Lliteratura

El Club de Prensa de La Nueva España recibió esti llunes la presentación de la novela “Mann-U-Mittu, lleendes de l’Asturies primera”, de Costante Álvarez, na que participó l’autor, xunto a José Ángel Gayol, d’Universos. La novela atópase yá a la venta nes llibreríes del país.

Esti miércoles, 16 de xunu a les 19 hores, nel Club de Prensa de La Nueva España, n’Uviéu, van presentase les obres de teatru “Oh, 36!” y “Poison”, de Lluis Portal, ganadores de los Premios Uviéu de Teatru nes ediciones de 2007 y 2008. Nel actu va tar, amàs del autor, l’editor de la obra, José Angel Gayol.

El proximu xueves 24 de xunu a les 19:30 nel patiu de la Biblioteca Carlos Gonzalez de Posada de Candás va presentase’l llibru úlitmu de Xurde Fernandez “Ucrania y otros nomes de muyer”. Nel actu van participar Carmen Dinten (responsable de la Biblioteca), Alberto Suarez (d’Ediciones Ambitu) y l’autor.

Güei, xueves 10 de xunu, a les 19 hores, l’Aula de les Metáfores, asitiada na Casa Cultura de Grau, Manuel García Rubio va allegar falar colos llectores moscones de la so novela “Sal”, asoleyada por Lengua de trapo y finalista del Premiu de la Fundación Lara a la meyor novela del añu 2008.

Esta actividá ta abierta al públicu xeneral, anque s’enmarca nos Clús de Llectura qu’entama la Biblioteca Municipal de Grau. Precisamente esta va ser la última sesión del Club enantes del parón braniegu, qu’entamen otra vegada n’ochobre.

Manuel García Rubio (Montevideo, 1956) vive n’Asturies dende los diez años. Practicó con ésitu l’ensayu, y dalgunos de los sos rellatos curtios figuren n’antoloxíes españoles y Hispanoamericanes. Con too, ye nel campu de la novela nel que, pasu a pasu, foi faciéndose con ún de los buecos más interesantes y orixinales de la narrativa contemporanea nel estáu español.

La escritora Iris Díaz Trancho presenta güei, xueves 10 de xunu, el so llibru últimu “Mio ma, la pirata” col que Suburbia Ediciones inagura la so colección de lliteratura infantil. La obra ta ilustrada por Gloria Caamaño. La presentación va celebrase a les 19.30 nel Institutu Vieyu Xovellanos de Xixón con Xulio Berros como “maestru de ceremonies”.

Como’l títulu indica “Mio ma, la pirata”, ye una hestoria de pirates anque atípica: Barba Negra lleva un restaurante y Barba Roxa ye xastre. La ma del nenu protagonista sigue surcando los mares buscando barcos que prindar y ayalgues escondíes. Con ayuda de la perra Pulga entamen un viaxe a Madagascar en busca del mayor tesoru de toos.

La Fundación Príncipe d’Asturies daba anuncia güei del ganador del so gallardón dedicáu a les Lletres. L’escritor franco-llibanés Amin Maalouf, cola obra traducida a más de 20 idiomes, ye según el xuráu “unu de los escritores contemporaneos que más afondó na cultura mediterránea, representada como un espaciu simbólicu de convivencia y tolerancia”.

El Xuráu d’esti Premiu convocáu pola Fundación Príncipe d’Asturies– tuvo presidíu por Víctor García de la Concha y formáu por Andrés Amorós Guardiola, Luis María Anson Oliart, J. J. Armas Marcelo, Blanca Berasátegui Garaizábal, Carmen Caffarel Serra, Pedro Casals Aldama, Antonio Colinas Lobato, Milagros del Corral Beltrán, Jacobo Fitz-James Stuart y Martínez de Irujo, José Luis García Martín, Pilar García Mouton, Olvido García Valdés, Manuel Llorente Manchado, Rosa Navarro Durán, Berta Piñán, Fernando Rodríguez Lafuente, Fernando Sánchez Dragó, Diana Sorensen y Román Suárez Blanco, como secretariu.

Amin Maalouf nació en Beirut, en 1949, nel senu d’una familia d’orixe cristianu. Estudió Economía Política y Socioloxía na Universidá Francesa de Beirut y exerció’l periodismu nel diariu An-Nahar. En 1976 exilióse en Francia arriendes de la guerra civil llibanesa. Ellí siguió la so carrera periodística como redactor xefe de Jeune Afrique, cubriendo numberosos acontecimientos como la guerra de Vietnam o la revolución iranina. Dende 1985, Maalouf dedícase dafechu a la lliteratura, na que cultivó la realidá hestórica y la ficción, l’ensayu y la novela.

Recibió, ente otros galardones, el Premiu Goncourt por “La roca de Tanios” (1993), el Prix Mediterranée y la Medaya d’Oru d’Andalucía. Ye doctor honoris causa pola Universitá Rovira i Virgili de Tarragona.

El Premiu Príncipe d’Asturies de les Lletres concédese “a la persona, institución, grupu de persones o d’instituciones que la so llabor creador o d’investigación represente una contribución relevante a la cultura universal nos campos de la Lliteratura o de la Llingüística”. Nesta edición llegaron un total de 27 candidatures procedentes de L’Arxentina, Brasil, Canadá, Chile, Estaos Xuníos, Guatemala, Países Baxos, Llíbanu, Macedonia, Marruecos, Méxicu, Perú, Portugal, Reinu Xuníu, Rumania y España.

Caún de los Premios Príncipe d’Asturies, concedíos per primer vegada en 1981, tán dotaos con cincuenta mil euros, la escultura creada y donada espresamente por Joan Miró pa estos galardones, un diploma y una insinia acreditativos. Los gallardones van entregase na seronda n’Uviéu, nun solemne actu presidíu, como cada añu, pola S.A.R. el Príncipe d’Asturies.

Güei a les 19:30 hores, va tener llugar la entrega del Premiu Pepe Campo un concursu que lleva siete ediciones dedicáu al monólogu, pero que se convocó yá en 1997 como certame de narraciones.

La entrega va facese na Casa Cultura de Morea (Ayer), cuntando cola presencia del ganador d’esti añu, Inaciu Galán y González, y representantes del xuráu y de los Humanitarios.

L’actu ye l’entamu de la Selmana Cultual Joaquín Rodríguez Muñiz, que celebra güei miércoles, el Día de Pepe Campo.

Hestoria del Premiu Pepe Campo

Nel mes d’abril d’esti añu cumpliénse cinco años de la muerte del escritor Manuel d’Andrés “Mánfer de la Llera”, que venía escribiendo n’asturianu dende los tiempos de la Posguerra y que s’implicó nel movimientu asturianista modernu a partir de los años setenta, convirtiéndose nun símbolu vivu de la hestoria de la lliteratura asturiana. La Conseyera de Cultura y Turismu, Mercedes Álvarez, anunció estos díes que la próxima Selmana de les Lletres Asturianes va celebrase en Llangréu y va centrase na figura d’esti autor.

L’autor, con una vida llarga (morrió a los 85 años) foi mineru, poeta y narrador n’asturianu, ñació en Les Cuestes de Ciañu, Llangréu, en 1918. Ye autor de llibros como ‘Cuentos en verso asturiano’ (1953), ‘Cielo bajo tierra’ (1982), ‘Garrapiellu lliterariu asturianu’ (1983), ‘Cabalgando sol tiempu’ (1990), ‘Coses vivíes’ (1998) o ‘La mio prosa atada en versos’ (2002), ente otros.

A lo llargo de la so vida foi reconocíu, col nomamientu como miembru de l’Academia de la Llingua Asturiana, una cai nel so conceyu natal y numerosos premios y reconocencies. Ye padre, amás del escritor Vital d’Andrés y el filológu Ramón d’Andrés, xunto col que redactó ‘Vocabulariu asturianu de la mina’.

Artículu d’Inaciu Galán sobre Mánfer de la Llera n’AsturnewsOpinión

Esti miércoles, 9 de xunu, na Sala Conferencies del Centru de Cultura Vieyu Institutu Xovellanos de Xixón, y a partir les 19,30 hores, entamará una actividá de la “Rolda 2010” de l’asoaciación l’Arribada, dedicada a “El fútbol y la lliteratura”.

Nella van participar l’escritor xixonésVicente García Oliva y los futbolistes José Antonio Pérez Boudón, José Manuel Espinosa Gómez y Eloy José Olaya Prendes, amás d’Humberto Gonzali. Los asistentes recibirán un exemplar d’“El pallabreru del fútbol” qu’editara la Oficina Municipal de la Llingua de Xixón.

Esta tarde preséntase l’antoloxía “Toma de tierra”, edición billingüe de la poesía de 38 autores asturianos, publicada por Trea y coordinada por José Luis Argüelles. L’actu va tener llugar nel Salón d’actos del Vieyu Institutu de Xixón a les 19.30 hores cola presencia de Mercedes Álvarez, Conseyera de Cultura; Consuelo Vega;Directora Xeneral de Política Llingüística; Leopoldo Sánchez Torre, profesor de la Universidá d’Uviéu; y el propiu Argüelles.

“Toma de tierra. Poetas en lengua asturiana. Antología [1975-2010]” recueye una esbilla de poetes integrantes del Surdimientu que ficieron los propios autores por petición d’Argüelles. Asoléyense diez poemes, n’asturianu cabo la so traducción al castellanu, de cada autor, na mayor parte los casos. El llibru cunta con una amplia introducción ellaborada pol escritor y periodista José Luis Argüelles. Consta de 768 páxines y tien un preciu de 35 euros.

Los poetes presentes nesta antoloxía son, per orden de nacencia, Pablo Ardisana, Nel Amaro, Xosé Bolado, Manuel Asur, Lluis Xabel Álvarez, Xosé Manuel Valdés, Xuan Xosé Sánchez Vicente, María Teresa González, Roberto González-Quevedo, Taresa Fernández Lorences, Miguel Rojo, Ánxel Álvarez Llano, Luis Salas Riaño, Antón García , Esther Prieto, Lourdes Álvarez , Miguel Allende, Xosé Antón García, Ignaciu Llope, Lluis Fano, Humberto Gonzali, Berta Piñán, Xulio Vixil, Aurelio González Ovies, Xuan Bello, Xilberto Llano, Marta Mori, Pablo Antón Marín Estrada, Xabiero Cayarga, Xuan Santori, Xulio Viejo, Chechu García, Xandru Fernández , Elías Veiga, José Luis Rendueles, Martín López-Vega, Pablo Texón, Héctor Pérez Iglesias y Ana Vanessa Gutiérrez.

Sicasí, otros autores refugaron la posibilidá d’apaecer na mesma, ye’l casu de Concha Quintana, Xosé Lluis Campal, Xulio Vixil y Pablo Rodríguez Medina, que nun artículu espublizáu n’AsturnewsOpinión mostróse mui críticu col procesu que se llevó alantre pa facer esta antoloxía, que según l’autor de l’Entregu fízose “nunes condiciones que me paecíen abusives” pa colos autores.

Artículu de Pablo Rodríguez Medina n’AsturnewsOpinión