Fiestes

L’Ayuntamientu de Corvera yá tenía liquidada dafechu la foguera de San Xuan en Tresona, la más multitudinaria de les cites celtes asturianes, a lo menos hai dos meses. Un cartafueyu editáu n’abril pola Conseyería de Cultura da anuncia d’una actuación de Fred Morrison y Cántara Folk, el 23 de xunu, nel “prau de la fiesta de Las Vegas”, alternativa qu’asociaciones corveranes albidren que va materializase l’añu qu’entra, si a la fin l’Ayuntamientu retira definitivamente’l so sofitu.

El barruntu de los collectivos ciudadanos -que forzaron ‘in extremis’ la cellebración de la foguera d’esti añu depués de recoyer miles de firmes contra la desapaición del eventu- afítase na pública rocea del equipu de gobiernu llocal encabezáu por Luis Moro (Unión Social y Progresista de Corvera) p’hacia la folixa de Tresona, cuya liquidación defendió Moro dende poco depués de la so llegada a l’alcaldía, hai agora un añu.

Esa visión en negativo de la foguera corverana por parte de los responsables municipales llevó a sustituyila, yá n’abril, por una fiesta de prau en Les Vegues, folixa na qu’actuaría el gaiteru escocés Fred Morrison, cuya contratación yá taba pesllada, según fontes del propiu Ayuntamientu, pa cuando l’equipu de gobiernu amosó a les clares el so determín d’acabar cola foguera de Tresona. La penalización económica prevista nesi contratu en casu d’anulación llevó al equipu de Moro a aceptar l’actuación de Morrison, qu’ensin embargu nun tocaría nel habitual allugamientu de xunta’l pantanu, sinón en Les Vegues.

L’ausencia de compromisos contractuales d’esi tipu pa la foguera del añu prósimu fai temer agora a les asociaciones corveranes que’l pantanu de Tresona vea pasao mañana la foguera cabera, mieu que se xustifica amás nel baxu perfil del cartel d’esti añu respecto a los d’ediciones anteriores: Depués qu’una multitudinaria recoyida de firmes pola continuidá de la folixa obligara al Ayuntamientu a recular a primeros de xunu y aceptar una cellebración ‘amenorgada’ de la fiesta, nesta nueche de San Xuan actuarán en Tresona Fred Morrison, Cántara y Ástura.

Los collectivos ven nesi programa un niciu claru de les boquiaes del sofitu municipal a la folixa, qu’a partir del añu prósimu podría o bien nun se cellebrar, o bien continuar baxo responsabilidá y financiación esclusiva de les asociaciones llocales que defenden la foguera.

Dixebra, Batulax, Llangres y Los Ciquitrinos pondrán los sones de la IV Nueche Celta de Llangréu, dientro d’un programa festivu que s’espardirá tres díes na llocalidá de Ciañu y qu’inclúi una cita col rock de Los Rebeldes, Lunáticos y Bourbon, y un realcuentru col pasáu de la mano de La Década Prodigiosa.

Con un presupuestu de 48.000 euros y xestionaes pola Sociedá de Cultura y Festexos ‘Torre La Quintana’, la folixa de Ciañu arrancará a les 20 hores de pasao mañana, vienres 11, con un pregón a cargu de José Ramón Rodríguez, profesor del Institutu d’Enseñanza Secundaria ‘Santa Bárbara’. Darréu de la llectura, el parque municipal acoyerá a partir de les 22 hores les cuatro actuaciones de la nueche celta.

Al día siguiente, sábadu, el rock garrará’l relevu con un conciertu de Los Rebeldes, Los Lunáticos y Bourbon, depués d’una amuesa de tiru con arcu y una carrera ciclista, mientres que’l grupu encargáu de da-y continuidá a la folixa na nueche’l domingu 13 ye’l veteranu La Década Prodigiosa.

La so actuación, a partir de les 23,30 hores, rematará una xornada dedicada a una concentración de motos clásiques denominada ‘Los leopardos del asfaltu’, y sedrá’l preludiu d’una espicha popular que pesllará’l programa festivu al día siguiente, llunes.

Grafitis, hip-hop y ‘break dance’ tendrán un llugar propiu nes fiestes de San Xuan de Mieres, cuyes actividaes centrales tendrán llugar na segunda quincena de xunu. L’Ayuntamientu ocuparáse amás de les señes d’identidá del conceyu con un homenaxe al malográu cantante de tonada Xuanín de Mieres, fallecíu en 2003, y un alcuentru de vecinos empigraos baxo’l lema “¿Yes de Mieres?”.

Esta iniciativa, denominada pol Conceyu como Primer Alcuentru d’Amistá y Señaldá, cellebraráse’l domingu 20 de xunu y pretende atrayer a la villa a mierenses que viven fuera’l conceyu pero que caltienen vivu el so raigañu. Un día depués, l’Ayuntamientu homenaxeará a Xuanín de Mieres como ún de los mayestros de la tonada asturiana.

El programa festivu de San Xuan complétase con un certame nacional de baille ‘break dance’ y grafitis, qu’inclúi una amuesa d’esta estaya de pintura urbana sobro muries y nel que tienen previsto participar grafiteros d’Asturies, Salamanca y Granada.

Un conciertu a cargu’l grupu de hip-hop RapsusKleyHazhe rematará les actividaes al rodiu’l mundu’l grafiti, que van cellebrase nel Parque Xovellanos el sábadu 18 y el domingu 19 de xunu.

Silenciu alministrativu. Esa ye la respuesta que l’Ayuntamientu de Corvera da pol momentu a los organizadores de la foguera alternativa que va entamase pa cellebrar la nueche de San Xuan xunta l’embalse de Tresona, énte la desapaición de la cita celta más multitudinaria d’Asturies por falta de sofitu municipal. La falta de permisu’l Conceyu fai temer a los grupos qu’entamen la convocatoria que’l conciertu nun puea desencolcase con normalidá.

Según fontes de los músicos que tienen previsto participar na foguera alternativa, los organizadores cuenten yá colos permisos pertinentes de la propiedá privada del prau onde va allugase l’escenariu -el mesmu llugar onde se cellebraba la multitudinaria foguera n’años anteriores, y de la empresa d’ellectricidá de la que va facese l’enganche pa suministrar la enerxía necesaria, pero falta el ‘sí’ del Ayuntamientu.

Pesie a cumplir los trámites llegales necesarios “escrupulosamente”, según los organizadores, los responsables del equipu de gobiernu llocal de Corvera entá nun se pronunciaron a favor de la cellebración del recital, y la so pública rocea pa cola foguera de Tresona, materializada na suspensión de la folixa esti añu y la so sustitución por otra fiesta con orquesta en Les Vegues.

L’Ayuntamientu de Corvera, rexíu dende les pasaes elecciones municipales de 2003 por Luis Moro, cabezaleru de la Unión Social y Progresista de Corvera (USPC), consumó yá la liquidación de la multitudinaria folixa xunta l’embalse de Tresona, que nes sos ediciones más desafortunaes axuntó a una media de 15.000 persones.

El calendariu celta asturianu sufre la so segunda gran perda n’alpenes tres meses. Depués de la desapaición de la Xuntanza Astur de Santu Adrianu na pasada Selmana Santa, l’Ayuntamientu de Corvera suprimirá la foguera de Tresona, que nos sos meyores años llegó aconceyar a 50.000 persones y qu’agora va vese sustituyida por una folixa en Les Vegues amenizada por una orquesta y pol músicu escocés Fred Morrison, que yá taba contratáu polos habituales organizadores de la foguera pa la so malograda edición d’esti añu.

Según confirmaron fontes del propiu Ayuntamientu corveranu, rexíu depués de les elecciones municipales de mayu de 2003 por Luis Moro, cabezaleru de la Unión Social y Progresista de Corvera (USPC), l’equipu de gobiernu llocal yá consumó la liquidación de la multitudinaria folixa xunta l’embalse de Tresona, que nes sos ediciones más desafortunaes axuntó a una media de 15.000 persones y cuya desapaición nun paez obedecer a motivos d’austeridá: Los 18.000 euros con que se venía sufragando la convocatoria celta emplegaránse agora nun eventu alternativu.

Pa evitar la penalización económica que trai consigo la ruptura de contratos yá firmaos, siempre según les fontes municipales consultaes, l’Ayuntamientu caltién l’actuación del escocés Fred Morrison pa la mesma nueche de San Xuan, pero nun allugamientu distintu al contratáu: Un escenariu instaláu xunta la Casa d’Alcuentros de Les Vegues al que al otru día xubiráse una orquesta.

La filosofía del equipu consistorial encabezáu por Luis Moro al respectu de la sustitución de la foguera por una folixa alternativa resúmela, según les mesmes fontes, una frase lliteral cola que miembros del equipu de gobiernu definieron yá hai meses la so concepción idónea de la cellebración de San Xuan: “Una buena danza prima y una orquesta gallega”.

Integrantes de varios grupos folk y rock asiduos de la foguera de Tresona estudien agora responder a la retirada’l sofitu municipal con una cellebración autónoma na medianueche’l 23 de xunu nel mesmu espaciu en que s’entamaba la cita celta corverana, qu’atrayía públicu llegáu a Corvera dende mui estremaos puntos d’Asturies.