Lliteratura

El xueves 10 de xunu, a les 19 hores, l’Aula de les Metáfores, asitiada na Casa Cultura de Grau, Manuel García Rubio va allegar falar colos llectores moscones de la so novela “Sal”, asoleyada por Lengua de trapo y finalista del Premiu de la Fundación Lara a la meyor novela del añu 2008.

Esta actividá ta abierta al públicu xeneral, anque s’enmarca nos Clús de Llectura qu’entama la Biblioteca Municipal de Grau. Precisamente esta va ser la última sesión del Club enantes del parón braniegu, qu’entamen otra vegada n’ochobre.

Manuel García Rubio (Montevideo, 1956) vive n’Asturies dende los diez años. Practicó con ésitu l’ensayu, y dalgunos de los sos rellatos curtios figuren n’antoloxíes españoles y Hispanoamericanes. Con too, ye nel campu de la novela nel que, pasu a pasu, foi faciéndose con ún de los buecos más interesantes y orixinales de la narrativa contemporanea nel estáu español.

L’escritor xixonés Milio Rodríguez Cueto espubliza “El final de la historia”, un llibru asoleyáu por Vtp Editorial, recoyendo nun volume los cuentos espublizaos nos suplementos Cultura y La Nueva Quintana del diariu La Nueva España ente los años 2007 y 2009. Nos cuentos atópase l’Asturies urbana y la rural, el rellatu costumista y el fantásticu, cuentos sentimentales y cuentos d’humor enllenen les páxines d’El final de la historia, siempre cola pretensión d’esplorar territorios de los que la lliteratura en llingua asturiana tuvo, tradicionalmente, ausente.

Milio Rodríguez Cueto (1962) ye autor, ente otros títulos, de Románticu (novela),Aventures, El ciegu la esquina, Les razones del calamar, L’últimu volador, Véndese pisu(rellatos) y El velatoriu de Blancañeve (prosa ensayística).

Con prólogu de Benigno Dionisio Coso, Felgueroso espubliza un llibru tituláu “Páxines del llibru muertu” que la editorial Trabe califica como escritu con “mano firme y grandes dotes de narradora” per parte de la autora, que yá algamó dellos premios lliterarios n’asturianu y castellán y tien espublizao en varies revistes y antoloxíes de rellatos. Ye colaboradora del diariu La Nueva España, onde firma la columna «El filandón».

Elisabet Felgueroso López (Llangréu, 1980) ye amás, llicenciada en Filoloxía Hispánica pola Universidá d’Uviéu, onde cursó’l doctoráu n’Estudios de la Muyer, dedicando’l so trabayu d’investigación al tratamientu de la imaxe de la muyer na cultura minera a finales del sieglu XIX.

L’autor valencianu vuelve a les llibreríes con un poemariu n’asturianu. Sicasí, nesta ocasión, la novedá ye nesti casu l’usu, amás del asturianu, del alfabetu deseret. L’alfabetu Deseret, un alfabetu fonéticu del inglés desenvueltu a mediaos del sieglu XIX nel territoriu de l’actual Utah, foi auspiciado pola Ilesia mormona ellí asitiada, p’ayudar a los inmigrantes de fala non inglesa a aprender l’idioma inglés.

Josep Carles Laínez (València, 1970) escribe n’asturianu dende 1991. Los años 1997 y 2008, algamó’l Premiu de Teatru de l’Academia de la Llingua Asturiana coles obres Elsa metálico(1998) y Thule (2010). Con posterioridá, publicó’l poemariu Lenta lletanía del cuerpu nel hedreru (2005), diversos fragmentos del dietariu La muerte del padre (2009) y la edición y torna al español de la Poesía asturiana completa de Lluís X. Álvarez (2009).

José Luis Argüelles preparó la edición billingües de “Toma de tierra. Poetas en lengua asturiana. Antología [1975-2010]”. Esta obra, publicada por Ediciones Trea, recueye una esbilla de poetes integrantes del nomáu Surdimientu, que ficieron los propios autores por petición d’Argüelles. Asoléyense diez poemes, n’asturianu cabo la so traducción al castellanu, de cada autor. El llibru cunta con una amplia introducción ellaborada pol escritor y periodista José Luis Argüelles. Consta de 768 páxines y tien un preciu de 35 euros.

Los poetes presentes nesta antoloxía son, per orden de nacencia, Pablo Ardisana, Nel Amaro, Xosé Bolado, Manuel Asur, Lluis Xabel Álvarez, Xosé Manuel Valdés, Xuan Xosé Sánchez Vicente, María Teresa González, Roberto González-Quevedo, Taresa Fernández Lorences, Miguel Rojo, Ánxel Álvarez Llano, Luis Salas Riaño, Antón García , Esther Prieto, Lourdes Álvarez , Miguel Allende, Xosé Antón García, Ignaciu Llope, Lluis Fano, Humberto Gonzali, Berta Piñán, Xulio Vixil, Aurelio González Ovies, Xuan Bello, Xilberto Llano, Marta Mori, Pablo Antón Marín Estrada, Xabiero Cayarga, Xuan Santori, Xulio Viejo, Chechu García, Xandru Fernández , Elías Veiga, José Luis Rendueles, Martín López-Vega, Pablo Texón, Héctor Pérez Iglesias y Ana Vanessa Gutiérrez.

La Fundación Juan Muñiz Zapico espubliza, en collaboración con KRK Ediciones, los microrrellatos ganadores y seleccionaos del VI Concursu de Microrrellatos Mineros Manuel Nevado Madrid. El ganador de la edición última foi Juan José Argudo García por “El rey de la mina”, siendo’l primer clasificáu n’asturianu, José Luís Rendueles por “El reló n’hora”. Amás apaecen autores como Miguel Rodríguez de Vera Mouliaá, Costante Álvarez Delgado, Mauricio Díaz Rodríguez, María Prado Muñiz o María Julia Bello.

La presentación de los mesmos va facese mañana, martes 25 de mayu, a les 19:30 hores, nel salón d’actos de la Casa Cultura d’Espiel. Esti eventu va servir tamién pa facer homenaxe a Manuel Nevado, nel venti aniversariu de la so muerte.

Páxina colos rellatos ganadores de 2009

Coincidiendo cola celebración de la XXXI Selmana de les Lletres Asturianes, la Xunta Xeneral del Principáu d’Asturies editaba estos un volume non venal tituláu “Una botella d’agua enllena de tierra vivo”. Nél cuarenta y ún escritores, d’estremaes xeneraciones y estilos lliterarios, apurren un microrellatu escritu n’asturianu o en gallego-asturianu que, d’una manera o otra, tienen dalgo que ver cola biodiversidá. Esto ye asina porque nesti 2010 ta celebrándose l’Añu Internacional de la Diversidá Biolóxica y la máxima institución parllamentaria asturiana quixo xuntar estes dos celebraciones.

La xestión editorial faila Ámbitu y dalgunos de los testos lleéronlos diputaos y cargos púbicos de toa triba nun actu celebráu na Xunta Xeneral pa conmemorar la Selmana de les Lletres Asturianes.

Ente los autores de la escoyeta: Vicente García Oliva, Carmen Gómez Ojea, Roberto González-Quevedo, Miguel Solís Santos, Dolfu Camilo, Xuan Bello, Xandru Fernández, Iris Díaz Trancho, Xosé Ánxelu Gutiérrez Morán, Ricardo Candás o Miguel Rodríguez Monteavaro .

El títulu del llibru, Una botella d’agua enllena de tierra vivo, ye un versu de Xosé Antonio García, escritor a quien tuvo dedicada la XXXI Selmana de les Lletres Asturianes.

La escritora Helena Trexu va presentar “Olaya n’África” na Casona Bravial, en Blimea, güei miércoles 19 a les 19 hores. Xunto a l’autora va tar Pablo Manzano, académicu y presidente de la Fundación Nuberu.

Esta obra premiada pola Academia de la Llingua asturiana col Premiu llectures pa rapazos 2008 y ta editada por esa mesma entidá na coleición escolín col numberu 65, empobinada al públicu mozu magar los 12 años. La obra presentóse yá en Xixón y n’Uviéu.

El Centru de Cultura Vieyu Institutu Xovellanos de Xixón, va acoyer un recital de Juan Carlos Mestre (Villafranca del Bierzu, Lleón, 1957), poeta y creador visual, ganador del Premiu Nacional de Poesía en 2009. L’actu entámalu La Llaboral Centru d’Arte y Creación Industrial, güei, martes 18 de mayu, a les 19.30 hores.

Mestre ye autor de los poemarios “Siete poemas escritos junto al agua” (1982), “La visita de Safo” (1983), “Antífona del Otoño nel Valle del Bierzo” (Premiu Adonais, 1985), “Las páginas del fugo” (1987), “La poesía ha caido en desgracia” (Premiu Jaime Gil de Biedma, 1992) y “La tumba de Keats” (Premiu Xaén de Poesía, 1999), llibru esti postreru escritu na so estancia como becariu de l’Academia d’España en Roma. La so obra poética ente 1982 y 2007 foi recoyida na antoloxía “Las estrellas para quien las trabaja” (2007).

La trece edición del Salón del Llibru Iberoamericanu llega al Vieyu Institutu Xovellanos de Xixón esti miércoles, 19 de mayu, con cinco díes d’actividaes alredor de la lliteratura fecha a un llau y al otru del Atlánticu. Ente les presentaciones y recitales, van participar José Luis García Martín, Beatriz Rato, Xuan Xosé Sánchez Vicente, Miguel Rojo, Armando Vega, Carmen Yáñez, Kirmen Uribe o Xuan Bello, ente otros munchos.

Na inauguración d’esti miércoles, que va celebrase a les 18:30, van participar la Conseyera de Cultura, Mercedes Álvarez, José Vega, de la obra social de Caxastru, Justo Vilabrille, Conceyal de Cultura de Xixón, y Luis Sepúlveda, director del eventu, cuntando cola banda de gaites Noega y el coru Encarnación Vega.

Programa completu del Salón del Llibru Iberoamericanu