Lliteratura

Esti añu la Vagamar va desarrollase en dos partes, la primera en xunetu y la segunda en setiembre. Ésta última va tener como exa central les muyeres escritores d’Asturies. N’ella va analizase’l so pesu na lliteratura asturiana nun progama qu’incluyirá espacios de debate, presentaciones, recitales y otros actos que se sucederán del 19 al 22 de setiembre nel Centru de Cultura Antiguu Institutu de Xixón. Amás de la Vagamar, dientro de la estaya Rolda la organización anuncia que ta diseñándose un programa que s’abrirá al empiezu de mayu y qu’amás “l’actividá de L’Arribada 2012 llegará tamién al occidente del país”.

La Sociedá d’Humanitarios de Samartín abre otru añu más el plazu pa presentase al concursu de monólogos Pepe Campo, un certame que premia obres en prosa y en versu y que se convirtió colos años n’amuesa de lo más nuevo del monólogu asturianu. El premiu ye de 600 euros teniendo de tratar un tema d’actualidá social, política o cultural. L’actu d’entrega del Premiu, que llega a la so edición nona, va formar parte de les VI Xornaes Culturales dedicaes a l’alcordanza de Joaquín Rodríguez Muñiz, que se celebrarán nel mes de xunetu.

El llargor de los trabayos tendrá de ser d’un máximo de cinco folios, en prosa, o ente 150 y 250 versos. El plazu d’entrega de los monólogos fina’l 14 d’abril de 2012 y tienen que se mandar a: HUMANITARIOS DE SAMARTÍN, apartáu correos 8, 33670 – Morea (Ayer-Asturies). Cada trabayu tien que dir nun sobre zarráu, ensin remite, col orixinal y trés copies, y amás, dientro’l sobre habrá otru sobre onde se conseñen los datos del concursante.

Ente los ganadores d’otres ediciones tán Carlos Alba Cellero, Inaciu Galán, José Antonio de Dios o Benxa Pérez.

Bases completes del concursu

La editorial Tarabe asoleya “Memorial del monstruu”, la obra ganadora del Premiu «Montesín» de Lliteratura Xuvenil 2010, convocáu por esta empresa editora asturiana. Esta ye la hestoria de maese Buciellos, cazador de cuélebres, y del so ayudante Antón. Entrambos los dos han d’enfrentase al mal n’estáu puru, al so pasáu el más vieyu y a un futuru inciertu el más mozu.

Al acabu la so vida, un flaire benedictín atopa nuna tronza de carbayu que sofita la so cama y que contaba vacia cuatro resmes de papel, de les que yá nun tenía alcordanza, que narren –de so mano moza– los fechos asocedíos na ivernada del 1729. Nunca nun tuviera –confiesa– tan cerca del mal como naquellos díes, nos qu’un cuélebre escomanáu andaba faciendo les d’elli pel occidente d’Asturies.

Suburbia Ediciones, na so apuesta pola lliteratura de calidá y por dar voz a autores poco conocíos, asoleya’l númberu 9 de la so colección de poesía males tierres, Los nomes de la lluvia, poemariu d’Ana Rosa Fernández. Anque la autora nun ye una autora novel, pues tien asoleyaos poemes en delles antoloxíes y algamó más d’un premiu lliterariu, sí ye una voz poco conocida nel panorama de la poesía asturiana.

Los nomes de la lluvia ye una muestra más de la calidá y fondura de la poesía fecha n’asturianu y más concretamente de la poesía fecha por muyeres en llingua asturiana. Los nomes de la lluvia ye un poemariu maduru, íntimu, que fala del pasu’l tiempu, les ilusiones perdíes, les espectatives rotes… Too ello ilustrao poles semeyes d’Ana Jambrina Huete.

Ana Rosa Fernández (Sotrondiu, 1965) ganó en 2002 el premiu Esperanza Spínola pol poemariu (en castellano) El peso de la luz. Apaez n’antoloxíes y en llibros colectivos como Antología de poesía española actual. Al aire nuevo o La mina que nun cierra.

¡Echa la llingua a placer! de la escritora noreñense Mónica Álvarez Viña foi’l mensaxe escoyíu pol xuráu del III Concursu Lliterariu ‘Demuestra’l to amor pola llingua’ de Xunta Moza.

L’actu celebráu Centru Social Autoxestionáu La Madreña cuntó con un conciertu de K-Nalón y celebróse coincidiendo cola selmana del Día Internacional de la Llingua Materna.

L’escritor ayerán Ánxel Álvarez Llano va abrir la Xunta d’Escritores Asturianos 2012 el próximu xueves 1 de marzu na Biblioteca d’El Campu San Francisco d’Uviéu con una ponencia titulada “A la solombra del Surdimientu”. La comunicación tendrá llugar a partir de les 16,30 hores y tará abiertu a la posterior participación y diálogu col públicu. Les xornaes lliteraries d’esti añu tán dedicaes a la Oficialidá y desarrollaránse tamién nos díes 2 y 5 de marzu. Ánxel Álvarez Llano (Boo, 1958) pertenez a la Segunda Xeneración del Surdimientu (1955-1966) y recientemente publicó’l poemariu tituláu “Ensin salir de casa”.

Programa completu d’actividaes de les Xornaes

L’agrupación de Siero d’Izquierda Xunida convoca esti concursu nel que pueden participar tolos interesaos con rellatos n’asturianu o en castellán venceyaos con aspeutos sociales o políticos. Los rellatos pueden presentase en formatu dixital hasta’l 28 de marzu. Hai dos premios, unu de 600 euros y otru de 300.

Bases completes del concursu

La Xunta d’Escritores Asturianos 2012 entamará’l próximu xueves 1 de marzu cola presentación del llibru “Lliteratura asturiana, identidá y nación”, llibru d’actes que recueye les ponencies y disertaciones llevaes alantre na anterior Xunta d’Escritores Asturianos,celebrada nel palaciu de Villa Madalena en 2010.

La Xunta d’Escritores Asturianos tendrá continuación nos díes 2 y 5 de marzu con ponencies, conferencies y presentaciones lliteraries na Sala de la Biblioteca del Campu San Francisco d’Uviéu. Dellos autores participaron colos sos escritos nesti llibru que reflexa los aspectos llingüísticos ya identitarios que surden al rodiu del conceptu de nación que se reflexen na estaya ensayística, narrativa o poética y qu’afecten al procesu de creación o inspiración lliteraria en tolos xéneros y l’actitú del escritor ante la realidá identitaria o nacional que lu arrodia.

La presentación del llibru “Lliteratura asturiana, identidá y nación” tendrá llugar el próximu xueves 1 de narzu a les 16 hores na Biblioteca del Campu San Francisco d’Uviéu a cargu de Llucía Fernández Marqués y de Xaviel Vilareyo.

El cantante y compositor lleonés Amancio Prada foi nomáu Patronu d’Honor de la Fundación Aula de les Metáfores, según alcuerdu unánime adoptáu na última xunta del Patronatu de la Fundación. El nomamientu foi yá aceptáu con emoción pol mesmu autor que manifestó’l so prestu y agradecimientu pol mesmu, la so implicación con esti proyectu dende los sos oríxenes, según la so presencia pa oficializar dicha distinción na ceremonia que, pa celebrar los ocho años de vida de l’Aula, va tener llugar na Capiella de los Dolores de Grau, el próximu 29 de febreru a los ocho la tarde.

Ediciones Trabe tien abierta la so “maratón de microrrellatos” al traviés de facebook o del blogue (http://edicionestrabe.blogspot.com/). Los escritos, sobre la crisis económica qu’apodera’l mundu d’anguaño y les posibles maneres de dexala p’atrás, nun han tener más de 250 caracteres y han dir firmaos col nome y apellíos de quien escribe y acompañaos de un corréu lletrónicu y un númberu de teléfonu onde poder contactar.

El plazu p’apurrir de manera telemática (en facebook o nel blogue de Trabe) los orixinales entama acaba a les 24:00 hores del día 29 de febreru de 2012. Ediciones Trabe acuta’l derechu de seleccionar los relatos que más-y presten y editar con ellos un llibru comunal y plural, en formatu dixital, que va quedar colgáu na so páxina web.

Asina mesmo, Ediciones Trabe acuta’l derechu a decidir el PVP del ebook, xenerador de derechos d’autoría.

Perfil de Trabe en Facebook