Lliteratura

Mañana, miércoles 21 d’abril, a les 18 hores. La Casa Cultura de Grau acueye la celebración d’un cuentacuentos y la entrega de Premios del IX Concursu Escolar de Marcapáxines. Anguaño presentáronse 511 dibuxos de marcapáxines, ente los que se buscará al ganador y los finalistes.

Amás, el sábadu 24 d’abril, los neños de la Conxusta Lliteraria del Pizarrín de Ca Pachín van inaugurar a les 11 la mañana la esposición y actividá alredor del llibru “Arroz, agua y maíz” de Berta Piñán, pa festexar el Día del llibru. Participen nel actu l’autora Berta Piñán, la ilustradora, Elena Fernández y la diseñadora gráfica Ester Sánchez, amás de los neños del Pizarrín. La esposición va tar abierta hasta’l 10 de mayu nel corredor de la Casa Cultura.

Cinco díes más tarde, el xueves 29 d’abril, y a partir de les 18 hores va celebrase una sesión de títeres titulada “Rolo va de excursión”.

El Centru de Referencia de la Cultura y la llingua asturiana Casa de los Alberti va acoyer güei, martes 20 d’abril, la presentación del llibru de Xune Elipe “Rockmería. L’actu va tener llugar a les 19:30 hores y enmárcase dientro de les actividaes que l’Ayuntamientu de Llangréu pon en marcha pa celebrar el Día’l Llibru.

Xune Elipe, cantante del grupu asturianu Dixebra y director del sellu discográficu L’Agüañaz, va presentar en Ciañu, Rockmería (Publicaciones Ambitu), un llibru que, col sotítulu d’Un repasu a la música popular del sieglu XX, busca resumir las música más combativa y comprometida de la nuestra historia. Al traviés de les sos páxines, descúbrense estilos como’l folk-rock inglés, el ska xamaicanu, el raï de la Kabilia, el zydeco de Luisiana, el rock del este d’Europa, el Rock Bravú de Galicia, el Rock Radikal Vascu… y artistes y grupos que conformen un verdaderu universu sonoru representativu de la diversidá humana y cultural del planeta.

Nél nun se van alcontrar productos comerciales prefabricaos, nin grandes éxitos: namás música sincera y auténtica fecha con actitú y rebeldía. Son soníos, estilos y propuestes que, dende un ámbitu local y ensin escaecer los sos raigaños (musicales o llingüísticos), supieron trescender más allá hasta convertise n’universales. Rockmería tien un carácter divulgativu, asequible pa toes aquelles persones que quieran adientrase per delles de les músiques populares más prestoses del sieglu XX.

Coincidiendo col Día del Llibru, el 23 d’abril, les Oficines de Coordinación Culturales y Llingüístiques d’Ozcos-Eo y del Parque Hestóricu del Navia, proponen a los llectores ayudar a dinfundir les lletres n’eonaviegu. Nos estremaos conceyos de la Mancomunidá Ozcos-Eo y de la comarca del Parque Hestóricu del Navia, van ponese a disposición de la xente que s’avere a ellos, una riestra de llibros y materiales editaos en gallego-asturianu. Mañana martes, va facese pública la llista de llibros espardíos y el llugar de la “suelta”.

Cualesquier persona interesao podrá averase y garrar el llibru na fala eonaviega, con una condición, volver a dexalu nun llugar públicu, pa ponelu otra vegada en circulación y que más xente pueda acceder a él. Ha mandase entós un corréu lletrónicu a culturalylinguistica@oscos-eo.net y cultural@parquehistorico.org cola dirección nueva del llibru, de manera qu’otres persones puedan conocer l’asitiamientu del mesmu.

L’asociación cultural de Villaviciosa La Compaña del Ronchel súmase a les celebraciones del Día del Llibru presentando, en xunto cola Academia de la Llingua Asturiana, la reedición de “Los artículos de la fe”, catecismu publicáu en 1916 por Luis Sánchez García, siendo párrocu de Samartín de Vallés y Sietes, nel conceyu maliayu. L’actu será nel Teatru Riera de Villaviciosa, el próximu 23 d’abril, a les 19 hores.

Van participar Lluis Portal Hevia de l’Asociación La Compaña del Ronche; Roberto González-Quevedo, secretariu de l’Academia de la Llingua Asturiana, entidá coorganizadora del actu; y Manuel Busto Alonso, Alcalde de Villaviciosa.

Esti catecismu foi escritu y publicáu en 1916 por Luis Sánchez García (Uviéu, 1879). D’esti curín sabemos que pasó dos años como capellán de Bode y Pendás (Parres). Fue coaxutor de Coya (Piloña) en 1906. Ecónomu de Pendás en 1907. Rexente de Tobes (Ribadeva) en 1909. Coaxutor de les parroquies de Samartín de Vallés y Sietes (Villaviciosa) de 1910 a 1918. Dempués, permanecería una temporada fuera, y vuelve al conceyu maliayu, concretamente a Grases, en 1919.

Ye párrocu de Rales en 1920. En 1943 pasa a la parroquia de Fuentes, onde continúa realizando’l so llabor pastoral hasta la so muerte, ocurrida’l 29 de xineru de 1964. D. Luis ye un cura recordáu y apreciáu en Fuentes, onde, a pesar de les goteres de la casa rectoral que lu obligó munches vegaes a metese col paragües na cama, sentíase como ún más del pueblu, como cuenten dende l’Asociación El Ronchel.

Trátase de la primera “doctrina” escrita en bable, inspirada nel Catecismu Romanu, El Perrone y les Sagraes Escritures. Nun pretende facer un testu pa espertos, esplica nel prólogu: “Ta escrito pa rapazos (y anque sea pa vieyos d’aldea y xente sencilla), non pa tiólogos y doctores, qu’esos ya saben dir a les fuentes”. “Y ta asina en bable porque paez qu’asina llamará más l’atención de los rapaces y lierán más; y liendo más, deprenderán más; y deprendiendo más… ¡Ai! home, va cambia’l tiempu, porque esti rema…”, aclara con humor.

D. Luis escribió estes 78 fueyes nel periodu en que permaneció na parroquia de Vallés, pero col tiempu perdióse’l rastru del llibru, hasta qu’hacia 1980, el cura de Santoxenia –actualmente párrocu de Nava-, Eduardo Solís, atopólu casualmente y púnxolo en conocimientu del tamién profesor y miembru de l’Academia de la Llingua, Roberto Glez-Quevedo na so estancia nel conceyu. Poco dempués –en 1981- el Seminariu de Llingua Asturiana volvía a asoleyar el vieyu catecismu, añadiendo-y un prólogu del cura de La Pola, Carlos Sánchez Martino, natural de Vallés, y un epílogu de Roberto, contestualizando la obra. La tirada foi pequeña y pronto desapareció de les llibreríes, por esa razón facíase imprescindible cuantayá volver a reeditalu.

La Conseyería de cultura y Turismu convoca’l Premiu de Testos Teatrales “Alejandro Casona” na so undécima edición. El Premiu tien una dotación de trés mil euros. Amás, la mesma institución convoca’l Premiu “Juan Uría Ríu” 2010 nel so trixésimu primer edición pa trabayos d’investigación sobro cultura asturiana, yá sían de calter hestóricu, etnográficu, filológico, musical, etc. El Premiu tien una dotación de cinco mil euros . Les bases de dambos premios tán nel BOPA de 26 de febreru.

Les obres van presentase na Oficina del Rexistru Central ya Información del Principáu d’Asturies, asitiada nel Edificiu Alministrativu de Servicios Múltiples, na plaza Coronel Aranda, e/n, 33005-Uviéu, hasta’l día 30 d’abril.

La Conseyería de Cultura tien abiertu’l plazu pa presentase a los premios lliterarios n’asturianu qu’entama cada añu y que nesti casu inclúi los premios “Xosefa Xovellanos” de novela, “Xuan M.ª Acebal” de poesía, “Máximo Fuertes Acevedo” d’ensayu, “María Josefa Canellada” de lliteratura infantil/xuvenil y “Alfonso Iglesias” de cómic en llingua asturiana.

Estos premios busquen, según diz la convocatoria “afitar, arriquecer y dar prestixu a la llingua y a la cultura asturianes, amás de dinamizar l’actividá cultural n’Asturies, sobre manera na creación lliteraria”.

Tolos premios tienen una dotación de 7.000 euros. El plazu d’entrega de les obres acaba’l 10 de setiembre del 2010.

Bases completes de los premios

El Gremiu d’Editores d’Asturies albidra qu’unu de cada 5 llibros espublizaos en 2009 poles editoriales que conformen esti colectivu editáronse en llingua asturiana. Trataríase d’un porcentaxe calteníu amás nos últimos años.

Los datos ufriólos la selmana pasada la presidenta del Gremiu, Marta Magadán, anque entá nun se cuenta con cifres concretes de les editoriales, pero dixo albidrar que en 2009 publicáranse alrodiu de 800 títulos nes editoriales asturianes, que llegaríen a 1.200 en total sumando lo editao poles instituciones, y de los qu’un 20 por cientu sedríen en llingua asturiana.

Marta Magadán albidra que la cifra va ser asemeyada a otros años, pese a que amenorgare’l total de llibros publicaos, por mor de la crisis económica.

Poro, la noticia nun ye enforma positiva ya qu’l porcentaxe de llibros n’asturianu ye dafechamente menor que’l d’otres llingües minoritaries españoles en comparanza col total de títulos editaos. Nes comunidaes de fala catalana (Cataluña, Valencia y Baleares) los títulos en llingua propia sumaríen el 32,16 pòr cientu del total, nel País Vascu un 45,7 y en Galicia un 57,32.

Un añu más la Fundación Fernández Lema convoca’l so premiu de Rellatu Curtiu pa testos en castellán, dotáu con 7.000 euros, y n’asturianu, con 3.500 euros, lo que convierte a esti gallardón nel de mayor cuantía d’ente los que cunten con una categoría na nuesa llingua.

Al concursu pueden unviase rellatos d’hasta 25 fueyes per una sola plana, y a un tamañu mínimu de 10 puntos. Pa presentase, los interesaos han mandar seis copies enantes del 31 de marzu y dientro d’un sobre onde s’epecifique pa qué categoría ye.

Les obres han mandase embaxo nomatu y pel sistema de pliques a la Casa Cultura de L.luarca, asitiada nel 24 de la cai Olavarrieta, 24, 3700, nel conceyu Valdés. Pa más información ha llamase al 985 470 578.

La editorial Ámbitu ta acabante asoleyar el númberu 35 de la revista cultural El Summum, que se distribúi de baldre. Nesti númberu inclúyense reseñes de les obres de teatru «Glengarry Glen Ross» y «Mercado libre», una entrevista a Fernando Bayona por «Circus Christi», y un reportaxe sobre’l club de llectura Bertrand sobre Sam Shepard.

Amás Miguel Barrero ufre’l testu «El origen del mundo» y Iván García fala sobre «La dolce vita», de Fellini. La revista inclúi reseñes de los llibros «Yo este trabajo para que lo hago», de Rosario H. Catalan, y «Les habitaciones vacies», de Ramon Lluis Bande; artículos d’Hilario J. Rodriguez sobre la critica cinematografica y de Montero Glez sobre Camaron.

Piesllen el númberu una entrevista a Manuel Vilas, semeyes d’Alejandro Braña, Helena Exquis y Henrique G. Facuriella, y un reportaxe de Miguel Barrero sobre Barcelona.Llee la revista en llinia

La escritora Helena Trexu Fombella va presentar güei pela tarde’l so llibru últimu “Olaya n’África”, una narración que foi premiada pola Academia de la Llingua Asturiana en 2008 y qu’espubliza agora esta institución dientro de la colección “Escolín” con ilustraciones de Violeta Mateu.

La presentación va tener llugar a les ocho la tarde na Llibrería “La buena letra”, asitiada nel númberu 12 de la cai Casimiro Velasco de Xixón. Amás de l’autora, va tar presente Pablo Xuan Manzano, miembru de númberu de l’Academia de la Llingua Asturiana.