Lliteratura

Xunta Moza anunció esti vienres pasáu a la ganadora del II Concursu “Declara’l to amor pola llingua”, que recayó n’Estefanía Moro, pol so rellatu “La guaxa”, que reproducimos darréu:

La guaxa

Volveréme lloca si nun t’atopo nos güeyos de la xente, si nun cuntes los pensares de los vieyos, si nun amueses les veyures de los neños.

Ente les actividaes desenvueltes pola Fundación Aula de les Metáfores, ocupa un llugar destacáu la convocatoria del Premio Aula de les Metáfores, de calter biañal. El premiu concédese a una persona, organismu, empresa, mediu, entidá o institución que destacare, especialmente nos dos últimos años, pol so llabor de sofitu, espardimientu y celebración de la poesía y el fechu poéticu. Acordies col ánimu altruista de la Fundación, el premiu nun lleva apareyada retribución económica dalguna, y consiste na donación d’una escultura orixinal del artista mallorquín Pep Carrió.

Na primer convocatoria, resultó galardonáu’l programa “La Estación Azul”, de Radio Nacional d’España. Nesta nueva convocatoria, el premiáu foi Joan Manuel Serrat, en reconocencia a la publicación del so discu últimu, editáu en memoria de Miguel Hernández, y al llabor d’espardimientu estatal ya internacional de la obra del poeta nel añu del so centenariu.

El premiu sorraya coles mesmes l’agradecimientu del mundu poéticu al trabayu realizáu a lo llargo de tola so trayectoria, dando a conocer poemes de Machado, Alberti, García Lorca, Neruda, Goytisolo, Benedetti y otros munchu autores, y sirviendo de ponte a tantes xeneraciones pa llegar al traviés de la música a los testos poéticos.

N’honor de Joan Manuel Serrat va celebrase un actu d’homenaxe y de reconocencia del mundu de la poesía que va cuntar cola presencia del premiáu y va tener llugar na Capiella los Dolores, de Grau, nuna fecha que se va anunciar llueu.

El vienres, 25 de febreru, a les ocho la tarde, la Casa de los Alberti, en Ciañu, Llangréu, va acoyer la presentación de “Ambos mundos. Poesía 1988-2009”, de Xuan Bello; y de “La mancadura”, de Berta Piñán.

L’actu, organizáu pola Asociación Cauce Nalón, en collaboración cola Conseyería de Cultura y Turismu y l’Ayuntamientu de Llangréu, y va presentalu Carlos Fernández con comentarios a cargu del escritor Antón García.

La revista Biblioasturias entamó al traviés de Facebook (http://www.facebook.com/pages/Biblioasturias) y per corréu lletrónicu (biblioasturias@gmail.com), una encuesta abierta hasta’l 30 de marzu de 2011 na que busquen les obres preferíes pola llectores asturianos, tanto n’asturianu como en castellán.

Cada participante podrá citar un mínimu de trés y un máximu de cinco obres lliteraries d’autor asturianu, espublizaes en castellán o asturianu mos caberos cuarenta años (de magar 1970). Caúna de les obres va recibir un puntu por cada votu, pudiendo ser de cualesquier xéneru.

El restorán La Sauceda de Buelles, a comuña col Conceyu de Peñamellera Baxa, convoca la VIII Edición del Certame Internacional de Poesía Memorial Bruno Alzola García pal añu 2011, pa sonetos, pudiendo presentase namás los que tean escritos en castellán.

El primer premiu ye de 1.800 euros, teniendo por fecha llende pa la unviada de los trabayos el 16 de mayu de 2011. Los participantes tendrán d’unviar la so obra a la Casa Conceyu, Cai Mayor e/n, 33570, Panes.

Esti llunes, 21 de febreru, al igual que tolos años dende 1999, cuando foi instituyida pola UNESCO esta fecha, va celebrase’l Dia Internacional de la Llingua Materna. Comunidallionesa.ye, qu’axunta a organizaciones en defensa de la cultural lleonesa, organiza les actividaes na capital cisastur. Por mor de cayer en llunes les actividaes adelántense al sábadu 19, faciéndose nel Palaciu de Don Gutierre.

Nesta ocasión, va dase protagonismu a los alumnos de les clases d’asturianu del Conceyu y l’actu va xirar alredor de la tema “Los falantes tienen la pallabra”. Va facese una intervención inicial esplicando’l sentíu de la llingua materna, de la celebración que ocupa la xornada y de la riqueza que les llingües representen pa la cultura universal y, de siguío, dellos alumnos de les clases d’asturianu van lleer fragmentos de diverses obres d’autores consagraos y noveles.

Xunta Moza, la estaya de mocedá de Xunta Pola Defensa de la Llingua Asturiana, convoca la segunda edición d’esti concursu lliterariu con motivu del Día Internacional de la Llingua Materna. Al certame pueden presentase frases, eslóganes o microrellatos, al corréu amorpolallingua@gmail.com o depositala nel “buzón del amor” en La Casa Posafuelles (La Cuesta la Vega, 10, Uviéu). La escoyeta de los meyores y el testu ganador va decidise por votación popular, ente los díes 21 y 25 de febreru en La Casa Posafuelles.

Pal cartame establezse un premiu únicu dotáu con un llote de productos de Xunta pola Defensa de la Llingua Asturiana y Xunta Moza. Amás, el trabayu que resulte gallardonáu pue ser imaxe de campañes de sensibilización y/o reivindicación de dambes organizaciones.

La estensión máxima ha ser de 160 caracteres, mecanografiaos (ordenador o máquina d’escribir) o manuscritos per una sola cara y perfectamente lleíbles.

Bases completes del concursu

La editorial Trabe acaba d’anunciar la dirección de la so sede nueva, asitiada nel segundu A del númberu 10 de la cai Foncalada d’Uviéu. Avisen amás de que caltienen el mesmu teléfonu, fax, direcciones de corréu lletrónicu y páxina web.

El Club Xeitu convoca’l tercer Certame Lliterariu en Pal.luezu ‘Guzmán Álvarez’, col que se intenta “revitalizar la llingua vernácula del monte occidental ástur-lleonés”. El certame, abiertu a cualesquier interesáu en participar, va unificar anguaño los dos modalidaes de les ediciones anteriores nuna sola, de forma que va quedar na concesión d’un premiu únicu.

Les obres van poder presentase enantes del 15 de mayu, momentu nel cual van ser evaluaes pol xuráu, formáu por dellos autores y recuperadores d’esta variante dialectal del asturianu. El fallu fadráse públicu nel mes de xunetu y la entrega del premiu va tener llugar el próximu branu, demientres la celebración del Recital de Pal.luezu que se va entamar, per cuartu añu consecutivu, na Casona de San Miguel. La obra premiada va publicase nel boletín del Club Xeitu.

Esti concursu, empecipiáu va dos años, vio la presentación de diverses obres, mereciendo’l primer añu los premios la poesía ‘Al Aviséu’, de Irma González-Quevedo Pedrayes, y el relatu ‘Carta desd’el Vatse’, de Guadalupe Lorenzana Rodríguez. Ésta tamién consiguió’l premiu de poesía de la pasada edición, pola so obra ‘La sulombra d’él’, ente que la modalidá de prosa hubo de dexase erma na pasada edición al nun presentase a la mesma nenguna obra.

Esti certame promovíu pol Club Xeitu y nel que collabora la Diputación de Lleón-Institutu Lleonés de Cultura, lleva’l nome del conocíu filólogu babianu Guzmán Álvarez, del que’l Club celebra’l so centenariu dende’l pasáu 2010 con delles actividaes y publicaciones, y que va siguir desenvolviéndose en 2011.

Bases completes del concursu

Esti vienres, 4 de febreru, preséntase “Dingurindaines” en Xixón. L’actu sedrá na llibrería La Buena Letra, allugada na cai Casimiro Velasco, 12, a partir de les siete y media la tarde. Nel actu tará l’autora, Cristina Muñiz, la responsable de la biblioteca virtual Xosefa Canellada, Mar Martín, y l’ilustrador, Enrique Carballeira.

L’autora estrénase nes obres ilustraes con esti llibru al que da color Enrique Carballeira, editor de la obra al traviés d’Asturtoons.

Cristina Muñiz tien escrites una novela, dellos llibros de rellatos y participó en volúmenes de monólogu, amás de facer guiones pa radio y teatru.