Lliteratura

El xueves pasáu, la Casa los Alberti de Ciañu, onde s’alluga’l Centru de Referencia de la Llingua Asturiana, acoyó la presentación de dos llibros dedicaos a Mánfer de la Llera. Una antoloxía lliteraria, obra de Severino Antuña y un llibru d’ensayos sobre l’autor con delles firmes. L’actu cuntó cola presencia, ente otres persones, de los coordinadores de los volumes editaos, los investigadores y espertos lliterarios Luis Casteleiro y Severino Antuña, amás de la directora xeneral de Política Llingüística, Consuelo Vega, la teniente d’alcalde del Conceyu, María Fernández, y el responsable de Trabe, qu’asoleya les obres, Inaciu Iglesias.

De la rampla a la pluma

Yye un volume divulgativu que recueye artículos sobre la biografía de Mánfer de la Llera, del contestu hestóricu llangreanu y asturianu, de la so vida como militante nel barriu de Pumarín, en Xixón y d’otros intereses del artista. El so títulu fai un chisgu a ‘Del aráu a la pluma’, antoloxía lliteraria asturiana editada na dómina del primera Surdimientu, sustituyendo la ‘rampla’ minera, pol ‘aráu’ agrícola.

Collaboren nesta obra, ente otros, Armando Magadán, encargáu de la biografía, Aladino Fernández (el Llangréu de la dómina), el periodista Paco Álvarez (que recuerda a Mánfer como militante de barriu en Xixón) o Ignaciu Llope, que fai un analís sobre la doble transición. Irene Díaz fala del movimientu pensionista, nel que Mánfer de la Llera tomó parte bien activa. Asina, inclúyese un artículu de Jesús Menéndez Peláez, profesor y antiguu cura que sofitó a los pensionistes en 1971, nel encierru na ilesia San Xosé de Xixón. Roberto González-Quevedo fai un estudiu sobre los monólogos de Mánfer y Xuan Xosé Sánchez Vicente sobre otres facetes lliteraries. Apaecen estudios tamién de Rubén Vega o Claudia Cabrero Blanco

Nel apartáu de “testimonios”, apaecen los de los sos fíos Vital y Ramón d’Andrés Díaz, y los d’otres persones que conocieron a Mánfer, como Toli Morilla, Marisa Vallejo, Vicente García Oliva, Jesús Menéndez Peláez, Inaciu Galán y González, Francisco Prendes Quirós, Albino Suárez Vallina, Pablo Antón Marín Estrada, Lluís Xabel Álvarez, Amelia Valcárcel y Urbano Rodríguez.

En cata de la mio lluna

El segundu volume, ‘En cata de la mio lluna’, tituláu como un versu del autor, ye una antoloxía lliteraria, escoyida por Severino Antuña. Recueye poesía y prosa de Mánfer nuna escoyeta que fai por dar una imaxe completa del autor.

Semeyes de la presentación

Cuando’l sol dexe d’allumar,
cuando al día nun lu siga la nueche,
cuando l’agua dexe de moyar,
cuando’l fueu dexe d’amburar,
cuando la mar y los ríos s’escosen,
cuando praos y viesques queden ermos,
cuando l’aire yá nun caltenga osíxenu,
cuando’l planeta dexe de voltiar
y cuando yo yá dexe d’alendar…

Entós.
sólo entós,
te dexaré d’amar.
?

Los díes 7 y 8 de mayu, coinciendo cola Feria del Llibru de Vil.lablinu, va celebrase nesti conceyu lleonés un alcuentru d’escritores na variedá pal.lueza del asturianu “I Alcuentru d’Escritores na nuesa l.lingua”. L’actu va cuntar con conferencies, presentaciones y teatru, nos que van participar autores como Roberto González-Quevedo, Julio Álvarez, Emilce Núñez o Emilia Riesco, ente otros.

Esti ye’l programa d’actos:

17,15 horas – Inauguración ya presentación del I Alcuentru d’escritores
17,30 horas – Ponencia: Julio Álvarez,”Que nun queime (Alcordanzas de cuando yera mozu ya “filólogu”)”.
18,15 horas – Coloquiu.
18,30 horas – Comunicación: Emilce Núñez, “Alcordanzas d’una escritora”.
18,45 horas – Coloquiu.
19,00 horas – Fin de la primera xornada del Alcuentru.

11,00 horas – Comunicación: Severiano Álvarez, “Rememoranzas”.Coloquiu
11,15 horas – Comunicación: Emilia Riesco, “Vivencias del patsuezu”.Coloquiu
11,30 horas – Comunicación: Félix Suárez, “La dinamización cultural en una cultura minoritaria”. Coloquiu
11,45 horas – Comunicación: Eduardo Carbajo, “Recuerdos “.
12,00 horas – Descansu.
12,15 horas – Comunicación: Guadalupe Lorenzana, “La nuesa l.lingua na radio”. Coloquiu
12,30 horas – Comunicación: Francisco Javier González-Banfi: “La esperiencia d’El Cudoxu” Coloquiu
12,45 horas – Ponencia: Roberto González-Quevedo, “La trayeutoria de la nuesa l.literatura”. Coloquiu
13,30 horas – Xanta final del Alcuentru
17,45 horas – Conclusiones y clausura:
• Conclusiones del I Alcuentru d’escritores na nuesa l.lingua.
• Pieslle del actu a cargu de:
* Celestino Pérez Colín – Conceyal d’Educación y Cultura del Ilmu. Ayuntamientu de Vil.lablinu
* Roberto González Quevedo – Secretariu de l’Academia de la Llingua Asturias.
* Julio Álvarez Rubio – Asociación Amigos de Sierra Pambley
18,30 horas – Presentación de l.libru d’Emilce Núñez, “Una tarde de outuenu “. (Auditoriu).

19.00h. Representación de teatro: “En que baixe Dios del Cielo” d’Emilce Núñez, a cargo del Grupo de Teatro El Escarpín. (Auditoriu).

Como cada vienres de les Selmanes de les Lletres Asturianes, celébrase’l Día del Llibru Asturianu, en collaboración coles llibreríes, editoriales y distribuidores. A lo llargo de tola xornada va facese un 10 % de descuentu na compra de llibros n’asturianu y va regalase’l llibru “Mánfer de la Llera, de la rampla a la pluma” nes llibreríes participantes y hasta escosar la edición. Decenes de llibreríes participen d’esti día.

Llibreríes y tiendes participantes:

UVIÉU: Llibrería Aldebarán / Llibrería Antares / Llibrería Bertrand / Llibrería Cervantes / El Corte Inglés / Llibrería Diocesana / Llibrería Garluc / Llibrería Maribel / Llibrería Ojanguren / Llibrería La Palma / Llibrería Paraxuga / Llibrería Polledo / Llibrería Puntos / Llibrería Reconquista / Llibrería Santa Teresa / Llibrería II Milenio / Llibrería Servitec

XIXÓN: Llibrería Bardos / Llibrería Casa del Libro / Llibrería Central / Llibrería Cornión / El Corte Inglés / Llibrería English Book Shop / Llibrería Hernández / Llibrería Paradiso / Piraña Family Producciones / Llibrería Roy / Llibrería Zifar

AVILÉS: Llibrería Alani / Llibrería Azucel / Llibrería Casona / Llibrería Clarín / El Corte Inglés / Llibrería Víctor Núñez / Llibrería La Vieja Atalaya / Tienda Elepé Productions

MIERES: Disco 55 / Llibrería Mercantil / Llibrería La Pilarica / Llibrería La Torre

CANGAS DEL NARCEA: Llibrería Treito

CANGUES D’ONÍS: Llibrería Imagen

CORVERA: Llibrería Mario (Cancienes)

L’ENTREGU: Llibrería Sol

L’INFIESTU: Llibrería Rima

LLANES: Llibrería Clarín

LLANGRÉU: Llibrería A. Pantiga (Ciañu)

LLAVIANA: Llibrería Arvín

L.LUARCA: Llibrería Helas

LES ARRIONDES: Llibrería Gestión

NAVA: Muséu de la Sidra

SIERO: Llibrería Eroski (Parque Principáu-Paredes) / Llibrería Naredo (La Pola Siero) / FNAC (Parque Principáu-Paredes) / Llibrería San Vicente (La Pola Siero)

El Centru Social la Semiente presenta la so Timba PoétiKa, onde se va amestar la música la poesia y les mas modernes técniques audiovisuales con D.J. Antistailo (a los platos y demas apartos sonoros) acompañando la poesia de Pablo X. Suárez, Miguel Allende, Sergio S. Taboada y La Turka. Tamien se va cuntar con delles collaboraciones más de poetes llocales. L’actividá va tener llugar nel recién inauguráu Centru Social La Semiente, na cai Ladio Jove 6 de L’Entregu, esti vienres 6 de mayu, a les 21.30. La entrada ye llibre y gratuita.

Nesti Día de les Lletres Asturianes, les oficines de Coordinación Cultural y Llingüística d’Ozcos-Eo y del Parque Histórico del Navia, propónense difundir les lletres n’eonaviegu. Pa ello va llevase alantre l’actividá “Al son das Lletras”, cola que, como yá se ficiere l’añu pasáu, van repartise llibros y materiales editaos en gallego-asturianu, que podrán recoyese en distintos sitios de los conceyos de la Mancomunidá Ozcos-Eo y de la comarca del Parque Histórico del Navia.

Los llibros tán espardíos perdayuri y puede consultase la so llocalización nes páxines web d’estes dos mancomunidaes (www.oscos-eo.net y www.parquehistorico.org) Cualesquier persona interesada puede averase y lelvar el llibru que-y pete de baldre, “allegando asina a la xente una amuesa de la producción en gallego –asturianu”, destaquen los organizadores.

Una vegada lleíu’l llibru, ha deolvese n’otru llugar, dexando’l lluga au ta, nes direcciones culturalylinguistica@oscos-eo.net y cultural@parquehistorico.org, de tal manera qu’otres persones puedan facese col llibru y ésti siga percorriendo espacios.

La estaya de cultura del Conceyu de Villaviciosa, a comuña cola Conseyería de Cultura y Turismu y el Serviciu comarcal de Normalización Llingüística, celebra la Selmana de les Lletres Asturianes nel conceyu con un recital de poesía n’asturianu, a les ocho la tarde. El Teatru Riera, espaciu escoyíu, va recibir a J. I. Pidal Montes, Sofía Castañón y Rubén d’Areñes, acompañaos por Dani García de la Cuesta poniéndo-yos música.

Doce fueyes del añu ya escosaes,

un cachín más de vida amagostáu,

un migayín más averáu a la muerte,

y cada ve más lloñe del pasáu.

Esti xueves 5, a la una la tarde, na Casa de los Alberti (Ciañu, Llangréu) preséntase la edición conmemorativa “Mánfer de la Llera, de la rampla a la pluma”, volume ilustráu al rodiu del escritor y la so época onde participen autores como Ignaciu Llope, Xuan Xosé Sánchez Vicente, Elisabet Felgueroso, Inaciu Galán, Vicente García Oliva, Vital d’Andrés, Toli Morilla, Lluis Xabel Álvarez, y el llibru “En cata de la mio lluna” Antoloxía lliteraria con obra de Manuel d’Andrés “Mánfer de la Llera”. Les obres preparáronse pola mor de la 32 Selmana de les Lletres Asturianes.