Lliteratura

El sábadu 17 de setiembre, a les 18:00 hores, nel salón d’actos del CCAI, preséntase’l llibru “Portugal, país, posada y paraíso”, d’ Ángel García Prieto y Daniel Gouveia, nel que se fai un repás pela cultura, l’arquitectura, los escritores, la gastronomía, la llingua, los aspectos xeográficos, etc.

Publicaciones Ámbitu acaba d’asoleyar “L’alma robada”, llibru qu’axunta los testos de Pablo Texón coles semeyes de Mario Rojas y Pablo Lorenzana. A partir de les tomes d’estos dos fotoperiodistes asturianos bien conocíos, l’escritor fai que vaigamos más allá de la imaxe, sumando esta cola prosa poética pa descubrir la verdá interior de les coses.

Dellos momentos de la realidá asturiana que foron captaos polos dos fotoperiodistes son la escusa perfecta pa que l’autor xenere unos testos narrativos onde la mirada crítica, poética o reflexiva del escritor complementa a la de los fotógrafos, mostrando cares nueves de Woody Allen, Areces, Paca y Tola o los conflictos llaborales.

Esti llibru, asoleyáu por Trabe, recueye tola obra poética y narrativa n’asturianu de Nené Losada Rico. Xunto a los poemes de tipu popular de Cantares valdesanos (Llibros del Pexe, 1992) que se ven ampliaos nesta edición colos 68 versos últimos del apartáu «Cantares», vienen los publicaos nos dos llibros siguientes de l’autora (Entre apigarzos, 1997 y El nome de las cousas, 2001). De Fueyes que reverdecen (Atenéu Obreru de Xixón, 2004) recoyéronse namás aquellos que naquel momentu yeren iné¬ditos. La parte poética d’esta obra pieslla con un puñadín (7o esactamente) de poemes inéditos.

El Garrapiellu tien abierta la convocatoria de la que ye la venti edición del so concursu de cuentos curtios. Un concursu nel que los cuentos han de tar redactaos dafechu en Llingua Asturiana, respetando les normes ortográfiques de l’Academia de la LLingua Asturiana, ensin pasar les 12 fueyes de llargor.

El concursu ta empobináu a escritores mayores de 16 años, la temática ye llibre y el plazu d’entrega tará abiertu hasta’l 13 d’ochobre de 2011, teniendo d’unviase a: TERTULIA CULTURAL EL GARRAPIELLU, apartáu de correos 8133 – 33280 Xixón, nun sobre onde s’escribirá “XX Concursu de Cuentos Curtios EL GARRAPIELLU”. Dientro del mesmu dirá l’orixinal del cuentu col títulu y TRÉS copies, baxo plica, amás d’otru sobre cola plica’l autor y el títulu del cuentu escritu per fora, que contendrá los sos datos y un teléfonu de contactu.

El fallu’l concursu sedrá’l día 25 d’ochobre de 2011. El Garrapiellu nomará un xuráu debidamente cualificáu pa fallar estos premios y les sos decisiones nun serán retrucaes. La entrega de los premios comunicaráse personalmente.

A xuiciu de la Tertulia Cultural El Garrapiellu, el ganador de la presente edición formará parte del xuráu del próximu concursu. Los trabayos premiaos son propiedá d’El Garrapiellu que los espublizará nel IV volumen de Cuentos Curtios. En dengún casu se tornarán los orixinales a los autores de les obres non premiaes, pero éstos podrán, pela so parte, facer usu de les copies nun presentaes.

Ediciones Trabe tien abierta la convocatoria del Premiu Narraciones Trabe 2011 hasta’l viniente 30 de setiembre, pa obres de más sesenta páxines ya inédites. Autores como Pablo Antón Marín Estrada, Berta Piñán o Xandru Fernández ficiéronse con esti premiu nel pasáu.

Les bases son les siguientes:

Primera: puen participar toles persones interesaes, soles o en grupu, ensin límite d’edá, con obres de narrativa en llingua asturiana, yá seyan noveles, recopilaciones de cuentos o cualesquier otra forma posible de narración.

Segunda: los trabayos presentaos nun tendrán menos de sesenta páxines –DIN A-4 o foliu– mecanografiaes a doble espaciu per una sola llana (1.800 caracteres). Han ser inéditos y han tar ensin premiu n’otros concursos como conxuntu, quier dicise, puen presentase obres de les qu’apaecieren fragmentos publicaos, o recopilaciones de cuentos onde hebia dalgún editáu.

Tercera: el premiu tien una dotación de 2.000 euros en conceptu de drechos d’autor y la so publicación dientro de dalguna de les colecciones de la casa editorial. El xuráu pue partilu, conceder accésit, recomendar la publicación d’otres obres o dexalu desiertu según aconseye la calidá de los trabayos presentaos.

Cuarta: les obres han mandase, per corréu o en mano, en cinco copies a Ediciones Trabe, S. L. U., c/ Foncalada, 10 – 2u A 33002 d’Uviéu, enantes de les 24 hores del día 30 de setiembre de 2011, faciendo constar la siguiente lleenda: PREMIU DE NARRACIONES TRABE 2011. Puen presentase de dos xeitos: firmando col nome, dirección y teléfonu o baxo plica, quier dicise, figurando dientro d’un sobre zarráu los datos del autor y fuera’l títulu de la obra presentada y l’alcuñu col que se presenta, d’habelu.

Quinta: el xuráu tará formáu por persones relacionaes col ámbitu de la lliteratura asturiana. Como secretariu o secretaria, con voz pero ensin votu, actuará un representante d’Ediciones Trabe.

Sexta: al fallu del xuráu nun se pue retrucar. Fairáse públicu enantes del día 10 de payares de 2011. El xuráu queda autorizáu a abrir la plica de les obres premiaes y de les que recomiende pa publicar. Pal casu de les obres que nun reciban premiu económicu, Ediciones Trabe tien que se poner d’alcuerdu col autor o autores enantes d’entamar la so edición.

Sétima: los trabayos que nun se premien volveránse a los autores, en pidiéndolos estos, nos tres meses siguientes a que se dea conocencia del fallu. Desque pase esti plazu ensin que naide los reclame pasarán a formar parte del archivu editorial.

Octava: presentase al premiu supón tar d’alcuerdu coles bases. Les cuestiones que se plantexen y que nun tuvieren establecíes nestes bases podrá resolveles el xuráu.

El Gremiu d’Editores d’Asturies y les editoriales que lu integren van celebrar a partir d’esti vienres 26 d’agostu la nona edición del Salón del Llibru Asturianu, que se va allugar nuevamente en Xixón, nuna carpa de cien metros cuadraos asitiada na cai Francisco Tomás y Valiente.

A la inauguración, que va tener llugar a les 12:00 hores del vienres 26, van asistir Ángela Sanchez Vallina, presidenta del Gremiu d’Editores d’Asturies, Carlos Rubiera, conceyal de Cultura, Educación, Festexos y Mocedá del Conceyu de Xixón y Alfredo Ignacio Álvarez, Director Xeneral de Política Llingüística del Gobiernu d’Asturies.

La carpa va tar abierta al públicu mientres diez díes, hasta’l domingu 4 de setiembre, siendo l’horariu d’apertura: de llunes a vienres de 11:00 a 14:00 hores y de 17:00 a 21:00 hores, y los sábados y domingos de 11:30 a 14:30 hores y de 16:30 a 21:30 hores.

El IX Salón del Llibru Asturianu va esponer gran parte del fondu bibliográficu de les editoriales asturianes, con más de 1.000 títulos tantu n’asturianu como en castellán, col fin de dar a conocer la riqueza y calidá del llibru editáu n’Asturies.

La organización d’esti Salón cunta col patrociniu del Conceyu de Xixón, la Conseyería de Cultura y Deporte del Gobiernu d’Asturies, CEDRO y l’Obra Social y Cultural de Caxastur.

El vienres a les ocho la tarde, Valentín Álvarez Álvarez va roblar exemplares del so llibru “Real Juvencia. Historia del Fútbol en Trubia” d’Ediciones La Cruz de Grau. El sábadu 27 a les seis Ovidio Parades va roblar exemplares d’“El extraño viaje” con prólogu d’Elvira Lindo.

El mesmu sábadu, a les siete, Francisco Álvarez González presenta “Historia de cinco goles. El Mundial de El Guaje” d’Ediciones La Cruz, mientres qu’a les ocho va presentase “Crónicas fuera de programa” de Teté Fernández Balseiro.

El xueves 1 de setiembre Lluis Antón González representará monólogos de Cristina Muñiz Martín recoyío nel so llibru últimu “¡Que te preste!” (Ediciones Trabe) y d’Inaciu Galán y González.

El vienres 2 a les 19 hores Manuel Antonio Huerta Nuño va presentar “Los vigilantes silenciosos. Construcciones de la Guerra Civil en Asturias”.

Asturnews na Feria del Llibru Asturianu

El sábadu 3 a les 19 y 20 horas, respectivamente van presentase “Unos cuentos de muerte” d’Abel Martínez y “Febreru 29” de Marián García y Xurde Fernández, premios Astunews de Lliteratura Infantil y Xuvenil, asoleyaos por Ediciones La Cruz de Grau.

El Garrapiellu acaba dar anuncia de la convocatoria de la que ye la venti edición del so concursu de cuentos curtios. Un concursu nel que los cuentos han de tar redactaos dafechu en Llingua Asturiana, respetando les normes ortográfiques de l’Academia de la LLingua Asturiana, ensin pasar les 12 fueyes de llargor.

El concursu ta empobináu a escritores mayores de 16 años, la temática ye llibre y el plazu d’entrega tará abiertu hasta’l 13 d’ochobre de 2011, teniendo d’unviase a: TERTULIA CULTURAL EL GARRAPIELLU, apartáu de correos 8133 – 33280 Xixón, nun sobre onde s’escribirá “XX Concursu de Cuentos Curtios EL GARRAPIELLU”. Dientro del mesmu dirá l’orixinal del cuentu col títulu y TRÉS copies, baxo plica, amás d’otru sobre cola plica’l autor y el títulu del cuentu escritu per fora, que contendrá los sos datos y un teléfonu de contactu.

El fallu’l concursu sedrá’l día 25 d’ochobre de 2011. El Garrapiellu nomará un xuráu debidamente cualificáu pa fallar estos premios y les sos decisiones nun serán retrucaes. La entrega de los premios comunicaráse personalmente.

A xuiciu de la Tertulia Cultural El Garrapiellu, el ganador de la presente edición formará parte del xuráu del próximu concursu. Los trabayos premiaos son propiedá d’El Garrapiellu que los espublizará nel IV volumen de Cuentos Curtios. En dengún casu se tornarán los orixinales a los autores de les obres non premiaes, pero éstos podrán, pela so parte, facer usu de les copies nun presentaes.

Esti llunes, 22 d’agostu, a les 18:30 hores, representaráse una comedia de teatru asturianu y darréu (sobre les 20 hores) va facese la entrega de premios del concursu de microrrellatos “Hórreo de Carbayedo”, con llectura de los rellatos per parte de los premiaos, nel salón d’esta asoaciación vecinal avilesina, asitiada na cai Dr. Marañón, 16, baxu.

El xuráu de V Premiu de Microrellatos de l’AAVV “El Hórreo de Carbayedo”, independiente dafechu de la organización, alcordó da-y el primer premiu al micro-rellatu “Pol amor d’una muyer” de Pablo Rodríguez Medina; y el segundu a “Vaya peles ánimes” de Vítor Suárez.

La Sociedá Popular La Regalina dio anuncia del fallu del xuráu del XVIII Premiu de Poesía Fernán Coronas, dempués del aconceyamientu del mesmu na Casa Natal del Padre Galo, en Cadavéu, el pasáu 7 d’agostu. El poemariu “Los suaños y los díes”, de José Angel Gayol, del que xuráu destacó “entemez con sensibilidá y procura la esmolición del mundo actual, les sos miseries y diferencies”.

José Ángel Gayol

José Ángel Gayol (Mieres, 1977), Escritor y críticu lliterariu, collabora davezu en dellos medios como les revistes lliteraries Clarin, Reloj de Arena, Paralelo Sur, Formientu, es Tandoriu o’l diariu La Nueva España, ente otros.

Realizó la edición y l’entamu del volumen collectivu Nuevas maneras de contar un cuento (Llibros del Pexe, Xixón, 2005), y col llibru Con el velo de una sonrisa (Ed. Nobel, Uviéu, 2006) algamó’l Premiu Asturies Xoven de Poesía 2005.

En llingua asturiana tien publicau la novela Argonautes (Ámbitu, Uviéu,2007), la obra de teatro Ensin noticies del fin del mundo (Universos, Mieres 2011) ganadora del Premiu Asturies Xoven de Testos teatrales 2010, asina como dellos artículos y cuentos en prensa y antoloxíes. Imparte talleres de llectura y escritura.

Ye llicenciáu en Drechu pola Universidá d’Uviéu, llicenciáu n’Antropoloxía Social y Cultural pola UNED y Master n’Historia y Análisis Sociocultural pola Universidá d’Uviéu.

Hai una lliteratura que n’Asturies tien públicu y ye quien a amestar lo nuevo y lo vieyo, la tradición autóctona y lo llegao de fuera, esa ye la lliteratura d’humor. Hasta hai bien poco esta yera una lliteratura d’homes: hubo qu’esperar al añu 2007 con Ente muyeres p’arrexuntar un puñadín curiosu de monólogos y lliteratura humorística escrita por muyeres. Agora, una de les autores ellí incluyida, Cristina Muñiz Martín, xunta nesti volume los monólogos escritos pa echar nel programa de la TPA Al aldu, na sección titulada «La risión», el llibru llámase ¡Qué te preste!.

Con una mirada irónica pero amable, l’autora d’estos monólogos va esgranando la vida na Asturies d’anguaño, apurriendo nueves temátiques y una visión «de muyer» a un xéneru masculín por tradición.

Cristina Muñiz Martín (Xixón, 1953) ye amás de narradora, escritora de guiones radiofónicos y amante del teatru. Tien publicaos nesta editorial dellos volúmenes de cuentos (Onde pisen poques güelles, 2005;El buscador d’hestories, 2007 y Kárias, 2008), y la novela Ventiocho díes (2008). Amás d’esto, hai poco estrenóse nel mundu de la lliteratura infantil con Dingurindaines y La pota encarnada (2010).