Gastronomía

Henrique G. Facuriella, escritor y responsable de la estaya de publicidá nel periódicu asturianu Les Noticies, nun actu organizáu pola Conceyalía de Cultura del Conceyu d’Avilés, dará’l día 2 d’avientu a les 19:00 hores, nel salón d’actos del Palaciu de Valdecarzana d’Avilés una charra titulada “El té: historia, ellaboración y ceremonies”.

Dempués de la charra los asistentes van poder tastiar distintes clases de té. L’actu tará abiertu a toles persones interesaes, hasta que s’enllene’l salón.

El conceyu d’Ayer va celebrar del 6 al 11 d’avientu la decimonovena edición de les sos Xornaes Gastronómiques de la Mantanza, que cunten con gran tradición y que tolos años axunten a un importante númberu de persones nesti conceyu del sur del país.

Van Ser dellos restoranes de Felechosa, los qu’ufierten un contundente menú a base de: pote asturianu con compangu caseru (chorizu, morciella, costiella y llacón), picadiellu y llombu adobáu y pa rematar panchón (postre típicu ayerán fechu con pan d’escanda, mantega y zucre).

El preciu del menú ye de 24 euros y, amás, inclúi café de pote, clin d’oruxu d’arándanos de L’Ayerán, vinu tinto crianza y Agua de Cuevas.

La Estaya de la Llingua del Conceyu d’Avilés y la Federación Xuntanza organicen esti martes, 8 de payares, a les 19,30 hores, nel Palaciu de Valdecarzana una mesa redonda titulada “La cultura de la sidre: un patrimoniu rentable”, cola que los organizadores quieren tratar dende distintos puntos de vista, la rentabilidá de la cultura alrodiu la sidra, “un productu tan de nuesu y que pertenez al patrimoniu asturianu”, afirmen.

L’actu va presentalu y moderalu Germán Glez. Rubín, llagareru artesanal y componente d’Escontra’l Raigañu, cuntando cola participación de Cele Foncueva (Productor de sidra), Elías Carrocera (Director del Muséu de la Sidra), José Antonio Alonso González (Restaurante Jose’s), Miki López, fotoperiodista y autor de la esposición “La cultura de la sidra” (Xefe de fotografía de La Nueva España dende 2010), y Belén Suárez Valles (Responsable Área de Tecnoloxía de los Alimentos, llaboratorio de sidres y derivaos, SERIDA).

La actividá fáise con motivu del programa de la “IX Seronda n’Avilés”. N’acabando l’actu va facese una preba de dellos tipos de sidra.

Más d’un cientu de persones, ente periodistes, llagareros, hosteleros y espertos del mundu de la sidra, participaron el vienres pasáu na primer edición del Salón Internacional de Sidres de Gala, que se celebró nun hotel xixonés y que sirvió pa dar a conocer les sidres de mesa que se tán produciendo nel país y n’otros llugares, yá que tamién se pudieron prebar delles sidres d’Alemaña, Bretaña, República Checa y otros llugares, amás de dellos productos gastronómicos del país. Un actu qu’espera sirvir pa promocionar l’usu de sidres distintes de la natural en xintes y cenes, amás de n’actos oficiales, onde’l vinu foriato y los caves entá siguen siendo los protagonistes.

Los convidaos a esti Salón de les Sidres de Gala yeren recibíos con unos culinos de sidra a la puerta l’hotel onde se celebraba la cena. Darréu pudo vese’l documental ‘Procesual’, onde se ve’l procesu que se lleva a cabu pa facer la sidra asturiana.

Enantes de la cena, el gourmet Serxu Solares dio a prebar un cóctel fechu con sidra y vodca, al que siguió una creación del mesmu autor, “caviar de sidra y una yema falsa con sidra de la Champanera de Villaviciosa”, que pudo prebase yá nes meses, onde a los convidaos-yos esperaben más de 15 variedaes estremaes de sidra.

Sidra axampanao, de nueva espresión, sidra de xelu, oruxu de sidra, crema de sidra… y de caúna d’elles la posibilidá de prebar la de dellos llagares asturianos, y dalgunos d’otros países. Amás, una preba de conserves de gastronomía asturiana, con patés, cebolles rellenes, fabada, callos o quesos, ente otros platos. En caún de les paraes que se facía pa prebar sidres, los propios llagareros y dellos espertos gastronómicos fueron esplicando les característiques de caúna de les bebíes.

L’actu organizábalu la Fundación Asturies XXI y la revista La Sidra en collaboración cola Conseyería d’Agroganadería d’Asturies y la Conceyalía de Cultura de Cultura de Xixón, pola que tuvo Xosé Nel Riesgo como representante, disculpando l’ausencia del conceyal, Carlos Rubiera, por otru actu coincidente nel tiempu. Riesgo recordó’l compromisu del nuevu gobiernu de Xixón y Asturies de llevar la bebida asturiana a los acto oficiales y recordó na so intervención la importancia del sector agroalimentariu na economía asturiana, pesie a que según dixo, “nun se tien puxao por él”.

Intervinó tamién nel actu, Llucía Fernández Marqués, directora de la revista La Sidra y Marcos Abel Fernández, presidente de la Fundación Asturies XXI que pidió que’l compromisu pa cola sidra asturiana del gobiernu actual se faiga realidá con fechos.

La revista La Sidra, en collaboración cola Fundación Asturies XXI y el sofitu del Conceyu de Xixón, de la Fundación Municipal de Cultura y Deportes y de la Conseyería d’Agroalimentación d’Asturies entama la celebración del que sedrá’l I Salón Internacional de les Sidres de Gala, un alcuentru alredor de la sidra non escanciable d’alta calidá, nel qu’estremaes variedaes sidreres y derivaos de la sidara, tanto asturiana como d’otros países, van ser presentaes de mena profesional nel Hotel “Villa de Gijón”.

La sidra brut, l’axampanao, los aguardientes de sidra y la sidra de xelu van tener cabida dientro d’esti Salón. Anque la celebración se centra non escanciable, a la entrada va ufiertase a los asistentes unos culinos de sidra, “a manera de recibimientu y en señal del nuesu respetu pola sidra tradicional”, espliquen los organizadores.

Los organizadores espliquen que l’eventu va tener presencia tamién de sidres d’Alemaña, Gales y Normandía.

L’actividá central va consistir nuna Xornada Técnica, na que se va cellebrar una cena gourmet compuesta por dellos platos. Con cada platu propondráse’l maridaxe con dos sidres, presentaes polos mesmos llagareros. Al empar d’estes 20 marques ufiertaes na cena, el restu sidres van ufiertase, a mena degustación, en meses dimpuestes con esi envís.

Amás, a lo llargo de la xornada proxectaráse’l documental “Procesual” sobre la sidre, comentáu polos sos autores, y van realizase cates guiaes de la sidra participante.

Ta confirmao la presencia nel eventu de representantes institucionales, profesionales del mundu la hostelería, distribuidores, gastrónomos y prensa especializao –amás, llóxicamente, de los mesmos llagareros- procurándose que tea la mayor repercusión posible, tanto a nivel mediáticu comu nel ámbitu de la hostelería.

La presentación oficial del mesmu, a la que va acudir el conceyal de cultura Carlos Rubiera.

La participación nesta xornada Técnica tendrá un costu de 40 € y sedrá necesariamente llimitada siguiéndose un rigurosu orde d’iscripción fasta cumplimentar l’aforu. Pa participar pue contactase pel corréu lletrónicu info@lasidra .as o nel teléfonu 652 594 983.

El gastrónomu asturianu Serxu Solares, espertu nel campu de vinu y creador de dellos caldos d’autor, presentó estos díes n’Agropec, el que ye’l primer vinu del mundu qu’utiliza una etiqueta ocupada nun 95% por un códigu BIDI O QR y que nun da mas información d’esti que la llegalmente establecida pa la so comercializació, llámase “Implícito”. Ensin un llector d’esti tipu de códigos el veceru nun va poder saber nin siquier si ye tinto, blanco, rosao, o datos fundamentales qu’inflúin na compra.

Unu de los problemes técnicos ye que’l códigu Qr. funcionar en planu y tuvo de ser deformáu p’afaelu a la botella tronconónica del vinu, espliquen. Yá hai delles esperiencies nel mundu del vinu rellacionaes con códigos QR pero per primer vegada un vinu va tar nel mercáu, ensin más información que la llegalmente establecida pola llei pa comercializase. A partir d’ehí pa poder afayar más coses va ser imprescindible que tenga un teléfonu móvil con un llector d’esti tipu de códigos que puede descargase de baldre pa los smartphones.

Col llector de códigos QR el consumidor va aportar a una plataforma virtual que va dir creciendo coles sos esperiencies, un espaciu apináu d’información del vinu, fotografíes, videos, la ficha técnica, información sobre’l procesu d’ellaboración del vinu, de la mesma etiqueta y lo más importante, los comentarios de el consumidores que van poder dir xubiendo col consumu del mesmu. Ensin esti llector el veceru va tener que mercar a palpu, la botella ye negra y polo tanto va ser difícil conocer si ye tinto, blanco o rosao, si tien o non crianza, de qu’añu ye… Ye dicir la información que davezu un consumidor utiliza pa decidise nuna compra.

L’hotel Barceló Uviéu Cervantes va acoyer del xueves 6 al sábadu 8 d’ochobre les I Xornaes Gastronómiques Xaponeses. A lo llargo d’esos trés díes, l’hotel Barceló Uviéu Cervantes, acompañáu y sofitáu pola Asociación Cultural la Brisa del Xapón y pol so presidente Javier López Espinosa, va ufiertar nel so restorán Galatea, un menú de preba formáu por cinco platos colos que pretende recoyese la esencia de la culinaria xaponesa.

Mientres les Xornaes preve l’asistencia y particpación de conocíes personalidaes de la vida cultural, empresarial y política d’Asturies.

L’eventu enmárcase na condición de foru cultural que progresivamente algamó l’hotel Barceló Uviéu Cervantes, según cuenten los sos responsables.

El concursu, que persigue l”aumentar la conocencia y espardimientu de los estreamos aspeutos que conformen la cultura asturiana de la sidra, favoreciendo l’estudiu y la conocencia de la mesma, al empar que s’algama l’aniciu d’un corpus bibliográficu sidreru”, ta dotáu con un premiu de 1.500 euros y la espublización de la obra premiada. El plazu pa presentar obres fina l’1 d’avientu de 2011, tienen que tener una estensión mínima de 65 páxines (TNR12, a doble espaciu) y tar escrites n’asturianu o en castellán.

Dende la organización sorráyase que na primer y segunda edición d’esti premiu pudo adicase comu esta convocatoria vien xenerando una cantidá d’información de gran calidá ya interés”. y que la recoyida de material “de toa triba ” venceyáu al mundu la sidra “ye perimportante a la hora d’evitar perdes inreparables del nuesu padrimoniu cultural, la implicación de profesionales normalmente ayenos al mundiu la sidre permite’l desendolque d’ensayos anovaores qu’aporten idegues nueves y puntos de vista orixinales pa la evolución del alrodiu sidreru”.

Bases completes del concursu

La Casa Cultura de Pión acueye coincidiendo cola so Fiesta Mayor, una esposición de les cuarenta meyores semeyes presentaes al Concursu Semeyes de la revista La Sidra nos dos años últimos. L’amuesa tuvo yá en La Galana, el Llagar El Mancu y La Huerta, pero esta sedrá, según anuncien “una ocasión especial pa los amantes de la sidra y les semeyes”.

Tendráse la oportunidá de ver, per primer vegada a un tiempu, toles semeyes que formaron parte de les esposiciones itinerantes demientres los dos caberos años, lo que nos permitirá comparar y valorar directamente la evolución de les semeyes presentaes a esti concursu.

La esposición, entamada en collaboración cola Asociación de Vecinos El Valle, celebraráse nos llocales de la Casa Cultura de Pión, un allugamientu consideráu pola organización como “perfetu tanto poles sos dimensiones comu pol so allumáu”.

Una disculpa perfecta p’aprofitar el caberu fin de selmana d’agostu y pasar peles folixes d’esti pueblu del Conceyu de Villaviciosa.

La revista La Sidra tuvo presente nel Festival Internacional de la Sidra de Gales. Sidra Buznego, Sidra Alonso, El Piloñu y Champanera de Villaviciosa (Sidra La Real, La Asturiana y Escanciador) acompañaron a la publicación nesti proyectu que quier abrir les fronteres de la nuesa bébora tradiconal.

L’International Craft Cider Festival comparte, según comenten dende la organización la so “visión internacionalizaora de la sidra” y pretende ser un muestrariu, non solo de les estremaes tribes de sidra producíes en países de tol mundiu, sinón tamién de les cultures qu’arrodien la nuesa bébora: música, gastronomía, formes de bebela, tradiciones… Foi un puntu d’alcuentru nel que compartir aquello que mos ye común y esfrutar conociendo lo que mos estrema.

Tamién foi, según espliquen, “una interesante oportunidá de negociu” pal sector la hosterlería y la importación/esportación de sidra, darréu qu’esti festival cunta con una amplia asistencia de representantes d’esti sector que podrán aceder a inforamción sobro sidra y llagares de tol mundu, realizándose importantes contactos comerciales colos que dende La Sidra esperen “reforciar la presencia de la sidre asturaino acullá de les nueses llendes”.