Lliteratura

La VIII Edición del Concursu de Microrrelatos Mineros Manuel Nevado Madrid foi convocada pola Fundación Juan Muñiz Zapico en setiembre de 2011, recibiéndose 161 microrrellatos. El que ye l’únicu concursu del mundu dedicáu al tema mineru tuvo como ganador a la valenciana Elia Dembilio Mezquita con “Luz de emergencia”. L’Accésit Asturianu foi pa Gabino Busto Hevia por “Chamiceruca”. Amás, fízose Mención Especial n’asturianu a Ánxel Nava por dos microrrellatos, “El Castiellete” y “El penitente”, y una mozá, Beatriz Fernández Álvarez, recibió un accésit por otru rellatu n’asturianu.

L’Accésit Mozu (menos de 26 años) foi pa “Una ilusión, un desaliento” d’Ana Rodríguez Suárez, de catorce años. Y l’Accésit Testimoniu Hestóricu pal navarru Jesús Jiménez Reinaldo por “Una misión pedagógica”.

La calidá de los microrrelatos presentaos foi resaltada pol xuráu per aciu la mención, nes sos respectives categoríes, a otros 9 microrrellatos. Hubo dos menciones especiales a Testimoniu Hestóricu, a Alberto González Llames per “Días de lance”, a Amparo Pérez Iglesias por “Una fosa al lado de la carretera” y a Almudena Bustamante Anibarro por “El sonido del miedo”. Mención Especial Moza a Beatriz Fernández Álvarez por “Lo que la mina unce”, tamién n’asturianu. A lo último, ficiéronse Menciones Especiales en castellán a Inmaculada Solís Mora por “Seda para un niño minero”, a David Sánchez Jiménez por “Minero”, a Francisco Vila Guillén por “Rescate” y a Ulyses Villanueva Tomás por “Sinfonía”.

El xuráu tuvo compuestu pol catedráticu de lliteratura Benigno Delmiro Coto, presidente del mesmu, xunto al escritor Xulio Arbesú, Ana Alonso Cabrera, Secretaria de Muyer y Cultura de CCOO d’Asturies, Marcelino Álvarez, Presidente del CMPA, y la periodista Matu Fernández.

Llei n’Asturnews los rellatos n’asturianu premiaos na convocatoria

L’escritor Xulio Arbesú ye, según anuncia de la editorial, el ganador del Premiu de Narraciones Trabe 2011 cola novela titulada Eternu negociu.

El xuráu, formáu por M.ª Antonia Pedregal Montés, Antón García, Inaciu Iglesias y Esther Prieto, destaca nella l’espléndidu trazu de los personaxes nuna hestoria divertida y realista, escrita nun asturianu pulidu, áxil y puru.

Ediciones Trabe saca’l númberu 3 d’Estoyu. Revista de Llibros, dedicada nesta ocasión a la lliteratura asturiana fecha por muyeres.

La espublización, fecha col enfotu de dar a conocer los llibros editaos n’Asturies, en cualquiera de les sos llingües, va disdribuyise, como siempres, de baldre. Amás, pue atopase en formatu PDF na web y nel blogue d’Ediciones Trabe.

Descarga la revista de baldre

La edición de 2011 del premiu Los Bilordios de Pinón de l’Asociación de Vecinos San Esteban de Sograndio ganólu na so categoría d’asturianu’l rellatu “1962”, del escritor xixonés Quique Faes.

Na categoría de xuvenil y infantil, el premiu foi compartíu por Mara Blanco y Isabel Pardo, pol rellatu “Un cuentu rarísimu”.

Na categoría en castellán ganaron Miguel Sánchez, con “Cosas” na categoría d’adultos; y “Capitel”, de María Zamarreño, na categoría de xuvenil. Diote tamién un accésit al rellatu “Amor de padre muerto”, de la escritora Dolores Marín.

El xuráu taba formáu por José Alba, Roberto González-Quevedo, Carlos Osoro, Idoya Rey, Liliana Blanco, Nacho Fonseca y Iván G. Fernández.

L’Asociación Cultural Xeira ta acabante convocar la edición d’esti añu del Premiu de Narraciones Curties en gallego-asturianu, con una dotación de 600 euros, pal rellatu ganador, qu’ha axustase a lo afitao en “Normas Ortográficas del gallego-asturiano (Secretaría Llingüística del Navia-Eo, ALLA, 2007)”.

Pue participase con obres de tema llibre, qu’han mandase por cuadruplicáu a l’Asociación Cultural Xeira (Apartáu de Correos 5, A Caridá) pol sistema de plica, hasta’l 23 de payares.

Ente los ganadores de pasaes ediciones apaecen autores como Manuel García Galano, José Manuel Martínez Castro, Fredo de Carbexe, Xaviel Vilareyo, Aurora García Rivas, Alba González Fernández o María José Fraga.

Hasta’l 15 d’avientu pueden presentase rellatos de tema navidiegu al concursu convocáu por Buscolu.com, páxina de noticies del oriente asturianu. Al certame pueden presentase obres n’asturianu o en castellán, con una estensión máxima de 10 páxines. La hestoria ha guardar rellación cola Navidá, tando abiertu’l concursu a persones de cualesquier edá y nacionalidá.

Los rellatos a concursu nun tienen de ser inéditos, pero nun pueden tener ganao nengún premiu lliterariu previu. Si’l relatu ganara dalgún premiu mientres el tiempu de duración del concursu, l’autor tendrá d’indicalo unviando un corréu lletrónicu por que’l relatu seya retiráu del concursu.

El premiu va consistir nuna cena pa 2 persones en dalgún de los patrocinadores de la páxina. La participación nel concursu supón la cesión de los drechos d’autor de los rellatos escoyíos. Los relatos van unviase en formatu d’archivu .doc, .rtf o .txt a buscolu@gmail.com, col asuntu “Concursu de Rellatos”.

Nel corréu ha figurar un nomatu y una dirección de corréu de contactu.

Na primer edición d’esti concursu, celebrada en 2010, la ganadora foi la xixonesa Gemma María Ortiz col rellatu “Las mejores Navidades”.

El Club Cultural Xeitu del Monte Occidental Asturlleonés peracaba estos díes la grabación d’un discu n’homenaxe al recordáu escritor pal.luezu Melchor Rodríguez Cosmen. La organización, que trabaya na defensa de la variedá pal.lueza del asturianu, falada nos montes asturlleoneses suroccidentales, quier celebrar asina’l centenariu de la so nacencia.

Ñacíu en Madrid anque natural de L.laciana y L.leitariegos, Melchor Rodríguez Cosmen foi un conocíu estimulador cultural del monte ástur-lleonesa, como recuerden dende Xeitu.

El discu que prepara Xeitu va recoyer pieces de folclore grabaes fai más de veinte años ya interpretaes por el mesmu Rodríguez Cosmen con curdión, panderu, pandereta y birimbáu, preséu esti postreru del que foi auténticu maestru. Tamién van apaecer poesíes na variedá pal.lueza recitaes pol mesmu autor y otres de la so autoría, delles inédites, lleíes por dalgunos de los más conocíos autores y divulgadores d’esta variante del dominiu llingüísticu asturlleonés.

Ente ellos, amás del so sobrín José Ramón Blanco, tán Roberto González-Quevedo, Emilce Núñez, Guadalupe Lorenzana, Manuel Gancedo, Eduardo Carbajo, Severiano Álvarez y Rita García. El discu, que va apaecer en próximes selmanes, va incluyir un cuadernín con notes sobre l’autor y toles poesíes lleíes xunto con testos y semeyes.

Una editorial nueva ta acabante ñacer. Llámase Ediciones Seronda y apaez nel mercáu con trés llibros nuevos. “Rumbo a la Historia. Navíos emblemáticos de todos los tiempos”, que ye’l primer volume d’una colección divulgativa, con testos de Francisco Álvarez y dibuxos de Guillermo Liroz.

Amás, con distribución estatala, va sacase al mercáu el poemariu billingüe “El Paséu-El Paseo”, de Miguel Rojo. A estos dos llibros súmase tamién “Mañana saldrá el sol”, una biografía del entrenador Manuel Preciado, firmada polos periodistes Carlos Llamas y Javier Barrio.

El salón d’actos de Vieyu Institutu Xovellanos de Xixón acueye esti vienres la presentación del llibru “¡Rómpese un tonel!”, un percorríu pela hestoria de les espiches en Xixón, con collaboraciones d’escritores y dibuxantes de sonadía. L’actu va entamara les siete y media la tarde cola presencia de dalgunos d’ellos. El llibru espublízalu l’asociación de vecinos de Vega (Xixón), pa financiar les sos actividaes.

Nel llibru apaecen testos ya ilustraciones de Carlos Antuña, Mabel Alvarez Lavandera, Melquiades Álvarez, Xuacu Amieva, Ladislao de Arriba, José Arias, Xesús Cañedo, Jose María Díaz Bardales, Reyes Díaz, Alfonso Álvarez Canteli, Cándido Gonzalez Carnero, Josefina Junco. Rafael Loredo Coste, Pablo Maojo, Pedro Martino, Ángel Mato, Miguel Mingotes, Javier Morán, Alfonso Pelaez, Luis Miguel PIñera, Jose Luis Rendueles, Julio Rodriguez, Lola Salvador Maldonado, Covadonga Valdés Moré, Rubén Vega y Nuria Villemur.

La Biblioteca Pública de Navelgas sirvió d’espaciu pa la presentación de “Palabres sin dicir”, el llibru primeru de la moza Cristina Menéndez Martín, qu’asoleyó Suburbia Ediciones. La presentación del poemariu , de calter intimista, cuntó con perbona asistencia del públicu, que pudo sentir na voz de l’autora los poemes colos que debuta nes llibreríes asturianes.