Galerías 2008/2014

Redacción.

L’Academia de la Llingua entregó na mañana del vienres 25 de mayu los sos premios 2007 d’investigación, creatividá lliteraria y cine nun actu que tuvo llugar nun centricu hotel de la ciudá d’Uvieu. Na entrega tuvieron la presidente de l’ALLA, Ana Cano, el secretariu de la Institución, Roberto González-Quevedo, l’aylagueru Carlos Lastra, amás de dalgunos premiaos como Marta Lozano Carbajal, Inaciu Galán y González, Miguel Solís Santos, Pablo Suárez García y Pablo Rodríguez Medina ente otros.

Nel ‘Concursu d’investigación de recoyida de material toponímico’ premióse con 600 euros el trabayu ‘Toponimia de la parroquia de La Collá (Siero)’ del que son autores Inaciu Galán y Marta Lozano y diose accesit de 300 euros al trabayu ‘Toponimia de la parroquia de Santiagu d’Aces (Candamu)’ del que son autores Andrea M. Miranda y J. Ignacio Santos Rodríguez. Nesta estaya dieronse tamien dos accesits de 150 a los trabayos ‘Toponimia de La Xungarosa (Aviles)’ del que ye autor Carlos Suari Rodrigue y ‘Toponimia de la parroquia de Tolivia (Llaviana)’ de la que ye autor Xulio Llaneza Fernández. Los concursos de recoyida oral de lexicu y de recoyida de material lliterario oral quedaron ermos nesta edición.

Na investigación llingüística l’Academia premió con 600 euros el trabayu tituláu ‘Diccionariu politecnicu de la llingua asturiana’ de Pablo Suárez García, qu’anunció que trabayaba ‘nun gran diccionariu temáticu pa la nuesa llingua, recoyendo tolos terminos teunicos que necesita l’idioma’. Amás, nesta estaya, l’Academia entregó un accesit de 150 euros al trabayu ‘L’Asturianu, llingua del sieglu XXI’, del que ye autor Xose Arsenio Coto Perez. Nel premiu d’investigación sobre lliteratura asturiana Ramiro González Delgado recibió 600 euros pol trabayu ‘La lliteratura grecollatina en llingua asturiana. Safo nel Surdimientu’.

Nel concursu de Llectures pa Rapazos dióse el premiu de 600 euros a la obra ‘Nosotros, los pexes’ de la que ye autor Miguel Solís Santos. Los premios de novela y teatru llevólos Pablo Rodríguez Medina por ‘Vivir ensin probalo’ y ‘El Santu’ respeutivamente. Quedó ermu’l de curtios cinematográficos.

Nel premiu de recoyida de material lliterario escrito, que lleva’l nome de Federico Fierro G.-Botas dieronse tres accesits, unu de 300 euros pa Xose Lluis Campal por ‘Cinco testos poeticos anónimos del sieglu XIX’ y dos de 150 euros, unu al mesmu autor por ‘Una obra de teatru y delles poesíes espardíes d’Eloy Fernández Caravera’ y otru a Inaciu Galán y González pola recuperación y edición de ‘Nieve en el puerto d’Eladio Verde’ .

Semeyes de la entrega de premios

Redacción.

El Centru Asturianu de Mendoza, en L’Arxentina celebró esti mes de mayu’l Día de les Lletres Asturianes na so sede. Esti añu taba dedicáu a la narrativa y ficieron un actu que consistió nuna llectura de testos d’esti xeneru de la lliteratura asturiana. L’actu tien, según los propios organizadores, “una gran importancia pa los asturianos que viven naquel país” y los organizadores remitieron unes semeyes que güei espublizamos n’ASTURNEWS.COM. Una amuesa de l’asturianía de los nuesos emigraos.

Redacción.

El Salón del Llibru Iberoamericanu, qu’esti añu llega a la so edición númberu diez, termina güei a les 19:00 hores. A lo llargo de la tarde van desenrrollase les últimes actividaes nel Antiguu Institutu de Xixón y en dalgunos colexos del conceyu de Xixón, onde escritores como Luis Sepúlveda o Antonio Sarabia van dar a conocer la so obra.

El vienres dedicáronse dalgunos actos a la lliteratura asturiana. Pela mañana, los poemes d’autores asturianos como Berta Piñán, Humberto González o Armando Vega, impresos sobre tresparencies, tuvieron colgaos delantre na mar, nel paseu de San Llorienzo de Xixón. Na playa, dalgunos de los autores escribieron versos sobre l’arena.

Esi mesmu día pela tarde, nel patiu del Antiguu Institutu Xovellanos de Xixón celebróse un recital poeticu nel que participaron Antón García, Ana Vanessa Gutierrez, Berta Piñán y Pablo Antón Marín Estrada. Zárrase asina una nueva edición del Salón del Llibru Iberoamericanu.