Lliteratura

Xuventú Asturianista celebra güei, xueves 6 de mayu, a partir de les 19:30 hores, un “Homenaxe a los escritores en llingua asturiana, pola oficialidá”, na Llibrería Alborá de Xixón. La mocedá del PAS entiende que “ye de xusticia facer un homenaxe a los escritores qu’a lo llargo de tola hestoria y dende Antón de Marirreguera, primer escritor conocíu n’asturianu, vienen sofitando’l caltenimientu de la nuesa llingua ya identidá”.

Nel actu va celebrase un recital d’autores asturianos y xente representativo de la cultura asturiana, lleendeo les sos propies creaciones y otres obres de los nuesos clásicos. El recital va cuntar con un intermediu musical de cantares asturianos.

Amás, nel actu va desvelase la nueva imaxe de Xuventú Asturianista, qu’anova’l llogotipu coinciendo col 25 aniversariu del Partíu Asturianista, que se celebra esti añu. Una imaxe “más moderna y dinámica que vien a actualizar la imaxe pública de la organización moza asturianista con más años d’actividá”, comenten dende la organización.

L’actu, que se celebra na viéspora del Día de les Lletres Asturianes, y de la manifestación pola oficialidá, na que van participar tanto’l PAS como Xuventú Asturianista, va sirvir tamién pa la presentación de la campaña pola oficialidá, que va repartise na manifestación, y que va cuntar tamién con un audiovisual, que s’estrena nel actu tamién.

Xuventú Asturianista convida a tola sociedá asturiana a sumase a esti Homenaxe y a participar de la Manifestación qu’esti vienres va percorrer les cais d’Uviéu, “pa recordar al Gobiernu d’Asturies, formáu pola FSA-PSOE ya Izquierda Unida-Bloque por Asturies, y al PP, que l’asturianu tien que tener l’estatus d’oficialidá, como drechu irrenunciable de tolos asturianos”, recuerden los xóvenes asturianistes.

La editorial Trabe ta acabante sacar al mercáu, en collaboración cola Conseyería de Cultura, el volume “Poesía”, que sal pola mor de la XXXI Selmana de les Lletres Asturianes, dedicada esti añu al desapaecíu escritor de Mieres del Camín Xosé Antonio García (1961-1997). Recueye esti volume los llibros publicaos “El cuartetu de la criación” y “Alcordances d’un home muertu” y “Voz en off”, que nun se llegó a publicar, asina como testos espardíos en varies publicaciones y dalgunos poemes inéditos.

La vida del autor…

Xosé Antonio García (1961-1997) ye un escritor representativu del periodu conocíu como Surdimientu, ocupando por méritos propios un espaciu señaláu na lliteratura asturiana de la segunda metá del sieglu XIX.

El poeta mierense desarrolló una intensa actividá cultural dende los años setenta, collaborando de manera activa en revistes lliteraries y en prensa, dirixendo programes radiofónicos o participando nel mundu editorial. Publicó dos llibros de poesía –Cuartetu de la criación (Casa de Cultura Teodoro Cuesta, 1989) y Alcordances d’un home muertu (Editora del Norte, 1995)–, amás de dexar inédito parte de la so obra (incluyendo narraciones). Xosé Antonio García ye sobremanera un poeta figurativu, esistencialista, que reflexona de la condición humana y de la muerte.

La Mancomunidá de la Comarcar la Sidra va repartir otru añu más, como celebración del día de les lletres, el vienres 7 de mayu, les yá tradicionales lletres de pan, per edificios públicos, centros educativos y establecimientos hosteleros. El númberu d’elles sube esti añu a 5000, mil más que l’añu pasáu, nun formatu de presentación nuevu y acompañaes nesta ocasión d’un testu de l’autora maliaya Tuxa Villaverde.

Xuventú Asturianista celebra esti xueves, 6 de mayu de 2010, a partir de les 19:30 hores, un “Homenaxe a los escritores en llingua asturiana, pola oficialidá”, na Llibrería Alborá de Xixón. La mocedá del PAS entiende que “ye de xusticia facer un homenaxe a los escritores qu’a lo llargo de tola hestoria y dende Antón de Marirreguera, primer escritor conocíu n’asturianu, vienen sofitando’l caltenimientu de la nuesa llingua ya identidá”.

Nel actu va celebrase un recital d’autores asturianos y xente representativo de la cultura asturiana, lleendeo les sos propies creaciones y otres obres de los nuesos clásicos. El recital va cuntar con un intermediu musical de cantares asturianos.

Amás, nel actu va desvelase la nueva imaxe de Xuventú Asturianista, qu’anova’l llogotipu coinciendo col 25 aniversariu del Partíu Asturianista, que se celebra esti añu. Una imaxe “más moderna y dinámica que vien a actualizar la imaxe pública de la organización moza asturianista con más años d’actividá”, comenten dende la organización.

L’actu, que se celebra na viéspora del Día de les Lletres Asturianes, y de la manifestación pola oficialidá, na que van participar tanto’l PAS como Xuventú Asturianista, va sirvir tamién pa la presentación de la campaña pola oficialidá, que va repartise na manifestación, y que va cuntar tamién con un audiovisual, que s’estrena nel actu tamién.

Xuventú Asturianista convida a tola sociedá asturiana a sumase a esti Homenaxe y a participar de la Manifestación qu’esti vienres va percorrer les cais d’Uviéu, “pa recordar al Gobiernu d’Asturies, formáu pola FSA-PSOE ya Izquierda Unida-Bloque por Asturies, y al PP, que l’asturianu tien que tener l’estatus d’oficialidá, como drechu irrenunciable de tolos asturianos”, recuerden los xóvenes asturianistes.

La Casa Cultura de Ribeseya va acoyer güei, miércoles 5 de mayu, la entrega del premiu Arbidel’ de rellatos eróticos en llingua asturiana, que convoca’l Conceyu. David Artime volvió a facese col premiu col testu ‘El problema vascu’. L’áccesit foi pa ‘La Expedición’, del dramaturgu y novelista Dolfo Camilo. L’actu d’entrega ye a les 19:00 hores. Los premios son de 1.200 y 500 euros respectivamente.

El xuráu tuvo formáu por Nieves Otero Paraja, especialista n’asturianu pola Universidá d’Uviéu y profesora d’asturianu, Roberto Glez-Quevedo González, secretariu de l’Academia de la Llingua asturiana y Xandru Martino Ruz, especialista n’asturianu pola Universidá d’Uviéu, y faciendo de secretariu con voz, pero ensin votu, Juan González Martino, conceyal de cultura del Conceyu de Ribeseya.

Dientro de toles actividaes que van tener llugar na Comarca de la Sidra con motivu de la XXXI Selmana de les Lletres Asturianes, pa esti añu destaca la presentación, el xueves 6 de febreru, a les 19:30 hores, nel soterrañu del Teatru Riera de Villaviciosa, de l’antoloxía “Canigú Lliterariu”, editada pol Serviciu de Normalización Llingüística de la Mancomunidá col sofitu de la Conseyería de Cultura y Turismu.

“Canigú Lliterariu” recueye la obra de 14 autores orixinarios de los distintos conceyos mancomunaos, una nómina bien curiosa si tenemos en cuenta les característiques demográfiques de los mesmos. Celia Fernández Loredo, Iris Díaz Trancho, Xilberto Llano, Xulio Vixil Castañón, Xuan Pedrayes Obaya, Fernándo Fernández Suárez, Miguel González Pereda, Etelvino González López, Josefina Solares Fernández, Javier Cayado Valdés, Casilda Ríu, Xose María Valdés Costales, Maria Luisa Picado Amandi y Lluis Portal collaboren nesta antoloxía qu’inclúi prosa, poesía y teatru.

Amás d’esta actividá, el vienres van repartise les yá tradicionales “lletres de pan” y a lo llargo de tola selmana habrá diferentes: teatru n’asturianu, Esposiciones rellacionaes cola llingua, cuentacuentos n’asturianu pa los neños y curtiometraxes n’asturianu.

La primer convocatoria del Premio Timón p’autores en castellán, convocáu por L’Arribada, yá tien tamién candidatos: Fulgencio Argüelles, Carlos Bousoño, Ángeles Caso, Luis Fernández Roces, Carmen Gómez Ojea, Carmen Ruiz-Tilve y Gonzalo Suárez.

Per otru llau, la cuarta edición del Premiu Timón, p’autores en llingua asturiana y n’eonaviego, convocáu pa escritores que ñacieren nel añu 1960 o anteriormente, publicó la so llista de seleccionaos: Pablo Ardisana, Manuel Asur, Roberto González-Quevedo y Miguel Rojo.

P’alcordar el premiu, l’asociación va convocar dos xuraos, ún por cada modalidá, integraos por persones vinculaes a la cultura del país. Esta distinción, que consiste nuna obra del escultor y ceramista xixonés Jesús Castañón, va entregase durante la cellebración de L’Arribada 2010, dientro de la so estaya Vagamar, que va facese del 18 al 25 de setiembre.

Los ganadores anteriores fueron, en 2007, Nené Losada Rico, en 2008, Xuan Xosé Sánchez Vicente y, en 2009, Manuel García ‘El Galano’.

La XXXI Selmana de les Lletres Asturianes entama güei, llunes, 3 de mayu, a les 11:30 hores. El Salón d’actos de la Casa Cultura de Mieres del Camín va acoyer l’apertura oficial de la celebración, cola presentación de les ediciones preparaes a costafecha pa la ocasión conmemorativa: “Xosé Antonio García, un poeta nel fin de sieglu”, volume ilustráu al rodiu del escritor y la so época, y la so obra completa “Poesía”.

Amás, darréu, va inaugurase una esposición dedicada a la so figura, que va tar abierta al públicu hasta’l 31 de mayu, n’horariu de 9:00 a 21:00 hores, de llunes a vienres.

Mañana, martes 4 de mayu, nel mesmu espaciu, y a partir de les diez y media la mañana, van producise visites escolares d’animación a la llectura.

Programa completu de la XXXI Selmana

L’Asociación Cultural La Caleya, col sofitu la Conceyalía de Cultura Tradicional y Valores Autóctonos del Ayuntamientu d’Astorga y del Institutu Lleonés de Cultura de la Diputación de Lleón, convoca la cuarta edición del so certame lliterariu pa obres orixinales en llingua asturlleonesa, que nesta ocasión coincide col 1100 aniversariu de la capitalidá lleonesa del reinu hestóricu, primero nomáu d’Asturies. Un reinu nel que los organizadores recuerden “desendolcóse’l romance de los ástures, el reinu qu’allumó la primeira Universidá europea, el reinu nel que xurdió’l parllamentarismu, el reinu del Fueru Xulgu y de los fueros de les ciudaes, de la primer carta de drechos y garantíes del ciudadanu”.

Nel concursu pueden participar tolos ciudadanos de la Unión Europea a títulu individual y con un únicu trabayu que nun seyan ganadores na mesma modalidá (rellatu/poesía) del primer premiu nes cuatro ediciones anteriores d’esti certame. Los trabayos han de tar escritos en cualesquiera de las variedaes dialectales del dominiu llingüísticu asturlleonés.

El tema, nesta convocatoria, ye llibre masque se valorarán especialmente los trabayos al rodiu de la conmemoración del Reinu de Lleón. La obra ha de ser orixinal, inédita y non gallardonada anteriormente en nengún concursu lliterariu nin con otru premiu o distinción. Almítense dos modalidaes, rellatu curtiu y poesía. La estensión mínima del poemariu ye de 100 versos y la máxima de 250. La estensión máxima del rellatu curtiu ye de 10 páxinas.

El plazu de presentación acaba’l 30 de setiembre de 2010 y los trabayos tienen que s’unviar a: Certame Lliterariu La Caleya, Apartáu de Correos 187 – 24700 Astorga (Lleón).

Los premios van de los 400 € y diploma pal primeru de cada categoría, a los 100 del terceru.

Bases completes del certame

La Casa Cultura de Valdés, asitiada en L.luarca, va acoyer esti vienres, 30 d’abril, a les ocho la tarde, la presentación d’un nuevu llibru infantil de María Esther García López, miembru de l’ALLA. La obra ye “Deva y el pitín” y foi espublizada pola editorial Pintar-Pintar, en castellán, como “Deva y el pollito” y na so versión orixinal n’asturianu.

Na presentación van tar, amás de l’autora, Cristina García, la ilustradora del llibru; Norberto Martín Gómez, maestru; y Ángela Sánchez Vallina, de la editorial.

Amás, el llibru va presentase en Piedras Blancas, el 14 de xunu.

Vidiu promocional del llibru