Lliteratura

La traductora Ingrid van der Voort, holandesa y conocedora de la llingua asturiana, tornó al holandés un testu del escritor asturianu Xuan Bello. La torna apaez espubliza nel númberu 26 de la revista holandesa Tortuca, dedica al arte, la prosa y dende va dos númberos, tamién a la poesía. Bello tien espublizaos dalgunos de los sos llibros en catalán, gallegu o castellán, y testos sueltos tornaos a otres munches llingües.

Tortuca ñació en Rotterdam en 1997 y tien nel conseyu de redacción a Paul Bogaers, Lizán Freijsen (editor) Peter Swanborn y Kees van de Ven.

Páxina de la revista Tortuca en Facebook

Esti xueves 6 d’ochobre, l’escritor Xandru Fernández va ufrir un recital de la so obra poética dientro de les actividaes de l’Aula de les Metáfores de Grau. L’actividá va entamar a les ocho la tarde.

El vienres día 7 d’ochobre, a les 20:00 hores na Sala Álvaro Delgado, asitiada na cai Álvaro d’Albornoz de L.luarca (Valdés), va presentase la “Obra completa n’asturianu” de Nené Losada Rico, cuntando col conceyal de Cultura, Juan Guisasola, cola conferencia de Taresa Lorences «Construir un mundu, reinventalu: elementos simbólicos na poesía de Nené Losada Rico» y con una semblanza de Nené Losada Rico, por Antón García, escritor.

El pieslle al actu van ponelu Inaciu Iglesias, editor y José Modesto Vallejo, alcalde de Valdés.

Esti llibru, asoleyáu por Trabe, recueye tola obra poética y narrativa n’asturianu de Nené Losada Rico. Xunto a los poemes de tipu popular de Cantares valdesanos (Llibros del Pexe, 1992) que se ven ampliaos nesta edición colos 68 versos últimos del apartáu «Cantares», vienen los publicaos nos dos llibros siguientes de l’autora (Entre apigarzos, 1997 y El nome de las cousas, 2001). De Fueyes que reverdecen (Atenéu Obreru de Xixón, 2004) recoyéronse namás aquellos que naquel momentu yeren inéditos. La parte poética d’esta obra pieslla con un puñadín (70 esactamente) de poemes inéditos.

Con “El cuartu negociu” estrenóse na narrativa llarg Ismael María González Arias (Uviéu, 1958) y fízolo ganando’l Premiu Xosefa Xovellanos del 1992. Con ironía bien fina y un puntu de cinismu, l’autor va narrando’l pasu de Fernando Martín, de la P&C Ld., peles tierres desolaes de l’antigua Yugoslavia. Cuerren los primeros años 90 del sieglu xx y Bosnia ye sinónimu de guerra, muerte, traición y… negocios d’armes al traviés d’una empresa y unos personaxes que nun tienen escrúpulos nin torga. Coetania de los socesos que narra, esta obra introduxo na narrativa asturiana d’entós la novela d’acción, que, al par qu’entretién, fai pensar y nunca nun dexa indiferente.

Agora Trabe vuelve a asoleyar la obra na so colección de llibru de bolsu “Clásicos y contemporanios”.

Güei, vienres 30 de setiembre, el Centru Social La Semiente pieslla la so Selmana Cultural qu’organiza’l con una amuesa de semeyes, lliteratura y videucreación, que quier axuntar a un buen númberu d’artistes propios que son, según los sos organizadores “el meyor esponente de la vitalidá y creatividá de Samartín”. L’actu va celebrase nos andenes de la estación antigua de Renfe de L’Entregu.

Trátase d’una llectura pública musicada na cai per parte de los escritores mientres nuna pantalla se proyecten semeyes de los fotógrafos participantes na esposición qu’estos díes ta abierta na Casa de la Cultura de L’Entregu. Los escritores participantes son Ana Vanessa Gutierrez, Pablo Rodríguez Medina, Xulio Arbesú, Chechu García, Ana Rosa Fernádez y Benigno Delmiro Coto, xunto a les semeyes d’Ana Cachafeiro, Porfirio Vicente Pérez, Aida Cadenes, Daniel Rodríguez, Hugo Menéndez, Delfín Valdés, Jacobo, Zapico, Bego y Miguel.

Publicaciones Ámbitu va presentar la torna al asturianu del llibru de Jordi Llavina, Londres nevao , onde van intervenir, amás del autor, de visita n’Asturies pa esta presentación, el traductor del llibru al asturianu, Ramón d’Andrés, y l’escritor Xuan Bello. L’actu sedrá güei, xueves 29 de setiembre, a les siete y media la tarde, nel Salón d’Actos del Real Institutu d’Estudios Asturianos, nel 9 de la Plaza Porlier, n’Uviéu.

“Londres nevao” ye un llibru formáu por seis rellatos que tienen en común que tán ambientaos nel iviernu, la confusión ente narrador y autor, y la descripción sicolóxica de los personaxes al traviés de los detalles pequeños.

Jordi Llavina i Murgadas (Gelida, Barcelona, 1968), ye escritor, poeta, críticu lliterariu y presentador de radio y televisión. Diose a conocer nel añu 2001 al ganar el Premiu Josep Pla de narrativa cola novela “Nitrato de Chile”. Collabora col diariu Avui y nel programa Els Matins en TV3. Condució’l programa de televisión “El book insígnia”, y na radio, presentó’l programa “Fum d’estampa” na yá sumida emisora Catalunya Cultura.

Hasta la fin d’ochobre ta abiertu’l plazu pa la presentación de rellatos a la quinta edición del concursu lliterariu de la Fundación Cultural Asturias, de la UXT. El concursu ta destináu a mozos menores de 30 años residentes n’Asturies y ta dotáu con 1.000 euros de premiu y la publicación de la obra, amás d’un accésit de 500 euros. La tema ye llibre, siendo’l testu inéditu y escritu en castellán o n’asturianu, con un máximu de 25 fueyes.

Eva María Alonso Ruisanchez resultó ganadora de la edición pasada, siendo finalistes Inaciu Galán y Sofía Castañón.

Bases completes del concursu

El xueves 22 de magar les siete y media la tarde, l’escritor Pablo Texón va presentar el llibru “L’alma robada”, na Llibrería Cervantes d’Uviéu. Na presentación van partcipar, amás de Pablo Texón, los fotógrafos Mario Rojas y Pablo Lorenzana y el músicu y profesor de Lliteratura Ricardo Saavedra.

“L’alma robada” ye un llibru qu’axunta los testos de Pablo Texón coles semeyes de Mario Rojas y Pablo Lorenzana. A partir de les tomes d’estos dos fotoperiodistes asturianos bien conocíos, l’escritor fai que vaigamos más allá de la imaxe, sumando esta cola prosa poética pa descubrir la verdá interior de les coses.

L’Arribada se celebra del 9 al 17 de setiembre, dará-y un espaciu importante al ensayu sobro la realidá del País. Precisamente mañana, día 17, habrá trés presentaciones y una tertulia (D’Alderique) onde van recoyese estremaes visiones alrodiu del ser d’Asturies.

Los actos allúguense nel patiu del Centru de Cultura Vieyu Institutu de Xixón. A les 12:00 hores, presentaráse’l llibru “Incompetentes y autoritarios. La industria de Xixón dende l’autarquía al desmantelamientu” de David M Rivas. A les 12:30, D’Alderique tratará de “La realidá propio nel ensayu asturianu”. Yá n’horariu de tarde, presentaránse a les 17:00 hores “De totalitarios a demócrates” de Pablo Rodríguez Alonso y a les 17:30 hores “De les coses del mundu (1)” d’Ignaciu Llope.

El sábadu 17 de setiembre, a les 18:00 hores, nel salón d’actos del CCAI, preséntase’l llibru “Portugal, país, posada y paraíso”, d’ Ángel García Prieto y Daniel Gouveia, nel que se fai un repás pela cultura, l’arquitectura, los escritores, la gastronomía, la llingua, los aspectos xeográficos, etc.