Lliteratura

Esti martes, 21 d’avientu, de magar les siete la tarde, la Llibrería Paraxuga, asitiada na cai Paraísu, 2 d’Uviéu, va acoyer el poemariu, “Cilurnión”, del artista plásticu Ánxel Nava. Esta obra foi la ganadora del Premiu Teodoro Cuesta de poesía na convocatoria del añu 2009. El llibru espublízalu Trabe.

Ánxel Nava ye miembru d’El Garrapiellu y d’otres organizaciones como’l Foru Arte Ciudá. Conocíu pol so trabayu plásticu, ta venceyáu a la defensa de la llingua asturiana y del patrimoniu cultural asturianu.

Los habituales de BookCrossing van facer una lliberación de llibros, de mancomún, el próximu sábadu, 18 d’avientu, a les 12 hores, en distintos llugares d’Asturies. Pa participar han rexistrase los llibros en www.bookcrossing.com, etiquetalos y lliberar esi día, pa que viaxen conozan el mundu y cada participante sepa per ónde van. Va facese en tol estáu a un tiempu.

Los llugares escoyíos n’Asturies son:

Avilés: Esquina de la cai La Fruta col Conceyu (Al pie de la fonte) Dempués a tomar daqué nel Café Lord Byron

Xixón: Xardinos de Begoña (zona quioscu). Dempués a tomar daqué nel Café Caracol

Uviéu: Campu de San Francisco (zona Uría)

Col envís d’analizar la sociedá civil y la promoción de la lliteratura en Xixón, L’Arribada y l’Atenéu Obreru d’esti conceyu entamen, a comuña, una mesa redonda, esti xueves, 16 d’avientu, a partir de les 20:00 hores, nel llocal de la entidá ateneística, allugada na cai Cuadonga númberu 7, primeru izquierda, cuntando cola presencia de representantes d’estes entidaes y de la Tertulia Cultural El Garrapiellu, qu’esti añu cumple venti d’actividá y recibe la Medaya de Plata de Xixón.

L’Atenéu Xovellanos de Xixón acueye la presentación de la novela última de Xuan Xosé Sánchez Vicente, una obra en castellán asoleyada por Septem Ediciones. L’actu va entamar a les siete la tarde.

Tinéu organiza un concursu de cuentos n’asturianu dedicáu a la figura de César Feito y empobináu a los escolinos del conceyu dende va doce años. Nesta ocasión tuvieron na entrega de premios, celebrada nel Cine Marvi de Tinéu, más de 160 escolinos, entregando los premios el teniente alcalde, José Ramón Feito, y la conceyala de Cultura y Deportes, Purificación Plá.

El total de cuentos presentaos foi de 92, siendo ganadores los escolinos del Centru Rural Agrupáu de Xera Daniel Fernández y Lorena Suárez, en caúna de les categoríes.

L’Asociación Cultural La Caleya, col sofitu la Conceyalía de Cultura Tradicional y Valores Autóctonos del Ayuntamientu d’Astorga y del Institutu Lleonés de Cultura de la Diputación de Lleón, convoca cada añu dende va cuatro, el Certame Lliterariu La Caleya-Reinu de Lleón, un concursu que nesta ocasión coincide col 1100 aniversariu de la capitalidá lleonesa del reinu hestóricu y que va entregar los sos gallardones el sábadu 18 d’avientu, a les seis de la tarde, na Cámara de Comerciu y Industria d’Astorga y Comarca.

Los ganadores nun van sabese hasta esi momentu, nun actu nel que van participar, Enrique Soto de Soto, teniente alcalde y conceyal de Cultura Tradicional y Valores Autóctonos, Ricardo Pomar Alonso, presidente de l’asociación La Caleya, y los miembros del xuráu, que nesta ocasión tuvo formáu por Roberto González-Quevedo, José Morala Rodríguez, Pablo Rodríguez Medina y Enriqueta Alonso como secretaria del mesmu.

Dempués de la entrega y llectura va dase a prebar un vinu lleonés y va presenta un llibru colos rellatos ganadores de la primer y segunda edición del concursu, tituláu “Los cuentos de la Caleya”, na qu’apaecen los cuentos y poemes d’autores lleoneses como Xosepe Vega, Emilio Gancedo, Francisco Javier Pozuelo Allegre, Nicolás Bartolomé, Álvaro Lobato Fuertes, María Rosario Martínez, María José Zurrón, Jonatan Rodríguez; zamoranos como Alfredo Hernández, Álvaro Pérez o Rubén García; y asturianos como Inaciu Galán y González o Abel Martínez.

La Llibrería Trabe pieslla dempués de más d’una década siendo un referente pal llibru n’asturianu n’Uviéu. En 2007 la llibrería, entós Llibrería Asturiana de Trabe, pasó xunto a la editorial a manes del empresariu Inaciu Iglesias, qu’agora va siguir namás cola actividá editora, dempués de que’l dueñu anterior, Antón García, tuviere d’abandonar l’actividá pola incompatibilidá de la mesma col puestu de la so muyer nel gobiernu, Consuelo Vega, Directora Xeneral de Política Llingüística.

La dirección de la Llibrería fala de “baxada de les ventes” pa xustificar el pieslle. A lo llargo de la so hestoria, la Llibrería Trabe recibió presentaciones de llibros y discos de toa triba, amás d’esposiciones y otres actividaes culturales.

Esti llunes, 13 d’avientu, va facese la gala d’entrega de los premios lliterarios 2010 en llingua asturiana que convoca la Conseyería de Cultura y Turismu del Principáu d’Asturies. Nesta ocasión resultaron ganadores: Marta Mori, Vicente García Oliva y Montserrat Garnacho. L’actu va facese nel Palaciu d’Inclán Leiguarda, na Plaza del Sol, 8, d’Uviéu, a les 18.00 hores.

El Premiu “Xuan María Acebal” de poesía (XVI edición), ganólu la profesora y escritora Marta Mori d’Arriba; el Premiu “Máximo Fuertes Acevedo” d’ensayu (XVI edición), l’escritor Vicente García Oliva; y el Premiu “María Josefa Canellada” de lliteratura infantil y xuvenil (III edición), la profesora y escritora Montserrat Garnacho Escayo.

La cabeza del Conceyu de Valdés acueye la presentación del llibru de rellatos “A la gueta l’amor”, de la escritora de la parroquia valdesana de La Degol.lada, María Esther García López. L’actu va celebrase’l vienres 10 d’avientu, a les 20 hores, na Casa Cultura y cola presencia del escritor Xosé Nel Riesgo, de Juan Fernández Pereiro, alcalde de Valdés; de Néstor Fernández Muñiz, conceyal de Cultura y del dibuxante Neto, encargáu de les ilustraciones de la obra. En representación de Trabe tará la escritora Esther Prieto.

“A la gueta l’amor” ye un llibru de rellatos nos que bullen temes como l’amor y el desamor, la soledá, el pasu’l tiempu y la velea de la vida, trataos dende’l puntu de vista d’esta autora que mira sollerte’l mundu que la arrodia dende’l balcón de la señardá unes veces, y de l’allegría de vivir, otres.

M.ª Esther García López (La Degol.l.ada, Valdés) escritora y poeta n’asturianu y en castellán, cuenta con llibros de didáutica y d’investigación etnográfica y hestórica con temes rellacionaos cola educación y al rodiu de la llingua y la cultura asturiana. Ye coautora de llibros de testu pa la enseñanza del asturianu.

La sétima edición del Concursu Manuel Nevado Madrid foi convocada pola Fundación Juan Muñiz Zapico en setiembre recibiéndo n total 155 microrrelatos, 45 participantes d’Asturies y 80 d’otros territorios estatales, amás de 17 d’otros estaos, principalmente de Llatinoamérica, pero tamién d’EE.XX., Alemaña, Noruega o Italia. Según esplica la organización “esti concursu ye únicu nel mundu pola so temática puramente minera”.

L’Accésit Asturianu ye pa “Texedora de suaños” del turonés Alberto Carrio Sampedro. Siendo, amás, destacaos pol xuráu otros dos rellatos n’asturianu “Colás, el de Rufona” de Miguel Redondo García y “Por un poco de maíz” de Roberto Fernández Osorio.

El Primer Premiu recayó nel relatu “La última puerta abierta” del madrilanu Paloma Hidalgo Díez. L’Accésit Mozu (menor de 26 años) foi pa “El gato del Astronauta” de la santanderina Laura González Tirador. Y l’Accésit Testimoniu Hestóricu pa “Octubre” de David Fernández Tamayo, de Madrid.

Fueron tamién accésit “Es otoño y no llueve” de Rosi Serrano Romero, “Truco de magia” de Juan Luís Ruiz Sánchez de Molina y De la Pañoleta al mar de José Quesada Moreno. Mención Especial Mozu foi “La primera mina” de Lorena Escuderu Sánchez y “De cuando truena” d’Elena Martínez Martínez. Ficiéronse tamién con menciones especiales en castellán “El carbón perpetuamente es negro” de David Castrillo Cachón y “El mensaje de la lámpara” de Gabino Busto Hevia.

El xuráu tuvo compuestu pol catedráticu de lliteratura Benigno Delmiro Coto, presidente del mesmu. Xuntu al escritor bolivianu afincáu en suecia Víctor Montoya. Ana Alonso Cabrera, Secretaria de Muyer y Cultura de CC.OO. d’Asturies. Marcelino Álvarez, Presidente del CMPA y la periodista Mato Fernández. El llibru correspondiente asoleyaráse a principios del 2011.

Los microrrellatos asoleyáronse yá en llinia