Lliteratura

L’escritor asturianu José Manuel Fernández Argüelles vieno acabante ganar el I Premiu Nacional de Novela en castellanu ‘Alcorcón Siglo XXI’, pola so obra ‘La gasolinera de colores’.

Un total del 76 noveles procedentes de 14 países participaron nesta primer edición del galardón entamáu pola Asociación Cultural Alcorcón Siglo XXI, en collaboración con Ediciones Irreverentes.

L’Asociación d’Amigos de la Biblioteca d´Uviéu entama un recital de poesía pa esti vienres 14 de mayu, a les 19:30 hores, na Biblioteca Pública d’El Fontán, n’Uviéu. Nel mesmu van participar los escritores en llingua asturiana Rubén d’Areñes y Esther Prieto; y el mozu escritor en gallego-asturianu Miguel Rodríguez Monteavaro.

Güei, vienres 14 de mayu a les 21 hores preséntense trés llibros en La Casa Posafuelles, el chigre de la Xunta pola Defensa de la Llingua Asturiana. Los llibros en cuestión son “Los Dioses de Curtis”, de Sergio Gutiérrez Camblor, “Tiempu de Render”, de Sofía Castañón y “Yoni y yo” de Pablo X. Suárez.

L’Alcaldesa del Ayuntamientu de Castrillón, Ángela Vallina de la Noval y el Conceyal d’Educación y Cultura, Iván Patiño, van participar güei, vienres 14 de mayu a partir de les ocho la tarde, na presentación del nuevu llibru d’Esther García López, escritora y miembru de l’Academia de la Llingua Asturiana.

Na presentación de “Deva y el pitín” van tar tamién Isabel Iglesias Cueva, maestra del C.P. Baudilo Arce d’Uviéu, y Ángela Sánchez Vallina de la Editorial Pintar-Pintar, qu’asoleya esti llibru infantil. L’actu va celebrase nel salón d’actos del Edifciu de Servicios Sociales de Castrillón, asitiáu na cai Rei Pelayo 27.

Deva y el PITÍN

Ilustráu por Tina García, el llibru recueye la hestoria del pitín Manolín “que se perdió cuando yera pequeñín y al que los sos amigos ayudaron pa buscar a la so ma. Manolín recibió una lleición y dende esi día siempre obedeció a los sos pas”.

Güei, xueves 13 de mayu, en LlibrUviéu y a les 18.00 hores, Helena Trexu Fombella, presenta la obra ganadora del premiu de l’ALLA ‘Llectures pa rapazos 2008’ editáu agora con ilustraciones de Violeta Mateu. La presentación va tar al cargu d’Esther García López, académica correspondiente de L’ALLA, autora de dellos llibros pa la mocedá amás de profesora hasta va bien poco.

Nel libru l’autora trainos les aventures d’Olaya, una neña que viaxa a un pueblu africanu colos sos pas, médicos que collaboren como voluntarios con una ONG. La pequeña protagonista va descubrir l’amistá y la solidaridá al empar que deprende munches coses de la cultura africana.

Luis Martínez Muñiz, director de LlibrUviéu, abría ayeri miércoles, la presentación de los dos primeros volúmenes espublizaos con obres ganadores nos Asturnews de Lliteratura Infantil y Xuvenil, qu’edita La Cruz de Grau. Martínez Muñiz comentó siguir la obra lliteraria d’Abel Martínez, ún de los autores presentaos, y la so satisfacción, por acoyer la presentación d’obres en llingua asturiana. Darréu garró la pallabra Próspero Morán, director d’Asturnews, que comentó les razones que llevaron al diariu a convocar, y darréu espublizar, estes obres, “da-y puxu a la lliteratura asturiana y promocionar a los autores dende’l nuesu mediu de comunicación”, remató.

Inaciu Galán, redactor d’Asturnews y secretariu del xuráu nes dos ediciones del premiu presentó la figura de los autores Abel Martínez González, Xurde Fernández y Marián García, de los que por razones llaborales asistió namás el primeru d’ellos. “Pueden considerase tovía autores mozos, pero con una carrera lliteraria afitada y una calidá bien importante, amás de numerosos premios”. Perfiló especialmente Galán, la figura de Martínez, que se fizo yá con premios como l’Uviéu de narrativa, ún de los que cuntaben con mayor dotación hasta la so suspensión en 2009.

Nel actu diose anuncia amás, de la publicación próxima, en dos tomos, de toles narraciones ganadores y accésits nes dos ediciones del premiu Asturnews celebraes hasta’l momentu.

L’actu pesllóse cola pallabres del autor d’«Unos cuentos de muerte», Abel Martínez, que-y dio les gracies a Asturnews por consideralu merecedor del gallardón, y comentó’l conteníu de los siete cuentos que componen el llibru de rellatos col que se fizo con un accésti na edición última del premiu Asturnews.

Tres la presentación llegó’l momentu protocolariu, la firma del llibru d’honor de LlibrUviéu, que tuvo llugar nel espaciu preparáu a costafecha pa la robla del mesmu. L’autor, y darréu Próspero Morán, estamparon la so robla, xunto con un testu n’alcordanza de la presentación de los llibros del Premiu Asturnews.

Semeyes de la presentación de los llibros del Premiu Asturnews

Güei, miércoles, a les 13:00 h. va producise la presentación de los llibros d’Abel Martínez González, ‘Unos cuentos de muerte’, y Marián García y Xurde Fernández, ‘Febreru, 29’, asoleyaos por Asturnews y La Cruz de Grau. Los actos de LlibrUviéu faense nel Paséu Los Álamos de la capital asturiana.

Amás, a les 18:00 h. va producise la presentación del llibru de Carmen González Casal ‘Los amores del rey Casto’, cola presencia de Marta Magadán, editora. Media hora más tarde l’Asociación d’Escritores presenta ‘Mujeres en escena. Feminismo y política en la literatura teatral’, de Violeta Varela Álvarez.

A les siete y cuartu va celebrase una mesa redonda sobre “Lliteratura Europea”, y a les ocho, Ignacio del Valle presenta “Melania Jacoby”, de Susana Pérez Alonso.

Mañana xueves, a les 12:15 h, presentación infantil con Vicente Muñoz Puelles, qu’asoleya ‘Polizón a bordo. El secreto de Colón”, l’actu va celebrase nel Colexu Inmaculada. Darréu, a les 13:15 h., preséntase un llibru nuevu de Dorita García. ‘La sombra de la llama’. A les 18:00, llega la prsentación d’‘Olaya n’África’, premiu ‘Concursu de llectures pa Rapazos’ de l’Academia de la Llingua Asturiana 2008. Van presentalu Esther García López y l’autora, Helena Trexu.

A les 18:30 h. va producise la presentación del llibru de José Luis López Fernández ‘Cacho, el grande’ per parte del autor y de Sandra Martínez Sánchez. A les 19:15 h. Carmen Gómez Ojea va falar del so llibru “Nosotras de cinco a nueve”. Pesllando la xornada del xueves, Vicente Muñoz Puelles con ‘La guerra de Amaya’ cola presencia del protagonista del llibru, Cecilio Puelles.

Los actos van siguir hasta’l domingu 16 de mayu.

Cambalache, un negociu lliterariu y cultural allugáu na cai Martínez Vigil, númberu 30, d’Uviéu entama la VI Feria del Llibru, que dende’l 12 al 21 de mayu va desenvolver un programa d’actos onde destaquen proyecciones d’audiovisuales, talleres, recitales poéticos y presentaciones de llibros.

El primer actu va ser esti miércoles 12, a les 20:00 hores, con Ricardo Ferrer Espinosa que va presentar el so llibru “Nos matan y no es noticia”.

La feria LlibrUviéu, asitiada nel Paséu de los Álamos de la capital d’Asturies, va acoyer esti miércoles 12 de mayu, a partir de les 13 hores, la presentación de dos volúmenes, que fueron premiaos con accésits, nel II Premiu Asturnews de Lliteratura Infantil y Xuvenil. Les narraciones espublizaes agora son «Unos cuentos de muerte», d’Abel Martínez González; y «Febreru, 29» de Xurde Fernández y Marián García.

Na presentación van tar presentes los autores, el director d’Asturnews, Próspero Morán, y el secretariu del Xuráu qu’otorgó’l premiu, Inaciu Galán.

Los autores:

-Abel Martínez González (Uviéu, 1976) Collaborador habitual de revistes como Lletres Asturianes, algamó gallardones tan importantes como’l Premiu Uviéu de narrativa nel añu 2007, l’Art Nalón de cuentos curtios y na so primer edición, el Premiu Asturnews de Lliteratura Infantil y Xuvenil, ex aequo con Nicolás V. Bardio.

-Xurde Fernández (Candás, Carreño, 1975) Xurde Fernández. Nació en Candás (Carreño) en 1975. Profesor de llingua asturiana n’enseñanza secundaria y collaborador de l’Academia de la Llingua Asturiana y del diariu El Comercio, vio publicada en 2007 la so primer colección de cuentos curtios, titulada Volver.

-Marián García (Xixón, 1975) Filóloga y Esperta en Llingua Asturiana pola Universidá d’Uviéu. Anguaño ye profesora de Llingua Asturiana en Candás. Espublizó a comuña con Xurde Fernández la novela «El color del escaezu», espublizada por Trabe en 2008.

La editorial Trabe ta acabante sacar al mercáu un llibru de rellatos de Ricardo Candás, tituláu “Les últimes pallabres”. Doce son los títulos qu’inclúi esta compilación que la editorial define como “crónica d’un mundu que cai y diz les pallabres últimes”. Un llibru nel que tres del aire inmóvil que percuerre los espacios pelos que transita la mirada certera del autor búi un soplu de muerte y acabación, pero tamién d’inocencia. Inocencia de rapacín que tenta d’ayudar al padre a escapar de la mala vida de la mina apurríéndo-y llapiceros asgaya pa qu’axunte carbón bastante como pa nun volver a picar nes coraes de la tierra.

Ricardo Candás (Xixón, 1977) ye llicenciáu en Filosofía pola Universidá d’Uviéu. Escritor billingüe, tien publicáu nesta mesma editorial el poemariu ganador del premiu de poesía «Fernán-Coronas» del añu 2005, Quiciás seya payares. Como narrador ye esta la so primer obra publicada, magar que yá tenga ganaos dellos premios y dalgunos de los rellatos d’esti llibru fueran yá publicaos en dalguna revista o llibru compilatoriu, como Formientu o Lletres Asturianes, ente otres.