Lliteratura

Esti miércoles 18 de mayu, a les 19,30, na Llibrería Cervantes d’Uviéu, Antón García presenta’l primer volume, númberos 1 y 2, de la revista “campo de los patos”, dedicada a la cultura xermánica. Nel actu va participar, xunto al director de la revista, l’escritor José Luis García Martín.

La revista “Campo de los patos” quier, en pallabres d’Antón García nel so entamu, “aprovechar esti momentu espansivu (de la lliteratura asturiana) y llevantar acta de la mirada que dende Asturies, y dende l’asturianu, s’echa al conocimientu universal”.

Esti primer volume marca según el so director “la llinia a siguir”, incluyendo trabayos críticos, traducción, creatividá y reflexión. La idea de Campo de los patos ye proponer un tema d’antemano y trabayar dempués pa que la xente que puede facer dalgo sobre ello participe. Al director interésa-y muncho “l’aportación que se fai dende’l restu de les artes, los trabayos sobre música o pintura”.

Entrevista a Antón García sobre la revista

Esti martes, 17 de mayu, a les siete y media la tarde, la editorial Zahorí presenta’l llibru “Veinte viajes de ida sin vuelta”, de Luciano Maldonado. Na presentación, que va facese nel Vieyu Institutu de Xixón, van tar, amás del autor, JOSE María Fernández Cardo, Caderalgu de Filoloxía Francesa de la Universidá d’Uviéu, y Macrino Fernández Riera, de Zahorí Ediciones.

La revista de la rede de biblioteques asturianes “Biblioasturias” tien yá un nuevu númberu na cai. Esta entrega 19 de la revista correspuende al primer trimestre del añu y lleva na portada al escritor Xuan Bello. Como reportaxe principal destaca la escoyeta fecha polos llectores de “les meyores obres de la lliteratura asturiana contemporánea” , na que se recueyen obres n’asturianu y en castellán.

Entrevistes a Xuan Bello, Manuel Rivas, Fulgencio Argüelles y Juan Cueto completen la revista, na que tamién se da a conocer nesti númberu la Biblioteca d’Avilés y se reproduz un alderique ente fotoperiodistes asturianos, ente otres secciones.

Descarga la revista de baldre

La editorial Publicaciones Ámbitu pon a la venta dos novedaes lliteraries con motivu del Día de les Lletres. Trátase de los llibros, “Singularidá”, del escritor ayeranu Pablo Texón y “La casa gris”, del pixuetu Ignaciu Llope, y que pueden mercase nes llibreríes y na tienda d’Ámbitu.

En “Singularidᔠaxúntense dellos testos curtios de Pablo Texón, onde’l poeta y narrador encara de manera sincera y con gran xeitu la reflexón sobre dellos esmolecimientos personales y sociales. Texón, fuxendo de l’autocomplacencia, muestra no filosóficu un ciertu pesimismu vitalista. Y no lliterario, vuelve a descubrise como un maestru de la prosa poética, onde l’escritor ye humilde compañeru de camín y non guía.

D’otra banda, Ignaciu Llope percuerre en “La casa gris” asuntos como’l cuadonguismu, la estroza del paisaxe tradicional o la identidá, que trescalen los artículos periodísticos axuntaos nesti volume. La poesía, la precisión y la pasión nel análisis en cada tema que se trata, faen de la llectura de caún de los artículos un exerciciu intensu abiertu al debate y a la reflexón. Y, siempre, cola raíz n’Asturies.

Yá llegó a les llibreríes “La mio voz”, el poemariu que-y valió a l’académica y profesora Marta Mori’l Premiu Xuan Mª Acebal na so edición de 2010. “La mio voz” afonda nes venes característiques de la poesía de Marta Mori: poesía intimista, d’ellaboración curiada y fondu procuru llingüísticu, onde l’autora posa la mirada sobre l’entornu inmediatu y tamién el llonxanu, enllazando la imaxe suxerente cola reflexón axeitada. La obra espublízase a comuña ente la editorial xixonesa Suburbia y la Conseyería de Cultura.

Marta Mori d’Arriba (Xixón, 1965) ye autora tamién de los poemarios Pórticu (2003), El tiempu de la espera (2005) y L’alcordanza (2010), amás d’estrenase como narradora nel volume de rellatosHistories familiares (2008).

Con “Cuando’l mundu debala” Berto García algamó nel 2009’l Premiu Llorienzu Novo Mier de Poesía, convocáu pola Academia de la Llingua Asturiana, que ta acabante editar el llibru.

Berto García ñaz en Les Vegues (Corvera), en 1975. Ye autor d’otros tres poemarios, editaos por Trabe: Ensin otra sida (2005), Treslallende (xunta Carlos Suari, 2007) y Manual contra’l vacíu (2008), obra cola qu’algamó nel 2007 el Premiu Fernán Coronas. Tien amás bien d’obra espardío peles revistes lliteraries del país, como: El Canciu’l Cuélebre, Lletres Asturianes, Formientu, Lliteratura, Lletres Lliterariu o Entellunu, y nes antoloxíes: Pa[i]saxesy Cuando la memoria fala.

Amás, tien feches les tornes, na estaya de la lliteratura infantil, pa la editorial Cumio, de los llibros Florenta, la gata poeta y Les fábules de Leonardo da Vinci. L’autor ye mayestru interín d’Educación Infantil y Primaria, amás d’Espertu en llingua asturiana pola Universidá d’Uviéu.

Esti xueves, 12 de mayu, la periodista y escritora Mai Luz Pontón presenta’l llibru-álbum “Un monstruu ensin corazón”. El llibru asoléyalu la editorial Pintar-Pintar y va presentanse na so llibrería d’Uviéu. Na presentación va tar l’autora de los testos y la ilustradora, Iranidis Fundora, amás de la hestoriadora y escritora Pilar Sánchez Vicente, faciendo de presentandora.

La Biblioteca d’Asturies acueye esti miércoles 11 de mayu, a les 19:30 hores, la presentación de les obres lliteraries ganadores de los premios Asturies Xoven, na so edición de 2010. El Director del Institutu Asturianu de la Mocedá, Guillermo Martínez Suárez, va tar presente nel actu nel que van presentase al públicu les obres ganadores en poesía, narrativa y yestos teatrales. “Cerrar los ojos para verte” de Rodrigo Olay, “Entrevias” de José Antonio Calzón y “Ensin noticies del fin del mundu” de José Ángel Gayol.

A la convocatoria 2010 presentáronse 25 orixinales, 13 poemarios, 10 na modalidá de narrativa o narraciones curties y 2 a testos teatrales. El xuráu formáronlu Martín López Vega, Sofía Castañón, José Luis Rendueles, Juan Bautista Bilbao Lopategui (Jon Bilbao) y Adolfo Camilo Díaz López .

Les obres espublícense dientro de la Colección Texu, que se convirtió col pasu del tiempu nuna importante amuesa de la lliteratura moza asturiana, axuntando los llibros de tolos premiaos. Esctitores como José Luis Piquero, Martín López Vega, Jordi Dolce, Ricardo Menéndez Salmón, Ignacio del Valle, Pablo Rodríguez Medina, Ismael Piñera, Chus Fernández, Jon Bilbao, Sofía Castañón, Miguel Barrero o David Barreiro, ente otros munchos.

El pasáu 6 de mayu, zarró’l plazu de presentación de candidatures pal V Premiu Timón entamáu pola asociación L’Arribada. Pa esta edición, opten a los gallardones los escritores que ñacieren nel añu 1961 o enantes y tengan un carrera lliteraria en llingua asturiana o n’eonaviegu. Nesta ocasión presentáronse candidatures pa premiar a Ánxel Álvarez Llano, Lurdes Álvarez, Pablo Ardisana, Manuel Asur, Sabel de Fausta, Joaquín Fernández García, Antón García, Vicente García Oliva, Ismael María González Arias, Cristina Muñiz Martín, Esther Prieto, Miguel Rojo, Luis Salas Riaño, Miguel Solís Santos y Alfonso Velazquez.

Amás, dende l’añu pasáu l’Asociación L’Arribada convoca tamién el “Premio Timón”, p’autores asturianos qu’escriben en llingua castellana. Nesta ocasión son candidatos Fulgencio Argüelles, José Luis Argüelles, José Luis García Martín, Carmen Gómez Ojea, Ricardo Labra, Juan Méjica y Carmen Ruiz-Tilve.

P’alcordar los gallardones, l’asociación convocará dos xuraos, ún por cada modalidá, formaos por persones venceyaes a la cultura del país. Estes distinciones, que consisten nuna obra del escultor y ceramista xixonés Jesus Castañón pa cada premiu, entregaránse mientres la celebración de L’Arribada 2011, dientro de la so estaya Vagamar, que va desarrollase del 9 al 17 de setiembre en Xixón.

Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009) y Roberto González-Quevedo (2010); y el del Premio Timón, Luis Fernández Roces (2010).

Esti martes, 10 de mayu, de magar les siete la tarde, nel Club de Prensa Asturiana de La Nueva España, n’Uviéu, Rosa Cunqueira presenta’l so poemariu “Suenos, versos cunqueiros”, escritu na variedá cunqueira del asturianu. La obra ta espublizada pola editorial CH Ediciones y yá se presentare na llibrería Treito de Cangas del Narcea.

Rosalía Rodríguez, más conocida como Rosa Cunqueira, ye conocida pol so trabayu como artesana nel “Rincón Cunquieru”, en Tabláu, Degaña, onde xunto con otros artesanos caltién la cultura cunqueira o tixileira.