Galerías 2008/2014

Esti domingu, dende les doce la mañana n’adelantre, vecinos de La Collá, en Siero, y la Tertulia Cultural “El Garrapiellu” colocaron el ñacimientu na Ilesia Vieya de San Pedro La Collá. Nel actu hubo tiempu pa los villancicos, la música de la gaita, la danza prima y un discursu de despidida de la presidenta d’El Garrapiellu, Gloria García, que torna a la militancia de base na organización, a favor de Tino Lozano.

Esti vienres pasáu, hacia les ocho la tarde, entamaba na llibrería Alborá Llibros de Xixón, un actu nel que diba celebrase un añu de la espublización del primer númberu de la revista Formientu y la presentación de la web de l’asociación que la edita y que tamién se dedica a la organización d’actuaciones de “Monólogu Modernu”, Xareos!. Nel actu axuntaron dellos de los autores que nestos doce meses espublizaron na revista “de lliteratura mui moza”.

L’actu abriéronlu Inaciu Galán, director de la revista Formientu y Benxa Pérez, miembru del conseyu de redaición. Galán destacó “la importancia de qu’una revista fuera de los organismos públicos y del ámbitu priváu saque trés númberos nun añu y tenga’l ritmu d’actos de Formientu”. Amás quixo destacar “el bon momentu que vive la lliteratura asturiana, con un bon númberu d’escritores mozos dándo-y puxu dende abaxo y preparándose pa convertise nel futuru de la meyor lliteratura asturiana”.

Darréu, presentóse la web www.xareos.com, una web na que Xareos! quier promocionar a los autores más mozos y que según cuntó Inaciu Galán va ser un llugar pa la promoción de los autores de monólogu modernu, pa los que la páxina prepara nuevos espacios pa dientro de bien poco. “La páxina va ser viva y quier axuntar toles noticies rellacionaes colos autores mozos, amás d’una biografía completa de cada autor qu’espubliza con Formientu y una parte d’edición dixital”.

Na web, cuntóse nel actu, recupérase’l conocíu como “Proyeutu Cartelos”, que quier “axuntar tolos cartelos n’asturianu presentes n’Asturies” y pa lo que los responsables de Xareos! pidieron la collaboración de tolos asturianos.

L’actu siguió cola llectura de dalgunos testos per parte de Benxa Pérez, Xabel Cayado, Diego Aldebarán y el propiu Galán, que peslló l’actu lleendo un testu del últimu de los númberos de Formientu, dedicáu a la lliteratura erótica.

Vidios del actu

Páxina web de Xareos!, presentada’l vienres

Esti vienres 30 de payares fina la esposición entamada pola Academia de la Llingua Asturiana y l’Ayuntamientu d’Uvieu, titulada ‘La lliteratura n’asturianu’ nel Café Español d’Uviéu. Nella recuéyense llibros antiguos, dende l’antoloxía de Caveda y Nava de 1839, a les novedaes d’esti añu, ente les que destaquen la edición de La Odisea n’asturianu. Asturnews ufre la posibilidá de visitar esta esposición, dende equí y namás con calcar nel enllaz de la nuesa galería y conoz la esposición en más de 45 semeyes.

La esposición en semeyes