Galerías 2008/2014

La Xunta pola Defensa de la Llingua Asturiana cellebró un añu más la so manifestación del Día de les Lletres cola que demanda’l reconocimientu llegal qu’oficialice esta llingua, equiparando asina los derechos de los falantes d’asturianu colos de los falantes de castellán. La manifestación que, mesmo que n’anteriores convocatories, salió a les siete y media la tarde de la estación de la Renfe d’Uviéu y acabó a les puertes del teatru Filarmónica onde l’Academia de la Llingua Asturiana cellebró’l so actu institucional nel qu’esti añu Manuel García Galano va tomar posesión como Miembru d’Honor.

L’Academia de la Llingua cellebró esti vienres 5 de mayu l’actu central del Día de les Lletres, qu’esti añu tuvo como allugamientu’l Teatru Filarmónica d’UViéu. Arriendes del discursu institucional de la Presidenta de l’Academia de la Llingua Asturiana, l’actu abrióse cola actuación del gaiteru Iñaki Sánchez Santianes y la cantante de tonada Bibiana Sánchez García; y pesllóse col grupu folk DRD.

L’Academia de la Llingua Asturiana, siguiendo’l facer entamáu la edición pasada, fizo un brinde a los asistentes pa que, na midida de les sos posibilidaes, llevaren traxe asturianu de mou qu’ésti puea, pasu ente pasu, dir asitiándose nos actos más solemnes.

La sesión académica pudo siguise en tol mundu en tiempu real al traviés d’Internet, darréu que l’ALLA quiso festexar con Radio Sele’l fechu de llevar 20 años nes ondes, nun inequívocu compromisu cola normalización social de la llingua asturiana.

El Club de Prensa Asturiana de La Nueva España d’Uvieu acoyó’l pasáu miercoles la presentación de la nueva colección ‘Trabe Atlántica’, que presentaba a la vez los sos tres primeros títulos: ‘Aquí me tocó escribir (antología de escritores y escritoras latinos en Nueva York’ de Paquita Suárez Coalla; ‘La formación histórica de la lengua asturiana’ de Xulio Viejo; y ‘La nación (im)posible (Reflexiones sobre la ideología nacionalista asturiana)’ de Pablo San Martín Antuña.

‘Aquí me tocó escribir (antología de escritores y escritoras latinos en Nueva York)’ de Paquita Suárez Coalla, axunta catorce escritores que, anque son estremaos nes temátiques y estilos de les sos obres, comparten una posición fronteriza que según l’autora ‘dio-yos la llibertá d’escribir lo que seguramente nunca escribiríen nos sos países d’orixe’.

L’ampliu y rigurosu estudiu sobre la formación histórica de la llingua asturiana de Xulio Viejo aparez agora n’español, allegando d’esta manera a tol públicu los mecanismos llingüísticos que la tresformaron a lo llargo de los sieglos, a la vez que la dinámica social, económica, política y cultural que sufrió la so comunidá de falantes.

El tercer títulu de la colección correspuende a Pablo San Martín Antuña. ‘La nación (im)posible (Reflexiones sobre la ideología nacionalista asturiana)’ analiza los principales fechos históricos y l’actuación de los protagonistes del nacionalistu asturianu.