Fiestes Más de 8.000 botelles de sidra van riegar la Folixa de Primavera de Mieres by asturnet 30 de marzu, 2006 L’alcalde de Mieres, Luis María García, xunto a la conceyal de Festeyos, Isabel Sánchez y el periodista musical Aurelio Argel, presentaron esti miércoles 29 el cartelu de la Folixa de Primavera que va celebrase na villa’l camín los díes 7, 8 y 9 d’abril. Dos bandes irlandeses: Flook y Mosaic, xunto a dos asturianes: Corquiéu y La Col.lá Propinde encabecen el cartelu d’esta fiesta que van regar con más d’ocho mil botelles de sidra mediu centenar de llagares del país. Jalos, un artista mierense del graffiti ye l’autor del cartelu col que s’anuncia esta Folixa 2006 a la que s’espera acudan cientos de visitantes de toa Asturies y de la mesma cuenca’l Caudal. Música, gastronomía, deportes tradicionales y cultura tradicional en toles sos espresiones van dase cita en Mieres dende la tarde-nueche del prósimu viernes 7 d’abril hasta la madrugada del domingu 9. 30 de marzu, 2006 0 FacebookTwitterPinterestEmail
Fiestes Flook y Corquiéu abren la Folixa de la Primavera de Mieres by asturnet 24 de marzu, 2006 La banda irlandesa Flook y los asturianos Corquiéu van abrir la Folixa de la Primavera de Mieres el prósimu viernes 7 d’abril. Al día siguiente, el sábadu 8, los encargaos de completar el cartelu del festival d’esti añu, van ser La Col.lá Propinde y los irlandeses Alan Kelly & The Mosaic Band . La Folixa va xuntar una primavera más na villa del camín a cientos d’aficionaos a la música folk y al xaréu en xeneral, acompañáu de bones viandes y sidra del añu. Corquiéu y La Col.lá Propinde son dos bandes enforma conocíes y populares del nuevu folk asturianu, entrambes con una puesta n’escena en directu enérxica y perapreciada pol públicu. “Salia” y “Güeria” son los títulos de los más recientes trabayos discográficos de Corquiéu y La Col.lá, respectivamente. Les bandes internacionales presentes nesta Folixa 2006 vienen les dos d’irlanda y con diferentes propuestes estétiques. Flook -que fueron escoyíos recientemente como meyor grupu folk pola BBC- apuesten pol son más tradicional tocáu con savia nuevo y la Mosaic Band d’Alan Kelly combina ritmos populares gaélicos colos soníos del swing, el jazz o la música latina. 24 de marzu, 2006 0 FacebookTwitterPinterestEmail
Fiestes Asturies desfila por segundu añu na Gran Parada de San Patricio en Nueva York by asturnet 17 de marzu, 2006 El conseyeru de Xusticia y Esteriores del Principáu, Francisco Javier García Valledor encabeza la delegación oficial asturiana que va desfilar esti viernes 17 pela Quinta Avenida de Manhattan en Nueva York na Gran Parada del Día de San Patriciu. Ye la segunda ocasión na que’l nuestru país participa na celebración nacional de la comunidá irlandesa. Les bandes de gaites de Corvera y Villa de Xixón formen el gruesu musical de la representación asturiana nel desfile del 17 de marzu, un eventu que paraliza la ciudá de Nueva York dende va más de sieglu y mediu en remembranza del patrón d’Irlanda. Xunto a los músicos y a los representantes institucionales del Principáu acompañen la delegación miembros de la comunidá asturiana emigrada en Nueva York. El conseyeru Valledor asistió, vistíu col traxe tradicional del país, esti xueves 16 a una cena de gala nel Hotel Waldorf Astoria na que tuvieron presentes destacaes personalidaes públiques de la vida neoyorquina. Esti domingu 19 la delegación asturiana va volver desfilar en remembranza de San Patricio peles cais de Nueva Jersey enantes d’entamar el so viaxe de vuelta a Asturies. 17 de marzu, 2006 0 FacebookTwitterPinterestEmail
ConvocatoriesFiestes Bimenes convoca’l so Concursu de Cuentos pola Oficialidá by asturnet 15 de marzu, 2006 L’Ayuntamientu de Bimenes ta acabante convocar el Concursu de Cuentos pola Oficialidá del Asturianu, qu’esti añu algama la so novena edición. La convocatoria del certame ta relacionada dende los sos oríxenes cola fiesta que conmemora el conceyu yerbatu la so declaración institucional pola reconocencia oficial de la llingua asturiana va diez años. Nes bases de la convocatoria especifícase que les obres presentaes tienen de tar redactaos en llingua asturiana y ser inéditos. El plazu pa la presentación de trabayos fina’l xueves 1 de xunu y los premios afitaos son de 800 euros pal primer premiu, 500 pal segundu y 350 pal terceru. L’actu institucional d’entrega de premios sedrá’l vienres 30 de xunu, coincidiendo coles cellebraciones de la Fiesta de la Oficialidá de la Llingua Asturiana. 15 de marzu, 2006 0 FacebookTwitterPinterestEmail
ConvocatoriesFiestes Cultura convoca les subvenciones a actividaes creatives y culturales en castellano by asturnet 10 de marzu, 2006 La Conseyería de Cultura publica esti viernes 10 nel BOPA la resolución y les bases pa solicitar subvenciones económiques destinaes a financiar actividaes creatives y de difusión cultural en llingua castellana. Les ayudes empobinaes a actividaes culturales n’asturiano o gallego-asturiano tienen una convocatoria específica que habrá conocese nos prósimos díes o nes prósimes selmanes. La convocatoria que publica el BOPA na so edición d’esti viernes diríxese a particulares o empreses pa la realización d’obres cinematográfiques o en video; actividaes escéniques pa grupos profesionales y pa non profesionales; actividaes d’asociaciones culturales; obres de creación lliteraria: y formación y promoción artístiques. 10 de marzu, 2006 0 FacebookTwitterPinterestEmail
ConvocatoriesFiestes L’asociación El Portón convoca’l so concursu de cuentos n’asturiano by asturnet 27 de febreru, 2006 L’asociación cultural El Portón, en collaboración col ensame xuvenil Tragaluz, convoca un premiu de narrativa en llingua asturiana empobináu a rapacinos y xóvenes. El certame, que cumple la so edición númberu trece ta estremáu en tres categoría: una dedicada a escolinos de Primaria, la segunda a alumnos de Secundaria y una tercera abierta a mozos y moces de diecinueve a trenta años. La primera de les categoríes tien una compensa de 72 euros en llibros pal primer premiu y 36 pal segundu; la categoría empobinada pa estudiantes de Secundaria ta valorada con 150 euros en llibros pal primer premiu y 90 pal segundu; los premios destinaos a xóvenes de diecinueve a trenta años son de 210 euros pal primeru y de ciento venti euros pal segundu. El plazu de recepción d’orixinales pieslla’l prósimu 24 d’abril y les obres han unviase a l’asociación cultural El Portón, apartáu postal 140 d’Uviéu. 27 de febreru, 2006 0 FacebookTwitterPinterestEmail
ConvocatoriesFiestes Izquierda Xunida de Siero convoca un premiu lliterariu n’asturianu by asturnet 23 de xineru, 2006 L’agrupación local d’Izquierda Xunida de Siero acaba de convocar el primer concursu de relatos curtios “Valentín Palacio” que ta dotáu con seiscientos euros y va empobináu a premiar narraciones alrodiu d’asuntos sociales o políticos. Nel certame convocáu por IU de Siero puen participar tolos autores que quieran facelo, con una o más obres escrites en castellanu o asturianu. Los rellatos tienen que ser orixinales ya inéditos y el tema debe tar rellacionaú con aspéutos sociales o políticos y el llargor de les obres nun podrá ser de más de dos fueyes DIN A4 mecanografiaes per una sola cara. El plazu de presentación de los rellatos fina’l 15 de marzu de 2006 y los testos habrán unviase a Izquierda Xunida de Siero. Plaza Les Campes, 19 – baxu. 33510 La Pola Siero. El fallu va facese públicu’l prósimu 14 d’Abril, Día de la República. 23 de xineru, 2006 0 FacebookTwitterPinterestEmail
Fiestes Hevia sustitúi a Melendi na folixa de fin d’añu de Telecinco n’Uviéu by asturnet 29 d'avientu, 2005 El gaiteru José Ángel Hevia va sustituir a la fin a Melendi nel conciertu col que Telecinco va retresmitir el fin d’añu dende Uviéu. Los periodistes Antonio Lobato y Carmen Alcaide van encargase de conducir la folixa de les campanaes de nuechevieya dende la Plaza del Ayuntamientu carbayón, un sitiu onde hai convocada una protesta ciudadana pola oficialidá a la mesma hora de la retresmisión televisiva. Hevia cola so banda avezada va ser el protagonista del conciertu de la Plaza l’Ayuntamientu tres l’anunciu de la caída de Melendi del cartelu. L’actuación del gaiteru maliayés ta prevista pa les 23.30, la mesma hora pa la que delles convocatories anónimes piden a los ciudadanos qu’acudan al sitiu de la retresmisión p’amosar pancartes, cartelos y enseñes reivindicatives en defensa de la llingua asturiana. 29 d'avientu, 2005 0 FacebookTwitterPinterestEmail
ConvocatoriesFiestes Caltiense abiertu el plazu pa los concursos de creación ya investigación de l’Academia by asturnet 22 d'avientu, 2005 L’Academia de la Llingua Asturiana caltién abiertu hasta’l prósimu 15 de xineru de 2006 el plazu d’acoyida d’orixinales pa los diversos concursos de creación ya investigación que convocó en mayu d’esti añu. El meyor dotáu económicamente ye’l premiu de cortometraxes, con 1.200 euros. Los trabayos ganadores d’otres categoríes van recibir diverses compenses económiques amás de la posibilidá de publicación. Na estaya d’investigación tán convocaos un concursu de recoyida de material toponímico oral, ensin asoleyar, quabarque la totalidá duna parroquia, grupu de parroquies o Conceyu, siguiendol modelu afitáu na coleición «Toponimia» asoleyada pola Academia y otru pa recoyida oral de léxicu asturianu ensin asoleyar, dotaos entrambos con 600 euros.Dotáu cola mesma cantidá hai otru premiu pa trabayos dinvestigación llingüística ensin asoleyar que tenga aspeutos llingüísticos o sociollingüísticos dAsturies como oxetu destudiu, dende una perspeutiva sincrónica o diacrónica. El trabayu pue cincar aspeutos xenerales o específicos. Tamién un trabayu dinvestigación sobre lliteratura asturiana (oral o escrita). Tocante a la estaya lliteraria tán dientro la convocatoria fecha pola Academia en mayu de 2005 les categoríes de Llectures pa rapazos, Teatru, Creación Lliteraria ‘Llorenzo Novo Mier’, Recoyida de Material Lliterario Escrito ‘Federico Fierro-Botas’ y Recoyida de Material Lliterario Oral, toos ellos dotaos con 600 euros, a nun ser el premiu de recoyida de material oral que lo ta con 300. El premiu de curtios cinematográficos ta dotáu con 1.200 euros y empobínase a trabayos presentaos en formatu DVD que qua xuiciu del xuráu tenga más valir llingüísticu, teniendo siempre en cuenta, amás la calidá artística de los cortometraxes presentaos. Les bases completes de la convocatoria del 04/05/05 pueden consultase na páxina institucional de l’Academia de la Llingua. Bases de los concursos de l’Academia de la Llingua 2006 22 d'avientu, 2005 0 FacebookTwitterPinterestEmail
ConvocatoriesFiestes El Conceyu de Siero convoca una plaza de responsable de Política Llingüística by asturnet 5 d'avientu, 2005 L’Ayuntamientu de Siero acaba de publicar oficialmente les bases pa la convocatoria d’una plaza de responsable del Serviciu de Normalizacion Llingüística. El puestu ye de calter temporal con posibilidá de que se convierta en permanente a la fin del contratu y los candidatos han tener el títulu d’Espertu o Especialista en Filoloxía Asturiana. Los candidatos tamién pueden concurrir col títulu de Llingua Asturiana pa Enseñantes de la Conseyería de Cultura o los tres cursos de l’Academia de la Llingua. Nes bases especifícase que les funciones del futuru responsable de Normalización Llingüística de Siero van ser, ente otres, la traducción de los testos administrativos y propuestes polítiques al asturiano, asina como desarrollar actividaes de normalización llingüística nel ámbitu del conceyu. El calter temporal de la plaza ta condicionáu pola financiación de la Oficina de Política Llingüística del Principáu y nel casu de qu’a la fin del contratu, s’entamare la provisión del puestu con calter permanente, había tar supeditáu a condicionada “a la efectiva esistencia de créitu presupuestariu pa facer frente a les obligaciones que del mesmo se derivaren”. Les bases pueden consultase nel BOPA correspondiente al 03/12/2005 o nel tablón d’anuncies del Conceyu de Siero. 5 d'avientu, 2005 0 FacebookTwitterPinterestEmail