Lliteratura

El tercer Salón del Llibru de Grau va celebrase dende’l domingu día 2 de xineru y hasta’l miércoles 5, na capital moscona. Cientos d’exemplares van poder mercase d’11 a 14 hores y de 17 a 20, con 5% de descuentu en tolos llibros en vienta (inclúi novedaes, best-seller, infantil, etc.) y sortéu de regalos ente toles compres. La feria, que cunta con decenes de presentaciones, va entamalu la Conceyalía de Cultura a comuña coles Llibreríes de Grau, la Biblioteca’l Conceyu y el Gremiu d’Editores d’Asturies.

El día 2, a les doce la mañana va inaugurase, presentando darréu’l llibru “Historia de cinco goles. El Mundial de “El Guaje” de Francisco Álvarez González, asoleyáu por La Cruz de Grau.

Media hora más tarde va facese una robla d’exemplares de los llibros: “Un mundo así” de Fernando Martínez y “Poemas de Ciertos Días” d’Efrén Cañedo, asoleyaos pol Foru de Creación y Llectura de la Biblioteca.

A les cinco y media la tarde Cristina Muñiz Martín presenta Dingurindaines, asoleyáu por asturtOOns. A les seis piésllase la xornada con un cuentacuentos.

El llunes, 3 de xineru los actos entamen a les seis de la tarde con un espectáculu de pómpares de xabón xigantes y un Conciertu de la Escuela de Música Tradicional la Veiga´l Cubia.

El martes, 4 de xineru va facese un taller de recortables 3D con personaxes de cómic pa neños a partir de 6 años.

A les siete va producise la presentación del llibru Real Juvencia. Historia del fútbol en Trubia de Valentín Álvarez Álvarez, asoleyáu por La Cruz de Grau. Darréu la mesma editorial presenta “Trubia (1794-1930)” de Manuel Antonio Huerta.

A les ocho la tarde va facese una robla d’exemplares de los llibros “Miradas, recuedos y vivencias de San Juan de Villapañada” d’Álvaro Valdés Díaz y “Patrimoniu olvidado. Horreos y paneras en el concejo de Grau” de Gustavo Adolfo Fernández.

El miércoles 5 de xineru piésllense los actos, de 12 a 14 hores, con un taller de marcapáxines, pa neños a partir de 6 años.

Esti martes, 28 d’avientu, de magar les siete y media la tarde, l’escritor Xosé Ramón Martín Ardines va presentar el so últimu llibru, espublizáu pola Editorial Universos, “El camín que mos marca”, na Aula Cultural La Plaza de Sotrondio. Nel actu va participar, xunto al autor, l’editor José Ángel Gayol, la conceyala de Cultura de Samartín del Rei Aureliu, Gema Suárez y Javier Villanueva, escritor y director teatral.

Nel actu, el Grupu de Teatru Refaxu va escenificar delles escenes de la obra, qu’estrenaron en xunetu del 2009 na celebración del IV Alcuentru Medieval organizáu pola Sociedá Cultural y de Fiestes de L’Entregu.

El xueves 30 d’avientu na Llibrería Paraxuga na cai Paraísu 2 d’Uviéu, l’Atenéu Cultural Xuan María Acebal y Xareos! Xestión Cultural organicen a comuña un actu de despidida del añu nel que se va presentar el númberu nuevu y doble (7-8) de la revista, brindando pol Añu Nuevu con sidra axampanao. L’actu va entamar a les 19:30 hores, cuntando cola presencia de los autores.

La revista espubliza per primer vegada, nesti númberu, un autor en gallego-asturianu, Miguel R. Monteavaro (Bual, 1990), y cunta amás con delles collaboraciones d’autores qu’entá nun espublizaren en Formientu. Ye’l casu de Pablo A. Quiroga, Paula Pulgar, Alex Fernandi, l’autor más mozu de la revista (Uviéu, 1992), o David Artime, que mos presenta un estractu del premiu Trabe de Narraciones, que llevó la so novela «La bufanda», una de les obres con más ésitu en 2010.

Amás nel númberu apaecen autores habituales na revista, como Héctor Pérez Iglesias, Abel Martínez, Jorge Fernández, Ricardo Candás y José Ángel Gayol, que dan amuesa de la lliteratura con más esperiencia.

Ente les novedaes d’esti Formientu 7-8 tán tamién la participación de Belinda González, autora asturbelga que mos manda la so collaboración, como en númberos anteriores lo facía Llucía Di Salvo León, fía d’emigrantes asturianos en Bonos Aires; Rubén Garcías Martín (Zamora, 1983) que mos trai la lliteratura asturiana que s’escribe nel estremu sur del dominiu llingüísticu asturlleonés, y Álvaro Pérez, autor tamién venceyáu a Zamora que mos trai la torna de dellos poemes en catalán de Joan Margarit y Salvador Espriu.

L’escritor de Cangues d’Onís, ye’l ganador de la edición venti del Premiu «Teodoro Cuesta» de poesía col poemariu “La ñeve del cuquiellu”. L’autor yá se fizo va diez años col premiu, col poemariu “Pequeña Europa”.

El Club Prensa Asturiana de La Nueva España acueye esta tarde, a les 19.00 hores, la presentación del llibru «Teatru n’asturianu 2010», d’Alain J. Fernández Fernández, director xerente del Teatru Prendes de Candás. Na presentación participaron Consuelo Vallina, directora de Política Llingüística; Paulino García, conceyal de Cultura de Carreño; Belén Fernández Acevedo, conceyala de Cultura d’Uviéu; José Vega, director de la Obra Social y Cultural de Caxastur, y José Ramón López, de Feteas.

Xurde Fernández presenta esti xueves en Candás la so segunda novela, Intentu d’escritura (Suburbia Ediciones). Una novela adulta y d’estructura complexa que pue ser incluyía dientro del xéneru negru.

El Creisi Bar, asitiáu na cai La Estrecha, ye’l llugar escoyíu pa la presentación que se va cellebrar, a partir de les 19:00 hores, cola participación de Silvia Cosío de la editorial, l’escritor Xandru Fernández y el propiu autor.

La Sociedá de Festexos y Cultura San Pedro de La Felguera, convoca esti certame al que pueden presentase rellatos, en castellán, d’ente seis y ocho fueyes de tema llibre. Ta dotáu con 8.000 euros y el plazu de presentación remata’l 31 d’avientu.

Los concursantes tienen de dase d’alta na páxina web de la Sociedá www.festejossanpedro.com y rellenar tolos campos que se soliciten na mesma. Na mesma web pueden consultase les bases completes.

La escritora xixonesa de nacencia y avilesina d’adopción, Cristina Muñiz Martín presenta esti xueves 23 el llibru “Dingurindaines, poesíes pa nenos”. L’actu va ser a les siete la tarde, nel Palaciu de Valdecarzana d’Avilés. L’autora estrénase nes obres ilustraes con esti llibru al que da color Enrique Carballeira, editor de la obra al traviés d’Asturtoons.

Cristina Muñiz tien escrites una novela, dellos llibros de rellatos y participó en volúmenes de monólogu, amás de facer guiones pa radio y teatru.

En 1985, Adolfo Camilo Díaz ganaba’l premiu Xosefa Xovellanos de novela con “Añada pa un güeyu muertu”, un thriller crepuscular que diba marcar a toa una xeneración de narradores asturianos. La novela, editada daquella pol Gobiernu d’Asturies, tuvo un interesante percorríu de crítica y públicu, y convirtió al so autor (que volvería ganar el mesmu premiu n’otres trés ocasiones) nun referente ineludible de la lliteratura asturiana contemporánea. La llingua asturiana certificaba, asina, que yera apta pa representar cualaquier trama o sentimientu. La novela torna esta Navidá a les llibreríes.

Suburbia Ediciones rellanza esta novela inaugural nuna edición onde’l propiu autor revisó’l testu pa espurgalu d’hiperasturianismos y espresiones usaes na llingua lliteraria d’aquel periodu, pero estrañes pal llector actual. Una nueva oportunidá d’asomase a unes páxines hestóriques pa la nuesa lliteratura.

La edición complétase con un epílogu esplicativu del autor y un prólogu de Xandru Fernández.

L’asociación La Caleya y el Conceyu d’Astorga (Lleón), entregaron los gallardones de la cuarta edición del concursu Reinu de Lleón. El primer premiu foi en narrativa pa Emilio Gancedo, por “Se quieres conocer al paisanín, da-l.ly un carguín”, Mateo del Amo foi segundu con “El vieyu y el perru”, mientres qu’en tercer llugar quedó David Fernández, con “De fumu y ñublina”.

Na categoría poética Daniel Guerra ganó con “Un feix de sentimientos”.

Nel actu, nel que tuvieron el diputáu Avelino Vázquez; el cronista d’Astorga, Martín Martínez; l’editor, José Antonio Martínez; y el teniente alcalde, Enrique Soto, presentóse amás el llibru “Cuentos de La Caleya”, colos ganadores del concursu de narrativa nes sos primeres dos ediciones.