Lliteratura

La Fundación Juan Muñiz Zapico anunció’l resultáu de la VI edición del so concursu de microrrellatos pal que recibieron 153 obres. L’accésit en llingua asturiana foi pal cuentu “El reló n’hora”, del escritor xixonés José Luis Rendueles, mientres que’l premiu pa obres en castellán foi pa Juan José Argudo García, de Xaén, que presentó “El rey de la mina”. L’accésit mozu foi pa “Asturias, 1934”, del murcianu Miguel Rodríguez de Vera Mouliaá. L’accésit Testimoniu Históricu ganólu’l xixonés Costante Álvarez con “La Peña’l Gatu”.

El xuráu destacó la calidá de los microrrellatos, polo que dio nueve menciones especiales a los trabayos en delles categoríes. Asina, n’asturianu dióse-y a Mauricio Díaz Rodríguez, por “Passarowitz”, y a María Prado Muñiz, que presentó “El mensaxe de la candasina”. La mención pol Testimoniu Históricu recibiéronla’l navarru Aitor del Barrio García, cola obra “Encierro de Potasas”; l’uviedín Alberto Álvarez Rodríguez por “Lluvia de Abril”; y el toledanu Miguel Ángel Carcelén García por “El trino del canario”. Igualmente, llevaron menciones especiales en castellanu “La escama del cuélebre”, del alicantín Óscar M. Mora Gómez; “La recompensa”, del lleonés Javier Cuesta Bayón; “El mensajeroz”, del sevillanu José Quesada Morena; y “Trebejo”, de María Julia Bello, de L’Arxentina.

El xuráu formábenlu Benigno Delmiro Coto, Paulino Feito Alonso, Ana Alonso Cabrera, Alejandro Álvarez y Matu Fernández. El llibru colos rellatos ganadores va presentase a primeros del 2010.

L’autor xixonés José Luis Rendueles lleva un añu enllenu de premios, y sigue. Nesta ocasión fízose col premiu “Los bilordios de Pinón”, na so XXII Edición y na categoría d’asturianu, pol cuentu “Esconderite”. Nel casu del premiu en castellán, el lloréu foi pa Pablo Rodríguez Medina pol cuentu “Años de servicio”.

Los accésits d’esti premiu entamáu pola Asociación de Vecinos San Esteban de Sograndiu fueron pa “El corazón del náufrago”, del cordobés Manuel Luque Tapia, en castellán, y na categoría moza pa Julia García Valle, por “Se busca familia”.

Ente los neños, el premiu foi pa Bruno Santos del Campo, qu’escribió “El país matemático”. El xuráu tuvo formáu por José Manuel Suárez Vocero, como secretariu, y por Carlos Rodríguez Suárez, Ramón Rodríguez, Pablo Xuan Manzano y Pablo Fernández, como miembros. Van entregase’l 26 d’avientu.

Fallóse una edición nueva de los premios Asturies Xoven de Poesía, Narrativa y Testos Teatrales convocáu pola Conseyería de Cultura y Turismu dientro del Programa Culturaquí. El xuráu formáu por Jordi Doce, Fernando Beltrán, Xuan Bello, Eva Mar Santurio y Adolfo Camilo Díaz propunxo por unanimidá ganador del Asturies Xoven de Poesía a Sergio Gutiérrez Camblor pol conxuntu de poemes “Los dioses de Curtis”, a Juan Folguera en Narrativa por “Historias de la fortaleza” y a Rosario Hernández Catalán por “Chernobil, paraíso natural” en Testos Teatrales.

Güei, xueves 19 de payares, de magar les ocho, el Centru de Cultura Vieyu Institutu Xovellanos de Xixón, Jerónimo Granda va presentar el so llibru nuevu, tituláu “Logomonos”, onde cunta delles hestories surdíes en dalgunos casos de los cantares, y nun asturianu amestáu col castellán nel que Granda s’espresa de vieyo nes sos actuaciones.

L’escritor, poeta y periodista Pablo Antón Marín Estrada ye’l ganador d’esti añu del Xosefa de Xovellanos de novela, depués de qu’un xuráu formáu por Miguel Rojo, Taresa Lorences y Miguel Barrero valorara como la meyor la so novela “Mientres cai la nueche”.

La novela ye una hestoria na que se mecen memoria hestórica con memoria personal alrodiu d’unos díes escuros del hibiernu de 1947 na cuenca del Nalón.

Nacíu en 1966 en Sama de Llangréu, Pablo Antón marín Estrada ye l’únicu autor asturianu ganador d’un premiu estatal de lliteratura, el premiu Abril, con una obra en llingua asturiana y tien abonda producción poética y narrativa.

Ye autor de volúmenes de poesía como “Blues del Llaberintu”(ALLA,1989), “Les hores”(Ámbitu, 1990), “Díes d´inocencia”(Trabe, 1992), “Un tiempu meyor”(Trabe,1996), “Otra edá”(Trabe,2000) y “Los baños del Tévere”(SPPA,2003).

Como narrador publicó la novela “La ciudá encarnada”(SPPA,1995), premiu Xosefa Xovellanos ex aequo; tamién los volúmenes de relatos: “Xente d´esti mundu y del otru”(Pexe, 1992), “Esa lluz que naide nun mata”(Trabe,1995) y “Nubes negres”(Trabe,1998).En 2000 algamó´l Premiu Abril cola novela “Los caminos ensin fin”(Ed.Asociaos-Pexe, 2000).

Ye autor tamién de dos breves volúmenes de diariu: “Agua que pasa”(Vtp,1995) y “Suma y sigue”(Vtp,1998).

Miguel Allende resultó ganador de la decimoquinta edición del Premiu de poesía en llingua asturiana “Xuan María Acebal”, que concede la Conseyería de Cultura y Turismu d’Asturies según informó esti vienres la Directora Xeneral de Política Llingüística, Consuelo Vega Díaz, que participó del xuráu xunto a los escritores José Luis Argüelles, José Luis García Martín y Ana Vanessa Gutiérrez. Otros seis poemarios presentáronse a esti premiu, dotáu con 7000 euros.

Ente les obres presentaes, el xuráu concedió’l Premiu al testu tituláu Pastoral en sol mayor (Endecha de la memoria), al valorar que se trata d’un poemariu que “-con gran intensidá, bayura léxica y dominiu métricu y rítmicu- evoca con voz emocionada un mundu camín de la desapaición”. La decisión del Xuráu adoptóse por mayoría y tres d’un alderique final onde s’estimó de manera especial el poemariu “La mio voz”, que resultó finalista del certame.

El ganador, Miguel Allende, ñació en Llaviana nel 1960, ye llicenciáu en Filoloxía Románica pola Universidá d’Uviéu y trabaya como Educador na Fundación Docente de Mineros Asturianos (FUNDOMA). Ta en posesión de dellos galardones lliterarios, como’l Premiu de la Crítica de l’Asociación d’Escritores al meyor llibru de poesía n’asturianu del añu 2004 (pol so llibru Pallabres de payaso, Ediciones Trabe) o’l Premiu “Teodoro Cuesta” de poesía, que llogró nel añu 2007 pol poemariu Güelgues de gallón.

Amás d’ello, ye ún de los promotores del “Concursu de Cuentos pa rapacinos y xóvenes d’Asturies”, qu’organiza dende va quince años l’Asociación Cultural “El Portón”, y collabora col grupu de teatru aficionáu “La Fumarea”, de Llaviana, pal que preparó la traducción al asturianu d’El médicu a palos, de Molière.

El Centru Asturianu de Madrid anunció los ganadores del “Concursu de Rellatu Curtiu en Llingua Asturiana”, convocáu na so VIII Edición. José Luis Rendueles algamó’l primer premiu, que lleva’l nome de Xosé Álvarez col rellatu “Furtivos”, mientres que l’accésit Xosé Lleón Delestal foi pa “La boda”, de Mª Esther García López, que yá ganadre’l Xosé Álvarez en 2007.

El xuráu formáronlu representantes del Conseyu de Comunidaes Asturianes, de la Oficina de Política Llingüística d’Asturies, de l’Academia de la Llingua Asturiana y del Centru Asturianu de Madrid.

Güei vienres, y mañana sábadu, la Casa Cultura de L.lena va acoyer el Ciclu de Poesía “en-L.lena”. El ciclu dixébrase en trés estayes; con un escritor en llingua castellana menor de 35 años, otru mayor d’esta edá; y otra estaya pa un escritor en llingua asturiana, ensin importar la so edá.

Los escritores escoyíos pal ciclu son Fernando Beltrán (Uviéu, 1956), Xuan Bello (Tinéu, 1965) y Ana Gorría (Barcelona, 1979), y van tar na casa cultura a les 20:00 hores del día 13 con una llectura llibre y el sábadu a la mesma hora nel Café La Palmera de La Pola L.lena.

El miércoles aconceyó’l xuráu del XVIII Premiu del concursu de Cuentos Curtios El Garrapiellu pa fallar los gallardonaos d’esta edición. Dempués d’aldericar en Xixón, llegóse al alcuerdu de declarar ganador de los 900 euros del primer premiu al rellatu “Lentu”, que resultó ser de José Luís Rendueles. El xuráu decidió, amás, dar un accésit de 300 euros al rellatu “(Solo) un besu”, de Pablo Texón Castañón.

El xuráu d’esta XVIII edición taba formáu pol académicu de la llingua Vicente García Oliva, pola escritora y maestra Iris Díaz Trancho, pol organizador escritor Humberto Gonzali, pol anterior ganador d’esti premiu Pablo Rodríguez Mediana y pol maestru y direutor del programa de la RPA Nomes d’Asturies, Chechu García.

L’asociación Xareos! Xestión Cultural y la revista Formientu, en collaboración cola editorial La Cruz de Grau, convoquen la segunda edición del Certame de Microrrellatos Mozos “Formientu”, que nesta ocasión ha escribise con llingüaxe SMS embaxo’l títulu “¡Si nun llego a recibir aquel SMS…!”. Nel Certame ha escribise colos 160 caracteres que formen un mensaxe unviáu con un teléfonu móvil. Dende Formientu, camienten que “pue que seya hasta l’únicu tipu de testu que les xeneraciones más moces redacten y remanen con más remangu que les más madures”.

En Formientu, faciendo gala del so “espíritu innovador” conviden a los escritores a que-yos dean “una vuelta lliteraria intentando enzarrar nes poques frases que caben na pantalla d’un teléfonu móvil toa una historia onde s’intuyan dos o más personaxes y un puntu d’inflexón na relación ente ellos”.

Podrá participar nel concursu cualesquier persona nacida a partir del añu 1975 con tantes participaciones como-y pete de como muncho los 160 caracteres de los mensaxes SMS, redactaos en llingua asturiana. Podrán emplegase les abreviatures típiques que s’empleguen nesti tipu de mensaxes, asina como prescindir d’espacios y signos de puntuación, anque s’encamienta a los autores que miren porque’l mensaxe seya entendible pa los más de los llectores hasta’l miércoles 6 de xineru de 2010.

Los rellatos han unviase al corréu lletrónicu formientu@xareos.com unviando los datos personales (nome, teléfonu, dirección y curriculu curtiu) nun archivu axuntáu al corréu.

D’ente los rellatos recibíos van otorgase trés premios (compuestos por un llote de llibros y la espublización del rellatu na revista Formientu) y un númberu ilimitáu d’accésits, que van espublizase na revista. El xuráu podrá encamentar la espublización d’otros rellatos. El certame pue quedar ermu.