Lliteratura

La Fundación Cultural Asturias del sindicatu UXT ta acabante espublizar los dos rellatos ganadores de la edición quinta del so certame lliterariu “Atrévete”. Les obres, una n’asturianu (L’homes les caparines) y otra en castellán (Cuando dejamos de ser hombres), son de Blanca Inés Fernández Quintana y José Ramón García Franco, respeutivamente. El llibru puede descargase de baldre o pidise a la Fundación pa la so versión en papel.

Descarga’l llibru de baldre

L’escritor Xaviel Vilareyo presentará na próxima Xunta d’Escritores Asturianos 2012 un ensayu nuevu, el llibru “Les Asturies y el nacionalismu bascu”. Sedrá’l xueves 1 de marzu a les 19 hores, cuntando cola intervención de Llucía Fernández Marqués, de la editorial Espublizastur.

“Les Asturies y el nacionalismu bascu” ye según la nota de la editorial “una valiente aproximación a la imaxen que se tien de Les Asturies dende la óptica del nacionalismu bascu”. Esti ensayu recibió una Mención Especial nel Premiu Asturies d’Ensayu 2009.

El fallu del VII Concursu de Cartes d’Amor “San Valentín” convocáu pola Asociación Cultural “Valentín Andrés” y el Foru de Creación y Llectura de la Biblioteca de Grau, yá tuvo llugar, el primer premiu, dotáu con 150 euros, foi pa “Camas separadas” presentada col nomatu Tesón y obra de Trini Pestaña Yánez (de Martos, Xaén) , siendo accésit la carta “Tiempo hacia atrás” presentada col nomatu Martín Arranz, perteneciente a a Amando García Nuño (de Madrid).

Díes de mucho, perconocida novela d’Antón García ye la novela más vendida de la literatura asturiana, un llibru imprescindible, y qu’agora llega a la so edición cuarta. Esta novela ganó’l XVIII Premiu «Xosefa de Xovellanos» de 1997, y dende entós vien gozando del favor de tou tipu de llectores, que reconocen nesta obra, escrita nun asturianu lluminosu, una parte de les sos vides.

La hestoria:

De la que regresa a Grandiella depués de venti años, Falín abre la memoria pa recordar l’últimu añu que vivió en pueblu y los acontecimientos tráxicos que-y cambiaron la vida y emburriaron a la so familia a emigrar. Pero aquellos meses de branu a branu tamién tuvieron momentos felices y divertíos, cuando too taba por descubrir y tres amigos inseparables deprendíen a lleer el mapa del universu qu’habitaben. La llegada al pueblu de la prima Rita, una catalana mui distinta a les moces del llugar, diba poner aquel mundu pates arriba.

L’autor:

Antón García (Tuña, 1960) yá ganara’l «Xosefa de Xovellanos» en 1986 cola narración El viaxe. En 2009 publica un breve conxuntu de cuentos, Xente tan cerca. En 2007 xuntó la so poesía nel llibruLa mirada aliella (poesía reunida, 1981-2006), que s’editó n’español nel 2011 col títulu La mirada atenta. Nos dos volúmenes de Xeneraciones y dexeneraciones (2007 y 2011) recoyó bona parte de los sos trabayos sobre lliteratura asturiana. Dirixe la revista asturiana de cultura Campo de los Patos (2011).

Esti doble númberu correspuende a los años 2009 y 2010. Recueye estudios distintos («El Vocabulario asturiano y castellano, coleccionado de la viva voz del pueblo: breve estudio y edición», de Fco. Gago Jover; «Léxico galego-asturiano núas Lecciones de agricultura de 1818», de Xosé M. Suárez; «Vocabulario de eusquerismos en las gergas gremiales de Asturias y del Noroeste de la Península (1)», de Ramón d’Andrés Díaz; «Ámbito del predicado y posición de los pronomes átonos en asturiano», de Taresa Fdez. Lorences; «La dialectometría y su aplicación en el estudio de las variedades del catalán», de María Pilar Perea; «Ily/*Nur y Cerecotes. Dos notas críticas sobre onomástica y reconstrucción de prelenguas», d’Eduardo Blasco Ferrer; «Unde habita la melancolía. Miradas sobre el romance eonaviego», de Raúl González González. Complétase’l volume con delles notes, reseñes, una crónica y una necrolóxica d’Emilio Barriuso.

Asturies tuvo una producción de 789 títulos espublizaos en 2011 ente olos formatos (dixital y papel). D’ellos, 103, alredor del 13% del total, espublizáronse n’asturianu. Esti datu supón una xuba del 151% con respectu al añu 2010, cuando s’editaron 41 obres n’asturianu y a 2009, cuando fueron 64 los llibros emprentaos nesta llingua.

En cuantes a los datos globales, ensin dixebra de llingua, la xuba foi del 10’7% con respectu a 2010, cuando s’espublizaron 704, dempués de los 808 de 2009.

Nel estáu español espublizáronse en 2011 un total de 97.211 llibros, el 79% (81.825) en castellán, 10.910 en catalán (un 11% del total estatal), en gallegu, 1.855 (2%) y en vascu, 1.442 (1%), n’otres llingües el total foi de 5.866, un 6% del total.

Nun situación de normalidá llingüística, y en comparanza col país más cercanu, Galicia, Asturies había espublizar unos 618 llibros n’asturianu cada añu, pa qu’estos fueran proporcionales por habitantes col país vecín.

Suburbia Ediciones ta acabante asoleyar el númberu 2 de la so colección “Quemando cromo” col llibru “Cuando ensamen les abeyes”, una novela d’hestoria-ficción escrita pol mozu escritor Nicolás Bardio. La editorial califica la obra como “una novela orixinal dientro d’un xéneru que nun ye habitual na narrativa asturiana”.

Con un estilu amenu y directu l’autor conduznos a principios del sieglu XX cuando l’Imperiu asturianu s’alcuentra en plenu procesu de destrucción, Santo Olaya, una de les sos últimes colonies llucha pola so independencia. Nesi ambiente d’intrigues polítiques, violencia ya traiciones, un grupu d’aventureros asturianos busquen un míticu tesoru.

L’equipu xixonés Unión Club Ceares acaba d’abrir el plazu pal so primer concursu de rellatos futboleros. Una convocatoria na que pueden presentase testos n’asturianu y en castellán y que titulen “Ente llínies”. La estensión másima de los relatos ye de cinco fueyes, pudiendo mandase hasta’l 20 d’abril a Estadiu de La Cruz, Carretera La Pola, e/n, 33209, Xixón, Asturies. Ente los premios, “un paxu futboleru-cultural”, incluyendo ente otres coses más: una suscripción a la revista Panenka, llibros, una camiseta y una bufanda del Unión Club Ceares, y un carné de simpatizante del club pa la temporada 2012-2013, asoleyándose tamién un llibru colos trés premiaos.

BASES DEL PRIMER CONCURSU DE RELATU CURTIU “ENTE LLINIES”

1. Pueden participar nesti concursu tolos aficionaos al fútbol que quieran, acullá del so orixe o l’equipu al qu’animen.

2. Pueden optar al mesmu les obres orixinales y inédites en llingua castellana o asturiana y que nun se premiaran n’otros certámenes.

3. La temática de les obres ye llibre, cola condición única de que’l relatu tenga della relación col fútbol. Esta relación puede dir dende ser l’exe principal de la narración hasta apaecer de manera anecdótica en dalgún de los pasaxes del relatu.

4. El relatu ha tener una estensión nin inferior a cinco fueyes nin superior a diez. Tien que se presentar mecanografiáu, con lletra Times New Roman (o asemeyada), tamañu 12, interlliniáu 1,5 y cuatro copies del mesmu. Cada autor namás puede unviar un relatu.

5. Los trabayos presentaos tienen que llevar nel espaciu’l remitente del sobre un alcuñu envede’l nome real. Dientro del sobre tien que s’incluir al empar otru sobre zarráu colos datos del autor: nome, señes, teléfonu de contactu, alcuñu usáu y títulu del relatu. Los orixinales tienen que se mandar a: Estadiu de La Cruz, Carretera La Pola, s/n, 33209, Xixón, Asturies, España. La fecha máxima pa la recepción d’orixinales ye’l 20 d’abril del 2012, aceptándose inclusive los unviaos nesa mesma data.

6. El xuráu fórmenlu cinco persones venceyaes de dalguna manera al mundu lliterariu y futbolísticu, y con conocimientos reconocíos nesos ámbitos.

7. La decisión del xuráu nun puede recurrise.

8. Van concedese trés premios, ensin orde xerárquicu. Los premios van consistir nun paxu futboleru-cultural, incluyendo ente otres coses más: una suscripción a la revista Panenka, llibros, una camiseta y una bufanda del Unicón Club Ceares, y un carné de simpatizante del club pa la temporada 2012-2013. Amás, los relatos ganadores van editase nun llibru, entregándose a los premiaos exemplares del mesmu.

9. El xuráu va facer pública la so decisión el 18 de Mayu del 2012. Esta data podría cambiase, con avisu previu, por mor de circunstancies del club.

10. El fechu de participar nesti Concursu implica aceptar estes Bases. Toles incidencies que nun figuren nestes Bases va resolveles la organización en pro del Concursu.

La revista N’ast, Cartafueyos d’Ensayu, llega al so númberu 7. Na mesma recuéyense’l testu del “Manifiestu pola Documentación Hestórica Asturiana Espoliada”, una iniciativa de la propia asociación sofitada por otros ocho colectivos, y dos entrevistes feches a miembros de l’asociación cultural: la primera a Daniel Cueli, direutor de la revista, y la segunda a Javier Cubero, responsable d’organización de N’Ast, dambes espublizaes enantes n’ASTURNEWS. Ente los artículos d’ensayu trabayos dedicaos a la hestoria, la sociollingüística, la ciencia o la etnografía.

Collaboren con esti sétimu númberu Carlos Blanco, con un artículu sobre Asturies vista a la lluz de los plantegamientos d’Oswald Spengler; Xuan Porta, con un trabayu sobre l’osu na cultura asturiana; Inaciu Galán, qu’analiza’l papel de les llingües indíxenes y del castellán nos procesos d’independencia d’América del Sur; Xaviel Vilareyo, que torna tamién a les páxines de la revista con un trabayu toponímicu; Isaac G. de la Arada, que vuelve a asoleyar un artículu de calter eminentemente científicu: un averamientu a los procesos d’almacenamientu d’hidróxenu; y Eduardo Abad, con un trabayu etnográficu sobre la fragua de Fonteta (Allande). Por último, pieslla esti númberu de los cartafueyos el pregón de la XII Fiesta de la Oficialidá de la Llingua Asturiana, del añu 2008, dau por Xuanxo Mariño.

Aquelles persones interesaes en mercar la revista pueden facelo nel llar social de l’Asociación Cultural N’Ast (cai Decanu Prendes Pando, 11, baxu – Xixón), pidiéndola al traviés del corréu lletrónicu (nast.oficialida@gmail.com) o, dientro d’unos pocos díes, nes llibreríes Ojanguren y Cervantes (Uviéu) y Paradiso (Xixón).

Uviéu tornará acoyer una nueva edición de la Xunta d’Escritores Asturianos que tendrá llugar los díes 1, 2 y 5 de marzu na Biblioteca del Campu San Francisco. Conferencies, ponencies, debates, alderiques y presentaciones de llibros sedrán una vegada más los conteníos d’esta nueva Xunta d’Escritores qu’esti añu faise col títulu de “Lliteratura asturiana y Oficialidá”. La convocatoria ta abierta a tolos escritores interesaos en participar coles sos propuestes al traviés de la dirección xuntadescritores@wanadoo.es

El primer actu de la Xunta d’Escritores Asturianos sedrá la presentación del llibru “Lliteratura asturiana, identidá y nación” que recueye les actes coles ponencies de la Xunta d’Escritores Asturianos 2010 que tuvo llugar en Villa Madalena en xineru del 2010.