Fiestes

Esti vienres celébrase la xornada cimera de los festexos de San Timoteo en L.luarca cola participación de delles bandes de gaites peles cais de la Vil.la dende les ocho la mañana.

Van participar les bandes de gaites «Aires» de Valdés, «Os Carcaixas» de Lalín, «La Reina del Truébano» de Navia, «Follas novas» de Ribadeo y «Villa de Avilés.

La Selmana Negra de Xixón entama esti vienres con un piñu actividaes, que siguen esti sábadu dende pela mañana con xuegos de rol organizaos por Asturcón, a partir de les 11.

Esti sábadu tamién pero dende ñes 17 a les 18 hores va desendolcase la tertulia “Los monstruos”, que moderada por Jorge Iván Argiz va cuntar cola participación de Fernando Marías, Miguel Cane, Rodolfo Martínez, Eduardo Angulo, Daniel Mares, Elia Barceló, Juan Miguel Aguilera, Rafael Marín, Manel Loureiro, Victor Conde, Marc R. Soto, Federico Fernández Giordano, Manuel Nonídez y Cristina Macía.

A partir de les seis de la tarde, na carpa d’alcuentru, van presentase los llibros “El abismo en el espejo”, de Rodolfo Martínez; “Cordeluna” y “Futuros Peligrosos”, d’Elia Barceló; “El libro de Nobac”, de Federico Fernández Giordano, Premiu Minotauro; y “El pescador de demonios”, de Steve Redwood.

Al tiempu, l’Espaciu AQ va acoyer les presentaciones de les obres “El arte de Canción de hielo y fuego”; “Monstruos”, d’Eduardo Angulo; y «El dios de los Mutilados», de Claudio Cerdán.

Dende esti xueves 10 de xunetui y hasta’l domingu 13, Nava va exercer de capital de la Sidra asturiana con un programa de Fiestes nel que la sidra y la cultura tradicional son protagonistes.

Esti xueves, dende les 18 hores celébras ena bolera del Muséu de la Sidra’l Primer Tornéu de Bolos del Festival, con una exhibición de seniors contra promeses y a les 19 hores entamará tamién nel Muséu la cata de preselección de la MEYOR SIDRA NATURAL D’ASTURIES Y DE NAVA.

Dende les 21 hores podrá seguise la Primer MUESTRA DE CANCIONES DE CHIGRE del Festival de la Sidra nes sidreríes Casa Mino, Sidreria Prida, Sidreria La Barraca, Sidreria Villa de Nava, Sidreria La Figar, Sidreria Viuda de Angelón y Sidreria Plaza.

El programa pa tol fin de semana pue consultase na web del Festival: http://www.ayto-nava.es/festivalsidra2008.php.

Web del Festival

L’Agrupación de Xixón del Partíu Asturianista (PAS) “anima” a les sociedaes y comisiones organizaores de festexos y fiestes de Xixón a usar l’asturianu nos programes, y cartelos de les fiestes, “pa promocionar d’esta manera la llingua asturiana”.

Tamién afala’l PAS a éstes a introducir nos programes festivos de les parroquies “actividaes que tengan dalguna rellación cola cultura asturiana, o coles costumes típiques de los pueblos d’Asturies: como xuegos tradicionales o actividades d’otru tipu como construcción de paxos, madreñes, música asturiana…”.

Esti xueves día 3, a les 20’30 hores tuvo llugar la representación de la obra “País, una traxicomedia asturiana”, de Dolfo Camilo Díaz, a cargu del grupu Teatru Casona, cola qu’entamó la programación de la XII Fiesta de la Oficialidá de Bimenes que tien el so cumal el domingu na capital del conceyu.

Nesti vienres 4 de xunetu a les 19’45 hores van entregase los premios del XI Concursu de Cuentos pola Oficialidá del Asturianu. Darréu, a les 20’30 hores, va ser el momentu pal monologuismu, cola representación de los monólogos “Asturianos al volante” y “Les vacaciones”, d’Isaac de l’Arada ya Inaciu Galán , a cargu de Lluis Antón González, de Xareos!.

El sabadu 5 de xunetu va ser el día grande. Nel prau de la fiesta (Xenra) y a les 11’00 hores. Va abrise la VI Feria d’Artesanía y Mercáu de Productos Agroalimentarios. A les 12’00 hores va ser el pasacais de los grupos folklóricos Los Yerbatos (Bimenes) y Os Pauliterios de Constantin, de Miranda del Douro, hasta la Casona de los Careaga.

La Casona de los Careaga va acoyer a les 12’30 hores el pregón, a cargu de Xuan Xosé Mariño, fundador y direutor de Radio Sele. A la una la tarde va haber misa n’asturianu, cantada por El Corriellu la Pandorga nel prau de la fiesta.

A les 13’30 hores va facese la Puya’l ramu, cola collaboración de la Sociedá de Feries y Fiestes “Nuestra Señora del Rosario” de Santuyano.

A les 13’45 hores van actuar Los Yerbatos (Bimenes) y Os Pauliterios de Constantin (Miranda del Douro). Darréu, a les 14’30 hores, va celebrase una Xinta popular con Bollu preñáu, empanada, casadiella y arroz con lleche.

De tarde, ente les cuatro y les seis, va haber un taller de manualidaes pa neños, a cargu de l’Asociación Sociocultural Afayáivos. Yá a les seis, va celebrase’l IX Concursu de Gaiteros y Gaiteres Mozos y a les 19’30 hores, una amosanza d’entibadores mineros, a cargu del Club Deportivu d’Entibadores del Caudal.

Les fiestes van pesllase a partir de les once la nueche con un conciertu nel que van actuar “La Bandina” y “DJ – J15”.

Programa completu de la Fiesta

Un añu más los vecinos de Porciles (Piloña) xubieron el ramu de San Xuan al cumal de La Picoreta, cumpliendo un ritu que mos llega dende los más fondo los tiempos. Xente mozo (falando, por cierto, un asturianu perguapu), fizo xunto a los más vieyos del pueblu’l trabayu duru y foron a llantar y perafitar la bedul nel so pozu hasta l’añu viniente. Una borrina atapecida dexó a toos con una bona pulpera, pero eso nun-y importa a los que nun dexen de cumplir cola tradición faiga’l tiempu que faiga.

Yá van dos años qu’un garapiellu xente amante de les tradiciones xube colos vecinos y nun sólo por face-yos compaña, sinon pa compartir una tradición que conozse bien poco nel restu d’Asturies. De la que baxen del monte, xúntense toos a cellebrar una pequeña espicha nun solhorru de la Vega la Fonte. Esti añu participó xente foriato de países bien alloñaos de nós, como Australia (4), Nueva Zelanda (1) y los Estaos Xuníos (1).

Xixón celebra güei les fiestes de San Xuan con dellos actos que van desenrrollase a lo llargo de tol día na villa de Xovellanos. A les nueve la nueche, va facese’l tradicional enramáu de la fonte de Pelayo, na Plaza’l Marqués, a les diez van celebrase dos pasacais, unu de la Banda de Gaites “Villa de Xixón” y otru de “Noega”. A les once la nueche y na Playa de Poniente, va ser el momentu más importante del día, cuando se prendan les más de cincuenta tonelaes de la Foguera y se pueda disfrutar de l’actuación d’Anabel Santiago.

L’enramáu de la fonte de Pelayo va tar a cargu d’Andecha de Cultura Tradicional na Señardá. Los pasacais van salir dende la plaza Mayor, llegando hasta la playa de Poniente pela cai de Rodríguez Sampedro, nel casu de la banda “Villa de Xixón” y dende la plaza del Seis d’Agostu desplazándose tamién hasta Poniente, nel casu de Noega.

Alredor de la foguera, los xixoneses van baillar la danza prima embaxo un espectáculu pirotécnicu y darréu de la mesma, va siguir sonando la voz d’Anabel Santiago, que va dar fin a la nueche de pasu al branu na ciudá de Xixón.

El xueves pasáu, fízose la fiesta del tercer aniversariu del chigre de la Xunta pola Defensa de la Llingua Asturiana, La Casa Posafuelles. El chigre ta asitiáu na Cuesta la Vega d’Uviéu y abrióse dempués del pieslle del Chigre Naranco, que la Xunta tenía nun llocal cercanu a la catedral.

El xueves, entamó la folixa cola actuación del monologuista Carlos Alba “Cellero”. La xente disfrutó del personaxe nuevu, “El Pola”, que cuntó les sos “Memories d’un Quinqui”. Depués vieno la música pa baillar cola Bandina’l Tombo, “animando a la parroquia colos sos temes”, según cuenten dende la XPDLA. De siguío, empezó la sesión de música folk que yá ye vezu tolos xueves.

Nesti momentu de reforma del Estatutu, declaren dende la organización, “el chigre de la Xunta va siguir siendo un espaciu pa la reivindicación y normalización llingüística al empar que ye un llocal abiertu a tola xente que quiera pasar”.

El Conceyu de Nava celebra San Xuan con un concursu d’enramáu de fontes pela tarde. Un desfiles de carroces a les 19 hores, tamién con premios. Y una entrega de premios, con folixa, que va entamar a les once la nueche n’El Campu Grandiella, onde a medianueche va encendese la foguera y va poder sentise al «Grupo Biorritmos» y a un Dj.

La nueche de San Xuan va arrancar en Llaviana cola actuación, na plaza del Ayuntamientu, de la orquesta «Charol». A les once menos cuartu habrá un pase de mariachis, hasta una hora dempués, cuando la banda de gaites «El Texu» de Villoria conduza a la xente nun pasacais hasta’l recintu del mercáu de ganáu, onde va prendese la foguera, pa baillar alredor y sentir los soner d’una orquesta.