Lliteratura

Güei, xueves 29 d’abril, a les 19:30 hores, na Llibrería Trabe (Cai Padre Buenaventura de Paredes, d’Uviéu) va presentase’l llibru infantil “L’horru” de José Luis Fernández (testos) y Nuevu llibru de la colección álbum d’Ediciones Trabe, encuadernáu en tapa, ilustráu a tou color por Francisco Pimiango.

Nel llibru fálase de la convivencia y la tolerancia, mensaxe que trata d’inculcar a los neños llectores.

El programa de la XXXI Selmana de les Lletres Asturianes ta peslláu y va entamar el próximu llunes, 3 de mayu, a les 11:30 hores. El Salón d’actos de la Casa Cultura de Mieres del Camín va acoyer l’apertura oficial de la celebración, cola presentación de les ediciones preparaes a costafecha pa la ocasión conmemorativa: “Xosé Antonio García, un poeta nel fin de sieglu”, volume ilustráu al rodiu del escritor y la so época, y la so obra completa “Poesía”. Amás, esi mesmu día, va inaugurase una esposición dedicada a la so figura, que va tar abierta al públicu hasta’l 31 de mayu, n’horariu de 9:00 a 21:00 hores, de llunes a vienres.

El martes 4 de mayu, nel mesmu espaciu, y a partir de les diez y media la mañana, van producise visites escolares d’animación a la llectura.

El miércoles, a partir de les 12 hores, l’Ayuntamientu de Mieres va facer na Casa Cultura una declaración institucional y va producise’l descubrimientu d’una placa dedicada a Xosé Antonio García. Pela tarde, a les 20 hores, l’Auditoriu de la Casa Cultura va ser l’espaciu escoyíu pal actu d’homenaxe de los ganadores del Premiu “Teodoro Cuesta” a Xosé Antonio García, nel XX aniversariu del premiu. Va cuntase entós cola actuación de los hermanos Valle Roso.

El xueves 6, a la una la tarde, vuelve a la Xunta Xeneral del Principáu d’Asturies, n’Uviéu, la yá tradicional llectura pública institucional de testos n’asturianu, per parte de diputaos, conseyeros y otres autoridaes.

Pero como siempres, el día grande de la Selmana les Lletres, ye’l propiu Día de les Lletres, nel qu’amás de los actos entamaos pola Academia de la Llingua Asturiana n’Uviéu, el Gobiernu d’Asturies entama delles actividaes y el Día del Llibru Asturianu, con descuentos del 10% nes llibreríes. En Mieres, a les 12 hores, celébrase l’actu escolar institucional de celebración, cola intervención d’autoridaes, la entrega de premios del “XV Concursu de Poesía y Dibuxu” y del “VII Concursu de Cartelismu”, amás de delles actuaciones musicales.

El sábadu 8, y como vien siendo vezu dende l’aniciu de la RPA, el programa “Nomes d’Asturies” va facer una emisión especial na que va poder conocese la vida del autor. “Xose Antonio García, vida d’un poeta” emitiráse a les dos de la tarde.

Amás, Castellón y Barcelona van acoyer la celebración del Día de les Lletres nel Esterior, los díes 22 y 23 de mayu.

La vida del autor:

Xosé Antonio García (1961-1997) ye un escritor representativu del periodu conocíu como Surdimientu, ocupando por méritos propios un espaciu señaláu na lliteratura asturiana de la segunda metá del sieglu XIX.

El poeta mierense desarrolló una intensa actividá cultural dende los años setenta, collaborando de manera activa en revistes lliteraries y en prensa, dirixendo programes radiofónicos o participando nel mundu editorial. Publicó dos llibros de poesía –Cuartetu de la criación (Casa de Cultura Teodoro Cuesta, 1989) y Alcordances d’un home muertu (Editora del Norte, 1995)–, amás de dexar inédito parte de la so obra (incluyendo narraciones). Xosé Antonio García ye sobremanera un poeta figurativu, esistencialista, que reflexona de la condición humana y de la muerte.

El Conseyu de Comunidaes Asturianes organiza’l Día de les Lletres nel Esterior, en collaboración col Centru Asturianu de Castellón y el Centru Asturianu de Barcelona, los díes 22 y 23 de mayu, respectivamente.

Les actividaes van entamar nos dos casos a les 12 la mañana y cola mesma estructura y participantes. En primer llugar van producise les intervenciones institucionales. Darréu va dar una conferencia l’académicu de la llingua, Roberto González-Quevedo. Los actos van pesllase con un recital de Berta Piñán, recién traducida la so obra al catalán, y una actuación de La Bandina’l Tombo.

Suburbia Ediciones inagura la so colección de lliteratura infantil camín de Bree con esti título, Mio ma, la pirata, de la escritora xixonesa Iris Díaz Trancho y cola collaboración de la ilustradora Gloria Caamaño.

Como’l títulu indica Mio ma, la pirata, ye una hestoria de pirates anque atípica: Barba Negra lleva un restaurante y Barba Roxa ye xastre. La ma del nenu protagonista sigue surcando los mares buscando barcos que prindar y ayalgues escondíes. Con ayuda de la perra Pulga entamen un viaxe a Madagascar en busca del mayor tesoru de toos.

La Casa Cultura de Llanes va recordar güei a estos dos autores en llingua asturiana del conceyu, con una itinerariu poéticu diseñáu pola bibliotecaria María del Carmen Acebo. L’actividá va entamar a les siete la tarde, siguiendo los caminos y llugares qu’apacen nes obres d’estos dos autores, y declamando poemes como ‘El pozu l’Alloral’ o ‘Entre peña y peña’.

Amás va esplicase la vida de los autores, de la mano d’Estrella Collado, directora de la Casa Cultura de Nueva. Nes llectures van participar Maite Mora, Estrella Collado, Marcos Rodríguez y Juan Morote.

El conceyu de Llangréu opta por adelantar dalgunes actividaes y celebra güei, xueves 22, el Día del Llibru. Les actividaes van entamar a les diez de la mañana con un cuentacuentos pa los neños de la Escuela Infantil de 0 a 3 años “Pinin”. D’11 a 13 hores, va celebrase un taller lliterariu nel Archivu Municipal tituláu “La historia de Langreo a través de la literatura”. Darréu y hasta les 19:30 hores, va entamar un trueque de llibros na Casa de Cultura “Escueles Dorado” de Sama.

Yá a les 18 hores, va celebrase un clú de llectura nel IES Santa Bárbara y en collaboración cola Biblioteca Pública de La Felguera. Mientres a les ocho, va proyectase nel Teatru Nuevu La carretera, del Dr. John Hillcoat, 2009, EE.XX.

Amás, el vienres, va celebrase un homenaxe a Miguel Hernández y a Federico García Lorca, na Casa Cultura que lleva’l so nome en Riañu. Fadráse una llectura dramatizada de les sos obres cola ayuda del Colectivu Les Filanderes, amás d’una nueva xornada de trueque de llibros.

El Conceyu de Nava ta acabante convocar el II Concursu de Rellatos Curtios “Festival de la Sidra”, empobináu p’autores mozos d’ente 14 y 35 años. La temática ha falar del mundu la sidra, con un llargor máximu de trés fueyes namás per una plana.

EL premiu ye de 150 euros y llugar pa mandar o presentar los trabayos, l’Axencia de Desenvolvimientu Local del Conceyu de Nava, per corréu postal o per corréu lletrónicu. El determín del Xuráu va dase a conocer el día 6 de xunetu del 2010 y la entrega de premios va ser al otru día nel salón d’actos del Muséu de la Sidra. Si se requier más información pue llamase al 985 71 60 08 ó 985 71 66 53; o escribir a adl@ayto-nava.es y oijnava@lacomarcadelasidra.com.

Asturies súmase esti vienres 23 d’abril y como cada añu a la celebración mundial del Día del Llibru y failo con actividaes perdayuri. En Villaviciosa l’asociación cultural de La Compaña del Ronchel súmase a les celebraciones presentando, en xunto cola Academia de la Llingua Asturiana, la reedición de “Los artículos de la fe”, catecismu publicáu en 1916 por Luis Sánchez García. L’actu será nel Teatru Riera de Villaviciosa a les 19 hores. Mientres, na Biblioteca Pública de La Pola L.lena va dedicase la xornada al escritor Vital Aza (1851 –1912), con una ruta lliteraria nomada “Ego Sum” n’alusión al títulu d’ún de los poemes del autores, una esposición y una obra de teatru.

La esposición cunta con publicaciones, manuscritos, semeyes y otros documentos rellacionaos cola vida y obra del autor, mientres que la obra va representase nel teatru Vital Aza a les ocho de la tarde, pol grupu deteatru amateur ‘Rosario Trabanco’ y cola obra “Les Codornices”, estrenada en 1882 nel Teatru Lara de Madrid.

En Xixón van celebrase más de sesenta actividaes pa celebrar esti Día del Llibru, ente les que destaquen l’homenaxe a Miguel Hernández, nel centenariu del so ñacimientu. A les 19:30 hores, el Vieyu Institutu Xovellanos acueye una conferencia del profesor de Lliteratura Española y escritor José Luis García Martín sobre l’autor, siguida d’un rectial poéticu a cargu de Tachia Quintanar.

Amás, en La Calzada va celebrase una Feria del Llibru y delles actividaes colos neños como protagonistes.

El Club de Prensa Asturiana presenta nesta xornada, el llibru “El Monasterios de Santa María de Villanueva de Oscos”, de José Antonio Álvarez Castrillón. Será a partir de les ocho la tarde y cola presencia del alcade de Vilanova d’Ozcos; d’Eva Sánchez, de Cultura, y de Juan Ignacio Ruiz de la Peña, caderalgu d’Hestoria Medieval, amás del autor.

Tamién n’Uviéu, y a lo llargo de tol día, la Llibrería Cervantes va celebrar la xornada con venta de llibros na cai, un espectáculu a cargu de Teatro Margen tituláu “Recordando La Regenta” , con pases a les 12h y a les 18h, d’unos 45 minutos de duración. Amás d’un maratón d’escritores, llectura y firma d’exemplares, y animación pa neños na so filial infantil, el Búho Lector.

N’Avilés va celebrase una ruta lliteraria alredor de la figura del novelista Armando Palacio Valdés, y amás, la rede de biblioteques programó una serie d’actividaes pa neños y adultos, con animación na cai y actuaciones de tou tipu.

Nel estremu occidental d’Asuries, les Oficines de Coordinación Culturales y Llingüístiques d’Ozcos-Eo y del Parque Hestóricu del Navia, proponen a los llectores ayudar a dinfundir les lletres n’eonaviegu. Nos estremaos conceyos de la Mancomunidá Ozcos-Eo y de la comarca del Parque Hestóricu del Navia, van ponese a disposición de la xente que s’avere a ellos, una riestra de llibros y materiales editaos en gallego-asturianu. La llista de llibros espardíos y el llugar de la “suelta” ta nes web de les respectives instituciones.

La escritora y Miembru de l’Académica de la Llingua Asturiana tien yá nes manes la so obra última, “Salones de baille en Castrillón. Sieglu XX”, qu’asoleya na colección “Abogaderu”, el Patronatu Municipal d’Actividaes Culturales de Castrillón (PMAC). La obra recueye les más de trenta sales de baille que funcionaron nel conceyu a lo llargo del sieglu XX dende los tradicionales bailles hasta les discoteques modernes abiertes a mediaos de sieglu en Castrillón.

Ente los primeros tuvo’l Casinu d’Arnao, abiertu pola Real Compañía Asturiana de Mines pal ociu de los sos trabayadores, pero toes tienen la so hestoria y l’autora fizo un estudiu bien importante de caún d’elles, como El Recreo, Casa María la Viuda, El Xalé, L’Oméu, Llau o Ca Xuan, ente otros.

El llibru va presentase’l próximu día 29 d’abril, na Biblioteca de Salinas, a les ocho la tarde. El llibru va regalase a los asistentes al actu.

El Conceyu de Grau celebra güei a les ocho la tarde la entrega de premios d’esti concursu, que llega yá a la so novena edición. Nesta ocasión participaron 511 escolinos, un record, que fizo que’l xuráu diere diez premios en llugar de los cinco previstos.

Los ganadores son nesta ocasión: Jovino Alonso Miranda, Ismael Suárez Iglesias, Izan Flórez García, Daniela Vega García, Laura del Campo López, Adran Stanci Stelian, Laura Calvo Álvarez,Gabriel Patrascu Ion, Marcos de la Fuente Méndez y Pablo Fernández Echevarría.

El llugar escoyíu pa la ceremonia ye la Biblioteca Municipal de Grau “Valentín Andrés Álvarez”. El premiu consiste nun llote de libros, diploma y la edición del marcapáxines nel mes de setiembre. Amás, los neños van esfrutar d’un cuentacuentos.