Fiestes

Los conciertos de la nueche folk de Llastres, qu’abren los XI Alcuentros cola Cultura Tradicional d’Asturies de Colunga, van tar dedicaos nesta nueva edición a los músicos Ígor Medio y Carlos Redondo, miembros del grupu asturianu Felpeyu que morrieron nun accidente de tráficu’l pasáu 24 de xunu. Los uviedinos ‘Na Zona’ y los escoceses ‘Macfeck’ sedrán los encargaos d’empezar la nueche folk llastrina con un conciertu que va tener llugar mañana a les once la nueche nel puertu de la villa.

Otra de les atracciones de los XI Alcuentros cola Cultura Tradicional de Colunga sedrá’l Mercáu Tradicional que se va celebrar na plaza del Ayuntamientu ente los díes 22 y 23 d’esti mes. Esti segundu mercáu colungues va cuntar col doble d’artesanos que na pasada edición, cuntando con talleres en vivo pal deprendientu d’estos antiguos oficios asturianos.

La compañía de teatru asturianu ‘Nun Tris’ va estrenar con motivu d’estos Alcuentros la so obra ‘La vixigona nun tien remediu’, mentes que l’artesanu Miguel Alonso Cachafeiro fadrá un taller de gaites en vivo. El programa tamien inclúi’l I Certame de pintura al aire llibre de Llastres, el V Taller de repostería tradicional, asina como una charra-coloquiu sobre ‘La bruxería na sociedá tradicional asturiana’.

El martes día 25 de xunetu, el músicu Dani García de la Cuesta va ser l’encargáu d’echar el pieslle a los Alcuentros con un conciertu de presentación del so llibru ‘La bandurria y el rabel n’Asturies’.

El profesor y escritor Xulio Vixil Castañón va ser l’encargáu de pregonar la Fiesta de la Oficialidá del conceyu de Bimenes qu’esti cumple la so decima edición cola entrega de so popular concursu de relatos n’asturianu, asina como con abondes actividaes ente les que destaquen la presentación d’Alonsomanía, de Cellero’l monologuista, una proyección de curtiometraxes en llingua asturiana, asina como un conciertu nel que van participar les bandes Xera, Stukas y DJ – J15.

El conceyu de Bimenes celebra estos díes la decima edición de la so fiesta pola Oficialidá de la Llingua Asturiana, anque dende’l miercoles día 21 yá yá puede vese na Casa la Cultura de Santuyano la esposición de semeyes y poemes del escritor Xose Ramón Martín Ardines titulada ‘De la gloria les ruines’.

Güei va ser el grupu Telón de Fondo quien, a la mesma hora, represente la obra ‘Antón, el cantu’l cisne’, mentes que mañana va facese entrega del IX Concursu de Cuentos pola Oficialidá pa depues dar pasu a la representación de la obra Alonsomanía, de Cellero’l monologuista.

Sin embargu, el día grande la fiesta sedrá’l sábadu 1 de xunetu nel que l’escritor y profesor Xulio Vixil Castañón va ser l’encargáu de dar el pregón y na que se dará una misa oficiada n’asturianu por Jose Manuel García de Jesús. Como yá ye tradicional, acabante la misa van actuar los grupos s folklóricos Los Yerbatos (Bimenes), Os Pauliteiros (Miranda del Douro) y Aires de Asturias (Xixón – Villaviciosa).

Tres de la xinta popular a base de fabes y arroz con llechi, los cantantes Liliana Castañón, Jorge Tuya y Mª Luz Cristobal Caunedo fadrán amuesa de la canción asturiana, mentes que la nueche va correr a cargu de los grupos Xera, Stukas y DJ-J15.

Esta nueche, el chigre de la Xunta pola Defensa de la Llingua Asturiana, va celebrar la so fiesta de primer aniversariu con un actu que va escomencipiar a les diez de la nueche con una llectura de poemes a cargu de los poetes Lourdes Álvarez y Pablo Texón, y al que van siguir les actuaciones de tonada y gaita con Queipo y Llorián. La fiesta piesllaráse cola actuación del músicu Hector Braga.

Esti mes cúmplese un añu desque la Xunta pola Denfesa de la Llingua Asturiana abriere un chigre col nome de La Casa Posafuelles, col que buscaba’l caltenimientu de la vida uvieína de la vida tradicional, xuncíu a la reivindicación de la normalización social de la llingua asturiana. Na vida diaria d’esti establecimientu, les actividaes culturales asturianes son parte fundamental, como amuesa’l fechu de que na so fiesta d’aniversariu participen mesmo escritores que cantantes y músicos.

El grupu asturianu Dixebra va ser l’encargáu d’encender la nueche de San Xuan nel conceyu de Nava. El prósimu día 23 de xunu, a les doce la nueche, los alumnos de la Escuela de Folclore de Zamora y la Banda de gaites La Raitana van dar pasu al grupu avilesín col que Nava quemará’l primer día d’unes fiestes que se van allargar hasta’l domingu 25de xunu.

El sábadu a les cinco la tarde, na Bolera del Titi, va tener llugar el concursu de Bolos ‘Comarca la sidra’ tres del qu’habrá un desfile de carroces. A les siete la tarde, la Banda de Gaites de Villaviciosa abrirá un conciertu nel que tamien van actuar los alumnos de la Escuela de Folclore de Zamora, la Bande de gaites Noega, el Ranchu Folclóricu de Mogadouro (Portugal), la Banda de gaites Llariegu, la Banda de gaites Catroberigum d’El Biernu, l’Asociación folclórica Los Yerbatos de Bimenes y la Banda de Gaites La Raitana. Pa zarrar la nueche del sábadu va celebrase una tradicional verbena popular a cargu de la orquesta Super Estrellas.

El domingu 25 de xunu, volverá haber una gran verbena popular na plaza Manuel Uría colos músicos de la Orquesta Cañón.

El director tecnicu de la Sociedá Uvieína de Festeyos, Javier Batalla, anunció que la nueche de San Xuan uvieína, que se va celebrar el prósimu día 23 na plaza la Catedral, “va dar una importancia especial al folk y el baille tradicional que sonarán alredor de la foguera”. El gaiteru Xuacu Amieva presentará esa nueche’l so últimu trabayu discográficu, arrodiáu de dalgunos amigos y músicos d’excepción, como Ramón Prada, Sergio Fernández, Jorge García, les pandereteres de Dulcamara y les bandes de gaites El Llacín y Naranco, ente otros.

Javier Batalla presentó ayeri’l programa de les fiestes del Día de San Xuan qu’empezará a les ocho y media la tarde cola actuación de grupos folclóricos peles places más centriques d’Uvieu, pa dar pasau, a l’actuación del gaiteru finalista del Remis Ovalle, asina como al espectáculu ‘Para una noche de San Juan’ del grupu de Teatru Margen. Pero la cita más destacada del San Xuan d’Uvieu va tener llugar, sin duda, a les once y cuartu la nueche cola actuación del gaiteru Xuacu Amieva “que diseñó un espectáculu especial pa esta cita”.

Nesti conciertu de presentación del so últimu trabayu, xunto a Amieva van actuar les bandes de gaites El Llacín y Naranco, el grupu de danza Andrea Lebeña, los cantantes de Flor d’Agua, les pandereteres Dulcamara, el guitarrista Jorge García, el percusionista Sergio Fernández, asina como’l teclista y compositor Ramón Prada.

El grupu Trasgu, Filandón, Noceu de Trubia y San Antonio de Fitoria, siguirán la fiesta pasada la media nueche.

Tolivia celebra esta fin de selmana la II edición del so Mercáu Tradicional onde, amás d’artesanos, música, teatru y actividaes deportives, van tener llugar los primeros “Alcuentros na caleya” que van axuntar a varios profesionales ente tres charres dedicaes a analizar les alternatives posibles pal desarrollu rural, la situación del asturianu anguaño y la denominación d’orixen de la sidra.

Cuasi cincuenta puestos de productos típicos, un concursu de gaita infantil, una exhibición de deportes rurales pensada nos más pequeños, una amuesa de bailles de país per parte de la xente de Tolivia y de l’Agrupación Reija de La Felguera, son dalgunes de les actividaes d’esti mercáu que cunta con un presupuestu de 5500 euros.

Esti añu, el Mercáu Tradicional cunta amás cola novedá de la celebración de los primeros Alcuentros na caleya. Unes charres nes que se va analizar la situación del asturianu anguaño, la denominación d’orixen de la sidra, asina como les alternatives al desarrollu rural.

L’asociación cultural El Cascayu, organizadora de la fiesta, tien arreglao un aparcaderu a la entrada del pueblu espresamente pa esti actu, asina como autobuses gratuitos ente La Pola Llaviana y Tolivia.

La nueche de San Xuan na playa de Poniente ye la cita más esperada d’esta temporada yá que, amás de ser una fecha máxica, marca l’empiezu les fiestes de branu en Xixón. Lliberdón va ser l’encargáu de poner música al comienzu d’un estívu que na ciudá xixonesa tien una programación cargada de representaciones y conciertos, como los que traerán a grupos como Pereza, El Arrebato, Carlos Jean, Alejandro Fernández, Niña Pastor, y representaciones teatrales de pretixu como les dirixíes por Jose Sámano, Antonia San Juan o Albert Boadella.

Grupos asturianos como La Bandina, qu’actuará’l prósimu 2 d’agostu na Plaza Mayor, Avalanch, Tina Gutierrez, o’l Coru Mineru de Turón, tocarán esti branu en Xixón, compartiendo escenarios con formaciones como The Lewis Express, con interpretes versátiles como Carlos Jean, Paco Ibáñez, La Niña Pastori y el mexicanu Alejandro Fernández, o cantantes de moda como ye’l casu d’El Arrebato, Coti, El Canto del Loco o Chambao.

La danza irlandesa y la música celta vivirán una nueche especial el 13 d’agostu col espectáculu Spirit of the Dance, que llega reconocíu por más de quince galardones de calter internacional.

No tocante a la estaya teatral, la temporada estival nel Teatru Xovellanos empieza cola representación d’El cartero de Neruda, d’Antonio Skármeta, dirixida pol prestixosu Jose Sámano. A lo llargo de la temporada, pelos escenarios del veteranu teatru de Xixón van desfilar Antonia San Juan, monologando Las que faltaban, La Fura dels Baus, pa metamorfosear a Kafka, mentes que Julio Boca presentará la versión en danza d’El Quijote y los populares Els Joglars d’Albert Boadella podrán al públicu xixones En un lugar de Manhattan.