Hestoria

El plazu d’inscripción pa matriculase nel seminariu “Teoría e historia de los nacionalismos” que se va celebrar na Facultá d’Historia del 3 al 6 d’abril ta abiertu hasta’l prósimu 14 de marzu. La mesma fecha caltiense abierta pa presentar comunicaciones nestes xornaes qu’organiza’l Conceyu d’Hestoriadores Mozos d’Asturies.

Les comunicaciones ya inscripciones pueden facese na Facultá d’Historia d’Uviéu o contactando cola siguiente dirección de corréu electrónicu: xornaeshistoria@yahoo.es

Los investigadores Álvaro Ruíz de la Peña y Elena de Lorenzo son los autores de la edición crítica d’un nuevu tomu de les obres completetes de Gaspar Melchor de Xovellanos que recueye los sos Escritos Asturianos. Nel volume agora publicáu recuéyense tolos testos escritos pol ilustráu xixonés dedicaos a la cultura, la llingua y la realidá d’Asturies.

La edición crítica de les obres completes de Xovellanos, entamada en 1984 pol fallecíu profesor José Miguel Caso González, reemprende con “Escritos asturianos” el so procesu de publicación, que va completar los sos quince tomos nel añu 2008. Xunto al InstitutU Feijoo d’Estudios del Sieglu XVIII y al Ayuntamientu de Xixón intervién agora la editorial asturiana KRK Ediciones.

El trabayu d’Elena de Lorenzo y Álvaro Ruiz de la Peña, los responsables del estudiu actual, viose nesti casu favorecíu pol forzosu retrasu na edición de les Obras, ya que pudieron ncorporar testos que nin el propiu José Caso llegó a conocer.

Con esti son ya ocho los tomos de les obres completes de Xovellanos publicaos dientro la nueva colección. La obra va completase con otru tomu que recueye escritos del ilustráu que pola so diversidá temática meriten un volúmen independiente, y coles separates d’índices onomásticos.

L’Ayuntamientu de Mieres presentará esta tarde nel Ateneu de Turón la reedición de la obra del turones Diego Suárez Corvín, titulada “Historia del Maestre último que fue de Montesa…” y que narra les batalles d’Orán nes que participó l’autor, amás de como militar, como cronista. Hasta agora la obra, escrites a finales del sieglu XVII, permanecía nos archivos de la Biblioteca Nacional, siendo mui considerada polos críticos pola veracidá y el valor de les descripciones de la campaña militar en tierra africana.

Suárez Corvín, militar, poeta y historiador nacíu n’Urbies en 1521, nun llego a ver la so obra publicada pesie a los esfuerzos que fixo pa ello. Pero, dos sieglos depues de la so muerte, sería editada en Madrid con entamu de F. Guillen Robles, embaxo’ll títulu “Historia del maestro último que fue de Montesa y su hermano D. Felipe de Borja. La manera como gobernaron las memorables plazas de Orán y Marzaelquivir, reinos de Tremecen y Túnez, en África, siendo allí capitanes generales, uno en pos del otro, como aquí se narra”.

Cuatrocientos años más tarde de que fuere escrita, ye recuperada por Miguel Ángel de Bulnes, qu’esta tarde va participar na presentación del llibru na Biblioteca de Turón.

La Fundación Municipal de Cultura del conceyu de Siero edita un llibru nel que recueye l’importante llabor de Fausto Vigil como promotor de la recuperación llingüística y de les tradiciones asturianes, asina como’l so trabayu como folclorista al llau de persones como Martínez Torner o Alas Pumariño.

Fausto Vigil (La Pola, 1873) formó parte d’un grupu d’intelectuales y eruditos que, dende finales del sieglu XIX y primeros del XX, se dedicaron a la recuperación de la llingua, les costumes y el folclore asturianu. Ente aquelles personalidaes taben Alas Pumariño, Melquiades Álvarez, Benito Álvarez Buylla, Martínez Torner y Aldeflor.

A lo llargo de la so vida Vigil desendolcó una obra como lliteratu, que firmaba col nomatu d’”Ego”, y como folclorista, na que trató de recuperar les tradiciones de La Pola Siero, estudiando’l teatru popular, les fiestes, el traxe típicu y dalgunes costumes tradicionales. Xunta Eduardo Martínez Torner y Ramón Menendez Pidal participó nos trabos de recopilación de la música traidicional y el romanceru.

Vigil foi miembru de númberu del Institutu d’Estudios Asturianos, nel qu’ingresó col discursu tituláu “El Alferazgo y los Alfereces Mayores de Siero”. Parte de la so poesía foi recoyida na llibrería facsimilar de l’Academia de la Llingua Asturiana.

Una decena de colectivos sociales y culturales y les asociaciones de vecinos del vai de Turón xúntense nuna iniciativa cola que quieren recuperar de la memoria hestórica a una serie de personaxes que d’una manera o d’otra destacaron poles sos vides al serviciu de la comunidá. Líderes obreros o ciudadanos comprometíos coles meyores o la cultura del vai tán ente los nomes propuestos al conceyu de Mieres pa la so recuperación.

La práctica totalidá de les asociaciones del Vai de Turón respaldan la iniciativa que pretende “poner fin al abandonu de la desmemoria” y “escomenzar a reconocer el trabayu, el compromisu y la trayectoria personal de dalgunos de los nuestros ciudadanos a lo llargo de la historia recié d’esti pueblu”, afirma l’escritu empobináu al Ayuntamientu. Pa les asociaciones “la ciudadanía del Vai de Turón caracterizóse pola so capacidá de trabayu, organización colectiva y compromisu alrodiu valores como la xusticia social o la meyora de la calidá de vida nesti territoriu”. Los colectivos sumaos a la iniciativa afirmen que nesi sen “va siendo hora reconozamos non namás con palabres sinón tamién con dellos xestos, decisiones cencielles pero con un importante significáu”. Ente elles enmárcase la de solicitar al conceyu de Mieres que “ponga en marcha un procesu de recuperación de la memoria colectiva que nos permita algamar esti oxetivu de forma plural y xenerosa”. Nun primer pasu, van proponer a l’administración local una iniciativa que permita reordenar dalgunos espacios urbanos reconociendo la trayectoria y el compromisu de dellos de los turoneses exemplares, una propuesta que permita agradecer esti compromisu dando el so nombe a calles y espacios públicos.

Los nomes propuestos son los de Manuel d’Eduviges, dirixente socialista y mineru, que foi alcalde de Mieres en 1916. Ceferino Álvarez Rey, ye otru de los nomes propuestos, destacáu militante comunista, participó na revolución d’ochobre del 34 y después esilióse a Francia, onde vivió vinculáu a les actividaes del Partíu Comunista. Miguel Olivar, personaxe implicáu en múltiples iniciatives populares de Turón, ente elles el Club Deportivu Turón y la Sociedá de Festeyos, tamién ta ente los nomes propuestos pa la so recuperación. El médicu José María Rodríguez Hevia, fundador del colectivu “Mejoras del valle” y Sabino Fernández del Viso, entamador de diverses empreses locales en defensa de la zona y editor de la publicación “Ecos del Valle”, son los otros nomes d’esta llista pa que se remembren pol so compromisu cívicu.

Las organizaciones del Valle han elegido un momento oportuno, en estos momentos se están desarrollando obras e inversiones que van a recuperar partes importantes del espacio urbano al mismo tiempo que permitirán poner en marcha nuevos equipamientos. Además, en los últimos meses también han concluido algunas obras que han contribuido a generar nuevas áreas urbanas.

Inaciu Iglesias, empresariu, editor y estudiosu de la identidá asturiana, ufierta nel so últimu llibru “Historia del nacionalismu asturianu” una visión particular de la nacencia y desenvolvimientu nel tiempu de los elementos comunes que conformaron el nuestru país. Pal autor d’esti trabayu, fueron les instituciones polítiques, independientemente del so debilitamientu o solidez en cada dómina, les que caltuvieron la entidá nacional d’Asturies. La otra tesis de la obra ye qu’una tradición de pensamientu ilustráu y los movimientos culturales consolidaron na época contemporánea el nacionalismu que llega a los nuestros díes.

El llibru del editor de “Les Noticies” y autor d’otros trabayos como “La identidá asturiana”, tenta ser perenriba de too: “un llibru divulgativu, que quier contribuir a un mayor conocimientu d’una hestoria que non siempre se conoz y d’esa ignorancia puede que se despliquen munchos de los erros del nacionalismu contemporáneu”, afirma Inaciu Iglesias. Los oríxenes de la actual identidá asturiana coinciden na tesis d’esta obra colos oríxenes políticos d’Asturies como reinu. Pa Iglesias “les instituciones de gobiernu que tuvo Asturies son les que, unes veces d’una manera más firme, otres más débil, caltuvieron la unidá del país y el sentimientu de pertenencia a la comunidá”. Nesi sen “Historia del nacionalismu asturianu” ta estructurada en capítulos que definen les distintes categoríes qu’Asturies tuvo a lo llargo de la hestoria: “El reinu”, “El reinu en Lleón”, “El Principáu”, “La provincia” y “L’autonomía”.

Otru de los motores del desenvolvimientu de la identidá asturiana y la causa principal de qu’anguaño esista un movimientu políticu nacionalista, al empar qu’un movimientu cultural y creativu con puxu importante

, ye pal autor d’esti ensayu “la esistencia y continuidá del tiempu d’elementos intelectuales, casi siempre asitiaos na vanguardia del pensmaientu de la so época, nos sectores más ilustraos, y que teníen al so país y la so cultura como esmoliciones propies: del Beatu de Liébana, pasando por Xovellanos y el restu d’ilustraos, a los intelectuales y creadores actuales en llingua asturiana sigue esa tradición”.

Preguntáu poles causes que ficieron a Asturies na dómina contemporánea a siguir un destin estremáu al d’otres comunidaes nacionales del estáu qu’afitaron importantes movimientos políticos d’ámbitu propiu, l’autor de “Historia del nacionalismu asturianu”(Ámbitu,2005), afirma que “equí desenvolvióse otru movimientu políticu popular qu’impidió l’afitamientu d’alternatives nacionalistes, y esi foi el movimientu obreru, dalgo que llegó a la época actual y na transición na que sigue apostándose per esa vía y namás en dómines mui reciente, nos últimos tiempos vese un ciertu enclín asturianista en partíos como Izquierda Xunida o la esistencia d’un sector pequeñu nel mesmu PSOE”. En cuantes a la fragmentación del nacionalismu asturianu anguañu y la so falta de relevancia social Iglesias caltién que “la razón ye qu’en toos esos años hubo xente que paecía más preocupada por restar que por sumar y a les mesmes organizaciones preferíen proponer les sos alternatives unitaries si otres se sumaben a elles y non tentando sumar ente toes”. Hai otru factor a xuiciu del autor de “La identida asturiana” y ye el de “la xente, ente los políticos nacionalistes nun hai xente como sí lo hai n’otros ámbitos con éxitu como’l de la cultura, que se dediquen al so llabor con tol empeñu, l’ambición y la dedicación profesional cola que se dediquen al suyu escritores, músicos, artistes, los resultaos tamién tán ehí:mientres munchos de los segundos tan algamando ya ésitos considerables, el nacionalismu asturianu va de fracasu en fracasu”.

L’Atenéu Obreru de Xixón emprima mañana cola inauguración de la esposición “Las sombras de la memoria” les actividaes programaes en remembranza de les víctimes del campu d’esterminiu de Mauthaussen. Ente les actividaes programaes ta un viaxe al güei muséu del holocaustu pa participar nel actu d’aniversariu de la lliberación del campu polos aliaos, que per primer vez tendrá respaldu institucional del gobiernu asturianu cola presencia del director xeneral de Cooperación Rafael Palacios. Mauthaussen foi ún de los campos onde más republicanos españoles fueron esterminaos, ente ellos cientos d’asturianos.

La esposición que va poder contemplase dende esti viernes 29 n’adelantre nel Muséu Barjola de Xixón ye obra del fotoperiodista asturianu Pedro Timón Solinís presenta una amuesa de fotografíes hestóriques sobre l’holocaustu, que tenten ufiertar el marcu referencial de la videoinstalación cola que se complementen, un montaxe nel que los visitantes participen cola proyección de la so propia sombra sobre les imáxenes visualizaes.La videoinstalación consiste, específicamente, na proyección d’un DVD, editáu con diferentes imáxenes tanto fixes (fotografíes y dibuxos) como en formatu orixinal de vídeo y cine (16mm y Super8) y soníu alusivu al tema (grabaciones de discursos de políticos y militares relacionaos col tema y entrevistes a supervivientes españoles o familiares de los mesmos). Destamiente entamaráse un recorríu al través de la sala que provocará la proyección de la propia sombra del espectador sobre les pantalles repartíes en diferentes planos. Esti recorríu conducirá al visitante a altravesar les teles colgaes (pantalles) y asina alcontrase cola gran fotografía en color de María Cueto, vilda del deportáu asturianu en Mauthausen Víctor Cueto, que simboliza la memoria real.

Les actividaes del Atenéu Obreru pa remebrar el 60 Aniversariu de la Lliberación de Mauthaussen siguen esti miércoles 4 de mayu, a les 20.00 hores,nel Centru de Cultura Antigu Institutu de Xixón cola conferencia “Los españoles en los campos nazis. El genocidio, los testigos y la memoria”, a cargu del hestoriador Benito Bermejo. Una ofrenda floral énte’l momenumentu a los deportaos asturianos nos campos nazis na Sienda del Cervigón nel meudía del sábado 14 de mayu, valdrá pa roblar l’homenaxe.

Los actos de remembranza de la lliberación del campu d’esterminiu de Mauthaussen que se celebren tolos añós el primer domingu de mayu van cuntar nesta ocasión con una representación institucional del Gobiernu d’Asturies. L’Axencia Asturiana de Cooperación sofita asina una iniciativa del Atenéu Obreru de Xixón y l’asociación de fotoperiodismu Cread cola que se tenta rendir homenaxe a la memoria de los cientos de prisioneros republicanos asesinaos polos nazis nesti campu de concentración asitiáu en territoriu austriacu.

Un viaxe dende Asturies p’acudir a los actos de remembranza que se van entamar en Mauthaussen los díes 7 y 8 de mayu y diverses activaes como una esposición de fotografíes sobre’l campu d’esterminiu, una videoconferencia del hestoriador Benito Bermejo y una instalación artística nel Muséu Barjola de Xixón, igüen esta iniciativa del Atenéu Obreru y l’asociación que xunta a los fotoperiodistes de la nuestra comunidá pa recordar la memoria de los cientos de republicanos asturianos que pasaron pelos barracones del campu de prisioneros al caer en manes de los nacis tres la invasión de Francia poles tropes de Hitler.

El fotógrafu Pedro Timón, un de los promotores d’esta conmemoranza, afirma que con ella, tanto l’Atenéu como l’asociación de reporteros de la que forma parte, tenten “contribuir a pechar una delda cola memoria d’eses víctimes”, un entamu, que nel so casu particular como autor d’abondos trabayos gráficos sobre Mauthaussen, “supón amás del interés que pudiera representar pa mi como fotoperiodista, un compromisu ideolóxicu y moral”.

Per primera vez el gobiernu del Principáu, al través de l’Axencia Asturiana de Cooperación de la Conseyería de Xusticia y Esteriores, va tar presente xunta les representaciones institucionales d’otros gobiernos autonómicos nesta conmemoranza añal de la lliberación del campu poles tropes aliaes.

En ochobre de 1937 soldaos de les Brigades Navarres qu’avanzaben dende l’oriente d’Asturies pa bastiar les últimes posiciones del frente republicanu fusilaron a un grupu de trabayadores del Hospital Psiquiátricu d’Uviéu, treslladáu mientres la guerra, al llugar del monesteriu de Valdediós. Esa ye la base sobre la que constrúi Marta Capín la so novela “El Valle de Dios”, una crónica d’aquellos fechos remanecida de la información que l’autora foi recopilando al través de los datos obteníos na investigación de la fosa común onde foron enterraes les víctimes y que narra la hestoria al través d’una d’elles, l’enfermeru Antonio Piedrafita.La novela preséntase esti miércoles 6 nel Fnac de Sieru.

El fusilamientu de personal civil del Hospital Psiquiátricu d’Uviéu nel so allugamientu mientres la guerra civil en Valdediós sufrió a lo llargo d’abondos años la ocultación y l’olvidu. Hasta la escavación de la fosa común onde foron enterraes les víctimes en xunetu de 2003 corrieron sobre estos fechos toa clase de lliendes y versiones. La escavación del enterramientu y la investigación de datos documentales referíos al sucesu ufierten güei información bastante pa saber qué pasó ellí y quienes foron los protagonistes d’esta traxedia. Marta Capín, miembro de l’asociación ‘Asturias por la memoria’, quiso relatar esa hestoria escaecida y agora recuperada en “El Valle de Dios”, una novela na que tolos fechos narraos básense no sucedío na realidá.

Capín declaró a Asturnews que la so esperiencia nel procesu d’investigación de la fuesa común de Valdediós ta nel orixen fundamental d’esti llibru col que “quier dexar constancia escrita, amás de la que ya esiste agora nos datos consiguíos pola escavación, d’unos fechos que sucedieron y nun pueden permanecer nel olvidu”. L’autora de “El Valle de Dios” afirma que “podía haber narrao la hestoria de caún y caúna de les once muyeres y seis homes enterraos na fuesa, dalgo materialmente difícil, de manera que centreme na hestoria d’una de les víctimes, l’enfermeru Antonio Piedrafita

pa reconstruir una hestoria que foi la de toos esos homes y muyeres”. Na presentación de la novela va acompañar a Marta Capín un fíu del enfermeru protagonista del so relatu y del qu’apaecieron los restos na fuesa común, xunta los del restu de víctimes identificaes.

Alrodiu de les distintes versiones que circularon sobre estos sucesos l’autora de “El Valle de Dios”, afirma que “colos datos de los que disponemos al través de los resultaos de los estudios forenses, documentales y testimoniales, güei podemos saber lo que realmente pasó”. Capín remembra qu’al empiezu de la investigación de “Asturias por la memoria” vecinos de la zona aseguraben a los investigadores que la masacre de Valdediós yera “una llienda”, tamién circuló una versión escabrosa de los fechos según la cuala delles de les muyeres asesinaes pudieran haber sufrío agresiones sexuales o tortures enantes del fusilamientu, colos datos que güei se conocen, afirma Marta Capín que “nun se correspuende cola realidá de lo sucedío, nin foi una llienda nin ocurrieron esos otros supuestos fechos, foi un fusilamientu y l’asesinatu fríu d’unes persones”. L’autora de la novela recuerda qu’apocayá de salir en prensa un de los reportaxes sobre la escavación de la fuesa una de les persones que participaron nel fusilamientu púnxose en contactu cola so asociación y col fíu del enfermeru Antonio Piedrafita pa relatar cómo se produxo la execución de los trabayadores sanitarios. Otru testigu, malpenes un nenu n’ochobre de 1937, vecín del llugar corroboró la versión del antigu militar.

Marta Capín amuésase satisfecha de que llograran averiguar lo sucedío y poder idenficar los diecisiete cuerpos enterraos na fuesa de Valdediós “inda esti ye un llabor mui poco satisfactoriu, frustrante poles enormes dificultaes qu’entraña y les numberoses trabes coles que se topa cualquier que quiera investigar sobre la guerra civil y la represión posterior”. Los intentos de recuperar la memoria hestórica entamaos nos últimos tiempos son vistos por l’autora de la novela como “dalgo esperanzadores, pero inda se percibe una gran rocea a remover esi pasáu, tovía significa muncho en determinaos sectores y pa bien de persones con significación pública que prefieren qu’esto siga tapecío porque los toca mui de cerca”. Noveles como la suya o los trabayos d’investigación de foses comunes, pueden contribuir “a que les xeneraciones desconocedores de lo sucedío na guerra civil y sobre too na postguerra puedan tener información de dalgo que sucedió nun hai tanto equí”. Respective a les cifres aprosimaes de víctimes de la represión n’Asturies, Marta Capín nun s’atreve a conseñar un númberu: “tenemos cálculos aprosimaos, pero diben ser siempre insuficientes porque desconocemos el númberu y l’allugamientu de bien de fueses comunes y el total de les víctimes, munches non rexistraes nin reclamaes polos sos familiares, pero n’Asturies hai foses nes qu’hai cientos d’enterraos, como la del cementeriu d’Uviéu, onde hai alrodiu de mil cuerpos, por eso ye arriesgao falar de cifres, siempre díbamos quedar curtios”.

Llangréu acueye dende esta selmana una serie d’actos en remembranza de los guerrilleros asturianos que llucharon en monte contra la dictadura franquista. Conferencies, proyecciones de vídeos, una esposición fotográfica y un homenaxe públicu a la memoria de los fugaos igüen el programa d’esta selmana organizada en Llangréu pol Partíu Comunista d’Asturies, les Mocedaes Comunistes d’Asturies y el colectivu Ochobre del 34, nel que tamién va haber una alcordanza pa la figura de Dolores Ibárruri ‘Pasionaria’.

Recuperar la memoria d’unos homes que llucharon pola llibertá y contra’l réxime de Franco, pagando un preciu bien altu por ello, ye’l propósitu d’esta selmana cultural cola que los comunistes asturianos quieren contribuir a pagar esta delda hestórica colos guerrilleros del monte. Persiguíos implacablemente poles fuerces de represión de la dictadura hasta’l so aniquilamientu físicu, silenciaos después y borraos de la hestoria mientres duró’l réxime contra’l que llucharon, escaecíos o consideraos una parte incómoda del pasáu de les organizaciones onde militaron años después, en plena transición, ye esti el primer homenaxe xeneral que reciben los fugaos asturianos.

Les actividaes d’esta Selmana Cultural entamen esti llunes 4 cola inauguranza de la esposición fotográfica “PCE y guerrilla”, que va tar abierta hasta’l 16 d’abril na Casa Cultura de Sama. El llunes 11 l’hestoriador David Ruíz va pronunciar una conferencia titulada xenéricamente “La guerrilla asturiana” nel mesmu centru cultural llangreanu. El 14 d’abril, Día de la República, los organizadores d’esta Selmana van rendir homenaxe a Dolores Ibárruri ‘Pasionaria’ énte’l so monumentu asitiáu enfrente la estación d’autobuses de La Felguera. El viernes 15 proyectaránse na Casa Cultura de Sama los mediometraxes “Estratexa” y “De Lafuente” de Ramón Lluis Bande, nos que se recueye’l testimoniu vivu del guerrilleru Manolín de Llorío y de Pilar Delafuente, la hermana de la mítica lluchadora de la revolución del 34 Aida Delafuente.

Les actividaes d’esta Selmana Cultural dedicada a la memoria de los homes del monte rematen el sábadu 16 d’abril un calter especialmente emotivu con una marcha dende la Plaza l’Ayuntamientu de Sama hasta l’Altu de Santu Millano, onde foron masacraos un grupu de guerrilleros comunistes nel llugar que güei recuerda el Monumentu a los Caíos pola Llibertá. Mui cerca d’esi llugar en La Teyera va desarrolláse un actu políticu coles intervenciones d’Alejandro López, coordinador d’IX-Llangréu, Alejandro Zapico, secretariu de l’agrupación llangreana del PCA; Jonhatan López, secretariu xeneral de les JCA; Noemí Martín, secretaria xeneral del PCA, y Francisco Frutos, secretariu xeneral PCE. L’actu piesllaráse con una corderada.