Lliteratura

Ediciones Trabe xúbese al mundu del llibru lletrónicu ufiertando a los llectores cuatro obres n’asturianu y de baldre pa la llectura n’Ipad, Iphone, ereader, etc. Los títulos son, la novela “Güelu Ismail”, d’Esther Prieto, premiu Xosefa Xovellanos nel 2001; “Cuentos rusos”, nuna torna de Cesáreo García Fernández; “El dr. Jekyll y mr. Hyde”, de R. L. Stevenson, con torna de Xuan Bello; y “La vuelta al mundu n’ochenta díes”, de Jules Verne, traducíu y con notes de Xesús González Rato.

Otres iniciatives, cuasi siempres particulares, yá llevaren al llibru n’asturianu a la rede, pero esta ye la primer vegada na qu’una editorial pasa al mercáu dixital dalgunes de les sos obres nesti idioma.

Páxina pa la descarga de llibros de Trabe

“L’Home les caparines”, de Blanca Inés Fernández Quintana, resultó ganador d’una mención especial del V Concursu Lliterariu de Rellatos Curtios de la Fundación Cultural Asturias de la UXT, nel que ganó José Ramón García Franco col testu en castellán “Cuando dejamos de ser hombres”.

Esti vienres 20 de xineru, a les ocho la tarde, el CSOA “La Madreña”, instaláu nel edificiu que fuera sede de la Conseyería de Bientar Social, na cai Xeneral Elorza d’Uviéu, va acoyer una charra del escritor Miguel Rodriguez Monteavaro sobre’l gallego-asturianu, titualada “A fala del occidente asturiano”. Una hora más tarde, Ana Vega, Miguel R. Monteavaro, Iván de Cazarón, Pablo X. Suárez, Andresín de Bual, Moises Cima y Xuan Naveiras van celebrar una “timba poétika” nes mesmes instalaciones.

Conocióse yá’l determín del xuráu del IX Concursu de cuentos curtios pa persones adultes del Conceyu Cangas, qu’añalmente vien convocando esti conceyu del occidente asturianu.

Nel xuráu tuvieron presentes persones venceyaes a facetes estremaes de la nuesa cultura, ente elles: Elena Martínez Martínez, escritora canguesa reconocida en dellos certámenes d’ámbitu autonómicu y estatal; Rosa Caballero Martínez, responsable del Aria de Mocedá del Conceyu Cangas; Natalia Fernández García, maestra d’asturianu, y Mónica Rodríguez Riesgo, responsable del Serviciu de Normalización L.lingüística del Conceyu Cangas.

Los escoyíos ente los 17 cuentos presentaos a esta edición del 2012, na que ye de sobrayar la calidá de los trabayos presentaos, especialmente na categoría d’estándar, fueron Marisa López Diz y el so cuentu “Arrecendor d’azahar” y Pablo Rodríguez Medina por “Estraños conocíos”.

Toño Martínez mozu hestoriador y profesor de ciencias sociales ta acabante facese col III Premiu d’Ensayu Emilio Trabanco Trabanco, que cunta con una dotación de 1.500 euros, pol trabayu “Noreña y la Sidra. Apuntes sobre la hestoria sidrera d’un conceyu asturianu”, que cuntó col sofitu unánime del xuráu. L’autr yá espublizare nel pasáu trabayos en N’AST. Cartafueyos d’ensayu y n’Erada. Revista d’Historia Contemporanea, amás de collaborar n’otres publicaciones como la revista La Sidra o Infoasturies, con testos de calter periodísticu. La so primer obra foi “Exiliu asturianu (1937-1939)”, una investigación rigurosa y novedosa sobre la primer dómina del exiliu asturianu, dende la so formación cola salida d’Asturies hasta la conformación del denomáu “exiliu permanente”, qu’editó Espublizastur.

El xuráu, compuestu por David M. Rivas (presidente), Antón Fuertes, Inaciu Hevia Llavona y Antonio Fernández Álvarez, alcordó por unanimidá otorgar el Premiu Emilio Trabanco a Antonio Martínez Fernández pola so obra “Noreña y la sidra. Apuntes sobre la hestoria sidrera d’un conceyu asturianu”.

Arriendes d’ello, el xuráu valoró perpositivamente la calidá del restu de trabayos presentaos (cinco, dos n’asturianu y trés en castellán) y confirma, según espliquen dende la organización “que cada vuelta hai mayor nivel nes obres que se presenten a esti premiu qu’algama yá la so tercer edición”.

En pallabres del autor:”Noreña y la Sidra” tien un oxetivu primeru, el d’emponderar una industria escaecida nel conceyu, la de la sidra, que tuvo un pesu relevante na hestoria de Noreña y que, polo xeneral,o nun se tien en cuenta o trátase de forma anecdótica n’obres xenerales sobre’l conceyu”.

El Premiu d’Ensayu “Emilio Trabanco Trabanco” ye una iniciativa puesta en marcha pola revista La Sidra, espublización con dellos años d’esperiencia nel sector sidreru. Grupu Trabanco patrocina esti gallardón, col que se contribúi al estudiu y espardimientu de toos aquellos temes que definen la cultura de la sidra n’Asturies.

Los estudiantes universitarios matriculaos nel presente curso académicu na Universidá d’Uviéu van poder presentar los sos trabayos nes modalidaes de rellatu curtiu y poesía. La Universidá d’Uviéu acaba de convocar la segunda edición del Concursu Lliterariu entamáu dende’l Vicerrectoráu d’Estensión Universitaria, Cultura y Deportes. L’oxetivu ye fomentar la creación lliteraria ente los estudiantes universitarios, que van poder allegar na doble modalidá de rellatu curtiu y poesía, pudiendo presentar obres n’asturianu y en castellán.

El concursu ta dirixíu a los alumnos matriculaos nel cursu académicu 2011/12 n’enseñances oficiales impartíes en centros propios de la Universidá d’Uviéu. Cada concursante va poder presentar una única obra indistintamente, en castellán o asturianu, per cada modalidá. Los trabayos presentaos, de tema llibre, tendrán de ser orixinales ya inéditos, nun pueden tar publicaos total o parcialmente por cualesquier procedimientu impresu o lletrónicu, nin tienen de ser premiaos n’otru certame lliterariu antes de la proclamación del fallu. Los comenenciudos tienen un plazu de tres meses pa presentar los trabayos.

http://www.asturias.es/bopa/2011/12/28/2011-24408.pdf

Esti próximu xueves, día 12 de xineru, el Club de La Nueva España en Xixón tien programada la presentación del nonu númberu de la revista «Formientu», na que van intervenir, ente otros, el director de la publicación, Inaciu Galán, xunto con Laura Marcos y Benxa Pérez, del conseyu de redacción de «Formientu». L’actu va servir pa despidir a los autores de más edá, que pasen yá la edá máxima pa espublizar na revista, puesta agora nel añu 1980, como fecha mínima de nacencia.

Xareos! Xestión Cultural espubliza un númberu nuevu de la revista de lliteratura “mui” moza, Formientu, que cumplió 5 años apocayá, con dos númberos añales saliendo al mercáu lliterariu dende 2006. Los responsables de la revista espliquen como “dempués de cinco años llegaba’l momentu de dicir adiós a dalgunos de los sos collaboradores, qu’entamaron siendo bien mozos y que tienen yá encadarmada una carrera lliteraria, con premios y volúmenes propios nel mercáu en munchos casos”, polo que nesti númberu va poder oyese per última vegada nesta publicación la voz d’autores como Pablo Rodríguez Medina, Ricardo Candás o José Ángel Gayol.

Dende’l númberu viniente, el 10, namás van poder espublizar testos los autores ñacíos dende 1980 n’adelantre, tarazando cinco años la edá máxima permitida pa la publicación nesta revista sotitulada de lliteratura “mui moza”.

El númberu 9 apurre amás otra novedá al llector. Estrénase la estaya de crítica, sobre la que na revista esplique “costó, pero por fin, dalgún autor mozu animóse a abrir camín nesta abegosa xera de la crítica y equí ta’l resultáu qu’esperemos que tenga continuidá en númberos próximos”.

A lo llargo d’esti añu Xareos! Xestión Cultural va organizar dellos actos pa celebrar los primeros cinco años d’esistencia de Formientu, que la convierten na revista lliteraria fecha dende la iniciativa privada con más años al llombu d’ente les que s’asoleyen n’asturianu con regularidá.

Nesti númberu apaecen poemes de Pablo Rodríguez Medina, Xurde Fernández, Ricardo Candás y Héctor Pérez Iglesias. Testos narrativos d’Abel Martínez, Jorge Fernández García, Pablo A. Quiroga Prendes, Rubén Rey Menéndez ya Inacio Rodríguez-Solar. Amás de dos crítiques de llibros, feches por Iván Cuevas y José Ángel Gayol sobre «Les últimes pallabres» y «Pequeñu álbum de familia».

Esti sábadu 7, a les 19 na FNAC, va presentase’l llibru “Despidida” de Pablo Antón Marín Estrada, asoleyáu por Suburbia Ediciones.

Pablo Antón Marín Estrada, Sama, Llangréu, 1966. Foi redactor del semanariu Les Noticies y del diariu dixital Asturnews. Collaboró en medios informativos como los diarios El Comercio, La Nueva España y la revista de viaxes Siete Leguas. Ye autor de los volúmenes de poesía Despidida, Suburbia, 2011, Animal estrañu, KRK, 2010,Los baños del Tévere, VTP, 2003,Otra Edá, Trabe, 2000, Un tiempu meyor, Trabe, 1996 y Díes d’inocencia, Trabe, 1992. Como narrador publicó les novelesMientres cai la nueche, Trabe, 2010,La boca puerca, Trabe, 2008, Los caminos ensin fin -Premiu Abril de Narrativa-, Editores Asociados, 2000 y La ciudá encarnada, SPPA, 1995, Ed.Trea, 2009. Ye autor tamién de los llibros de relatos Secretos y dos sombres, Ámbitu, 2005, Nubes negres, Trabe, 1998, Esa lluz que naide nun mata, Trabe, 2005 y Xente d’esti mundu y del otru, Llibros del Pexe, 1992. Dientro la so obra narrativa figuren tamién dos entregues d’un diariu Agua que pasa, VTP, 1995 y Suma y sigue, VTP, 1998. Otres obres publicaes son la pieza teatral Cuando Artur marchó a la isla d’Avalón, Ámbitu, 2004 y l’amuesa de versiones poétiques La maleta de Simbad, Llibros del Pexe, 2001.

En 2003 la editorial Debate dio a estampa la traducción al español de El Amor de La Habana,obra miscelánea que recueye testos narrativos dispersos y publicaos orixinalmente en llingua asturiana. Al llau de la so actividá editorial y periodística, impartió diversos talleres de creación lliteraria y d’animación a la llectura, el más recién n’ochobre de 2011 na Universidad Internacional de Andalucía en Sevilla, dientro los alcuentros Cruce de miradas y embaxo’l títulu Literatura y fotografía, en collaboración col fotógrafu José Manuel Navia.

Na colección de lliteratura infantil Camín de Bree, Suburbia Ediciones axunta esta selmana un nuevu títulu: “Nel circu lusu”, un llibru pa los más pequeños, de la mano de la escritoria Llucía Tejerina y l’ilustrador Marcos Vigo. Nel circu lusu ye la primer aventura (pero de xuru que non la última) protagonizada por Sira, una neña perinquieta, sorriyona ya imaxinativa. Un llibru orientáu a primeros llectores.

Aconceyáu’l xuráu de la XXI edición del Premiu Teodoro Cuesta de Poesía na Casa de Cultura de Mieres del Camín la tarde del llunes 19 d’avientu de 2011, decidió conceder por unanimidá’l Premiu al poemariu tituláu “Testamentu”, presentáu baxo’l seudónimu Truébanu Solitariu, y del que resultó ganador l’escritor Elías Veiga. El Premiu Teodoro Cuesta de Poesía, dotáu con cuatro mil euros, ye’l de más grande prestixu de los que se conceden n’Asturies nel apartáu de poesía, dalgo qu’atestigua la nómina de los sos ganadores, ente los que tán Berta Piñán, Xuan Bello, Llurdes Álvarez o Marta Mori, ente otros munchos.

El xuráu del Premiu Teodoro Cuesta de Poesía tuvo integráu nesta edición por María Antonia Pedregal, directora de la Oficina de Política Llingüística de la Conseyería de Cultura, Jesús Fernández, director de la revista Biblioasturias, Ismael María González Arias, escritor y director de la Casa de Cultura de Mieres, Esther Prieto, escritora, ganadora d’esti premiu na edición de 1998 y responsable d’Ediciones Trabe, y Xuan Bello, escritor, ganador d’esti premiu na edición de 1993. Presidió’l xuráu’l conceyal de cultura del Ayuntamientu de Mieres, Manuel Ángel Álvarez, y actuó como secretaria Anghara Trillo, técnicu superior de cultura de la Casa de Cultura de Mieres; dambos ensin votu.

Tres de la primera ronda de delliberaciones del xuráu pasaron a la siguiente rueda de valoración los poemarios titulaos Testamentu, Destruimientu del xardín y Magaya; resultando tres de la posterior votación, por unanimidá, ganador el poemariu tituláu Testamentu.

Elías Veiga (Presnes, Allande. 1972)

Diplomáu en Biblioteconomía y Documentación pela Universidá de Lleón y encargáu del Archivu de Tinéu de la Casa de Cultura de Navelgas, Elías Veiga venía publicando dellos de los sos poemes en revistes lliteraries como Lliteratura, editada pola Academia de la Llingua Asturiana, pero nel añu 2004 publica’l poemariu La tierra fonda (Trabe), destacando por ser una voz propia que sigue la llinia figurativa de la poesía asturiana de los últimos tiempos.

L’agradececíu golor de la tierra apálpase en La tierra fonda, poemes trazaos en llingua asturiana como sema dende l’occidente y que encierren un secretu y un arume propiu. Posteriormente Robinson astur (Universos) llanzó una botella de salvación en versu a tiempos que yá se presumíen escuros y dafecho crueles; el poemario obtuvo el Premiu de la Crítica de l’Asociación d’Escritores d’Asturies.

Tamién ganó a primeros d’esti mesmu añu 2011 la VIII edición del Concursu de Cuentos Curtios d’Adultos de Cangas del Narcea col cuentu Tierra adientro. Collabora como articulista nel selmanariu Les Noticies y dellos de los sos poemes tán incluyíos nes antoloxíes Escritores en Llanes y Palabres Clares.