Lliteratura

El 4 de febreru inaugúrase nel CMI de L’Arena, en Xixón, la esposición de poemes ilustraos de Boris Vian, titulada “Je voudrais pas Crever” (Nun me prestaría morrer) con motivu del cincuenta aniversariu de la muerte del autor, nel que s’espubliza un llibru de 23 poemes ilustraos por célebres dibuxantes y traductores, qu’agora amuesen la so obra n’Asturies. Na inauguración van participar el músicu Santiago Auserón, el trompetista Pacheco y el cantante Javier Krahe.

La esposición cunta col sofitu del Serviciu Cultural de la Embaxada de Francia y cola torna al castellán de los poemes, per parte de Fernando Savater y Luis Antonio de Villena.

Boris Vian (1920-1959) foi un ceador polifacéticu: foi novelista, poeta, dramaturgu, traductor, actor, periodista, autor de cantares y tamién músicu de jazz, trompetista. En 1942 entamó a escribir de día y a tocar jazz de Nueva-Orleans de nueche, nos chigres clandestinos de St-Germain-deas-Prés cuando la música negra taba prohibida por Vichy.Dexó una obra que foi considerada, a títulu póstumu, como’l manifiestu de la mocedá esistencialista de París.

La Tertulia Literaria Allerana convoca un concursu de cuentos en castellán, con un premiu ye de 1000 euros. Los rellatos han tener ente trés y cinco fueyes, de tema llibre, y van poder presentase hasta’l 31 de marzu nel Apartáu de Correos 3, 33670, de Morea (Ayer).

Bases completes del concursu

El xueves que vien, 3 de febreru, a les 19.30 hores, la Llibreria Rafael Alberti de Madrid acueye la presentación de l’antoloxía poética billingüe (asturianu y castellán) “La mancadura/El daño”, de la escritora Berta Piñán. Nel actu participa, amás de l’autora, la escritora Olvido García Valdés.

Tres ocho año de silenciu namás alteriáu pola publicación de dos antoloxíes de la so obra en castellán y en catalán, con “La mancadura” (El daño, na so versión castellana) Berta Piñán da continuidá a les sos constantes poétiques, les que (en palabres del críticu Leopoldo Sánchez Torre) ñacen «del equilibriu ente l’aceptación y l’arrenunciu, ente la evocación celebrativa y la constatación del dañu y la falta, y la propensión moral que deriva del so convencimientu de que la poesía ye necesaria como ”preséu de conocencia y configuración del mundu” (…) configurando un singular espaciu verbal sobre’l que se mueve una potente lente que desvela les más fondos cuévanos, pero tamién les superficies más tanxibles, de les nueses pallabres y los nuesos actos».

El Conceyu de Llaviana y l’Oficina d’Información a la Mocedá convoquen esti concursu nel que pue tomar parte xente mozu de 14 a 35 años. Los cuentos pueden tar en castellán o n’asturianu con un máximu de diez fueyes, de tema llibre, valorándose la orixinalidá y los temes rellacionaos colos intereses, inquietúes y esmoliciones de la mocedá.

Afitense dos categoríes con un únicu premiu en dambes; Pa mozos de 14 a 18 años, 100 euros; y pa mozos de 19 a 35 años, 250 euros. El plazu de presentación de los rellatos va finar’l 31 de marzu de 2011.

Bases completes del concursu

Hasta’l 4 d’abril ta abiertu’l plazu pa presentase al Concursu microrrellatos de pesca del Baxu Nalón-Narcea, qu’organiza la Feria del Salmón y al que pueden presentase obres escrites n’asturianu o en castellán, con dos categoríes en función de la edá del autor: “Categoría Esguín”, hasta 14 años inclusive, con un premiu de 200 euros en material didáctico o deportivo y un accesit que tamién se lleva esti tipu de material; y Categoría Salmón, a partir de 15 años, con un premiu de 400 euros y un accesit de 150 euros.

El conteníu va tener qu’aludir necesariamente al mundu de la pesca, yá seyan personaxes, argumentu, ambientación o motivos temáticos, con una estensión que nun pase de les 300 pallabres nin 2.200 caracteres.

Los rellatos han mandase a la Secretaría Técnica Feria del Salmón, Asturpesca 2011, asitiada na Plaza del Conceyu, 2, códigu postal, 33860 de Salas.

Bases completes del concursu

La Conceyalía de Cultura del Conceyu de Ribeseya tien abiertu hasta l’8 d’abril plazu pa presentase a la cuarta edición del Premiu Arbidel de Cuentos Eróticos que se convoca “col envís de contribuyir al espardimientu y promoción del usu del asturianu y de la cultura asturiana en xeneral”.

Van entregase dos premios, unu dotáu con 1.200 euros y el segundu con 500. La entrega va facese na Selmana de les Lletres Asturianes, en mayu. L’añu pasáu resultaron ganadores David Artime Coto y Adolfo Camilo Díaz, participando diez autores na convocatoria.

Bases completes del concursu

L’Ámbitu Cultural d’El Corte Inglés de Xixón acueye la presentación d’un poemariu en castellán del autor Xavier Frías Conde. L’actu, que se va celebrar esti vienres 28 de xineru a les siete y media la tarde, va cuntar cola participación del escritor y editor Milio Cueto y col sofitu de l’Asociación d’Escritores Noveles.

El llibru, tituláu “Café de Saudades ta editáu por Amargord.

Frías Conde tien tamién obra en llingua asturiana, amás d’otres llingües como’l gallegu, el portugués, el catalán, el sardu, etc.

El Conceyu de Llaviana y el Conseyu Municipal de la Muyer, en collaboración col Centru Asesor de la Muyer, convoquen la undécima edición del concursu Rellatos Curtios pa Muyeres, empobináu a muyeres mayores de 18 años qu’escriban en castellán o asturianu.

La tema a tratar ye llibre, valorándose especialmente: la calidá lliteraria de la obra, l’usu d’un llinguaxe non sexista, un abordaxe de les temes distintos de los estereotipos femenín y masculín tradicionales que representen una sociedá más igualitaria.

Hai un primer premiu, na categoría xeneral de 1.200 euros. Amás, va otorgase un accésit de 300 euros a la meyor obra fecha por una autora del Conceyu de Llaviana. El plazu de presentación de los rellatos termina’l 18 de febreru, teniendo que se mandar al Centru Asesor de la Muyer, en Llaviana.

Bases completes del concursu

Alba González Fernández ganó’l XX Premiu Xeira de Narracióis curtias col rellatu tituláu “Hiperhidrosis”. La premiada ñació en 1985 en Valdepares (El Franco) y ye llicenciada en Belles Artes y profesora de dibuxu. Alba González yá ganara con namás decisiete años esti mesmu premiu, nel 2002, col rellatu “Dos tempos, os miyores”, amás tien un rellatu espublizáu na revista lliteraria Trabatel.

El premiu, de 600 euros, dase por mayoría del xuráu, formáu por Manuel García-Galano, Refael Cascudo Noceda, María José Fraga, José Manuel Martínez Castro y Xosé Miguel Suárez Fernández. Tamén se quixo destacar el rellatu “Dar Bodegúas”, de Marcial Amor Pérez, residente en Madrid peró que ñacíu en Froseira (Bual).

El chigre L’Ayalga, asitiáu na cai Prendes Pando de Xixón, acueye esta tarde, de magar les ocho, la presentación de la revista d’ensayu “N’ast, cartafueyos d’ensayu”, cola presencia del so director, Daniel Cueli y de dalgunos de los autores d’esti númberu, ente los que tán Javier Cubero, Xune Elipe, Xaviel Vilareyo o Xuan Porta.

Esti últimu, Xuan Porta Allende, abre les collaboraciones d’esti númberu con “La llingua asturiana, ente les llingües nacionales del Estáu español”, siguiendo darréu un artículu espublizáu en catalán, llingua orixinal del autor y asturianu “Oficialitat?. No hi ha alternativa”, de David Gimeno i Ayuso. L’espaciu dedicáu a la lliteratura ábrelu Inaciu Galán y González con un “Averamientu a la figura del escritor Antón Forascepi (1869-1947)” y sigue nes lletres de Xaviel Vilareyo con un estudiu sobre’l “Vocabulariu asturianu na lliteratura de José María de Pereda”.

La revista recueye tamién el Pregón de la XIV Fiesta de la Oficialidá de la Llingua Asturiana. Bimenes 2010, qu’echó Xulio Elipe Raposo “Xune” y vuelve a editar, por fallos d’imprenta na anterior versión “L’Alianza Popular Revolucionaria Americana: Alderique ideolóxicu y práutica política”, de Javier Cubero de Vicente.

Descarga de baldre una amuesa de la revista