Lliteratura

La editorial Trabe acaba dar anuncia del ganador del so Premiu Montesín de Lliteratura Xuvenil 2010, que convoca en collaboración cola Conseyería de Cultura. La obra “Memorial de mostru” del escritor y xestor cultural Adolfo Camilo Díaz resultó ganadora.

El xuráu formáronlu María Antonia Pedregal, Xefa de la Oficina de Política Llingüística; María Xosé Rodríguez, responsable de la Oficina de la Llingua de Xixón y l’escritor Severino Antuña, embaxo la presidencia d’Esther Prieto, escritor y trbayadora de Trabe, y actuando como secretariu Inaciu Iglesias, editor.

El fallu foi por unanimidá, destacando’l xuráu “la estructura narrativa bien tramada” de “Memorial de mostru”, amás del fondu conocimientu de l’Asturies del sieglu XVIII na que se desenrolla. Según espliquen nel fallu “con técnica mui cinematográfica, la narración va esgranando la llucha ente ciencia y superstición que se dio nel Sieglu de les Lluces, una centuria bien apasionante y poco lliteraturizada na hestoria d’Asturies”.

L’escritor Sidoro Villa Costales presenta esti miércoles, 24 de payares, de magar les siete la tarde, el so llibru últimu “Mael al debalu”, asoleyáu por Trabe. La presentación va facese na Casona del Bravial de Blimea cola presencia del autor, que va tar acompangáu por Gema Suárez Torre, conceyala de cultura de Samartín del Rei Aurelio, y por Hugo Cortina Fanjul, responsable de la Oficina de Normalización Llingüística del conceyu.

El Foru de Creación y Llectura de la Biblioteca y l’Asociación Cultural Valentín Andrés convoquen un añu más, y van seis, el Certame de Cartes de Amor “San Valentín”. El plazu remata’l 21 de xineru de 2011. Les bases pueden consultase na web del conceyu.

Bases completes del concursu

L’Institutu Asturianu de la Mocedá dio anuncia yá de los ganadores de los premios Asturies Xoven de Poesía, Narrativa y Textos Teatrales 2010, a los que pueden presentase obres en castellán y n’asturianu. Resultaron ganadores los escritores Rodrigo Olay Valdés, col poemariu “Cerrar los ojos para verte”; José Antonio Calzón García, cola obra titulada “Entrevías”; y José Ángel Gayol, cola obra teatral “Ensin noticies del fin del mundu”.

Caún de los gallardones ta dotáu con 2.000 euros y la publicación de la obra na Colección Texu. El xuráu presidiólu nesta ocasión el director del Institutu Asturianu de la Mocedá, Guillermo Martínez Suárez, xunto a los escritores Martín López Vega, Sofía Castañón, José Luis Rendueles, Juan Bautista Bilbao Lopategui y Adolfo Camilo Díaz.

Según anuncia de Xareos! Xestión Cultural, la revista Formientu, asoleyada por esta asociaicón, espubliza un númberu doble (7-8) nel qu’“hai munches novedaes bien importantes”, comenten dende la revista. Formientu espubliza per primer vegada un autor en gallego-asturianu, Miguel R. Monteavaro (Bual, 1990), y cunta amás con delles collaboraciones d’autores qu’entá nun espublizaren en Formientu. Ye’l casu de Pablo A. Quiroga, Paula Pulgar, Alex Fernandi, l’autor más mozu de la revista nesti momentu (Uviéu, 1992), o David Artime, que mos presenta un estractu del premiu Trabe de Narraciones, que llevó la so novela «La bufanda», una de les obres con más ésitu en 2010.

Amás nel númberu apaecen autores habituales na revista, como Héctor Pérez Iglesias, Abel Martínez, Jorge Fernández, Ri¬cardo Candás y José Ángel Gayol, que dan amuesa de la lliteratura con más esperiencia de la tercer xeneración.

Ente les novedaes d’esti Formientu 7-8 tán tamién la participación de Belinda González, autora asturbelga que collabora cola revista, como en númberos anteriores lo facía Llucía Di Salvo León, fía d’emigrantes asturianos en Bonos Aires; Rubén García Martín (Zamora, 1983) que mos trai la lliteratura asturiana que s’escribe nel estremu sur del dominiu llingüísticu asturlleonés, y Álvaro Pérez, autor tamién venceyáu a Zamora que mos trai la torna de dellos poemes en catalán de Joan Margarit y Salvador Espriu.

Formientu ye una revista de lliteratura na que s’espubliza la obra d’autores xóvenes, ñacíos de magar 1975 y ta dirixida por Inaciu Galán. El so Conseyu de Redacción ta formáu, amás de pol director, pol escritor Benxa Pérez y pola escritora y filóloga Laura Marcos, que lu coordina. Formientu cunta con una ayuda de la Conseyería de Cultura d’Asturies y el sofitu de los anunciantes privaos como Publigrafik.

Dende Xareos! anuncien que nes selmanes próximes van anunciase “les feches y espacios onde se va presentar la revista al públicu, cola presencia de los autores”.

Xurde Fernández publica la so segunda novela en solitariu, “Intentu d’escritura”, una novela adulta y d’estructura complexa que pue ser incluyía dientro del xéneru negru. Pero va más allá, convíertese nuna reflexión sobre l’oficiu d’escritor, les obsesiones, l’amor… Una rede de personaxes que se crucien, vides rotes y un escritor obsesionáu por acabar la so novela, y Ágata, cuya muerte cambia la vida de tolos que la conocieron.

Xurde Fernández ñació en Candás (Carreño) en 1975. Profesor de llingua asturiana n’enseñanza secundaria y collaborador de l’Academia de la Llingua Asturiana y del diariu El Comercio, vio espublizada en 2007 la so primer colección de cuentos curtios, titulada “Volver”.

Tamien ye autor de la novela “El color del escaezu” xunto cola escritora Marian García, tien dellos relatos espublizaos en les revistes como Lletres Asturianes, Reciella Malory, Formientu y Parpayuela. Xurde Fernández ye tamien conocíu polos sos estudios etnográficos sobre la fala y les tradiciones d’El Cabu Peñes y la toponimia de la Parroquia de Candás (ALLA, 2002). Nel añu 2008 algamó’l Premiu Llorienzu Novo Mier cola obra “Díes d’iviernu”.

Suburbia Ediciones edita’l comic Manzajú del conocíu autor y músicu Ruma Barbero qu’algamó’l I Premiu de Comic Alfonso Iglesias que convoca’l Gobiernu d’Asturies. En Manzajú, el llecto ye testigu d’un viaxe al pasáu onde’l protagonista rememora’l tiempu nel que deprendió a conocese a si mesmu. Manzajú ye un comic hilarante que percuerre col sentíu del humor propiu del autor pasaxes de la infancia de Ruma y por ende de munchos colos que comparte xeneración y recuerdos.

L’autor fala d’un tiempu nel que n’Asturies “nun había más autopista que la “Y”, l’Sporting de Xixón quedaba segundu na lliga, los güelos entamaben a falar del so pasáu y los neños bebíen resfrescos asturianos”, un tiempu del que fai alcordanza con humor.

Ruma Barbero (Xixón, 1971) ye llicenciáu en Belles Artes na especialidá d’“Escultura” pola Universidá de Salamanca y miembru fundador del grupu de folk asturianu “Felpeyu”, col que continúa n’activu.

Ganador nel añu 2003 del primer Premiu de Cómic de la Comarca de la Sidra, tamién ye fundador, en xunto con Xosé Antón García Sampedro, de la editorial Cactus Cómics, que publicó dalgunos de los títulos más influyentes d’esti xéneru n’Asturies. D’otra banda, tamién ye un destacáu diseñador gráficu, autor de les carátules de discos de Felpeyu, La Bandina o DRD y de carteles teatrales pa les actuaciones del grupu Nun Tris.

A mediu camín ente’l cómic y el diseñu gráficu ta’l Cómic-CD de Los Ciquitrinos “Faciendo l’indio” (2009), del que tamién ye autor.Acullá de lo específicamente rellacionao col cómic, Ruma Barbero ye lletrista de los grupos Felpeyu, Los Ciquitrinos, Tejedor y Blima, amás de collaborador de delles publicaciones periódiques: el diariu El Comercio, el selmanariu Les Noticies o l’Anuariu de la Música Asturiana.

Vicente García Oliva ye’l ganador de la decimosesta edición del Premiu d’ensayu en llingua asturiana “Máximo Fuertes Acevedo”, que concede la Conseyería de Cultura y Turismu. Y gánalu pol testu tituláu “El síndrome de Sherezade”, destacando’l xuráu “que se trata d’una obra que, con bon estilu narrativu, analiza la necesidá antropolóxica de contar histories y les funciones de los mitos y cuentos populares, con una consideración especial de la sociedá actual y de la cosmovisión asturiana”.

El xuráu que concedió esti galardón aconceyó a les 12.00 hores de güei na sede de la Conseyería de Cultura y Turismu cola presidencia de la Directora Xeneral de Política Llingüística, Consuelo Vega Díaz, y cola participación de los escritores y investigadores Xulio Arbesú, ganador de la edición anterior del premiu; Elena de Lorenzo Álvarez, profesora de Lliteratura de la Universidá d’Uviéu; y Xosé Antón Suárez Puente, profesor de Bioloxía Molecular. El premiu ta dotáu con 7.000 euros.

La decisión del xuráu adoptóse por unanimidá y tres d’un debate final onde s’estimó de manera especial l’ensayu “Lliteratura y máscares”, que foi finalista del certame.

Vicente García Oliva (Xixón, 1944) ye miembru de númberu de l’Academia de la Llingua Asturiana. Tien cerca de venti llibros publicaos n’asturianu y en castellanu, nos que cultiva tanto la lliteratura xuvenil como la novela negra o l’ensayu. Tamién ye ganador de dalgunos premios lliterarios: el Premiu “Llectures pa Rapazos” de l’Academia de la Llingua Asturiana; el Premiu “Montesín”, d’Ediciones Trabe; y el Premiu de la Crítica d’Asturies, ente más otros.

El xueves 11, de magar les ocho la tarde, Esther García presenta’l llibru “A la gueta l’amor” na Casa d’Alcuentros de Piedras Blancas (Castrillón). El llibru, asoleyáu por Trabe, ta ilustráu por Neto, que va participar na presentación xunto a l’autora, l’alcaldesa del conceyu, Ángela Vallina; el conceyal de cultura, Iván Patiño Menéndez, Esther Prieto pola editorial Trabe, y el presentador, Xosé Nel Riesgo.

A la gueta l’amor ye un llibru de rellatos nos que bullen temes como l’amor y el desamor, la soledá, el pasu’l tiempu y la velea de la vida, trataos dende’l puntu de vista d’esta autora que mira sollerte’l mundu que la arrodia dende’l balcón de la señardá unes veces, y de l’allegría de vivir, otres.

M.ª Esther García López (La Degol.l.ada, Valdés) escritora y poeta n’asturianu y en castellán, cuenta con llibros de didáutica y d’investigación etnográfica y hestórica con temes rellacionaos cola educación y al rodiu de la llingua y la cultura asturiana. Ye coautora de llibros de testu pa la enseñanza del asturianu.

La so obra lliteraria ta compuesta d’abondos títulos de poesía y narrativa ente los que se cuenten los poemarios: L.l.uribaga (2003), Zamparrampa (2004), Tiempu d’iviernu (2005), Faraguyas (haikus) (2007), Pisadas (2008), col qu’algama’l Premiu Uviéu de poesía, 2006. En narrativa destacan El tatuaxe (1998) ya Historias de vida ya señas de muerte (2005). Esti llabor ta viéndose reconocíu col algame de varios premios. Amás del yá citáu gana’l Fernández Lema de L.l.uarca col rellatu Performance (2007), el Xosé Álvarez (2007) del Centru Asturianu de Madrí, col rellatu La maestra, y el León Delestal (2009) con La boda. Ye autora de dellos títulos de lliteratura infantil: Musical-landia (2008) Menú de versos (2009) y el caberu, Deva y el Pitín (2010).

El poeta catalán Francesc Parcerisas llega esti xueves a l’Áula de les Metáfores de Grau pa dar llectura a los sos poemes. L’actu va tar presentáu por Marta Mateo, Profesora de la Universidá d’Uviéu. L’actu va facese a les ocho na Casa Cultura de Grau.

Francesc Parcerisas (1944) ye poeta, traductor y críticu lliterariu. Profesor de la Universidá Autónoma de Barcelona, na actualidá ye decanu de la so Facultá de Traducción ya Interpretación. Miembru destacáu de la xeneración lliteraria de los 70, publicó ente otros, los llibros de poemes como La edat d’or (1984) o Dos dies més de sud (2006). Pola so poesía, recibió premios como’l Carles Riba, el Ciutat de Barcelona, el de la Crítica de poesía catalana, el de Lliteratura Catalana de la Generalitat de Catalunya y el Lletra d’Or, en 1992, pola escoyeta de la so obra escrita ente 1965 y 1983 nel volume Triomf del present (1991).

Foi traducíu a numberosos idiomes (castellán, inglés, francés, hebréu, italianu, húngaru, portugués, suecu, etc.) y llevó a cabu un intensu trabayu como traductor. Collabora davezu en revistes culturales y lliteraries, y axuntó dalgunos de los sos artículos y ensayos nel llibru L’objecte immediat (1991). Ye autor tamién de Cent anys de traducció al català (1998) y Traducció, edició, ideologia. Aspectes sociològics de -yos traduccions de “La Bíblia” i de “L’Odissea” al català (2010).

Foi presidente de la Associació d’Escriptors en Llengua Catalana y ye miembru de la Comisión Consultiva. Dempués de ser director mientres dellos años, ente 1998 y 2004, acaba de ser nomáu decanu de la Institució de les Lletres Catalanes.