Lliteratura

L’escritor malagueñu Antonio Montes ganó güei, cola so obra “El grito”, el Premiu de Novela Café Gijón, que s’otorga en Madrid dende 1949 y cunta anguaño col patrociniu del Ayuntamientu de Xixón, que lu dota con 30.000 euros.

El xuráu tuvo presidíu por Rosa Regás y formáu por José María Guelbenzu, Marcos Giralt Riega, Mercés Monmany y Antonio Colinas.

Na sede escoyida esti añu pola Arribada, el Centru Municipal Integráu de L’Arena, va producise güei la presentación, a les cinco y media la tarde, de los llibros espublizaos por La Cruz de Grau, y accésits del Premiu Asturnews de lliteratura infantil y xuvenil, concováu pola empresa editora d’esti diariu. Les narraciones espublizaes son «Unos cuentos de muerte», d’Abel Martínez González; y «Febreru, 29» de Xurde Fernández y Marián García.

Media hora más tarde Sidoro Villa Costales presenta la obra infantil “Mael al debalu”, celebrándose darréu una tertulia sobre la lliteratura xuvenil n’asturianu. Darréu siguen les presentaciones, “El misteriu del neñu esborráu” d’Adolfo Camilo Díaz y “Fontenebrosa II” de Vicente García Oliva, dambes dos espublizaes por Trabe. A les ocho y media, presentación musica d’Inaux, per parte de Güextia, dando fin a les cuarta xornada de l’Arribada 2010.

Dempués de les xornaes d’inauguración d’esta fin de selmana, l’Arribada de Xixón entama’l so espaciu de conferencies y presentaciones, nel Centru Municipal Integráu de L’Arena, sede de les actividaes esti añu.

Güei, llunes 20, a les cinco y media la tarde, inaugurase la esposición de les Obres del III Concursu de Fotografíes de Tierra Astur, que va tar abierta hasta’l 24 de setiembte. A les seis de la tarde va celebrase una mesa redonda embaxo’l títulu “Belenos, 25 años de llucha pol Patrimoniu Asturianu dende la Sociedá Civil”. Media hora más tarde, Jesús F. Torres Martínez, del Departamentu de Prehistoria de la Universidá Complutense de Madrid, va dar llectura a la conferencia “La edá del fierru nel Cantábricu: Etnoarqueoloxía y Etnohistoria”.

A les ocho, Roberto González-Quevedo presenta la so obra “La Cultura Asturiana. Introducción a l’antropoloxía d’Asturies”, asoleyada apocayá con Ediciotes CH.

A les ocho y media inaugurase otra esposición, dedicada nesti casu a l’alfarería negra de Miranda. L’actu va facese con una visita guiada a cargu de Ricardo Fernández, espertu n’alfarería asturiana. Pue visitase hasta’l 15 d’ochobre.

La Biblioteca Pública “Miguel G. Teijeiro” d’As Figueiras, Castropol, convoca esti concusru de poesía, abiertu a cualesquier persona interesao en participar, con independencia de la so edá y procedencia, concursando en castellán o gallego-asturianu, y con dos ámbitos, educativu y comuñal, dixebráu esti últimu, ente menores y mayores de 18 años.

Les obres presentaes tendrán de ser orixinales ya inédites, escrites en castellán o en gallego-asturianu, según correspuenda. La estensión de los trabayos presentaos va ser llibre, siempres baxo nomatu, faciendo constar nel esterior “I Concursu de Poesía BPM “Miguel G. Teijeiro”.

Nel interior va acompañase asina mesmo d’otru sobre zarráu nel que conste’l seudónimu y nel so interior los datos del participante: nome, apellíos, edá, casa, teléfonu de contactu, y corréu lletrónicu, y, nel so casu, nome y datos del colexu participante. Los trabayos ensin premiar van pasar a ser propiedá de la Biblioteca.

Los trabayos van apurrise na Biblioteca Pública “Miguel G. Teijeiro” de Figueres, n’horariu de 11 a 15 hasta’l 17 de setiembre y de 11 a 13 o de 17 a 19.30 hasta l’8 d’ochobre. Tamién van poder unviase per corréu ordinariu a Biblioteca Pública “Miguel G. Teijeiro” (Edificio Torre del Reló) Avda de Trénor, e/n 33794 As Figueiras, Asturies.

Pa caúna de les categoríes, va faese entrega d’un llote de publicaciones y regalos pal primera clasificáu, amás d’un diploma de participación pa toos. El xuráu va tar compuestu por miembros designaos pol Conceyu de Castropol. El fallu del Xuráu va tener llugar el día 16 d’ochobre a les 14 hores.

La Casona del Bravial de Blimea, en Samartín del Rei Aurelio, va acoyer güei, miércoles 15 de setiembre, a les 18:30 hores, la presentación del llibru “Harry Potter y la Piedra Filosofal “, editáu por Trabe na so versión n’asturianu.

Nel actu va contase cola presencia del traductor de la obra, Xesús González Rato. La editorial Trabe ye la responsable d’espublizar esti títulu de l’autora inglesa J. K. Rowling tornáu a la llingua del país. La editorial tien pensao espublizar la colección completa de Harry Potter, que ta formada por seis noveles d’aventures más.

Embaxo’l nome de «I Concursu de Poesía BPM Miguel G. Teijeiro», la biblioteca pixota convoca esti premiu tanto pa poemarios en castellán como en gallego-asturianu. Pue presentase tol que quiera, siempres que seya enantes del 8 d’ochobre.

Tanto la temática como la estensión de los trabayos ye llibre y el premiu xébrase en dos ámbitos: educativu y xeneral. Nel primeru d’ellos van dase premios pa les categoríes de más pequeños de doce años y pal centru educativu más participativu; y nel segundu casu, ente menores y mayores d’edá.

Bases completes del concursu

L’asociación cultural L’Arribada dio anuncia güei del programa d’actos de la “Vagamar 2010” y de “Per Asturies”, les sos programaciones más importantes, que van entamar esti sábadu, 17 de setiembre, n’El Muelle de Xixón cola arribada de los escritores y un pasacais cola Banda de Gaites de Corvera d’Asturies. A les 19:30 vendrá’l tradicional actu de llectura de testos por representantes sociales y políticos, dedicáu esti añu a los autores de los sieglos XIX y XX. Nel actu van actuar Celia González Baschwitz (gaita rabil) y Hervè Perochon (dulcimer). Darréu siete díes de charres, presentaciones de llibros, teatru, esposiciones y otres actividaes alredor de la lliteratura asturiana.

Ente les presentaciones de llibros tán previstos “La Cultura Asturiana. Introducción a l’antropoloxía d’Asturies” de Roberto González-Quevedo; “Mael al debalu” de Sidoro Villa Costales; “El misteriu del neñu esborráu” d’Adolfo Camilo Díaz; “Fontenebrosa II” de Vicente García Oliva; “L’alcordanza” de Marta Mori; “Tu como yo. El nacionalismu vistu d’otra manera” d’Inaciu Iglesias; “Recetes llambiones” de Beatriz Rato Rionda, o “As razóis d’Anxélica” d’Aurora García Rivas.

Programa completu de l’Arribada

Suburbia Ediciones organiza na FNAC de Parque Principáu la presentación del llibru últimu de la escritora xixonesa Iris Díaz Trancho, “Mio ma, la pirata”. Una obra empobinada al públicu infantil con ilustraciones de Gloria Caamaño.

L’actu va celebrase’l sábadu, 11 de setiembre a les 19 hores, nel Clú Infantil de Parque Principáu.

Según dio anuncia güei l’Asociación L’Arribada, l’autor lleonés Roberto González-Quevedo ta acabante convertise nel cuartu ganador del Premiu Timón, p’autores en llingua asturiana y gallego-asturianu. El xuráu integráronlu Alberto Álvarez Peña, Vicente García Oliva, Aurora García Rivas, Humberto Gonzali, Jorge Espina, Inaciu Iglesias y Xuan Xosé Sánchez Vicente- La distinción, que consiste nuna obra del escultor y ceramista xixonés Jesús Castañón.

González-Quevedo va recibir esti premiu nun actu que se va celebrar el 23 de setiembre, a les 20 hores, nel xixonés Centru Municipal Integráu de L’Arena,y dientro del marcu d’actividaes de L’Arribada 2010, acompañaos cola actuación del Cuartetu Antolín de la Fuente.

Los ganadores anteriores fueron, en 2007, Nené Losada Rico, en 2008, Xuan Xosé Sánchez Vicente y, en 2009, Manuel García ‘El Galano’.

Roberto González-Quevedo ye un escritor, filósofu, antropólogu y llingüísta nacíu en Palacios de Sil, provincia de Lleón, en 1953. En 1981 algamó’l Premiu de Narraciones Curties de la Diputación d’Asturies (antecesor del Xosefa Xovellanos) col so relatu Pul sendeiru la nueite. Ye miembru de númberu de l’Academia de la Llingua Asturiana ocupando anguaño’l cargu de secretariu, y director de la revista Cultures, editada pola Academia asturiana y dedicada a temes antropolóxicos y etnográficos.

La so obra lliteraria ta conformada poles siguientes obres: Pul sendeiru la nueite (1981), Inis Aion (1986), Llume de Lluz (2002), Pan d’Amore (2004), El Sil que baxaba de la nieve (2007). A comuña cola so madre, Eva González, Poesías ya hestorias na nuesa tsingua (1980), Poesías ya cuentus na nuesa tsingua (1980), Bitsarón: Cousas pa nenus ya pa grandes na nuesa tsingua (1981), Xentiquina (1983), Xeitus: poesías ya cuentus (1985) y Branas d’antanu ya xente d’anguanu: poesías ya cuentus (1990).

La Fundación Juan Muñiz Zapico convoca una edición nueva del so concursu de microrrellatos, al que pueden presentase escritores de cualesquier nacionalidá, siempres y cuando, les obres presentaes tean escrites en castellá o n’asturianu, seyan orixinales y ensin asoleyar y nun fueren premiaes enantes en nengún otru concursu. Pue presentase un máximu de dos microrrellatos por cada autor o autora, falando siempres de dalgún aspectu venceyáu col mundu de la minería de cualquier país, y ensin pasar les 40 lllinies.

Les obres hai que les unviar per corréu postal a la Fundación col lema “Concursu de Rellatos Mineros Curtios Manuel Nevado Madrid”, a la cai Santa Teresa 15, 33005, d’Uviéu. Mandaránse pol sistema de plica enantes del 21 d’ochobre de 2010.

La organización nomará al xuráu competente, presidíu pol caderalgu Benigno Delmiro Coto. El xuráu nun conocerá los nomes de los autores, namás el títulu de los rellatos y l’acuñu. Del fallu del xuráu, al que nun se podrá retrucar, daráse conocencia pública’l 4 d’avientu de 2010 coincidiendo cola fiesta minera de Santa Bárbola.

Los premios van dende los 1.000 euros a los 300, con estremaes categoríes.

Bases completes del concursu