Lliteratura

L’asociación cultural l’Arribada dio anuncia yá del xuráu que decidirá’l ganador del IV Premiu Timón, p’autores en llingua asturiana y n’eonaviego. Pa esta edición, optaron a los gallardones los escritores que nacieren nel añu 1960 o anteriormente.

P’alcordar el premiu, l’asociación convocó un xuráu integráu por persones venceyaes a la cultura del país, nesta ocasión integráu por Alberto Álvarez Peña, Vicente García Oliva, Aurora García Rivas, Humberto Gonzali, Jorge Espina, Inaciu Iglesias y Xuan Xosé Sánchez Vicente, ganador de la segunda edición.

Esta distinción, que consiste nuna obra del escultor y ceramista xixonés Jesús Castañón, va entregase durante la celebración de L’Arribada 2010, dientro de la so estaya Vagamar, y que va facese del 18 al 25 de setiembre. Los candidatos pa esti VI Premiu Timón son Pablo Ardisana, Manuel Asur, Roberto González-Quevedo y Miguel Rojo.

Los ganadores anteriores fueron, en 2007, Nené Losada Rico, en 2008, Xuan Xosé Sánchez Vicente y, en 2009, Manuel García ‘El Galano’.

Tovía nun se conoz el xuráu pa la edición del concursu d’autores en castellán.

El Vieyu Institutu de Xixón va acoyer la presentación de “Yoni y yo”, llibru de cuentos de Pablo X. Suárez nel qu’axunta un puñáu de rellatos protagonizaos, na so mayor parte, por xente mozo, de gustos y preocupaciones urbanes o periurbanes, y un auténticu desfile de fauna de polígonu y after, ensin cayer nunca nel tópicu y fuxendo tanto de l’apoloxía como de la condena moral. Un llibru sorprendente, d’estilu descaráu y directu, que yá se facía esperar. La presentación va celebrase güei, llunes 12 de xunetu, a les 19:30 hores.

Como ye vezu na colección mecánica popular, la fotografía de la cubierta ye obra de Jandro Llaneza, y el graffiti col que ta escritu’l títulu fíxolu pa la ocasión OCELT. Nel interior, cada cuentu va precedíu d’una ilustración ad hoc, por obra tamién de Jandro Llaneza.

Pablo X. Suárez ye escritor, filólogu y trabaya como responsable del Serviciu de Política Llingüística de la Comarca de la Sidra. Collaborador de revistes Lletres Asturianes o Formientu, tien espublizáu un poemariu tituláu “Asturiana Beat”.

Entrevista con Pablo X. Suárez

Ta acabante conocese la ganadora y segunda premiada del III Concursu de Narraciones Curties “Conceyu de Piloña”. La escritora María Xesús Rodríguez Guillón fízose col primer premiu cola obra “El zapatu” y lleva los mil euros otorgaos pal gallardón.

El segundu premiu foi tamién a parar en manes d’un escritora, Laura Marcos Domínguez, traductora, narradora y coordinadora del conseyu de redacción de la revista lliteraria Formientu. La obra cola que se fizo colos 700 euros del segundu premiu ye “Formal”.

El xuráu alcordó por unanimidá el fallu de los premios y destacó la calidá de los trabayaos premiaos y la dificultá nas delliberaciones a la hora d’otorgar los premios. El xuráu animó a la participación y a la creatividá lliteraria pal próximu certame. La entrega de premios, al que se presentaron dieciséis rellatos, va ser el próximu vienres 16, na Casa Cultura de L’Infiestu (Piloña).

Pablo Rodríguez Medina foi declaráu ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu trece. El primer premiu, dotáu con 800 euros, foi pa la so obra “Aproveciendo de fraxilidá”. L’autor yá ganare esti mesmu concursu nos años 2002, 2003 y 2007. El segundu premiu, dotáu con 500 euros, foi pal cuentu “Les circunstancies”, de Ricardo Candás Huerta, y Xuan Carlos Crespos Lanchas algamó’l tercer premiu, al que se-y apurren 350 euros, con “Cazumbre”.

La entrega premios va tener llugar na Casa Conceyu de Bimenes, allugada en Martimporra, de magar les 19’30 hores del prósimu xueves, día 1 de xunetu. Nel actu fadráse llectura pública de la obra ganadora.

La escritora Lourdes Álvarez ta acabante espublizar una plaquette titulada “P’anular los adioses”, na que recueye dellos poemes qu’anticipen el so llibru próximu, un poemariu que va espublizar l’añu que vien por Ediciones Trea, dientro de la colección “Entregas a cuenta”. El llibrín pue consiguise de baldre en delles llibreríes d’Asturies, como Cervantes y Ojanguren, n’Uviéu, o Paradiso, en Xixón.

El filólogu y escritor Xavier Frías Conde, que tien bien d’obres espublizaes en llingua asturiana, ta acabante asoleyar un llibru nuevu, cola novedá d’espublizase namás en versión dixital, que pue descargase de baldre y embaxo llicencia Creative Commons. La obra, titulada “Xixón(ón) century” ta formada por un cuentu curtiu tituláu “Sobrevivencia” y cinco microcuentos ambientaos en Xixón y escritos n’asturianu.

Xavier Frías-Conde (1965) ye Doctor en Filoloxía Románica, autor de lliteratura infantil, poesía y ensayu. Amás, ye traductor lliterariu, autor de delles antoloxíes (de poesía galesa, gallega y sarda contemporanees), miembru del Grupu Bilbao d’escritores en llingua gallega en Madrid. Tien obra espublizada en gallegu, castellán, asturianu, inglés, catalán…

Páxina onde pue descargase’l llibru de baldre

El XI Concursu de Narraciones Curties Conceyu Llaviana, entamáu pola Oficina de Normalización Llingüística, tien yá ganadores: Pablo Rodríguez Medina, en primer llugar con 600 euros, pola narración “L’espontaneu”; Alfredo Huergo Zapico, segundu premiu, de 300 euros, por “L’home qu’espantó a la muerte”, y Darío Aceba, que recibió’l tercer premiu, dotáu con 150 euros, pol rellatu “Armando”.

Güei, xueves 24 de xunu, a les 19:30 nel patiu de la Biblioteca Carlos Gonzalez de Posada de Candás va presentase’l llibru úlitmu de Xurde Fernandez “Ucrania y otros nomes de muyer”. Nel actu van participar Carmen Dinten (responsable de la Biblioteca), Alberto Suarez (d’Ediciones Ambitu) y l’autor.

L’autor ta acabante espublizar, xunto con Marián García, «Febreru, 29», obra que recibió un accésit nel II Premiu Asturnews de Lliteratura Infantil y Xuvenil.

Güei la lliteratura asturiana vive una importante novedá: la espublización del primer llibru que s’asoleya al traviés d’un blogue, la obra “Orbayu seco”, na que Nel Ricardo Álvarez Morán (Trubia, 1959), axunta 101 microrrellatos que pueden lleese de baldre nel blogue “Cordobello”.

L’autor espublizare yá, xunto a Maite González Iglesias los llibros pa rapacinos de “Ñubina, les estrelles y los pirates del espaciu” o “Ñubina atrapada nel Arcu la Vieya”, amás del llibru de testu “Les Coses d’Iyán”, ente otres obres.

L’Academia de la Llingua Asturiana yá espublizara dos microrrellatos de los conteníos n’“Orbayu seco” na so revista Lliteratura, y l’autor ufierta la so obra “a toles persones o organizaciones que quieran emprentalos con fines sociales”.

Blogue onde l’autor espubliza’l llibru

La editorial moscona presenta güei,xueves 17 una obra nueva, dedica a la hestoria del equipu “Oviedo Moderno C.F.”. L’actu va facese a les 19.30 hores, na llibrería Cervantes d’Uviéu, cola presencia del escritor Sergio Fuente Requejo, autor de la obra, primera de la colección Asturias Deportiva.

Nes más de 300 páxines del llibru atópense toles claves de la hestoria del club, con trés décades d’hestoria.