Lliteratura

El Conceyu de Valdés celebra la que ye la tercer edición de la Xunta d’Escritores en llingua asturiana y otros profesionales na Casa del Padre Galo. Los actos van celebrase na casa natal del escritor y relixosu d’entamos del sieglu venti Fernán-Coronas, el viniente 17 d’avientu.

Esti martes, 25 d’ochobre, a les 12 hores, nel salón de graos del Departamentu de Filoloxía Angloxermánica y Francesa de la Universidá d’Uviéu, va tener llugar la presentación del llibru “Escenas de la vida de Annie Ernaux (Diario de lecturas, 2005-2008)”, de Moisés Mori. Amás del autor, van participar Annette Maxime, directora de l’Alianza Francesa d’Uviéu, y Marie-France Fabre, profesora del mesmu centru. L’actu va ser presentáu por Carmen Alfonso García, vicedecana d’Estudiantes y Actividaes Culturales de la Facultá de Filosofía y Lletres.

Cristina Muñiz y Filadi Curto van presentar la so primer novela conxunta. El llibru, escritu a cuatro manes por estes dos escritores asturianes, va presentase esta tarde, llunes 24 d’ochobre, nel Palaciu Valdecarzana d’Avilés, a les seis de la tarde, pero tamién nos díes vinientes en Xixón y Uviéu.

El día 26 d’ochobre a les seis, va presentase na Biblioteca Xovellanos de Xixón, y el 4 de payares, a la mesma hora, na Biblioteca Pérez Ayala, n’El Fontán d’Uviéu.

El Conceyu de L.lena, en collaboración cola Conseyería de Cultura, convoca’l Concursu de Cuentos “Lena/Ḷḷena”, al que pueden presentase rellatos de cualesquier tema, inéditos y n’asturianu o en castellán. El ganador, unu pa dambes dos llingües, va recibir un premiu de 3.000 euros.

El plazu pa presentase termina’l 31 de xineru de 2012. Pa más información puede llamase al teléfonu 985 49 11 57 o al corréu cultura@aytolena.es

Bases completes del concursu

Esti llunes, 24 d’ochobre, a les seis y meda la tarde, la Casa Cultura de Vil.lablinu, en Lleón, acueye la presentación del llibru últimu de Roberto González-Quevedo, “Onde viven los amigos”, un volume con rellatos escritos na variedá occidental del asturianu occidental y asoleyáu por Publicaciones Ámbitu.

La celebración de les Xustes Lliteraries de Xixón, que se faen cada añu nel centru cultural de L’Arena, trata esti añu la lliteratura asturiana con una con una mesa redonda titulada “Presente y futuru de la lliteratura n’asturianu”. L’actu organízalu l’Asociación Cultural L’Arribada esti llunes 24 d’ochobre a les 19:30.

La editorial Suburbia ta acabante asoleyar trés poemarios nuevos. Trátase de los primeros poemarios de Larry Desdeyn y Cristina Menéndez y la vuelta a la poesía del veteranu Marín Estrada con ‘Despidida’, dende que ganare en 2007’l Premiu Xuan María Acebal de Poesía. Desdeyn asoleya’l poemariu “Montains’s silent shout. El gritu silenciosu de les montañes” nuna versión billingüe n’inglés y asturianu, incluyendo delles semeyes d’Asturies del músicu y fotógrafu norteamericanu. Pela so parte, Cristina Menéndez (Mieres, 1984) asoleya’l poemariu, de corte intimista, “Pallabres sin dicir”.

La Tertulia Cultural El Garrapiellu felicitóse al traviés d’una nota de prensa pola alta participación nel concursu añal de cuentos curtios que va fallase’l 25 d’ochobre viniente. Esti certame lliterariu ye yá decanu de los premios n’Asturies y El Garrapiellu quixo aprovechar la oportunidá “p’agradez nel alma l’esfuerciu a tolos autores que lleven participando estos caberos venti años colos sos rellatos”.

Dende El Garrapiellu recuerden que son “munches les persones qu’añu tres añu, tapando la blancura espantible del papel, sofiten la llingua asturiana creando pequeñes obres d’arte” y faen tamién un recordatoriu a los miembros del xuráu “Humberto Gonzali o Inaciu Galán, Iris Díaz o Vicente García Oliva, Chehu García o Dolfo Camilo Díaz, toes persones de reconocíu prestixu nel mundiu de la cultura, col so nome, de pasu, prestixen tamién esti premiu”.

Reconocen tamién la collaboración de l’Academia de la Llingua Asturiana a estos premios, yá que “cada añu la institución académica aporta miembros pa formar parte del xuráu”.

Ente los ganadores del concursu a lo llargo d’estos años hai escritores noveles naquelles dómines como Pablo Rodríguez Medina escritor agora yá con prestixu abondo dientro de la cultura asturiana, Xandru Martino maestru y escritor, tamién la yá finada María Teresa González foi premiada y a los pocos años otru escritor, Pablo Antón Marín Estrada tamién algamaba esti gallardón.

Estos son namás unos pocos nomes de los munchos qu’El Garrapiellu tien ente los sos premiaos, recoyíos darréu en llibros, que cada cuatro ediciones asoleya l’asociación. El Garrapiellu, asociación convocante d’estos premios ye dende esti añu Medaya de plata del Conceyu de Xixón, dempués de cumplir venti años d’actividá cultural n’Asturies.

Esti vienres, 14 d’ochobre, nel Salón d’actos del Palaciu de Valdecarzana d’Avilés, de magar les seis de la tarde, va presentase “Urraca l’astuiana”, novela curtia escrita pa la mocedá, sobre la vida d’Urraca, reina d’Asturies y Navara y señora d’Ayer. Fía del rei Alfonso VII y de Gontrodo Petri, fía de Pedro Díaz de Tinéu. Na presentación intervendrán: Román Antonio Álvarez, conceyal de Cultura del Conceyu d’Avilés, Cristina Muñiz, autora de la novela y Jose Ángel Gayol, editor.

Urraca ñaciere en Pel.luno, pueblu del conceyu d’Ayer. Llamóse Urraca pola so güela paterna, Urraca I reina de Castiella y Lleón. Casáronla a los trece años col rei García Ramírez de Navarra. En quedando vilda, fízose cargu del gobiernu d’Asturies hasta que fuere esterrada pol so hermanu, acusada de rebelión.

L’autora: Cristina Muñiz

Narradora, creadora de monólogos y escritora de guiones radiofónicos. Títulos de llibros de rellatos como Onde pisen porque güelles (2005), El buscador d’histories (2007) y Karias (2008); la novela Ventiocho díes (2008); monólogos del llibru Ente muyeres, guiones de radio, lliteratura infantil con Dingurindaines (2010) o La pota encarnada (2011) y agora la novela histórica pa la mocedá, Urraca l’asturiana (2011), sirven pa conocer a esta autora en llingua asturiana, que toca xéneros bien diferentes, pero que toos comparten el bon facer y el gustu pola lliteratura cuidada, que llega a neños y neñes, a la mocedá y al públicu adultu en xeneral.

Entrevista a Cristina Muñiz n’Asturnews

El xueves 27 d’ochobre Suburbia Ediciones va celebrar la presentación del llibru “El sitema débeme un chocolatina” de Pablo X. Suárez. Un actu que va convertise nun recital poéticu cola presencia del propiu autor xunto a Laura Marcos, Sofía Castañón, Rubén d’Areñes y Sergio G. Camblor, amás d’una sesión musical.

L’actu va tener llugar nel chigre La Caja Negra d’Uviéu, asitiáu nel 12 de la Cai Xesús, de magar les ocho y media la tarde.