en llingua asturiana de cualaquier estaya interesaos en participar y aportar les sos idees mediante un ciclu de conferencies, debates, alderiques, presentaciones de llibros y otres actividaes culturales alrodiu del fechu d’escribir n’asturianu.

Nesta edición el lema de les xornaes falará de cómo los aspectos identitarios afecten al fechu d’escribir nuna llingua minorizada y non oficial como l’asturiana frente a otres de más prestixu institucional y los medios pa superar cola lliteratura esta situación de desventaya, asina como les relaciones esistentes ente identidá y lliteratura, cara al futuru de los nuevos escritores, ente otros temes. Los animaos a participar nesta Xunta d’Escritores Asturianos 2010 pueden facelo comunicando les sos propuestes pela seña lletrónica xuntadescritores@wanadoo.es

Falláronse los premios del VI Certamen de Poesía “Nené Losada Rico” que convoca l’Asociación de Muyeres Valdés Sieglu XXI. Presentáronse 57 poemarios – 46 escritos en castellán y 11 n’asturianu.

Jesús Emilio Menéndez Menéndez, filólogu, y los escritores Xuan Santori; José Luís Rendueles y Carmen Guardado, concedieron el premiu a “Tiempu de render”, “del que’l Xuráu vien a destacar la súa frescura ya tresparencia, ya´l son fondamente asturianu col que s´aveira a la naturalidá diaria, nas súas referencias al amor, la muerte ya´l humor” de Sofía Castañón, filólogas y escritora xixonesa.

En castellán el premiu foi pa “No recuerdo un invierno tan frío como éste”, de la filóloga avilesina Esperanza Medina Martínez.

Caúna d’elles va recibir 1.000 euros nuna entrega que va celebrase esti vienres 6 de payares, en L.luarca.

El xueves entregáronse los premios d’esti certame a David Artime Coto (Candás) na estaya d’asturianu y Carlota Fernández-Escandón Vázquez (Xixón), na de castellán. El concursu lliterariu de microrrelatos ‘Minimorum’, lleva convocándose dellos años per parte del periódicu asturianu La Voz de Asturias, en collaboración cola Conseyería de Cultura del Principáu d’Asturies.

La decisión del xuráu, que tamién reconoció dos segundos premios pa Mauricio Díaz (Uviéu) n’asturianu, y Rafael Sánchez Avello (Uviéu).

El xuráu tuvo compuestu pol catedráticu de la Universidá d’Uviéu, Lluis Xabel Álvarez, el profesor de la mesma institución, Aurelio González Ovies, el periodista Carlos Rodríguez, el representante de la Conseyería de Cultura, Luis Casteleiro, y el director de La Voz de Asturias, Luis Mugueta, amás del director xerente del grupu Zeta Asturies, Joaquín de la Buelga, presentándose más de 200 rellatos sobre la crisis y el futuru, tema obligáu esti añu nes bases del concursu.

Col envís d’editar un llibru-cartafueyu qu’antologue la lliteratura n’asturianu que se ta escribiendo anguaño na Comarca de la Sidra, el Serviciu de Normalización Llingüística de la Mancomunidá convida a tolos escritores de la comarca interesaos en participar a unviar les sos participaciones en forma de poesía (con una estensión perbaxo de los 100 versos) o rellatu breve (tres fueyes como máximu). Les collaboraciones han mandase per corréu lletrónicu a normastur@lacomarcadelasidra.com, o bien per corréu postal a Serviciu de Normalización Llingüística MAN.CO.SI. Paraes, númberu 47 33529. El teléfonu pa más información ye 985718413. Los escritores antologaos recibirán exemplares de la edición.