Lliteratura

La Sociedá Popular La Regalina tien abiertu’l plazu del so premiu de poesía, dedicáu a la figura del Padre Galo (1884-1939), clásicu de la lliteratura asturiana hasta’l 16 de xunetu. Al concursu pueden presentase poemarios en llingua asturiana, con un mínimu de 275 versos. Los trabayos han mandase a la Sociedá, que ta asitiada nel Casinu de Cadavéu, na cai Curión e/n.

El premiu consiste en 1.300 euros y la posibilidá de publicar el poemariu . El premiu pue quedar ermu, conociéndose’l resultáu del xuráu, el 7 d’agostu, aniversariu del ñacimientu del Padre Galo.

Nos últimos años ganaron autores como Héctor Pérez Iglesias, Rubén d’Areñes, Carmen Guardado, Berto García o L.luis Fernández, ente otros.

La última obra del autor asturianu Alfonso Zapico va presentase na llibrería Gizzmo, en Mieres, el sábadu 11 de xunu a les 19 hores, acompañáu pol escritor ya investigador del cómic asturianu Chechu García. A la fin del actu, l’autor va roblar y dedicar exemplares.

En “Dublinés”, Zapico amuesa un gran trabayu de documentación y de plasmación en viñetes, con rellatu chiscáu de múltiples anécdotes que son un viaxe en tren per aquelles ciudaes –Dublín, Trieste, París y Zurich– peles que foi dexando’l so rastru de vida esti irlandés universal. Pernomaos autores van desfilando poles sos páxines como Henrik Ibsen, W.B. Yeats, Ezra Pound, H. G. Wells, Bernard Shaw, T.S. Eliot, Virginia Wolf, Paul Valéry, Marcel Proust, Ernest Hemingway, Samuel Beckett, Sergei Eisenstein, Henry Matisse, André Gide, -y Corbusier, y hasta Lenin.

Alfonso Zapico

(Asturies, 1981). Ñacíu en Blimea ye diplomáu n’Ilustración y Diseñu pola Escuela d’Arte d’Uviéu. Como freelance fai trabayos gráficos de calter infantil/xuvenil pa editoriales (llibros de testu, dibuxos animaos, página web, ilustraciones…), y exerz d’ilustrador nun proyectu de la Conseyería d’Educación d’Asturies dende’l 2005.

Ye collaborador habitual d’un periódicu La Nueva España, y publicó historietes y tires cómiques en diverses revistes xuveniles y dixitales d’Asturies. El so primer álbum de cómic, “La guerre du professeur Bertenev”, espublizólu en Francia Editions Paquet, y recibió’l Prix BD Romanesque nel FestiBD Ville de Moulins nel 2007. Tamién collaboró n’otru álbum colectivu, “Un jour de mai”, editáu na primavera del 2007 por Paquet con guión del francés Règis Hautiere.

El Serviciu de Política Llingüística d’Asturies y la editorial Suburbia anuncien la presentación del llibru “La mio voz”, de Marta Mori, obra ganadora del Premiu Xuan María Acebal de poesía n’asturianu 2010.

L’actu va celebrase’l prósimu día 8 de xunu nel Vieyu Institutu de Xixón, a les 7,30 la tarde, cola participación de Xuan Xosé Sánchez Vicente como presentandor y Consuelo Vega, Directora Xeneral de Política Llingüística, en representación del Gobiernu d’Asturies.

Esti vienres día 27 de mayu a les 20 hores visita la Casa de Cultura de Grau la escritora y periodista María Teresa Álvarez ufierta la conferencia titulada “Retazos de la historia de delles escritores”.

Esta actividá supon la culminación de los VI Alcuentros de Lliteratura y Artes qu’entamen dende’l pasáu 29 d’abril el Foru de Creación y Llectura de la Biblioteca de Grau, la Conceyalía de Cultura, l’Asociación Cultural Valentín Andrés y la Tertulia El Pizarrín de Cá Pachín.

María Teresa Álvarez ñació en Candás (Asturies) el 27 d’ochobre de 1945. Llicenciada en Ciencies de la Información, foi la primer muyer cronista deportiva na radio asturiana y la primer presentadora del programa autonómicu de TVE n’Asturies.

En 1987 treslládase a Madrid pa conducir la Subdireición de Cultura y Sociedá de los telediarios de TVE. Un añu más tarde dexó la información diaria pa realizar documentales hestórico-divulgativos.

En 1999 publicó’l so primer llibru, “La pasión última de Carlos V.” A esti siguiéronlu: “Isabel II. Melodía de un recuerdo”, “El secreto de Maribárbola” y otres.

La llibrería Paraxuga, una de les llibreríes clásiques del asturianismu n’Uviéu, va ser la protagonista esti sábadu 28 de Mayu, alrodiu les 12 hores de la cuarta temporada del programa “Nós”. L’espaciu entrevista a Yolanda y Dulce Gil Fernández que reinauguraran la so llibrería, que dende setiembre de 2007 tornaba como Llibrería-Café na cai Paraísu.

En 2006 , les responsables de la Llibrería Paraxuga tuvieron de camudar de llocal por problemes ayenos y dende entós dellos problemes alministrativos foron torgando l’apertura de Paraxuga na cai Paraísu hasta que nel mes de setiembre de 2007 ‘Paraxuga Llibrería ya Café’ va inaugurábase nel nuevu llocal del establecimientu, asitiáu na cai Paraísu, 2, baxu (Uviéu).

La TPA estrenó’l sábadu 5 de Marzu la cuarta temporada del programa “Nós”, espaciu dirixíu y presentáu pol periodista y profesor universitariu Próspero Morán, qu’emítese tamién pol satélite Hispasat pal restu d’España, Europa y América y por Internet pa tol mundiu al traviés de la web de la RTPA, y qu’esti añu grábase per primera vegada depués de cuatro años nun formatu HD o d’Alta Definición.

Esti xueves, 26 de mayu, a les 20 hores va presentase na Sala Polivalente de la Casa Cultura de Grau’l cómic de temática hestórica «Pedro Menéndez de Avilés. Al otro lado del mundo». Asoleyáu por Ediciones Nieva, ye obra de Javier Marines y José Martínez. L’actu ta entamáu a comuña ente l’Asociación Cultural Valentín Andrés y la Conceyalía de Cultura al traviés de la Biblioteca del Conceyu.

Ta previstu qu’intervengan nesta presentación el guionista José Martínez, l’ilustrador Javier Marines, el dibuxante Neto (que tamién collabora na publicación), y l’editor Benjamín Llebratu (Ediciones Nieva).

Pedro Menéndez d’Avilés foi fidalgu adineráu, comandó la flota de les Indies del rei Felipe II en nueve causes y foi nomáu Adelantáu (gobernador) de La Florida. Fundó la primer ciudá de l’actual Norteamérica -San Agustín- y encargóse de los hugonotes que-y triaben los talones.

Javier Marines (Grau, 1967) ye moscón de nacencia, anque anguaño vive en Les Vegues (Corvera). Javier Marines ye profesional del diseñu y la ilustración. Llogró numberosos premios nesti campu como’l concedíu pola Universidá Popular de Castuela (Badaxoz) en 1995, o como’l Urriello d’ilustración convocáu pol Principáu y que recibió en dos ocasiones (1991 y 92). Ganó tamién dellos concursos de cartelos como’l del Descensu Folkloricu del Nalón (Llaviana 1996), La Regalina (2002), etc.

Nel ámbitu de Grau tamién realizó cartelos pal Conceyu y distintes asociaciones, y publicó en delles revistes locales. Como autor de cómics en 1996 publicó “Ballenas”, un interesante llibru sobre la caza de ballenes na Asturies del sieglu XVI y “Domno”, que se ambienta nel primer terciu del sieglu XII y en llocalizaciones como Asturies, Lleón, Astorga, esti cómic amuésanos les aventures de Gonzalo Peláez un noble asturianu que se remontó contra’l rei de Castiella Alfonso VII. Collaboró tamién con publicaciones de cómics como “El Llapiceru” o “Tapón”.

Ye perdifícil saber la razón pero la cosa ye qu’aquella pota vieya, que tenía munchos años de trabayu cociendo enriba los fogones, yera mui especial cuando queríes preparar dalgún guisu. Pero resulta que munches veces dexámonos llevar polo más guapo, o lo más nuevo, aquello que nos parez, al menos estéticamente, más curioso. Y claro, el qu’una cosa seía más nueva, o más guapa, nun quier dicir que seya meyor…

Cristina Muñiz Martín foi una neña llectora a la que los llibros llograron encantar. Asina, empezó a escribir les sos propies histories, que dieron como resultáu llibros como Onde pisen poques güelles, El buscador d’hestories o Karias. Va poco estrenóse nel mundu de la lliteratura pa neños, y fíxolo a lo grande, col llibru de poemes Dingurindaines, que tuvo una respuesta bien bona por parte de los llectores, neños y mayores.

La FNAC de Parque Principáu cumple 10 años y pa celebralo convoquen un concursu de rellatos n’asturianu. A él van poder presentase toles persones que quieran con obres orixinales y inédites n’asturianu y non premiaes n’otros concursos. El tema va ser llibre y la obra ganadora va formar parte del primer llibru de rellatos n’asturianu espublizáu pola FNAC.

Van poder presentase a esti concursu siete exemplares orixinales, mecanografiaos o a ordenador con lletra de 12 puntos, formatu DIN A-4 per una cara y a doble espaciu, con un mínimu de 5 fueyes y un máximu de 10, ensin firmar. Han presentase acompañaos d’un sobre ciarráu onde tien que figurar el seudónimu del autor. Nel interior del sobre tien que constar el nome y apellíos del autor, DNI, fecha de nacimientu, domiciliu, teléfonu y un currículum vitae curtiu.

Les obres han remitise per corréu o entregase personalmente enantes del 15 de xunu de 2011. El xuráu va ser designáu pola dirección del centru ente persones de prestixu reconocíu dientro del mundu lliterariu. El premiu va fallase’l día 30 de xunu.

Bases completes

El Conceyu de Llaviana convoca la décima edición d’esti concursu dotáu con 400, 200 y 100 euros pa los tres primeros. Los trabayos, tanto en prosa como en versu, han tar redactaos en llingua asturiana, respetando les normes ortográfiques y gramaticales n’usu de l’Academia de la Llingua Asturiana, con un llargor máximu de 10 fueyes.

El tema sedrá llibre valorándose los trabayos que recueyan tradiciones, costumes, llugares, fechos, paisaxe d’Asturies y, sobremanera, del Conceyu de Llaviana y el Valle’l Nalón. Les obres van presentase na Oficina de Normalización Llingüística de Llaviana, allugada na Plaza Armando Palacio Valdés 1, 33980, en La Pola Llaviana. El plazu d’almisión de trabayos acaba’l vienres 3 de xunu a les 14:00 hores.

Bases completes

L’Ayuntamientu de Llaviana, en collaboración cola Oficina de Normalización Llingüística del conceyu presentó hoi la campaña Lleer faite llibre, dientro del Plan Revolucionariu de la Llectura que desarrolla la Conceyalía de Mocedá y Promoción del Asturianu.

Esta iniciativa consiste na edición de seis modelos de carteles con fragmentos d’obres lliteraries asturianes. El total d’exemplares llega a los 300 carteles, que van colocase en diferentes espacios públicos y privaos del conceyu, col oxetivu de facer llegar la lliteratura a la ciudadanía. La campaña ta diseñada pa ser un mediu de proyectar socialmente les producciones lliteraries n’asturiano, una manera de que la lliteratura asturiana llegue a la ciudadanía. Amás de dar a conocer la lliteratura en llingua asturiana la campaña quier animar a lleer y desarrollar al mesmu tiempu la capacidá crítica na población, buscando que la llectura de los testos propuestos tenga continuidá nes biblioteques y llibreríes del conceyu.

Nesta campaña podemos alcontrar testos de diferentes autores asturianos: Xuan Bello, Miguel Allende, Berta Piñán, Iris Díaz Trancho, Xuan Santori y Ovidio Parades. La selección de testos, que tuvo llugar nos meses precedentes, contó cola collaboración d’un grupu de maestres que desenvuelven la docencia en diferentes centros educativos municipales, y nella tamién participaron responsables de la Conceyalía de Mocedá y Promoción del Asturianu, de la Oficina de Normalización Llingüística y de la Oficina d’Información a la Mocedá.

La iniciativa va complementase con otres actividaes de fomentu de la llectura que van dir poniéndose en marcha nos meses próximos.