Fiestes

L’exitu de públicu y de participantes nos concursos agrícolas que se inxerten na Feria del Campu de Posada algamaron esti domingu de metanes d’agostu les cifres del añu pasáu y axuntaron na localidá llanisca a munchos veraneantes que pudieron disfrutar d’exposiciones de qusos artesanos, productos agrícolas, animales de granxa y otros munchos alicientes festivos.

La tercera edición de la Feria del Campu de Posada algamó un éxitu tanto de participación como de públicu enllenando la plaza de Parres Sobrino y dando-y un aire de cellebración a una xornada que competía cola programación de Sa Roque na Villa de Llanes. Y too ello por mor de les exposiciones y concursos de productos del campu asturianu que podíen contemplase y que diben dende calabaces xigantes que facíen sospirar a los más guah.es, pasando por pareyes de kikos, gochos vietnamites, faisanes, pites, cisnes y un garapiellu de palombes de tolos tipos y clases que prestaben enforma a los neños y a los veraneantes.

La Feria del Campu de Posada entamó hai dos años como continuación d’una xornada tradicional de mercáu na zona nestos domingos d’agostu y ta siendo enforma granible tanto dende un puntu de vista turísticu como dende’l puntu de vista cultural.

Casi 1.300 quilogramos de pólvora pa enllenar el cielu de Xixón de lluz y soníu. La ciudá más populosa d’Asturies prepárase pa vivir el fin de selmana grande de les sos fiestes patronales, que tendrá’l so episodiu central na quema de fueos artificiales, na madrugada’l domingu, y que güei abre na playa de Poniente el guitarrista Raimundo Amador.

El veteranu músicu andaluz sedrá’l segundu focu d’atención de la nueche, depués que la Banda de Gaites Noega ponga n’escena a partir de les 21 hores na Plaza Mayor l’espectáculu ‘Camín a Xixón’, un repasu al repertoriu musical tradicional d’una xornada de fiesta cola gaita como protagonista.

El puntu culminante de la folixa aportará na medianueche del sábadu al domingu, momentu nel que la empresa catalana Pirotecnia Igual activará una secuencia de fueos d’artificiu que va prollongase media hora y que tendrá dos puntos de llanzamientu, ún nel cerru de Santa Catalina y otru nel Camín de La Fontica.

Magar que les previsiones meteorolóxiques falen de nubes altes ensin lluvia pa la nueche’l sábadu, los responsables de la empresa pirotécnica ultimen el montaxe del espectáculu col envís cimeru de contrarrestar posibles corrientes d’aire como les que n’años anteriores cubrieron la playa de San Llorienzu col fumu de los primeros disparos ya impidieron acusbiar la mayoría de los fueos dende’l sable.

La Orquesta de la Televisión Autonómica Gallega amenizará la xornada grande de les fiestes, que si se cumplen los badagüeyos aconceyarán en Xixón a unes 300.000 persones. Pa facilitar la movilidá de toes elles, l’Ayuntamientu fai un llamáu a evitar los desplazamientos en coche, y Renfe habilitará 17 trenes especiales pa los asturianos que s’empobinen a Xixón dende Uviéu y Mieres.

L’intérprete David Civera sedrá l’encargáu de pesllar les cellebraciones, con un recital a partir de les 23 hores del domingu na playa de Poniente. Antes, a les 14 hores, la playa de San Llorienzu acoyerá’l baille de la dancia prima y el restallón que pon fin a les fiestes.

Avilés enfótase n’artistes de popularidá. La intérprete de copla y canción llixero Lolita y el cantante cántabru David Bustamante, catapultáu a la fama tres de la so participación nel programa televisivu ‘Operación Triunfo’, protagonizarán los dos conciertos centrales de les fiestes de San Agustín, que van desendolcase na última selmana d’agostu y qu’inclúin teatru, un concursu de ganao y una nueva edición de la Fiesta de la Cerveza.

El contrapuntu a los recitales de Bustamante -el 26 d’agostu- y Lolita -sábadu 28- pondránlu les bandes llocales AC Soul, Madera Rock y Brecha, que van ufrir un conciertu el miércoles 24 d’agostu nel estadiu municipal Román Suárez Puerta con entrada gratuita.

Esi mesmu día abriráse el X Certame de la Cerveza, que va allugase hasta’l sábadu 28 na plaza de los Hermanos Orbón, y previamente cellebraráse’l campeonatu asturianu de vaca frisona -pabellón de La Madalena, vienres 20-, que se completará con un mercáu de ganao ente los díes 25 y 28 d’agostu.

L’Ayuntamientu d’Avilés, qu’afronta les fiestes de San Agustín con un recorte económicu qu’alluga el presupuestu global de la folixa en poco más de 200.000 euros, integra amás nel programa festivu el XXIV Festival Internacional de Música y Dancia, que se cellebra dende güei hasta’l domingu; unes xornaes teatrales que pesllarán Els Joglars el 3 y 4 de setiembre; y un espaciu dedicáu a los xuegos pa neños, allugáu n’El Quirinal na última selmana d’agostu.

Pravia ponse a remoyu en sidra. La llocalidá del cursu baxu’l ríu Nalón espera recibir güei a más de 4.000 persones na multitudinaria Fiesta’l Xiringüelu, qu’axunta a mozos y mayores nel práu Salcéu y qu’esti añu contará con más d’un cientu de casetes de maera nes que se centraliza la folixa.

Asina, la xornada de güei convertirá les afueres de la villa nuna romería constante regada con milenta caxes de sidra, el mediu conductor pa que’l desenfrenu y la diversión aconceyen nel práu de la fiesta dende primeres hores de la mañana hasta pasaes les 21 hores.

Nesi momentu, gran parte de los asistentes treslládense a la plaza’l Conde de Guadalhorce, onde continúa una folixa cuyu orixe inmediatu remóntase a 1978, cuando s’estableció l’allugamientu de la fiesta en Salcéu. Ente culín y culín, les peñes construyen, a ritmu de gaites y charangues, les casetes que llueu desmonten hasta la prósima edición.

Más de 300.000 persones preparen el so desembarcu en Les Arriondes y Ribesella. Esa ye la cifra d’asistentes que, según les previsiones basaes na afluencia d’años anteriores, aportarán nes prósimes hores a los dos conceyos del oriente pa participar na Fiesta de Les Piragües. Un conciertu de rock abrió ayeri la folixa al rodiu’l 68 Descensu Internacional del Sella, que se cellebra mañana.

Depués del recital d’anueche, nel que tomaron parte les bandes Kaótiko, Desorden y Silencio Absoluto, la folixa quedó oficiosamente abierta a la espera de qu’a les 20 hores de güei se cellebre na plaza l’Ayuntamientu la ceremonia d’apertura de la fiesta.

La preba deportiva, actu central de la fiesta, arrancará al mediudía’l sábadu, depués del tradicional cantu del himnu asturianu, y nella participen nesta ocasión piragüistes d’una decena de clubes de distintos países que recorrerán el ríu hasta la meta allugada na ponte de Ribesella.

Nesta edición, el Descensu Internacional del Sella hermanaráse cola ciudá gallega de Santiago de Compostela, al traviés d’un simbólicu intercambiu d’agües ente los ríos Sella y Sar -que pasa pola capital de Galicia- que se suma a la llista d’actos conmemorativos del Añu Santu Xacobéu.

Xixón busca 3.500 escanciadores. L’Ayuntamientu de la ciudá prepara yá la XIII Fiesta de la Sidra Natural, que va cellebrase l’últimu fin de selmana d’agostu pero cuyu programa ta acabante de perfilar el departamentu municipal de Festexos. Amás d’intentar batir na playa Poniente el récord d’escanciáu simultáneu, allugáu agora en 3.494 persones, el certame sidreru incluyirá una xornada dedicada a los cantares de chigre con participación abierta al públicu.

La folixa empezará’l vienres 27 d’agostu con un mercáu de productos derivaos de la mazana y un concursu d’escanciadores que desembocará nel intentu d’algamar una nueva marca mundial d’escanciáu simultáneu de sidra. L’Ayuntamientu facilitará les primeres 3.495 botelles -una más que les que s’emplegaron l’añu pasáu p’algamar el récord-, pero habilitará un accesu especial pa los participantes qu’acudan cola so propia botella.

Na so segunda xornada, el sábadu 28 d’agostu, la XIII Fiesta de la Sidra Natural centrará les sos actividaes al rodiu de los populares cantares de chigre, que’l públicu asistente podrá interpretar na Plaza Mayor en compaña del Orfeón Xixonés, que tará dirixíu por Carlos José Martínez.

Magar de too ello, el día grande de la folixa sedrá’l domingu 29, xornada na que se servirá sidra de baldre durante cinco hores -de 12 a 14 y de 18 a 21 hores- nos puestos allugaos polos llagares na Plaza Mayor y l’entornu inmediatu de la Plaza’l Marqués. El grupu Trebeyu y la banda de gaites Llariegu protagonizarán l’animación musical a lo llargo de tol día.

Pastores n’oriente, vaqueiros n’occidente, romería nel centru. Asturies calca l’acelerador de les fiestes patronales y de raigón y somórguiase nun fin de selmana plenu de folixa nel qu’estremaes llocalidaes festexen Santa Cristina, Santiago y Santa Ana, con centros d’interés nel repartu de pación de los Picos d’Europa, na braña d’Aristébanu y en Sama Llangréu.

Esta última llocalidá estrena al mediudía de güei les sos fiestes de Santiago, con un pregón a cargu de la conseyera de Presidencia’l Principáu, María José Ramos, y actuaciones previstes de los grupos Iguana Tango (domingu) y de Los Berrones, na nueche’l prósimu llunes.

Na franxa occidental, el conceyu de Tinéu abre güei la ‘pipa’ de les cellebraciones cola primer xornada’l VI Campeonatu Nacional de Batéu d’Oru, que tien llugar en Navelgas, llocalidá qu’a partir de les 22 hores del sábadu acueye la final del V Certame de música folk ‘Cuartu de los Valles’. Na final d’esi concursu actuarán les bandes Nubeira (Pontevedra), Tarañu (Asturies), Feile (Vizcaya), Balbarda (Madrid) y Pintas Bandas Folk (Granada).

L’apoxéu festivu na comarca pondrálu, a lo llargo de tola xornada’l domingu, la multitudinaria romería vaqueira que se cellebra na cercana braña d’Aristébanu, y cuya actividá central ye un enllaz matrimonial acordies colos ritos y los vezos de la comunidá vaqueira.

Nel otru estremu d’Asturies, na Vega d’Enol, los pastores de los Picos d’Europa tienen previsto cellebrar tamién el domingu 25 de xunetu, día de Santiago, la fiesta na que se reparten la pación, nel contestu d’una folixa orixinada hai 65 años qu’inclúi el nomamientu’l Rexidor de Pación, una xinta popular y prebes de deportes tradicionales.

Al marxe de grandes eventos, pequeñes llocalidaes como’l núcleu rural de Yananzanes, nel altu Ayer, lluchen esti añu por mantener vives les sos fiestes patronales de Santa Ana, que se cellebren con romería, procesión, ellaboración de panchón y una tradicional puya’l ramu de pan d’escanda.

El Carmen instálase n’Asturies. Les llocalidaes de Cangas de Narcea, que güei cellebra l’españíu de la ‘Descarga’, y de La Pola Siero, qu’abrió ayeri los sos festexos colos güeyos puestos na romería’l Carmín, prevista pal prósimu llunes, centren los actos folixeros d’un fin de selmana pródigu en fiestes.

Un pregón a cargu de José Antonio Fanjul, polesu emigráu a Chile, abrió ayeri’l programa festivu d’El Carmen en La Pola Siero, que güei cellebra’l Día’l Neñu y pa les dos xornaes del fin de selmana tien previstes sendes verbenes, un concursu d’escanciadores de sidra (tarde’l sábadu) y una amuesa de deporte tradicional (domingu).

Magar de too ello, los polesos tienen yá los güeyos llantaos na popular romería’l Carmín, que’l llunes enllenará d’agua les cais de La Pola depués de la tradicional merienda nos Campos de La Sobatiella, xunta’l mercáu municipal de ganaos, na so edición númberu 309.

Pol contrariu, Cangas de Narcea anticipa a güei, vienres, el so día grande. Una misa solemne precederá al españíu de los miles de volaores que conformen la ‘Descarga’, prevista pa poco depués de les 19 hores y qu’abrirá una nueche de cellebraciones con verbena y fueos d’artificiu.

A la tercer actuación musical de les fiestes, qu’ayeri abrió un pregón del director de Radio Nacional d’España n’Asturies, el periodista Francisco Pañeda, siguirá’l domingu una nueche rock na que subirán a escena los grupos La Vieja Escuela, El Último Tren, Amazing Grace y Bull&Los Búfalos. En Cangas, les fiestes n’honor de la Virxe’l Carmen prollongaránse entá hasta’l sábadu 24 con nueves verbenes y la xira a Santana, el xueves prósimu.

Un conciertu de Nuberu, una gran arrozada popular, un mercáu artesanu y una multitudinaria xinta de corderu a la estaca al aire llibre. Bimenes, cola VIII Fiesta de la Oficialidá, y L.lena y Quirós, que s’hermanen na tradicional Fiesta’l Corderu nel Prau L.lagüezos, abren el calendariu folixeru de los meses centrales del veranu, que s’intensifica nes prósimes selmanes.

No que cinca a les cellebraciones nel conceyu yerbatu, la xornada de güei, sábadu, sedrá la central de la Fiesta de la Oficialidá, que conmemora la primer declaración del asturianu como llingua oficial nel ámbitu municipal, proclamada pol Ayuntamientu en 1997 y anulada depués pol Tribunal Superior de Xusticia d’Asturies.

Les actividaes empezarán cola llectura’l pregón de les fiestes a cargu’l director de la Oficina de Política Llingüística’l Principáu, Ramón d’Andrés, y siguirán con un mercáu d’artesanía y alimentación, a lo llargo de tol día; y una arrozada popular nel prau de la fiesta, pa la que tán a la venta vales de 5 euros. Un conciertu de Nuberu pesllará la xornada a partir de les 21 hores.

Nel Prau L.lagüezos la fiesta cai de domingu. Como cada añu, L.lena y Quirós cellebren una espicha de confraternización na llende ente dambos conceyos, basada na xinta de corderu a la estaca que preparen veteranos asadores y nesta ocasión amenizada pol gaiteru Xuacu Amieva y pol conxuntu de música tradicional La Bandina.

Asturies quema esta medianueche lo vieyo de tou un añu a ritmu de música folk. El gaiteru escocés Fred Morrison, los británicos Flook! y los asturianos Felpeyu, N’Arba y Chus Pedro Suárez pondrán l’embruxu musical nuna nueche de San Xuan marcada pol declive de la multitudinaria cita de Tresona y pola progresiva perda de les pequeñes fogueres de barriu.

Nel casu de la foguera corverana, que venía axuntando a miles de persones a la vera l’embalse de Tresona, la folixa entamará al rodiu de les 22 hores coles actuaciones previstes de Fred Morrison y Jamie McMenemy, Ástura y Cántara Folk, depués d’una prollongada engarradiella ente l’alcaldía del conceyu y les asociaciones cíviques corveranes que se resolvió ‘in extremis’ con una recoyida de firmes qu’obligó al Conceyu a recular na so decisión de suprimir la folixa. Magar d’ello, el baxu perfil del cartel d’esti añu y del númberu de grupos participantes fai pensar, según les asociaciones que defenden la foguera, en que la d’esta nueche pue ser la cabera fiesta de San Xuan en Tresona con sofitu municipal.

Uviéu, pel so llau, centra les actividaes nocherniegues na plaza de la Catedral, con un conciertu de Fred Morrison -que fai doblete- previu a la quema de la foguera y un recital de N’Arba darréu seyan visibles les primeres llaparaes. Na primer de les dos ciudaes más poblaes d’Asturies, Xixón, grupos folclóricos encargaránse del tradicional enramáu de fontes antes de l’actuación que’l veteranu cantante entreguín Chus Pedro Suárez ufrirá a partir de les 23 hores na playa de Poniente.

Tamién na zona central, Llugones revélase como una cita de San Xuan apta pa los siguidores de les cellebraciones tradicionales: Deportes autóctonos y una amuesa de tonada abrirán una tarde que va rematar con un doble conciertu de les bandes Felpeyu y Flook! darréu que se prenda la foguera.

No estrictamente festivo, la conmemoración popular de San Xuan vien marcada esta nueche pola progresiva perda de pequeñes fogueres de barriu que tradicionalmente entamaben y prendíen los vecinos más mozos, declive qu’alcuentra reflexu más ampliu en dalgunos conceyos como Ayer, onde nun hai nenguna convocatoria oficial de foguera pa güei.

Mieres cellebrará San Xuan con un conciertu d’Albertucho y Mojo Project, y Llangréu dexará la iniciativa a les estremaes sociedaes vecinales de Festexos. Avilés prenderá la so foguera nel parque’l Muelle, Castrillón fará lo propio n’Arnao y Piedres Blanques, Gozón acudirá a la playa de La Ribera y Sotu’l Barcu prenderá’l fueu nel puertu de L’Arena. Nel oriente d’Asturies, Ribesella centra les cellebraciones con una foguera de grandes dimensiones, y nel occidente les fogueres espardiránse per tolos conceyos.