Lliteratura

Como parte de los actos de la XXXI Selmana de les Lletres Asturianes, esti sábadu 8, y como vien siendo vezu dende l’aniciu de la RPA, el programa “Nomes d’Asturies”, programa dirixíu por Chechu García, va facer una emisión especial na que va poder conocese la vida del autor homenaxeáu nesta ocasión. El programa “Xosé Antonio García, vida d’un poeta” emitiráse a les dos de la tarde.

Xuventú Asturianista celebró esti xueves, 6 de mayu de 2010, un “Homenaxe a los escritores en llingua asturiana, pola oficialidá”, na Llibrería Alborá de Xixón, pola mor de la Selmana de les Lletres Asturianes. Asturnews ufre agora una galería del actu, nel que participaron los escritores Vicente García Oliva, Sabel Tuñón, Xuan Santori, María Jesús Suárez, Inacio Rodríguez-Solar, Llucía Fernández Marqués, Rubén Rey, Helena Trexu, Esther García, l’hestoriador Javier Cubero o’l presidente d’El Garrapiellu, Tino Lozano.

Galería de semeyes del actu

Los actos de la XXXI Selmana de les Lletres Asturianes terminen güei vienres, col ropiu Día de les Lletres, nel que’l Gobiernu d’Asturies entama’l Día del Llibru Asturianu, con descuentos del 10% nes llibreríes axuntaes a esta promoción, que son les más de les del país.

Amás, en Mieres, a les 12 hores, celébrase l’actu escolar institucional de celebración, cola intervención d’autoridaes, la entrega de premios del “XV Concursu de Poesía y Dibuxu” y del “VII Concursu de Cartelismu”, amás de delles actuaciones musicales.

Mañana, sábadu 8, y como vien siendo vezu dende l’aniciu de la RPA, el programa “Nomes d’Asturies” va facer una emisión especial na que va poder conocese la vida del autor. “Xose Antonio García, vida d’un poeta” emitiráse a les dos de la tarde.

L’ilustrador Francisco Pimiango y Ramón Lluís Bande presenten güei, vienres 7 d’abril, Día de les Lletres Asturianes, les sos dos obres últimes “Bruxes males, bruxes bones”, de Francisco Pimiango, y “Historia d’un árbol”, con testos de Ramón Lluís Bande y dibuxos d’esi mesmu artista. Los dos llibros tán editaos por Publicaciones Ámbitu.

L’actu va ser na llibrería El Búho Lector d’Uviéu, a les 18.30 hores.

Nel día les Lletres Grupu Epona quier convidar a tolos rapacinos d’Asturies a lleer de baldre los sos cuentos dende la web de l’Asociación a la que pue llegase dende www.grupuepona.com Esta iniciativa quier “ufiertar la posibilidá de conocer la lliteratura n’asturianu d’una manera rápida, cómoda y cenciella como ye facelo dende internet”. Los cuentos colgaos na web perteneces al volume editáu pola mesma Asociación col titulu ‘Cuentos pa que suañes’. Amás, l’asociación ta acabante asoleyar ‘Cuentos prestosos escritos por escolinos y escolines’, onde los escolinos de delles escueles d’Asturies son los autores y protagonistes.

Estos cuentos foron recoyíos pola Asociación a lo llargo los años magar talleres lliterarios y concursos de cuentacuentos ilustraos que Grupu Epona fizo peles Escueles asturianes.

Grupu Epona quier con esti llibru amosar el trabayu que se fai nes Escueles dende l’asignatura d’asturianu pesie tolos pilancos que-yos ponen a los mayestros. Ye un homenaxe a los escolinos y a los docentes de llingua asturiana porque ensin ellos nun fuere posible esti trabayu.

D’otra miente recuerda a los adultos que Grupu Epona tamién edita pa esti públicu con llibros que van de poesía hasta la narrativa.

Grupu Epona anunció tamién la so presencia por tercer añu na Feria Tolo d’Asturies que va tener llugar na Felguera esti fin de semana 8 y 9 de mayu onde van tener a la venta tolos llibros de l’Asociación ya otros d’otros autores ya editoriales.

Xuventú Asturianista presentó esti xueves, 6 de mayu de 2010, la so nueva imaxe, con un llogotipu y un cambiu del so color corporativu con una participación bien importante. La presentación fízose dientro d’un “Homenaxe a los escritores en llingua asturiana, pola oficialidá”, na Llibrería Alborá de Xixón, que la mocedá del PAS organizó pola mor de la Selmana de les Lletres Asturianes.

Nel actu celebróse un recital d’autores asturianos y xente representativo de la cultura asturiana, ente los que tuvieron los escritores Vicente García Oliva, Sabel Tuñón, Xuan Santori, María Jesús Suárez, Inacio Rodríguez-Solar, Llucía Fernández Marqués, Rubén Rey, Helena Trexu, Esther García, l’hestoriador Javier Cubero o’l presidente d’El Garrapiellu, Tino Lozano. Lléeronse testos, amás de los de los propios autores, de Xosé Antonio García, Antón de Marirreguera, Andrés Solar, María Teresa González…

L’Homenaxe abriólu Xuan Pandiella, voceru de Xuventú Asturianista, que recordó la importancia de la lliteratura a lo llargo de tola hestoria pal caltenimientu y normalización de la llingua asturiana.

Dempués de les llectures hebo un un intermediu musical de cantares asturianos, por Jesús Garmón, que tocó temes como “Nun quiero coyer la flor” o “Chalaneru”, ente otros.

Darréu, Inaciu Galán, del Gabinete de Prensa y Comunicación del Partíu Asturianista, esplicó y desveló al traviés d’un audiovisual el llogotipu nuevu de la Xuventú Asturianista, que recueye’l verde como’l so color principal “por ser el color que más representa a Asturies, a la defensa del mediu ambiente, al derechu…” y el trisquel “por representar al continuu deprendizaxe, la evolución y el crecimientu, y el nun escaecer el nuesu pasáu”.

Amás, presentóse un audivisual (que pue vese yá en youtube) y los folletos de la campaña que va distribuyise güei na Manifestación pola Oficialidá “pa recordar al Gobiernu d’Asturies, formáu pola FSA-PSOE ya Izquierda Unida-Bloque por Asturies, y al PP, que l’asturianu tien que tener l’estatus d’oficialidá, como drechu irrenunciable de tolos asturianos”

Una vegada al añu munchos de los diputaos de la Xunta Xeneral usen l’asturianu. Y ye que coincidiendo cola Selmana de les Lletres Asturianes, les autoridaes del país, o polo menos delles, participen na llectura pública institucional de testos n’asturianu, que se produz cada añu nel Salón Europa. Participen davezu, amás de dellos diputaos, dalgunos escritores, la presidente de l’ALLA, y otres autoridaes, anque non el Presidente Areces.

Güei, xueves, a la una la tarde, entama esti actu simbólicu nel que, anque seya per un día, pue sentise l’asturianu ente les paredes del Parllamentu asturianu.

Los actos de la XXXI Selmana de les Lletres Asturianes terminen mañana col día grande, el propiu Día de les Lletres, nel qu’amás de los actos entamaos pola Academia de la Llingua Asturiana n’Uviéu, el Gobiernu d’Asturies entama delles actividaes y el Día del Llibru Asturianu, con descuentos del 10% nes llibreríes.

Amás, en Mieres, a les 12 hores, celébrase l’actu escolar institucional de celebración, cola intervención d’autoridaes, la entrega de premios del “XV Concursu de Poesía y Dibuxu” y del “VII Concursu de Cartelismu”, amás de delles actuaciones musicales.

L’Eo-Navia súmase a la celebración del Día de les Lletres Asturianes, que nun apaez nos actos oficiales, con un actu na Llibrería Bertrand d’Uviéu, nel Espaciu Buenavista. L’actu «Falando: versos y sois» sedrá güei, xueves 6 de mayu, a les ocho la tarde cola participación de Xurde Portilla Lejarza, responsable del diariu cultural del occidente Qué femos, y encargáu de moderar una mesa redonda sobre la situación actual del gallego-asturianu.

Na mesa van participar los escritores Moisés Cima Fernández, Miguel Rodríguez Monteavaro, Xosé Miguel Suárez Fernández y Manuel García-Galano, amás del músicu Andrés Rodríguez Monteavaro. L’actu va pesllase con un rectial.

Güei, xueves 6 de mayu, a les 19:30 hores, el Salón d’Actos de la Casa Cultura de Mieres, acueye una mesa redonda organizada por Parpayuela Espaciu Cultural, embaxo’l nome “Lliteratura asturiana, presente y futuru” y cola participación d’Ana Vanesa Gutiérrez, Antón García, José Angel Gayol, Pablo Texón, Xandru Fernández y Xuan Bello. La moderación va tar al cargu d’Hilario Feito, de Parpayuela Espaciu Cultural.

La timba poétika llega a la so quinta edición, per segunda consecutiva nel bar “El zielo”, n’Uviéu. Nesta ocasión la cita va ser a les diez de la nueche de mañana, vienres 7 de mayu, Día de les Lletres Asturianes. Aprovechando la fecha, la timba va tar dedicada esta vez, n’esclusivo, a la lliteratura fecha n’asturianu.

Van ser 7 los poetes participantes: Miguel Allende, Laura Marcos, Pablo Texón, Sergio Gutiérrez Camblor, Xandru Fernández, Dani Tritón y Pablo X. Suárez.