Lliteratura

El xuráu del Premiu Xuan María Acebal, el de más dotación pa la poesía escrita n’asturianu, con 7.000 euros, asoleyó yá’l resultáu del so aconceyamientu. L’escritor avilesín Xosé Anxelu Gutiérrez Morán ye’l ganador de la edición 2011 d’esti gallardón convocáu pol Gobiernu d’Asturies, col poemariu “Un ciertu desorde”, sobre’l que’l xuráu destacó que “sobresal l’intentu del autor de dir de lo escuro a lo claro, componiendo una poesía conceptual que tiende hacia’l pensamientu ensin dexar de ser canción”.

Gutiérrez Morán (Avilés, 1969) ye Doctor en Bioloxía nel Centru Oceanográficu de Xixón, compaxinando esti llabor col cultivu de la poesía. Nel añu 2002 algamó’l segundu premiu nel Concurso de Cuentos pola Oficialidá de Bimenes y en 2009 fízose col Teodoro Cuesta de poesía.

Al premiu presentáronse otros diez poemarios, que fueron xulgaos por Marta Mori d’Arriba, Xuan Bello y Lourdes Álvarez, baxo la presidencia del Director Xeneral de Política Lingüística, Alfredo Álvarez Menéndez.

El Foru de Creación y Llectura de la Biblioteca Municipal de Grau y l’Asociación Cultural Valentín Andrés convoquen el Sétimu Certame Lliterariu de Cartes de Amor San Valentín, al que puede presentase una obra orixinal, inédita y non premiada n’otros concursos, en xéneru epistolar, sobre l’amor en cualesquier de les sos manifestaciones, bien en prosa, en versu o en dambes modalidaes, incluyendo versiones en cualesquier materialización gráfica, incluyíu’l cómic.Los testos habrán tar n’asturianu o en castellán.

Les cartes hab presentase en formatu físicu hasta’l 16 de xineru de 2012 a les 21 hores, con una estensión d’ente una y trés fueyes per una sola cara. Les obres han llevar títulu y van acompañase de los datos completos del autor (incluyíu un teléfonu de contactu), llevándose o mandándose per corréum a Biblioteca Municipal de Grau “Valentín Andrés Álvarez”, Cai Cuetu de la Muria e/n, 33820 Grau (Asturies), indicando nel sobre “Certame de Cartes d’Amor”.

L’anunciu de la carta ganadora del concursu va tener llugar el día de San Valentín de 2012, polos mesmos medios en que se convocó’l concursu. La carta ganadora va recibir como premio 150 €, un diploma acreitativu y la so publicación na revista “Las Hojas del Foro”.

http://culturagrado.blogspot.com/2011/11/vii-certamen-de-cartas-de-amor.html

El VIII Certame de poesía Nené Losada Rico yá tien ganadores. El xuráu, formáu polos escritores Antón García, José Luis Rendueles y Xuan Santori, alcordó por unanimidá conceder el premiu ax aequo a Pablo Rodríguez Medina pol poemariu “Mitoloxíes íntimes” y a Ricardo Candás por “Naufraxos”. Al premiu presentáronse ocho poemarios.

La entrega va celebrase esti vienres 4 de payares, a les 19:30 hores, na sala Álvaro Delgado de L.luarca.

“Tovía nun me fici a la idea, faime muncha ilusión”, esplicaba Isaac del Rivero a Asturnews poques hores dempués de saber la decisión del xuráu de facelu ganador del Premiu de cómic n’asturianu Alfonso Iglesias pola so adaptación a hestoria gráfica del llibru de Clarín, “Doña Berta”. El xuráu d’esti premiu convocáu pol Gobiernu d’Asturies formáronlu nesta ocasión el Director Xeneral de Política Llingüística, Alfredo Álvarez Menéndez, José Antonio García Fernández, escritor y guionista de cómic, Xune Elipe Raposo, espertu en cómic, y Efrén d’Andrés Díaz, dibuxante gráficu.

Isaac del Rivero de la Llana (Colunga, 1931) ye un dibuxante que lleva tola vida dedicáu al cómic. Fundador del Festival de Cine de Xixón y d’iniciatives como’l Salón del Cómic d’Asturies, el segundu n’entamar n’Europa, tien espublizaes hestories gráfiques sobre la vida de Xovellanos, una adaptación de La Rexenta, tamién de Clarín y otros munchos trabayos. Pero’l so llabor más importante llevólu a cabu promocionando la obra d’otros autores asturianos, dirixendo les revistes, Kikelín, Tapón y sobre manera, El Gomeru, que dende 1992 tuvo delles etapes y que supunxo un importante finxu pal cómic n’asturianu.

El martes día 8 de payares, a les 18:00 hores, nel palaciu Valdecarzana d’Avilés, va presentase’l llibru de monólogos de Cristina Muñiz Martín tituláu “¡Que te preste!” y espublizáu por Trabe Ediciones. Nel volume espublícense 39 monólogos que s’echaron pela TPA nel programa “Al aldu: La Risión”.

El vienres pasáu axuntóse’l xuráu del Premiu María Josefa Canellada de lliteratura infantil y xuvenil, convocáu pol Gobiernu d’Asturies. La Casa Cultura de Santolaya, en Cabranes, dedicada a la mesma figura que’l concursu, acoyó’l conceyu del xuráu, que decidió da-y el premiu a “Camín de lletres: d’Asturies a Nueva York”, obra presentada col alcuñu “La Xaranzana” y que resultó ser de Paquita Suárez Coalla, escritora n’asturianu que reside nos Estaos Xuníos.

El premiu ta dotáu con 7.000 euros y tuvo nesta ocasión un record de participación, con diez obres.

L’escritor Pelayo Fueyo va presentar el poemariu tituláu “El cielo de las cosas”, asoleyáu na colección de poesía “Mala letra”, de KRK Ediciones. L’actu sedrá esti xueves, 3 de payares, a les siete, nel Club Prensa Asturiana, de La Nueva España, cuntando cola intervención del autor y de Miguel Alarcos, Álvaro Ruiz de la Peña y César Inclán.

Esta selmana aconceyó’l xuráu del XX Concursu de Cuentos Curtios El Garrapiellu pa fallar los gallardonaos d’esta edición. Dempués d’aldericar en Xixón, llegóse al alcuerdu de declarar ganador al rellatu “La vengación”, que resultó ser de Denis Soria Fernández, un autor mozu ñacíu en Xixón en 1989. El primer premiu ta dotáu con 900 euros. El xuráu decidió, amás, dar un accésit de 300 euros al rellatu “Vae victis”, de Pablo Rodríguez Alonso, autor ñacíu en Xixón en 1979 y con delles publicaciones yá nel mercáu lliterariu.

El xuráu d’esta XX edición taba formáu pol académicu de la llingua Vicente García Oliva, pol escritor y ganador de la cabera edición Sergio Manuel Buelga Casas, pol escritor y editor Milio Rodríguez Cueto y pol escritor José Luis Rendueles.

El xuráu destacó’l bon altor lliterariu algamáu na mayoría de los cuentos. Asina mesmo, causó una perbona impresión la mocedá del ganador del decanu de los concursos de cuentos en llingua asturiana. Que la xente mozo escriba n’asturianu afita nel tiempu y na hestoria la supervivencia de la llingua llariega del país.

El Garrapiellu quier agradecer a tolos participantes que tomaren parte n’esta edición, igualmente presta-y al Garrapiellu agradecer a los miembros del xuráu l’esfuerciu pol pocu tiempo que tuvieron pa lleer les obres participantes.

Güei, xueves 27 d’ochobre Suburbia Ediciones va celebrar la presentación del llibru “El sitema débeme un chocolatina” de Pablo X. Suárez. Un actu que va convertise nun recital poéticu cola presencia del propiu autor xunto a Laura Marcos, Sofía Castañón, Rubén d’Areñes y Sergio G. Camblor, amás d’una sesión musical.

L’actu va tener llugar nel chigre La Caja Negra d’Uviéu, asitiáu nel 12 de la Cai Xesús, de magar les ocho y media la tarde.

Ta abiertu’l plazu pa presentar obres a una edición nueva del Concursu de cuentos curtios n’asturianu p’adultos del Conceyu de Cangas del Narcea. Como vien siendo habitual, cunta con dos estayes, una pa testos n’asturianu estándar y otra pa testos na variedá occidental del asturianu, caúna d’elles premiada con 500 euros.

Tolos trabayos han presentase por cuatriplicao, ensin pasar de les venti fueyes en DIN A4 a espaciu doble, baxo nomatu y axuntando plica dientro. Too ello ha unviase al Serviciu de Normalización L.lingüística del Conceyu Cangas, La Plaza la Oliva, s/n, 33800 Cangas del Narcea. El plazu pa entregar los trabayos acaba’l 21 de payares.

Bases completes del concursu