Lliteratura

Esti vienres, 3 d’avientu, el dibuxante asturianu Ruma Barbero va firmar exemplares de Manzajú, el so últimu cómic na llibrería Vaina, asitiada na cai Cervantes, 20 de Xixón, de magar les 19.30 hores. La novela gráfica “Manzajú” ta siendo un ésitu nes llibreríes del país.

L’autor fala d’un tiempu nel que n’Asturies “nun había más autopista que la “Y”, l’Sporting de Xixón quedaba segundu na lliga, los güelos entamaben a falar del so pasáu y los neños bebíen resfrescos asturianos”, un tiempu del que fai alcordanza con humor.

Ruma Barbero (Xixón, 1971) ye llicenciáu en Belles Artes na especialidá d’“Escultura” pola Universidá de Salamanca y miembru fundador del grupu de folk asturianu “Felpeyu”, col que continúa n’activu.

La nueva revista de poesía “El Alambique” editada en Madrid por Editor S.A. y que promueve la “Fundación Alambique para la poesía” con llar en Guadalaxara asoleya obra tamién n’asturianu. El númberu 2 de la revista presentóse esta pasada selmana nel centru cultural de la Diputación de Guadalaxara a cargu del so director, Agustín Porras, cola idea de facer una revista semestral centrada nel mundu de la poesía más actual.

Nesti númberu 2 dedícase un ampliu homenaxe al poeta de la Xeneración hespañola de 1950 Ángel Crespo. Tamién presenta poemes y traducciones de Joao Fernandes, Adriana Davidova, Mircea Oprita, Ingrid Tempel, ente otros autores asina como un poema n’asturianu de Xaviel Vilareyo, escritor asturianu ñacíu 1967.

Eva María Alonso Ruisánchez resultó ganadora del IV Concursu lliterariu de la Fundación Cultural Asturias col so rellatu “Tiráime a la mar”. L’autora, de 29 años y residente en Ribeseya, foi premiada colos 1.000 euros del gallardón por un rellatu que según el xuráu ta “bien construyíu, de diálogos bien vivos, con personaxes guañaos y bien caracterizaos”.

Amás, Sofía Castañón, con “La cuarta pared”, ya Inaciu Galán y González, con “Salir a la escuridá”, fueron finalistes nes modalidaes de castellán y asturianu, respectivamente y tamién van ver publicaos los sos testos. Del primer rellatu, el xuráu destacó’l so planteamientu singular”, y del de Galán, “la trama cenciella, concisa y de final inesperáu”.

El Concursu Lliterariu de la Fundación Asturies, que va yá pola so cuarta edición, ta dirixíu a moces d’hasta 30 años residentes n’Asturies. La tema ye llibre, les obres han de ser inédites y non premiaes n’otros certames y pueden tar escrites en castellán o asturianu.

Nardo, Quina y los demás personaxes de la tira humorística del dibuxante Enrique Carballeira tán d’aniversariu. La editorial Asturtoons celebra esti aniversariu espublizando un volume con una escoyeta de delles de les últimes tires a tou color, y con una historieta inédita protagonizada polos Chones, titulada “La tenada pantasma”. El volume va ser el primeru d’estos personaxes que se va espublizar en formatu de tapa dura, con un tamañu de 22×22 centímetros, y a tou color.

Unos personaxes que tuvieron de contino nes páxines del periódicu del oriente, El Fielato y que llograron caltenese nel corazón y los gustos de los asturianos, y tamién de munchos visitantes.

El llibru va poder mercase na tienda Carmel-Asturtoons na cai Cuadonga de L’Infiestu, o bien lo que ye entá más cenciello, solicitándolu nel corréu de la editorial asturtoons@gmail.com o na web www.asturtoons.es

Páxina publicitaria del llibru nuevu de Nardo y Quinta

Esti xueves, 2 d’avientu, de magar les ocho la tarde, la delegación del Gobiernu d’Asturies en Madrid, va acoyer la presentación del llibru de Berta Piñan “Arroz, agua y maíz”, una obra en versu pa neños, espublizada por Pintar-Pintar Editorial ya ilustrada por Elena Fernández. Nel actu van tar, amás de l’autora, la poeta Luz Pichel; el director de la Plataforma d’Organizaciones d’Infancia, Ángel Hernández Martín; y Ángela Sánchez-Camacho, de la editorial.

Yá ta nes llibreríes el númberu 103 del boletín de l’Academia de la Llingua Asturiana que s’abre con un entamu dedicáu a la puesta en marcha de la Universidá Asturiana de Branu (UABRA) y sigue con collaboraciones de Xosé Lluis García Arias, con «Continuadores del suf. Átonu –ULUS»; Ángel Iglesias Ovejero que fala de la «Situación del habla de El Rebollar -Salamanca-» o David García López tratando l’«Estado lingüístico de Senabria y La Carbayeda a comienzos del siglo XXI».

Collaboren tamién Francisco Jesús Fernández-Guisasola & Joaquín Fernández García, alredor de les «Claves etnollingüístiques pa entender la Melecina Popular Asturiana»; l’escritor Vicente García Oliva que da dellos «Apuntes pa una Historia de la Lliteratura Infantil y Xuvenil n’asturianu»; o Andrés Menéndez Blanco que estudia’l casu d’«Una comparsa d’aguilandeiros nos años 40 n’Allande».

Amás, l’exemplar inclúi na parte final espaciu p’anuncies, reseñes y repasu a la bibliografía n’asturianu publicada apocayá, amás d’un espaciu dedicáu a les donaciones de fondos bibliográficos feches a la institución académica.

L’escritor uvieín Jorge Fernández fízose con “Retentando” col primer premiu nel XXIII Concursu lliterariu “Los Bilordios de Pinón” na categoría d’adultos, qu’otorga l’Asocación de Vecinos San Esteban de Sograndio, n’Uviéu. Na categoría xuvenil y n’asturianu, Fernanda Moura da Silva, del Institutu de Salinas, ganó con “La contraseña”.

Na categoría en castellán el ganador foi Ginés Mulero Caparrós, por “El hormiguero”. Alfonso Sergio Barragán, cola obra “El niño Currito”, llogró l’accésit na categoría d’adultos en castellán. Na xuvenil, Arianne Flórez Rodríguez ganó con “Un día más”.

El xuráu tuvo formáu por Paula Álvarez, Alba Suárez, Alberto Álvarez, Xuan Bello, Marta Álvarez, Llucía Menéndez, Silvia Álvarez, Roberto González-Quevedo y José Ramón L. Patterson. La entrega de los premios va facese’l 27 d’avientu nel centru social de Sograndio.

Según da anuncia’l Serviciu de Normalización L.lingüística del Conceyu Cangas, el plazu pa la edición octava del so “Concursu de cuentos curtios n’asturianu p’adultos” remata’l 13 d’avientu próximu. Como cada añu dende la so primer convocatoria, el premiu cunta con dos categoríes, denomaes pol Conceyu como “asturianu estándar y asturianu occidental”, siendo premiada caúna con 400 euros.

Como cada añu, el xuráu, que se dará a conocer una vez conocíu’l determín tomáu nel concursu, va tar formáu por persones representantes de la Conceyalía de Cultura, l’Academia de la Llingua Asturiana, maestros y escritores en llingua asturiana.

Tolos trabayos han presentase por cuatriplicáu, ensin pasar les venti fueyes en DIN A4 a espaciu doble, baxo l’autoría d’un nomatu y axuntando plica nel interior. Mandaránse al Serviciu de Normalización L.lingüística de Cangas, asitiáu en La Plaza la Oliva, e/n, 33800 Cangas del Narcea.

Bases completes del concursu

La revista Estoyu espubliza’l so númberu dos, con reportaxes, artículos, crítiques y entrevistes alredor de los llibros asturianos espublizaos nos meses últimos. Amás, la revista inclúi fragmentos d’obres na so sección “Pa facer boca”, onde apaecen cachos d’“El extraño viaje”, d’Ovidio Parades, y el poemariu “Lo peor del bon tiempu”, d’Héctor Péez Iglesias.

Ente los conteníos atopamos a Pablo X. Suárez, que fala de «La novela asturiana y yo», Iván Cuevas col artículu «El tiempu de les posibilidaes», Miguel Rodríguez Monteavaro, que trata’l tema «A lliteratura nova en galego-asturiano», y la presidenta del Gremiu d’Editores d’Asturies, que fai una reflexón sobre lo que pue suponer la llegada del llibru dixital, lo mesmo que l’escritor Ovidio Parades.

Les entrevistes d’Estoyu 2 tán dedicaes a David Artime Coto, autor de la novela La bufanda, una de les obres n’asturianu que más sonadía algamó nos últimos tiempos; tamién conversen con Silvia Cosío, responsable de Suburbia Ediciones.

Hasta’l 5 d’avientu ta abiertu’l plazu pa presentase al I Concursu de rellatos navidiegos Buscolu.com, al que se pueden mandar rellatos con una estensión máxima de 10 páxines, escrites en castellán o n’asturianu, nun máximu de 2 per persona.

Los relatos a concursu nun tienen que ser inéditos, pero nun pueden tener ganao nengún premiu lliterariu previu. Si’l rellatu ganara dalgún premiu demientres el tiempu de duración del concursu, l’autor tendrá d’indicalo unviado un corréu a la organización pa que’l rellatu seya retiráu del concursu.

El premiu va poder declarase ermu si’l xuráu envalora que los relatos presentaos nun tienen la calidá abonda. El premiu va consistir nuna cena pa dos persones nun restorán del Oriente d’Asturies. La participación nel concursu supon la cesión de los derechos d’autor de los rellatos escoyíos. Los relatos van unviar en formatu d’archivu .doc, .rtf o .txt a buscolu@gmail.com, col asuntu Concursu de Rellatos.

Nel corréu tien de figurar nomatu y una dirección de corréu de contactu.

Bases completes del concursu