Lliteratura

La revista Reciella Malory torna a les llibreríes col so cuartu númberu. Nesti exemplar y según se da anuncia nel entamu del memsu los llectores van poder atopar “lliteratura n’asturianu de calidá”. L’oxetivu principal d’esta publicación ye, según puede lleese tamién na revista “mecer autores mozos con otros escritores yá consolidaos dientro les nuestres lletres”.

Nesta ocasión la revista inclúi un rellatu de Jorge Fernández («Eso fáigolo yo»); poemes de Rubén d’Areñes («Carta pa una muyer que se llama Inés»); Héctor X. Fernández («Quixera que supieres»); Sergio Gutiérrez Camblor («Son les once la mañana»); María Esther García López («Buttes Chaumont»); José Luis Rendueles («Xaula«); Laura Marcos («Onde afuxen los paragües»); y Héctor Pérez Iglesias («Cuando’l so pueblu tuvo que dexar»).

Amás, apaecen delles tornes: una adaptación d’«Epopeya de Gilgamesh, rei d’Uruk», un poema épicu babiloniu escritu ente los sieglos XII y XI enantes de Cristu y qu’aparez agora n’asturianu de la mano de Chechu García; una torna d’Henrique G. Facuriella del llibru “Llunariu”, obra d’Al Berto, alies del escritor portugués Alberto Raposo Pidwell Tavares; «Nel gran viaxe ámote más», obra del consideráu como poeta nacional palestín Mahmud Darwish, fallecíu nel 2008, tornáu al asturianu por Chus Varela; Alicia Fernández traduz «El tiempu nun pasa…», del poeta suízu-xermanu del sieglu XIX Gottfried Keller.

Pieslla’l númberu un monólogu del dramatugu catalán Jordi Galcerán, que tornó al asturianu Chechu García.

A les ocho la tarde d’esti martes 5 de xunetu, el Club de Prensa Asturiana d’Uviéu va acoyer la presentación de trés novedaes pal públicu infantil de la editorial Universos. Las obras son “Urraca l’asturiana”, de Cristina Muñiz Martín; “Einstein y la relatividá”, de Jorge Fernández García y Amparo Sarrión, y “Evaristo Valle”, el pintor del Antroxu”, de Sidoro Villa Costales. Nel actu van participar los autores y l’editor, José Ángel Gayol.

Estos trés títulos son los primeros de la colección “Xente que mola”, destinada a un públicu infantil y dedicada a narrar la vida de personalidaes destacaes de la historia d’Asturies y del mundu. Tolos llibros de la serie inclúin nes páxines últimes un conxuntu d’actividaes pa que los guah.es puedan completar la llectura del llibru. Asina, les biografíes compleméntense con unes reseñes de los personaxes, sitios o feches que configuren la hestoria, preguntes sobre los fechos narraos o páxines pa dibuxar, nel casu del títulu dedicáu a Evaristo Valle. Por eso, estos llibros conviértense nun material bien afayadizo pa les clases d’asturianu n’Educación Primaria y, nel casu de llibru dedicáu a la reina Urraca, inclúise un repasu a los sitios onde asocede la hestoria pa poder facer visites culturales per ellos.

El Conceyu Bimenes celebra estos díes la XV Fiesta de la Oficialidá de la Llingua Asturiana, cola que fai alcordanza de la hestórica fecha del 5 de xunetu de 1997, na que’l Plenu del Conceyu aprobó la oficialidá de la llingua asturiana nel territoriu yerbatu. Dientro d’estos actos, va celebrase güei, vienres 1 de xunetu, a les 19:30 hores, la entrega de premios de XIV Concursu de Cuentos pola Oficialidá del Asturianu y llectura pública de la obra ganadora del primer premiu na voz del so autor, Nacho Fonseca.

Amás, a les 20.30 hores, sesión de monóloguismu n’asturianu cola actuación de Ludivino Díaz González, ‘Pin de la Cotolla’, que va representar el so espectáculu ‘Cotollaes’.

Nacho Fonseca Alonso foi el ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu catorce. El primer premiu, dotáu con 800 euros, foi pa la so obra “Lluis”. Magar que l’autor ye miembru de l’Academia de la Llingua Asturiana y yá tien ganaos dellos premios lliterarios, ye más conocíu pol so llabor al frente del grupu musical “Xentiquina”, formáu por escolinos del Colexu Públicu de Lieres (Sieru), de los que va despidise esti xueves 30 de xunu nun actu musical nel que van participar dalgunos de los grupos más importantes del país.

El segundu premiu, dotáu con 500 €, foi pal cuentu “Tengo un plan”, de Quique Faes Díaz, autor que yá ganare esti concursu nel añu 2006, y Pablo Rodríguez Alonso algamó’l tercer premiu, al que se-y apurren 350 €, con “¿Qué coño bebe un zulú?”. La entrega premios va tener llugar na Casa la Cultura de Santuyano, de magar les 19’30 hores del prósimu vienres, 1 de xunetu. Nel actu fadráse llectura pública de la obra ganadora.

Aconceyáu nel Vicerrectoráu d’Estensión Universitaria, Cultura y Deportes el xuráu del “I Premiu Lliterariu Universidá d’Uviéu”, formáu por Xandru Fernández, Leopoldo Sánchez Torre, Magdalena Cueto Pérez, Marta Pérez Toral y presidíu por Vicente Domínguez, acordóse conceder el Premiu Rellatu Curtiu a Diego Llorente Díaz pola so obra titulada “Balas” y el Premiu de Poesía a José Luis Sevillano Martínez pola obra titulada “La victoria en la derrota”.

El concursu tuvo envueltu en polémica cuando se convocó pues namás permitía que fuera pa obres en castellán. A la fin, una reclamación del Conceyu Universitariu pol Asturianu (CUPA) fizo que la Universidá cambiara les bases y se permitiera la presentación d’obres n’asturianu, anque nesta ocasión nun resultó ganadora nenguna obra escrita n’asturianu.

Güei, llunes 27 de xunu, tendrá llugar nel salón d’actos de la Casa la Cultura de Santuyano (Bimenes) la presentación del llibru “Canigú Lliterariu”, editáu pola Mancomunidá Comarca de la Sidra y que recueye testos n’asturianu d’autores de los conceyos qu’abarca l’ente supramunicipal. La presentación correrá a cargu de Pablo X. Suárez, escritor y responsable del Serviciu de Normalización Llingüística de la citada mancomunidá y cuntará cola presencia de dellos de los autores qu’apaecen nel llibru, que lleerán dalgunos de los sos testos.

El llibru apurriráse de baldre a los asistentes al actu, hasta acabar esistencies. Amás, nel trescursu del mesmu procederáse a l’apertura de pliques del XIV Concursu de Cuentos pola Oficialidá de la Llingua Asturiana, al qu’hai presentaos diecisiete trabayos. Esta actividá, programada pa les 19’30 hores, ta dientro del programa d’actos de la XV Fiesta de la Oficialidá de la Llingua Asturiana, lo mesmo que la esposición de les obres presentaes al VII Concursu de Cómic n’Asturianu de la Comarca de la Sidra, que yá se pue visitar dende’l pasáu 22 de xunu.

La Sociedá Popular La Regalina tien abiertu’l plazu del so premiu de poesía, dedicáu a la figura del Padre Galo (1884-1939), clásicu de la lliteratura asturiana hasta’l 16 de xunetu. Al concursu pueden presentase poemarios en llingua asturiana, con un mínimu de 275 versos. Los trabayos han mandase a la Sociedá, que ta asitiada nel Casinu de Cadavéu, na cai Curión e/n.

El premiu consiste en 1.300 euros y la posibilidá de publicar el poemariu . El premiu pue quedar ermu, conociéndose’l resultáu del xuráu, el 7 d’agostu, aniversariu del ñacimientu del Padre Galo.

Nos últimos años ganaron autores como Héctor Pérez Iglesias, Rubén d’Areñes, Carmen Guardado, Berto García o L.luis Fernández, ente otros.

Con motivu de les Fiestes de San Roque del Carbayedo, a facer n’Avilés del 19 al 22 d’agostu del 2011, y col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, dependiente del Serviciu de Promoción Cultural de la Conceyalía de Cultura, entama’l quintu concursu de micro-rellatos b’asturianu “L’horru Del Carbayedo” al que pueden presentase autores hasta con trés rellatos de menos de 500 pallabres y temática llibre.

El plazu pa presentalos piésllase a les 14 hores del día 1 d’agostu. La presentación namás pue facese pel corréu lletrónicu, unviando los rellatos en formatu Word a avvelhorreo@yahoo.es. Los trabayos dirán encabezaos per un títulu y firmaos namás con un nomatu. Nel corréu lletrónicu axuntaráse un archivu aparte, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI, y títulu/os presentáu/os al concursu.

Daránse dos premios: primeru, de 400 euros y troféu; segundu, de 200 euros y placa. Los dos premios nun pueden recayer nel mesmu autor/a. El 4 d’agostu un xuráu formáu por reconocíes personalidaes de la cultura asturiana determinará los trabayos ganadores. El llunes, 22 d’agostu, los/les autores lleerán los rellatos premiaos y recoyerán los premios, a les 20:00 hores, nel Salón d’Actos de la AA. VV. El Hórreo (Cai Dr. Marañón, 16, baxu).

Tolos rellatos presentaos, premiaos o non, van esponese al públicu al aire llibre, nel campu la fiesta (Parque del Carbayedo), los díes que dure la fiesta. El Xuráu entenderá de cualesquier dulda o problema que pueda apaecer. A les sos decisiones nun se pue retrucar.

Esti miércoles 16, de magar les diez y media la nueche, los participantes de les estremaes “timbes poétiques” entamaes en dellos conceyos del país, van dar pieslle a un añu d’actividaes.

Nesta “The last poetik timba” van participar “La Vidub”, col poeta Sergio S. Taboada dende Avilés, acompañáu de Dany Antistylo a los platos, amás d’Electrórretórica, con Pablo X. Suárez “acompañáu n’ausencia”, comenten los organizadores, de Royksöpp, Moderat, Siriusmo y Nathan Fake, ente otros.

El X Concursu de Narraciones Curties Conceyu Llaviana yá tien ganador, Pablo X. Suárez, col rellatu “El bichu grandre”. Amás, Pablo Rodríguez Medina, con “La vuelta”, y David Fernández, con “La espera interminable”, algamaron el segundu y tercer premiu, respectivamente.

Un actu celebráu dientro del VI Festival de la Sidra de Llaviana y presentáu pol músicu Tante Blanco sirvió d’espaciu pa la entrega de los premios, de 400, 200 y 100 euros, d’esti concursu entamáu pola Oficina de Normalización Llingüística de Llaviana.